محتاج رأيكم ضروري ..

[Ahmad_Nawwara]

استفسار أستاذنا الكريم ..
هوه فيه سيات 133 وفيه فيات 133 ؟

[Ahmad_Nawwara]

ايه رأيكم ياشباب في العروض دي :

http://www.contactcars.com/UsedCars_All.asp?MakeID=42&ModelID=93

[Karim_Monir]

يا اخي لا كرم ولا حاجة وانا عارف انك مش هاتيجي ايدك فاضية هاتجيبلي فطيرة:D
طبعا بهزر وبخف حدة الموقف انا ماليش فيه قوي اصلا
شوف السيات تسافر اسكندرية بس اهم حاجة عينك على عداد الحرارة وتمشي بالراحة وتريحها كل شوية
وده حسب الجو حر ولا برد
السيات هيا اللي 133 لكن فيه فيات 126 ودي شبها بس اصغر شوية وموترها بينعر مش ناعم زي سيات
بس السيات نفس مدرسة الفيات بالظبط ومعظم قطع غيار الفيات 127 بتمشي عليها واللي ما ينفعش بيتعدل الميكانيكية مش بتغلب
ولو مالقتش فعلا انزل وما تحملش هم وان شاء الله نلاقيلك حاجة كويسة
بس انا افضل تشتري من عندك عشان مشاكل التوكيلات ونقل اوراق الملكية وما تفضلش رايح جاي والمشوار مش قريب
اما عن المنصورة دي من احب البلدان الى قلبي وبحب لما اروحها اقعد على الكورنيش ومامشيش ابدا
اما عن السن فانا ليا فيها ذكريات جامدة بس مش هاقدر اقول على العام عشان المنتدي متراقب
ها ها ها
اهلا وسهلا بيك استاذ احمد وربنا يديم المعروف

[Karim_Monir]

عروض كويسة بس اعتقد مهندس خالد سبعاوي يفيدنا اكتر
بس عموما ما ينفعش غير لما تتشاف ويتكشف عليها كويس

[Ahmad_Nawwara]

أخي الكريم .. كريم باشا
إن شاء الله بصرف النظر عن شراء السياره من القاهره أو لا .. ان شاء الله لازم اجيلك واشكرك بنفسي ومعايا الفطير والمشبك والحلويات اللي قلبك يحبها .. ولو مش غاوي .. يبقى للأقارب والحبايب .. بس انت تأمر
وياريت تقدر تنزل المنصورة قريب علشان نعرف نرحب بيك ان شاء الله
انا شفت النهارده واحده 133 هنا بس حالتها هه يعني ... عايزة شوية شغل وصاحبها عايز 7000 ... بس بالنسبة للي انا شايفه في عروض المواقع متساويش المبلغ ده
أدينا بندور وربنا يسهل ..
حاجه تانية فيه عربيه 1300 معقوله نوعا ما ومطلوب فيها 10000 موديل 72 .. كانت تاكسي وصاحبها قلبها ملاكي .. ايه رأيك في النوع ده ؟
وواحده تالته فولكس بيتل بس غاليه عليه شويه .. بـ 12000 ومعقوله . برضه عايز رأيك في الأنواع البديله للسيات اذا ملقتش واحده كويسه
وأشكرك على مجهودك وربنا ميحرمناش منك أبدا

[Ahmad_Nawwara]

دي الـ 1300

[Karim_Monir]

الله يكرمك الواجب اتعمل من ذوقك وكرم اخلاقك وانت مش لسه هاتقوللي على كرم المنصورة عارفهم كويس والله
شوف 1300 عربية جامدة وعفية ولو انت ساكن في ارياف عفشتها هاتستحمل جامد بس معرفش حاجة عن قطع غيارها بس طالما كانت تاكسي اكيد شقيت وتعبت وطلع عين اللي جابوها
البيتلز دي عشقي الاول لاني فولكساوي قديم اول عربية في حياتي من فلوسي كانت بيتلز 64 وبعد كدة بعتها وجبت موديل 70 وبعد كدة بعتها وجبت 73 وبعد كدة مراتي قالتلي لو جبت بيتلز تاني مش قاعدالك في البيت احنا عايزين عربية بتكييف (عشان كنت لسه مخلف جديد والبنت كانت بتفطس في الصيف من الحر)
المهم البيتلز عربية ثبات وموتور خرافة بس يعبها حاجتين اولا صالونها ضيق واضيق من السيات والدركسيون تقيل نوعا ما اتقل من السيات فبتحتاج قوة عضلية نسبية
اما تاني حاجة لازم ميكانيكي خاص بيها لان اللي بيشتغل فيها وخلاص بيعك فيها جامد وانا اعرف ان عندك اساتذة فيها بس مش هايبقو متاحين ليك دايما وقطع غيارها غالية نسبيا اغلى من فيات برضه وبيعها تقيل قوي قوي
خليك في سيات احسن
ولو حالة 1300 كويسة ومش متهانة او يعني صاحبها صارف عليها هيا معقولة بس صالونها ضيق خاصة قدام
بس ميزة انها 4 ابواب ولو مش فارق معاك بلاش خليك في سيات ووفر فلوسك
وبرضه بخصوص 1300 استني ردي سبعاوي وحازم خضر عشان دول فياتوية قدام

[Ahmad_Nawwara]

بيني وبينك أن وقعت خلاص في غرام السيات من قبل مااشتريها ... وحلمت بيها امبارح ..ههههههه ... بس حبيت أسأل علشان القرار يبقى نهائي وأصمم عليه بيني وبين نفسي .. وانت ريحتني برأيك برضه .. وان شاء الله يبقى النصيب في السيات... بالنسبة للـ 1300 هيه طالع عينها فعلا بس شكلها حلو لأنها مرشوشه جديد بس ..وعلى رأيك , الفرق في السعر أوفره فعلا وخاصة انه هيكون سلف من الحبايب ..

[Ahmad_Nawwara]

على فكره موضوع البابين والأربعة ابواب مش فارق معايا لأني انا وزوجتي بس .. المشكله اللي انا قلقان منها اننا تخان حبتين .. او نقول تلات حبات هاهاهاها يارب متكونش مشكله مع السيات

[Karim_Monir]

ان شاء الله مفيش مشكلة في الوسع بس صالونها فعلا واسع
ولو لقيت واحدة يا ريت تجربها وتجرب قعدتها
وحاول تخس شوية عشان صحتك مش عشان العربية

[Ahmad_Nawwara]

أنا ناوي والله ان شاء الله أخس .. بس كانت المشكلة ان أقرب مكان لشقتي ممكن اعمل فيه تخسيس ( سواء جيم أو نادي ) بعيد ومحتاج برضه لمواصلات وان شاء الله تتحل قريب ...

[hazem_khidr]

حاجه تانية فيه عربيه 1300 معقوله نوعا ما ومطلوب فيها 10000 موديل 72 .. كانت تاكسي وصاحبها قلبها ملاكي .. ايه رأيك في النوع ده ؟
وواحده تالته فولكس بيتل بس غاليه عليه شويه .. بـ 12000 ومعقوله . برضه عايز رأيك في الأنواع البديله للسيات اذا ملقتش واحده كويسه
وأشكرك على مجهودك وربنا ميحرمناش منك أبدا

اولا اهلا بيك يا استاذ احمد معانا
زي ما الباشمهندس كريم قالك بالضبط ال 1300 حتبقي حالتها تعبانه اولا لانها قديمه اوي غير كده لانها كانت تاكسي و اكيد اكيد ضايعه.
هيا تمنها بيعمل في حدود 7000 و قطع غيارها بتنقرض خلاص خلينا في السيات احسن او ال 126 و بالنسبالي 126 افضل لانها موديلاتها اعلي و تبريدها هواء مش ميه و مافيهاش مشاكل للسخونه بتاع السيات

[Ahmad_Nawwara]

طيب ياشباب فيه عربيه ظهرت قدامي من عشر دقايق عايز رأيكم فيها :
فيات 125 ايطالي موديل 1972 حالتها جيده ومعقوله جدا ... صاحبها طالب 12500 جنيه .. ملاكي .. يعني مش متحوله .. رأيكم ايه ؟؟؟

[Chicco]

١٢٥ موديل ٧٢ يعني ٣٦ سنة يا باشا و في شوارع المحروسة ....ما تخدهاش لو ببلاش :)...... و ١٣٠٠ شرحه
الصبر في شراء العربية المستعملة ضروري.... و بالنسبة لوضع القيادة في ١٣٣ أو ١٢٦ لازم تجرب تقعد في العربية إنت و المدام و تشوف مستريحين ولا لأ
البيتل هايلة بس بشرط الحالة و توفر مكانيكي حريف و محل قطع غيار شغال فيها.... ربنا يوفقك

[Karim_Monir]

برضه خليك في السيات
ونصيحة ليك عشان تخس
كل كويس فطار وغداء
وامنع العشاء تماما
لان العربية هاتخليك تدخن اكتر لان معدل الحركة هايقل
وبرضه خليك في السيات بس جرب قعدتها الاول