محتاج رأيكم ضروري ..

[Ahmad_Nawwara]

أحبتي في الله وأخواني الكرام الأعزاء
اليكم هذا التقرير :
بعد بحث ولف ودوران طول اليوم وجدت التالي :
1 - سياره 127 موديل 82 ممتازة بصراحه ومفيهاش الهوا زي مابيقولوا سعرها 19000 .
2 - سيارة 127 سوبر فيورا ممتازة جدا جدا موديل 83 وتحس انها انتاج 2008 .. سعرها 22000
3 - سيارة 127 موديل 81 جيده وكان فيها بارومه في الشنطه الخلفيه وتم عمل ترقيع لها .. لكن الموتور والعفه بحاله جيده 2 باب سعرها 12000
4 - سيارة فيات 128 موديل 79 بحاله جيده جدا استعمال طبيب ثاني يد ..ز سعرها 23000
5 - سياره فيات 128 موديل 80 بحالة جيده بس عايزه تغيير كوبلن شمال بسعر 17500

اما بالنسبة للسيات وال125 احوالهم لاتسر عدو ولاحبيب .. مينفعوش خالص
ايه رأيكم ؟؟
بالنسبة للفلوس .. الحاجه الوالده ( والدتي ) ربنا يكرمها قلبها رق وحن ومستعده تساعدني لغاية 10000 جنيه تبرع منها .. وده خلاني اطمع والشيطان شاطر في اني اجيب الماروتي الزيرو بالتقسيط
برضه محتاج رأيكم .. ومتحرمش منكم ابدا

[Ahmad_Nawwara]

أستاذي الفاضل .. أ/ أكرم
بالنسبة لأستفسارك عن معنى التوقيع الخاص بي .. فهو كالآتي :
حرف a اختصار لأسمي الأول : أحمد و nawwara اسم العائله (نواره) .. يعني اختصار لأسمي الأول وكل اسمي الأخير .. وتأمر يأستاذنا العزيز

[Chicco]

الصورة منورة المنتدى يا نوارة باشا ;)
بص يا سيدي مادام الميزانية عليت أنا أرشح ال-١٢٧ ديه كانت معايا و عربية زي الفل بس برضه لازم تقعد فيها و تجربها إنت و المدام لا تطلع مش مريحة ربنا يوفقك

[fahd_628]

خد بالك يا باشا لو حتجيب 127 هاتها حالة نضيفة لأنها لو مكانتش نضبفة حتحتاج تعمل ابونية عند الميكانيكى :d :d :)

[Ahmad_Nawwara]

الحمد لله رب العالمين .. أخيرا وفقني الله في شراء السياره ويارب يبارك لي فيها ويحميها من العين والحسد وادعولي تصمد معايا ان شاء الله .. العربيه 127 ودي صورتها .. وربنا ميحرمنيش منكم ومن نصائحكم الغاليه .. وبرضه خليكوا معايا .. لسه طبعا محتاجكم ..

[Ahmad_Nawwara]

بالمناسبه .. السياره نمر اسكندريه أسيبها كده ولا أنقل الملكيه ؟؟ باقي في الرخصه سنه تقريبا !!

[ehabradwan]

الف الف مبروك يا باشا ربنا يباركلك فيها و يكفيك شرها و يرزقك خيرها و خير ما صنعت له . انا رأيي الشخصي تنقل باسمك عشان تضمن و خصوصا ان هي مش هتكلف كتير يعني 200 كده ولا حاجة و لو على السنة اللي فالرخصة كده كده هتاخدها متقلقش . دي على كده الوالدة بقى هي اللي جابت هدية عيد الام . عشان تعرف بس هما ممكن يعملوا ايه عشانا (:

[Xpert]

مبروك يا عم .. اهه 127 احسن من ال 126 هههه
انقل ملكيه يا حج علشان تشتري دماغك من وجع الدماغ بعد كده ;)

[fahd_628]

الف الف مبروووووووووووووووووووك يا باشا

[Karim_Monir]

الف مبروك ياحمد باشا
وانا بحب الاحمر جدا اصلا
لاء جميلة بس عايزين تفاصيل
موديل كام وخلصتها على كام
وفعلا انقل احسن بدل ما يطلع فيها لعب وحوارت وخصوصا افلام التوكيلات المضروبة
الناس بتسالك عن توقيعك عشان يدي احساس او يتنطق
انا ورا
بجد بصلة هاتلاقية كدة خاصة مع صورة علم ممصر
عموما انا مش هاتنازل عن حقي في الفطيرة وتقدر تضيف الفاتورة على قيمة العربية
ها ها
طبعا بهرج وربنا يباركلك فيها

[hazem_khidr]

الف مبروك يا استاذ احمد ربنا يحمهالك يا رب و يكفيك خيرها
:)

[Ahmad_Nawwara]

الله يبارك فيكم جميعا .. وربنا يخلي لي الوالده الكريمه العظيمه يارب ويبارك لها في عمرها وصحتها .. وياريت ياشباب تدعوا لها ...
بالنسبة للموديل هي 83 وخلصتها على 19500 بالعافيه ... بس ان شاء الله ربنا يبارك لي فيها .. متهيألي متخمتش فيها كتير.. ولاأيه رأيكم ؟؟؟ صارحوني ومش هزعل والله
وان شاء الله لما انزل القاهره ونتقابل ان شاء الله هيكون معايا احلى حلويات وفطائر منصوريه وخاصة علشان أبو الكرم كله

[Ahmad_Nawwara]

أستاذي الفاضل / حازم خضر الله يكرمك .. بس ممكن تعدل الدعاء الله يكرمك .....هاهاهاهاها

[Ahmad_Nawwara]

استفسار بعد اذنكم ... المفروض أعمل ايه دلوقت في المرور علشان رايح بكره ان شاء الله .. يعني اللي باع لي العربيه معاه توكيل .. يبقى المفروض نعمل ايه علشان انقل الملكيه واطلع رخصة العربيه باسمي ان شاء الله

[Karim_Monir]

معلش ما شوفتش الا دلوقتي
وشكلك رحت وخلصت كل حاجة
ربنا يباركلك في السيارة ويباركلك في الحاجة واحنا مش عاشين الا ببركتهم وبركة دعاهم
وبيتهيالي هيا اللي جابتلك احلى هدية في عيد الام
مش كدة ولا ايه