مين فينا اللى غلطان (حوادث الأصطدام من الخلف)

[Amrrr]

الخلاصة
اللي ماشي ورا لو مركز + سايب مسافة الأمان !!! هيقف كويس ولو فقد شرط من دول تبقى غلطته
اسباب الوقوف كتييييييييييييييييرة اوي ومش هنقعد نشوف كل سبب دا وقف ليه ووقف يمين ولا شمال ولا عشان يلحق يوتيرن ولا حد بيعدي ولا ولا ولا ولا ولا

والدى دايما يقولى اعمل حساب غلط الغير وما تفرملش علشان اللى قدامك فرمل
انت تفرمل علشان انت متابع الطريق وشايف ان اللى قدامك هيفرمل وفعلا مش ببقى مرتبط باللى قدامى يعنى مش لازم الاقى الاستوب بتاع اللى قدامى نور علشان افرمل -ممكن افرمل قبل اللى قدامى ما يفرمل ولو ساتر عليا الطريق باخد وضع يكشفللى الطريق علشان ما اتفاجأش بحاجة

[kemoelord]

2


ميزه قاعدة الثانيتين ان المسافة بتزيد مع زيادة السرعة و بالتالى مسافة الامان بتزيد مع السرعة اوتوماتك... و انت عارف طبعا يا باشا ان وجود الabs من عدمة ملوش علاقة بقوة الفرامل





mmamdouh

مش المفروض يا باشا والي انا فاهمه مش عارف صح ولا غلط ان وجود ال abs بيزيد من قدرة السيارة على التوقف وفي مسافه اقل من سيارة لا يوجد بها abs خصوصا لو مدعم ب ebd ؟؟؟

[MMamdouh]

لا يا باشا الABS بيسمح ليك بالتوقف بامان لانة بيديك فرصة تحود العربية و انت دايس فرامل على الاخر... دة بيجى من ان الABS بيمنع انغلاق العجلات (الزحف) و بالتالى العربية حتستجيب لحركة الدركسيون مع الفرملة الشديدة

العربية اللى مفيهاش ABS مع الفرملة الشديدة حتزحف و حتمشى فى خط مستقيم بغض النظر انت بتعمل ايه فى الدركسيون و دة خطر

قوة الفرامل و طول مسافة التوقف بتعتمد على قوة تماسك الكاوتش مع الطريق و حجم التيل و الطنابير و الماستر العمومى للفرامل

MMamdouh

[Hondawy_2008]

الموضوع مش عافية و سبق ووضحنا ان مفيش حاجة اسمها اللى ورا غلطان لمجرد ان هو اللى ورا... يعنى لو انا ماشى على الدائرى و رحت رازع فرامل مرة واحدة و اللى ورايا لبس فيا (بفرض انه كان سايب مسافة الامان الصح) يبقى هو اللى غلطان؟؟؟

mmamdouh

آه لو سيادتك ماشي على الدائري و كبست فرامل مرة واحدة يبقى اللي ورا غلطان و حمار كمان علشان لازق فيك و مش سايب مسافة تسمحله بالوقوف حضرتك ده قانون عالمي مفيش فيه جدل

[fadod]

الموضوع مش عافية و سبق ووضحنا ان مفيش حاجة اسمها اللى ورا غلطان لمجرد ان هو اللى ورا... يعنى لو انا ماشى على الدائرى و رحت رازع فرامل مرة واحدة و اللى ورايا لبس فيا (بفرض انه كان سايب مسافة الامان الصح) يبقى هو اللى غلطان؟؟؟



انت اساسا رديت على كلامك و اثبت انة غلط

the number one accident cause is following close

معنى كدة ان المشكلة فى اللى مش بيسيب مسافة امان... طيب و اللى سايب مسافة امان... يبقى غلطان ازاى؟؟؟؟؟؟؟؟؟؟؟؟؟

MMamdouh

أنا مش فاهم ازاي أنا رديت علي كلامي وأثبت إنه غلط ، لو هو غلط ومش بيدعم اللي بقوله مش هحطه أكيد
لو إنت ماشي وسايب مسافة كافية وعملت حادثة ممكن داه لأنك مش سايب مسافة كفاية أو مش حسبها صح وفكر نفسك ماشي صح ، ممكن لأن فرملك تعبانة ،ممكن عشان سرحان أو تعبان ومجهد وتركيزك مش عالي ،ممكن عشان طبيعة الطريق لو فيه مطر أو مزحلق ،،فيه ميت ألف حاجة تانية بردو



بس يا سيد ممدوح ، لو كل قاعدة اتعملت أو قانون طلعنالو exception ذي اللي بيحصل في مصر مكنتش أوروبا وأمريكا فرقوا عننا في الحوادث وأعداد الوفيات
يعني مثلاً إنت بتقول آه قاعدة بس لها شواذ، ممكن ال- exception بتاعتك متوفقش واحد تاني والتاني يطلعه فيها عيوب تانية وهكذا،نلقي القاعدة اللي مفروض نمشي عليها مبقتش قاعدة لأن كل واحد ماشي بنظامه.
إنت بتقول لو علي الدائري واحد وقف فجأه ، وهو إيه إلي يفرق الدائري عن أي طريق تاني ، لو ماشي بسرعة سيب مسافة كافية وإنت تلحق تقف ، واحد تاني يقولك اللي قدامي وقف فجأه علشان يعدي واحد ، برد سيب مسافة كافية وإنتبه متسرحش ،متتكلمش في التلفون وإنت تقف .واحد وقف بالعربية علشان كلب أو قطة طلع قدامو .. فيه مت ألف حاجة وكل واحد ليه سببه لو كل واحد طلع له exception يبقى مفيش قاعدة نمشي عليها . إن كانت الأسباب بسيطة أو مش بسيطة من وجهه نظرك فده ميدكش الحق بتاتا انك تلبس في واحد من ورا وتقول إنه هو الغلطان.
والقوانين تثبت إن كلامي صح بدليل فرق الحوادث بنا وبين الدول اللي بطبق القوانين ده

[dr.hazem]

يا اخواننا

معروف ان اللي بيخبط حد من وراه غلطان 100 %

لاسباب كتيره مش وقتها اني اطرحها

لكن انا هتكلم عن حاجه تانيه

استخدام الفرامل ده فن

امتى اضرب فرامل وازاي اضربها مهما كانت الظروف؟

يا اخواننا الواحد لو سايب مسافة امان هيقدر يتصرف ببساطه شديده

بصة عالمرايه الخلفيه لقيت اللي وراك قريب شغل الانتظار في السريع وانتا بتقف

وبجد عود نفسك على كده



المشكله الكبيره في حاجه واحده

لو اللي قدامك معندوش لمبات فرامل
وللاسف الموضوع ده عادي فمصر وبجد ده حاجه وحشه جدا
ده بيغش اللي ماشي وراه

والله حرام

بس هنا لو خبطته ملوش ديه
عرووووووستي

معندكش لمبات وانا واخد مسافة الامان وملوش حق


باختصار
هيا دي الحاله الوحيده اللي قدامك ملوش حق لو خبطته


وده المنطق وده الواقع
وربنا يسترها علينا...

[MMamdouh]

آه لو سيادتك ماشي على الدائري و كبست فرامل مرة واحدة يبقى اللي ورا غلطان و حمار كمان علشان لازق فيك و مش سايب مسافة تسمحله بالوقوف

اذا انت بتعترف ان المشكلة مش فى انه ورا... المشكلة فى مسافة الامان... طيب لو كان سايب مسافة الامان الصح... يبقى ايه الوضع؟؟؟؟

حضرتك ده قانون عالمي مفيش فيه جدل

مفيش حاجة اسمها "دة فانون عالمى"... اللى قال كدة قبل كدة قولنا له يجيب نص الكلام دة و ملقاش اى حاجة تثبت الكلام دة... حتى انت نفسك قولت ان اللى ورا غلط عشان مسافة الامان مش عشان هو ورا و خلاص

MMamdouh

[MMamdouh]

أنا مش فاهم ازاي أنا رديت علي كلامي وأثبت إنه غلط ، لو هو غلط ومش بيدعم اللي بقوله مش هحطه أكيد

انت بالفعل عملت كدة للمرة التانية:

لو إنت ماشي وسايب مسافة كافية وعملت حادثة ممكن داه لأنك مش سايب مسافة كفاية

ازاى سايب مسافة كافية و مش سايب مسافة كافية فى نفس الوقت؟؟؟؟

أو مش حسبها صح وفكر نفسك ماشي صح ، ممكن لأن فرملك تعبانة ،ممكن عشان سرحان أو تعبان ومجهد وتركيزك مش عالي ،ممكن عشان طبيعة الطريق لو فيه مطر أو مزحلق ،،فيه ميت ألف حاجة تانية بردو

يعنى الميت الف حاجة دول مفيش منهم انى "انا اللى ورا و خلاص"... يعنى لازم اكون عملت حاجة غلط غير انى ماشى ورا و السلام

بس يا سيد ممدوح ، لو كل قاعدة اتعملت أو قانون طلعنالو exception ذي اللي بيحصل في مصر مكنتش أوروبا وأمريكا فرقوا عننا في الحوادث وأعداد الوفيات
يعني مثلاً إنت بتقول آه قاعدة بس لها شواذ، ممكن ال- exception بتاعتك متوفقش واحد تاني والتاني يطلعه فيها عيوب تانية وهكذا،نلقي القاعدة اللي مفروض نمشي عليها مبقتش قاعدة لأن كل واحد ماشي بنظامه.

انا مش فاهم ايه مغزى الجزئية دى بس ما علينا

إنت بتقول لو علي الدائري واحد وقف فجأه ، وهو إيه إلي يفرق الدائري عن أي طريق تاني

اختار الحتة اللى تعجبك يا سيدى..

لو ماشي بسرعة سيب مسافة كافية وإنت تلحق تقف ، واحد تاني يقولك اللي قدامي وقف فجأه علشان يعدي واحد ، برد سيب مسافة كافية وإنتبه متسرحش ،متتكلمش في التلفون وإنت تقف .واحد وقف بالعربية علشان كلب أو قطة طلع قدامو .. فيه مت ألف حاجة وكل واحد ليه سببه لو كل واحد طلع له exception يبقى مفيش قاعدة نمشي عليها . إن كانت الأسباب بسيطة أو مش بسيطة من وجهه نظرك فده ميدكش الحق بتاتا انك تلبس في واحد من ورا وتقول إنه هو الغلطان.

يعنى لو انا عامل كل حاجة صح و اللى قدامى مسك فرامل مفاجىء و انا خبطة ابقى برضة غلطان؟؟.... انت شايف ان دة منطقى؟؟؟

يعنى طبيعى انى افرمل بشكل يعرض الناس للخطر لكن مش طبيعى ان حد يخبطنى؟؟؟

والقوانين تثبت إن كلامي صح بدليل فرق الحوادث بنا وبين الدول اللي بطبق القوانين ده

مصر البلد الوحيدة اللى فيها "اللى ورا غلطان" و ما شاء الله احنا اكتر بلد فيها حوادث... انت بنفسك كتبت قبل كدة:

the number one accident cause is following close

يعنى المشكلة فى الناس اللى مش بتسيب مسافة... محدش قال:

the number one accident cause is being behind other cars

MMamdouh

[shaddadfalcon1]

اللي اعرفه ان اللي ورا هو ياديما غلطان بس خلوني افكر بصوت عالي

المفروض اني ابقي عامل حسابي علي العربيه اللي قدامي كمان يعني لو قدامي لانوس اكيد مش هتقف في نفس المسافه اللي الاس 500 هتقف فيها وبالتالي موضوع مسافة الامان ده هيبقي في الطراوه
طيب كانت لانوس وانا مبظط نفسي عليها وسايب مسافه كافيه وبذياده عشان انا عار ف فرامل اللانوس بس طلع الراجل اللي قدامي معدل الفرامل وبالتالي وقف في مسافه اقل بكتيير يبقي ايه الحل؟

طيب الراجل فرمل وانا لما جيت افرمل كان في شوية مياه او رمل علي الطريق في الحته اللي انا فيها بس مش عند اللي قدامي يبقي ايه الحل؟

من الاخر انا بحس انا الموضوع ده نصيب ومفيش قوانين تقدر تمنعه لان مش كل العربيات ذي بعض ولا حالة الطريق واحده في كل حته

وربنا يسترها علنا جميعا والحاجات دي كلها لتقليل نسبة الحوادث مش لمنعها

[kemoelord]

لو اللي قدامك معندوش لمبات فرامل
وللاسف الموضوع ده عادي فمصر وبجد ده حاجه وحشه جدا
ده بيغش اللي ماشي وراه

والله حرام

بس هنا لو خبطته ملوش ديه
عرووووووستي

معندكش لمبات وانا واخد مسافة الامان وملوش حق


باختصار
هيا دي الحاله الوحيده اللي قدامك ملوش حق لو خبطته


وده المنطق وده الواقع
وربنا يسترها علينا...

يا جماعه الجزئية دي مهمه جدا وما حد اخد باله واتكلم عليها لان بجد بنسبة 75 % من الناس وطبعا النسبة شامله معاهم الاتوبيسات والميكروباصات والمقطورات مش عندهم نور استوب وده في منتهى الخطورة ومش عارف المرور ازاي بيعديهم سواء في اللجان او في الفحص ,,

المشكله في مصر يا جماعه ان الناس هنا هي الوحيده الي بتتبع ثقافه وعادات وافعال عجيبه وغريبه , بمعنى انا متفق مع الاستاذ محمد في كلامه واراءه من ناحيه ان انا لو واخد كله احتياطاتي وسايب مسافه الامان المطلوبه ومركز ومش بعمل حاجة غير السواقه وجيه الي قدامي فرمل مثلا في طريق سريع او كوبري او اي مكان في الكوووووووون بدون ما يعطيني اي تحذيرات او تنويهات كاشارة انتظار مثلا فعمري ما هكون غلطان ,,,, عموما ربنا يسترها معانا جميعا

[MMamdouh]

المشكله في مصر يا جماعه ان الناس هنا هي الوحيده الي بتتبع ثقافه وعادات وافعال عجيبه وغريبه , بمعنى انا متفق مع الاستاذ محمد في كلامه واراءه من ناحيه ان انا لو واخد كله احتياطاتي وسايب مسافه الامان المطلوبه ومركز ومش بعمل حاجة غير السواقه وجيه الي قدامي فرمل مثلا في طريق سريع او كوبري او اي مكان في الكوووووووون بدون ما يعطيني اي تحذيرات او تنويهات كاشارة انتظار مثلا فعمري ما هكون غلطان ,,,, عموما ربنا يسترها معانا جميعا

مرة تاكسى 131 وقف قدامى على مطلع 6 اكتوبر عشان واحد ماشى على مطلع الكوبرى شاور للتاكسى... حد تخيل قبل كدة ان دة موقف ممكن يحصل؟؟

على فكرة انا مدخلتش فى التاكسى عشان انا كنت مامن نفسى... بس لو دخلت فيه ابقى انا الغلطان؟؟

MMamdouh

[dr.hazem]

لسا النهارده وانا مروح من العباسيه ورب الكعبه سواق التاكسي لقيته راح واقف مره واحده وفي نص الشارع والشارع 3 خانات هوا وقف في الخانه اللي في النص عشان ينزل اللي راكبين معاه

ده جبروت والله

والله كنت هلبس فيه لولا ستر ربنا

والله جيت جنبه ورزعته كلام في جنابه
بيقولي انا آسف

طب يعني انتا واخد بالك انك غلطان
ليه تخلي الناس تهزأك

الحمد لله على كل حال

بس لما اعتذرلي زعلت اني زعقتله

مش عارف ده طيبه مني ولا هوا فعلا يستاهل كده

ايا كان
ربنا يسترها علينا ويحمينا من شر الوقوف المفاجئ


تحياتي

[verynuclear]

دايما اللى فى الخلف هو الغلطان وده قانون فى كل العالم حتى لو اللى قدام عمل كل البلاوى وهو السبب اللى فى الخلف برضه هو الغلطان

[MMamdouh]

خلاص انا بعد كدة حمشى بضهرى عشان لو خبط حد يبقى هو اللى ورا

MMamdouh

[fadod]

خلاص انا بعد كدة حمشى بضهرى عشان لو خبط حد يبقى هو اللى ورا

mmamdouh

بردو إنت واخد الموضوع عافية ،، لو سافرت برة وعملت اللي بتقول عليه داه هتعرف لما تأمين العربية يتضاعف مع أول حادثة و- يتلغيلك مع تاني حادثة وساعتها ابقي قولهم في مصر عندنا داه مش غلط.
ممكن يكون كلامك مفهوم من الناحية النظرية بس ملوش أي معني من الناحية المرورية والتطبقية...بص تخيل حادثة واحد وقف فيها لأي سبب إن كان وبكرر لأى سبب ، انشالله وقف يهرش ، وجيه واحد رزع فيه من وراه ...هل تقدر تنزل وتقوله وقفت ليه ولا موقفتش ليه..طيب لما هو وقف موقفتش ليه إنت كمان
طيب لو طلع إنه وقف علشان طلع عيل قدامة فجاءة أو لقي تريلا بتقطع الطريق ، أهو عذر سليم أهه ، وراح واحد لبس فيك إنت من ورا، هتعمل إيه ، تنزل تاخده بالحضن وتبوسه .. وتقوله سلامات احنا أصحاب وحبايب ،،
فكر فيها من غير نرفزة وتعصب وياريت ماتقطعش كلامي حتت وتعلق عليه..وخد المعني الاجمالي لتعليقي