Tweet
الأول سلام عليكم و كل سنة و انتو طيبين يا جماعة و ياريت مش عاوز حد يزعل من الفقرة الجيا ديه او يضايق من كتر كلامى لأنى حاسس دلوقتى انى فى لحظات تجلى و الوحى هبط عليا أهو :D, غير ممكن تلاقوا الصيام مأثر حبتين ثلاثة.
قبل متكلم فى النقط العاوز اتكلم فيها, عاوز أقول و من غير تحديد لأسامى أو افراد, فالموضوع قلب أطفالى جدا, انا من كتر التعليقات مركزتش فى أسماء, بس لما تقرأ الموضوع لأول مرة تحس انه قلب طفولى و كل واحد بيدافع عن اللعبة بتاعتو.
أولا: شكرا لصاحب الموضوع, على شجاعته أولا :D فى مقارنة الالنترا بالهوندا (طبعا بهزر), و على التزامه الحيادية من وجهة نظره. و ديه نقطة لازم نقف عندها شوية "وجهة نظره".
وجهة نظر:
الراجل لما عمل المقارنة و ساق العربيتين, مقالش انه سائق محترف مسجل او يعمل فى برنامج TOP Gear مثلا, و مع احترامى لجميع الأخوة هنا مفيش حد متهيألى معاه شهادة رسمية أو دخل برنامج تدريبى محترف و خد شهادة بده فى فنون القيادةو تقييم السيارات. يبقى اليفرق ما بينا جميعا هوا شهية البعض الزيادة فى القراءة او متابعة المستجدات فى عالم السيارات و ما جمعه أو توافر له من قيادة و تجربة او امتلاك المزيد من السيارات, و ده معناه ان كل واحد فينا بيحكم من واقع خبرته و تجربته و ما قرأه و فى الأخر معظمها بنود تقع تحت جملة "وجهة نظر". و بردو خلينا متفقين ان مقدمين برنامج توب جير نفسهم او غيرهم من المقيمين المحترفين كثيرا ما يختلفوا فى ما بينهم فى تقييم انواع السيارات او تفضيل بعضها عن البعض الأخر.
دلوقتى أعتقد اننا متفقين ان لولا اختلاف الأذواق لبارت السلع, و خصوصا فى بلدنا ديه فى اختلاف كبير جدا فى الفصائل الاجتماعية و الثقافية و الاقتصادية و الجغرافية حتى, يعنى مثلا الفى بورسعيد ممكن يشوفه سلعة ممتازة أو السيارة المثالية, تلاقي نفس السلعة او السيارة متكولش عيش فى سوهاج أو قنا مثلا, و بالتالى كل واحد بيشوف فى السياره احتياجته هو الخاصة و ما تعطيه من قيمة مقابل السعر (value for money) من وجهة نظره, و الأغرب انك هتلاقى ان معايير التقييم ديه هتختلف من وجهة نظر الشخص نفسه كلما تقدم به العمر و زادت خبراته و اختيراته و حالته المادية.
يعنى مثلا فى يوم من الأيام (و أنا فى الجامعة مثلا) كانت اقصى طموحاتى تغيير سيارتى بلانوس أو نوبيرا, لاكن تجرى الأيام و لو اتعرضت عليا الأفيو أو الأوبترا فى الوقت الحالى مثلا ممكن مقتنعش بيهم اساسا (مع احترامى لكل السيارات و مالكيها), و ممكن اقتنع بيهم بعد سنتين من دلوقتى باختلاف التجارب البمر بيها و ظروفى المادية. و أبسط حاجة من سنتين كان معايا عربية بورا و كنت مقتنع بيها تمام الاقتناع, و عملت حادثة توتال لوس و قعدت فترة زمنية اتمنى بس امتلاكها تانى, و تدور الأيام و الحمد لله ربنا كرمنى و اشترتها تانى و بحالة افضل بكتير من العربية الكانت معايا زمان بس "و حط تحت بس الف خط" اقتناعى بيها قل و ده مش لحاجة فى العربية و لكن لأن سقف طلباتى أو توقعاتى زاد, يعنى اساسا كنت بدور على بى ام E46, او اوكتافيا 5 او جيتا أو سيفيك, بس لما لقيت البورا بالحالة اللقيتها ضعفت و اشتريتها من حبى فيها لكن بعد ما سقف خبراتى و تجاربى و احتياجاتى زاد.
و هنا بيحصل الاختلاف ما بينا فكل واحد فينا بيركز فى نقط معينة او بيفضل نقط معينة, فيحصل زى صدمة لما يلاقى واحد بيتكلم عن اتساع فتحة الباب و راحة الكرسى مثلا و صوت تزييق المرايات, و مش مركز فى فرق السحب أو الثبات الفظيع (من وجهة نظرك انتا) و ال لا يمثل اختلاف كبير بالنسبة لاحتيجاته, لكن فى نفس الوقت انتا مش هتقدر تتخيل قد ايه مثلا يفرق معاه هو صوت المرايات او اتساع فتحة الباب او راحة الكرسى, لان احتياجاته بتفرق تماما عن احتياجتك انتا و نظرته و تقييمه للسيارة مختلف مثلا تماما عنك, و فى الأخر اتفقنا ان ده منتدى سيارات و كل واحد من حق كل واحد يعرض وجهة نظره, فلا تتريق او تستهجن وجهة نظر حد فى الأمور لأن انتا نفسك ممكن تلاقى نفسك بعد 3 او 4 سنين بتقيم الأمور أو السيارات زى ما هوا بيبصلها و بيحسبها بضبط دلوقتى, وان كان ده ميمنعكش طبعا من مناقشته و توضيح الأمور من وجهة نظرك بدون الهجوم او التطاول على رأيه.
و مثلا السيفيك كانت بالنسبة لى شكلها تحفة و لا تقارن و لو معايا فلوسها مش هينفع اسيبها (الكلام ده من سنتين ثلاثة مثلا), دلوقتى رغم احتفاظى باعجابى بها بس مش بنفس القوة او التشدد, يعنى كان معايا فلوسها مستعمل و كنت بدور عليها بالفعل من 7 شهور بس جيت فى الأخر و ضعفت قدام البورا و فرق السعر البينهم خلانى اقرر اشترى البورا و قلت أنا اولى بالفلوس و هى ديه حسبة ال "Value for money" يعنى حسبتى ساعتها لفرق الفلوس الهدفعه ما بين سعر السياراتين لا يوازى القيمة الاضافية السيفيك ممكن تدهولى مثلا فاخترت البورا و ممكن كمات ست شهور لو اتحطيت فى نفس الموقف اختار السيفيك أو اغير و اروح لحاجة تانية خالص. كمان لما السيفيك بتقف جنب الالنترا بشوف الالنترا احلى من الشكل الخارجى و شكلها امتن (ديه وجهة نظر), و كما لم اقود السيارتين بفاعليه عشان احكم, ممكن ساعتها اغير وجهة نظرى تانى بسبب قوة موتور السيفيك مثلا او ثباتها, و ممكن لو قعدت بكل سيارة مثلا شوية اغير وجهة نظرى ثالث مرة لسبب بسيط جدا لم يتضح ليه فى التجربة العادية زى لو حسيت ان العزل فى الالنترا أقوى او لا اتعايش من وطى السيفيك و حكها فى بعض المطبات و الوطى ده هو هو السبب اليخلى واحد تانى يشترى السيفيك مخصوص و هكذا.......
و معلش لو صدعتكم, ديه بردو وجهة نظرى و انتا ببساطة كان ممكن تختار انك متقرهاش و شكرا يا جماعة ,و برجاء الهدوء و الاحترام فى مناقشة وجهات نظرنا و تقييمنا للأمور. و شكرا.
Comment