بـروتـوكـولات سـواقـيـن مصـريـيـن !!!

[3ateef]

+1111111111111111

[Imhotep]

هههههههه..... دى و لا بروتوكولات حكماء صهيون

[د.محمود صلاح]

الشعب الوحيد اللي له قوانين مرور لوحده وبنودها مذكورة بحذافيرها في مشاركتك الرائعة

[powerofhelll]

اكيد انتوا بتتكلموا عن امريكا \\\\\\ وعجبي

[م/مصطفى محمود]

موضوع مُميز فعلا ، وعلى فكرة هو مُفيد جدا بجد

لأنه بيوضح القوانين من ناحية مشاكل عدم تطبيقها

يعنى فعلا الواحد بيستفيد من المواضيع دى

[dr.nemo]

موضوع رائع زي بقية مواضيعك يا أحمد
وجاء على الجرح فعلاً

وعاوز اضيف كمان
لو مفيش عسكري مرور يبقى الاشارة ملهاش لازمة الافضلية لك دائما حتى لو الاشارة حمراء
اللي يقف في الاشارة بدون العسكري اكيد عنده حالة نفسية

الاشارة ومطالع ومنازل الكباري معمولة علشان نزول وصعود الركاب وعلى الجميع احترام ذلك

لو لقيت حد بيعدي اليوترن وانت جاي من بعيد متهديش لكن شد لحسن يسبقك
ولو سبقك مترحموش من تقليب النور علشان يحرم يسبقك

[kalmah]

العربيات المانيوال مش عمليه نهائى فى مصر , تبقى سايق ومستعجل وبتشرب القهوه وبتدخن السيجاره وبتقرى الجرنان ويجيلك تليفون متعرفش ترد عليه علشان بتظبط اوبشن الكاسيت وعايز تجيب الرابع لحسن اللى بتشد معاه يطلع منك

--------------------------------------------
دي بصراحة اشدههمممممممممممم

[ابوهاشم]

يااااااااااااااااااااااااااه
الحمد لله انى اخيرا لقيت قاموس المصطلحات دى
صدقنى كنت بدور عليها من زمان
خصوصا انى اوقات كتير بحتاس مع سواقيبن كتير
على الطريق مش بعرف اتصرف معاهم
وكنت متأكد ان فيه قاموس او كتالوج الناس دى ماشيه بيه
غير اللى اتعلمناه وقواعد المرور والكلام اللى مش نافع ده
اشكرك يانوح باشا وطبعا هنستفيد بالبروتكول ده
لان ده اخر طبعه لبروتكولات السواقه
بس منتظرين منك النسخة الجديده من كيفية التعامل
مع سائقى الميكروباص

[tigernet]

العلاقه بين بعد الكرسى عن الدركسيون ونوم الظهر على الكنبه اللى ورا علاقه طرديه مع مهاراتك القياديه

انا بعمل كدة بس مش لدرجة النوم علشان رجلى طويلة و بتخبط فى الدواسات

[hanyetsh]

ههههههههههههههههههههه جامدة موت

[ahmedbasto]

ههههههههههههههه جامدين اووووووى

[Amr A.salam]

جامدة أوي يا أحمد باشا.....واختيارك لاسم الموضوع هايل

[O.M.S]

الله عليك يا هندسة يا جامد
دي الناس اللي تعجبني اللي فاهمين الشارع ماشي ازاي واكيييييييييد من سكان القاهرة
انا عندي شوية حاجات قديمة من زمان لقيتها عندي علي الجهاز قولت اشارك بيها

اولا :دستور المرور في القاهرة:
لو عربيتك قديمة او كبيرة استخدم المبدأ القائل: اللي خايف علي عربيته يوسع(ملحوظة :ابعد عن سكة العربيات المخرشمة بيسوقو بنظرية ضربو الاعور علي عينه)

نظرية البوز بيز booz bas اللي يدخل ببوز عربيته الاول هوا صاحب الحق في اولوية المرور ,احرص علي ان تكون صاحب اول بوز (ملحوظة لا تطبق البوز بيز مع الاوتوبيس او النقل حرصا على سلامة بوزك)

الاشارات تكشف نواياك للااعداء ,اياك ان تستخدمها

لا تترك مسافة لاامان بينك وبين السيارة التي امامك فهذا له عدة مخاطر :
اولا: عربية تانية هاتملا الفراغ اللي بينك وبين اللي قدامك , كل اللي كسبتة انك اتأخرت لورا شوية
ثانيا: تعطي فرصة للعيال يعملوا غرز قدامك
ثالثا: كل المشاة هيغمضوا عينهم ويعدوا من قدامك
رابعا: اللي وراك هايعد يزمر او تسمع شوية اسامي حيوانا لو كان سواق تاكسي مؤدب او هايخبطك من ورا لو كان سواق ميكرباص(و دول مافيش حد منهم مؤدب)

الاشارات مش معمولة عشان المرور دي معمولة عشان شكل القاهرة يبقى متحضر ,اعتمد على العساكر(مع تحملك لكامل المسئولية لو واحد منهم شاورلك تعدي وبلدياته الناحية التانية فتح الطريق لعربية لوري) او يفضل تستعمل نظرية البوز بيز , راجع قاعدة

اذا كنت مش واقف في الصف الاول في الاشارة اعمل حسابك تزمر بشكل هستيري و متواصل اول ما الاشارة تفتح لان الناس اللي واقفين قدام بيبقوا واقفين من زمان و جايز جدا يكونوا ناموا

معظم الحوادث تحدث في التقاطعات اول الاشارة ما تحمر, كل ما عديت الاشارة الحمرا اسرع كل ما قلت فرصة انك تتخبط

الشارع مكان مقرف ,سوق باسرع يا يمكن حتي تتخلص من هذا الهم , الناس اللي ماشين براحة دول مرضي نفسيين بيستمتعوا بالعذاب ,يستاهلو الي يجرالهم

من حقوقك الدستورية ان تركن امام باب المحل الذي تريد الشراء منه, اذا سبقك واحد ابن ستين في سبعين فمن حقك ان تركن صف تاني و تالت وتقفل عليه ومش مهم لو الشارع اتقفل , ايه يعني لما الناس تتعطل ربع ساعة ولا نص ساعة عشان حضرتك تتمتع بحقوقك الدستورية, هيا يعني الدنيا طارت ولا كان وراهم الديوان

من حقك ايضا ان تخرج من مكان انتظارك في وقت تشاء, اكسر الدريكسيون شمال واطلع , اي حد ماشي لازم يقف لك فورا, (راجع البند السابق)

احترس من 3 انواع من الاسائقين بيسوقوا واكنهم مش ممكن يموتوا ابدا
اولا : العيال الروشين اللي بيلعبوا computer games و فاكرين انهم ممكن يكسبو life زيادة لو ساقوا اسرع
ثانيا : بتوع الدليفري
ثالثا :سواقين الميكرباص
ملحوظة: اوعي تحاول تثبت لحد منهم انه غلط

لما تشوف حادثة لازم تهدي وتتفرج (مش مهم تساعد) الحاجات دي دمها اخف من الاخبار بتاعت التليفزيون وبعدين لما الطريق وراك يقف انتا كده بتحمي المجتمع من حادثة تانية

الكناسين لازم يحللوا القمة اللي بياكلوها , حاول تنفعهم وترمي اي حاجة من الشباك

لما تخلص السيجارة اوعي تحطها في الطفاية ارميها من الشباك اول ما تشوف موتوسيكل بيعدي من جنبك (عشان يحرم يعمل غرز)

[zaza_lanos]

اشى خيال يا ناس
اكنى قاعد فى الشارع والكلام ده امام عينى

[O.M.S]

شوية حاجات كمان
الحرب خدع, كل السائقين بيتوقعوا انك تعدي من علي شمالهم في الطريق الصحراوي , عدي انت من علي اليمين , امال الحتة المرصوفة بره الخط الاصفر معموله ليه!

تعريف الكلاكس :هو اله لتنبيه الناس انك تملك سيارة
اما جهاز الانذار فهو اله لتبيه الناس انك تملك سيارة تستحق السرقة

تستطيع ان تسير في الحارة اليمني علشان تدخل شارع شمال , لأن كل العبط اللي داخلين شمال بيقفوا في صف طويل علي الشمال , لف انتا من حواليه وعدي قبلهم

ودي شوية حاجات للمشاه لانك مش علطول راكب العربية اكيد بتنزل منها تشتري الخ
من حقك ات تعبر الشارع في اي وقت و من اي مكان

اذا كانت هناك سيارة قادمة اعمل نفسك مش واخد بالك وعدي براحتك خالص , ما تخفش هوا هايقف , هوا اهبل يدوسك و يودي نفسه في داهية

اياك ان تنظر نحو السيارات القادمة , اعبر الطريق وظهرك لها حتي لا يشك احد السائقين انك تراه و يحاول يخوفك عشان تقف انت

حتى لو شفته اوعي تخاف -خصوصا لو معاك بنت - تبقى راجل ملو هدومك و تخاف من حتة عربية , عرض قفاك وسيبه يتفلق

الرصيف ليس للمشاه بل لركن السيارات وفرشات الباعة الجائلين لذلك يحق للمشاة السير في وسط الشارع