ازاي تعدي الطريق في انجلترا

[calipha3]

ده قصه حصلت مع اخي اليوم و هو عاوز يعدي الشارع في انجلترا مشي :)

النهارده و هو راجع فى طريق سريع قبل السكن ولازم يعديه فوقف مستنى فرصة يعدى
و مش عارف المهم فجأه عريبه راحت وقفت لوحدها هو استغرب و معداش فضل واقف

المهم الراجل الي كان سايق العربيه اما شافه لسه واقف شورله من الشباك يعدي قاله لا عادي عدي انت الاول

و في نفس الوقت العربيات من الاتجاه التاني برضه لقاها وقفت

ولقي صف واقف يمين وشمال
فتكسف منهم وراح معدى :) :)
فيبقول
" الناس دى هتبوظنى معنداش كدا فى مصر"

المشكله ان الحتة دى معملوش فيها اشاره
و نظام الشوارع عندهم ان عشان الناس تعرف تعدى من حتة معينة بيعمل ممر للمشاه
وفى اشاره مرور بزرار تضغط عليه عشان يوقف العربيات وتعرف تعدى و شكرااااا

[EgyptianTune]

انا كنت هاتخبط مرتين تلاتة أول مره أروح فيها لندن بسبب الشوارع المعكوسة بتاعتهم (عشان العربيات كلها يمين) لأنى كنت بأعدى الشارع وأنا باصص مثلاً شمال والمفروض أبص يمين وهكذا بس الحمد لله ربنا ستر

[Ahmed Samy]

الزرار ده كان في قبرص برضه هي نفس الخلف خلاف بتاع بريطانيا

من زماااااان ما حسيتش ان انا بني ادم

[mhmdalsaadany]

انا كان في واحد هندي قاعد يشتغلني بالزرار دا في البحرين لحد ماكنت هنزل اضربه كل شويه يدوس عليه وميعديش الاشاره تفتح يقوم دايس عليه تاني وبرضه ميعديش لحد ما الناس زعقتله جامد اوي قام ماشي عالطول ومعداش برضه كان واخدها لعبه البيه
والله النظام حلو واحترام الاخر شئ احلى بكتير امتى نشوف النضافه دي هنا

[pharonicking]

ناس متحضرة

[ahmedsamir5edr]

هههههههههههههههههههههههههههههههههههه

[medo_2060]

دا فى انجلترا !!

[Ahmed Samy]

دا فى انجلترا !!

معظم الدول سابقة الاحتلال البريطاني كده

ريطانيا و استراليا و قبرص و اعتقد اليابان أو ماليزيا كده بس مش متأكد

[mohie777]

المشكلة ان الناس ده كانوا محتلين مصر اكتر من 50 سنة
بس للاسف مخدناش منهم حاجة خالص

[medo_2060]

معظم الدول سابقة الاحتلال البريطاني كده

ريطانيا و استراليا و قبرص و اعتقد اليابان أو ماليزيا كده بس مش متأكد

معاك يا دكتور انا كان قصدى ان الكلام دا فى انجلترا وهيفضل هناك وفى الدول المتقدمه زيهم..... وكل الدول الى قولتها ماشى بس قبرص الى هيروحها هيشغل دماغه بمرور وبتاع ليه هناك حاجات اهم هههههههههههههههههه

[mahamedaraby]

المشكلة ان الناس ده كانوا محتلين مصر اكتر من 50 سنة
بس للاسف مخدناش منهم حاجة خالص

المصرى مش بيتاثر فى اى حاجه بالعكس absolutely هو اللى بياثر فى الناس

واعتقد ان اكتر متفائلين فى البلد دى ميعتقدش ان النظام ممكن يوصل لكده فى مصر احنا محتاجين اجيال علشان نوصل لكده

[Abdo_Eldesokey]

أنا حصل معايا موقف مشابه .. بس مش في إنجلترا أو حتى في أوروبا

في (سوريا) .. دولة عربية زينا

كنت في دمشق وعايز أعدي الشارع .. وواقف ببص على العربيات الي جاية

كان فيه عربية جاية وأنا لسة واقف على الرصيف .. فجأة لقيته كبس فرامل جامد ووقف

أنا قعدت أدور على تفسير ملقتش .. بعد ما عديت وبصيت ، لقيت إني كنت واقف جنب إشارة عبور مشاة

وبالصدفة الإشارة قفلت وأنا بفكر أعدي

والكلام ده مكنش في تقاطع أو كده ، ده في نص الشارع ، وكل الناس بتقف حتى لو مفيش مشاة بيعدوا

الظريف بقى في الموضوع إن سواقين الميكروباصات برضوا مش بيقفوا في الإشارات دي ، شكلها مواصفات ثابتة في جميع سواقين الميكروباصات

[Amrrr]

المشكلة ان الناس ده كانوا محتلين مصر اكتر من 50 سنة

ياخسارة

وبمناسبة الميكروباص ، اسمع ان الميكروباص والنقل في اغلب دول العالم كله كدة

[calipha3]

هما تقريبا معندهمش ميكروبوصات في انجلترا ,اتوبيسات بس و النظام الاتوبيس فيه زورار برضه تضغط عليه عشان يقف المحطة اللى جايه و الستات شغالين محصلين تذاكر وسواقين و الكلاب بتقعد برضهجنب الناس :)
هو اول ما اخويا ركب استغرب مفيش تباع بتنده يلا و يلز و نازل هههههههههه ولا حتي حد بيتكلم الي بيحب ينزل يتغط الزرار و يمشي و شكرا :)

[kar!m]

فى انجلترا الشوارع الرئيسيه فيها زى صندوق محطوط فى الناحيه اللى المشاة بتقف فيها .. لو عاوز تعدى الطريق بتدوس على الزرار بيطلع لك كلمة wait و تستنى لما اشارة المشاة الناحية التانية تبقى خضرا تقوم معدى الطريق .. و ده موجود فى بعض الدول العربية برضه.

فى الشوارع الصغيرة بتعتمد على ثقافة المواطنين انه لما حد سايق بيلاقى حد واقف مستنى يعدى بيقف له.

من وجهة نظرى ان حتى لو طبقنا النظام ده عندنا مش هينفع .. لأن الناس متعودتش انها تنتظر عشان تعدى الطريق .. أو انها تعدى من حته معينه .. يا راجل ده فى ميدان رمسيس عاملين سور حديد عشان الناس متعديش و الناس بتعدى من فوق السور عادى جدا و كأن ده الوضع الطبيعى .. و لا كأنه بيعمل جاجه غريبه.

لو حبينا نبقى زيهم كده .. لازم نحط اداب عبور الطريق و اداب القيادة فى مناهج التعليم .. و نستنى عشرين سنه على ما الجيل اللى هيتعلم الحاجات دى يبدأ يسوق و يمشى فى الشوارع عشان نشوف تأثير الموضوع ده .. انما لما تبص على سلوكيات الناس فى الشارع دلوقتى تعرف ان الجيل ده متعلمش حاجه .