بتغير كاوتش العربيه كل كام كيلو؟

[momomania22]

السلام عليكم
والله انا معايا عربية ماتريكس ولسة مغير الكاوتش الاصلي الهانكوك اللي فيها على 40 الف بس نضافة ،، والمهندس قاللي ممكن يعيش ويبقلى كويس اوي لحد 60 - 70 الف
ولفيت لقيت انواع كتير
في الشعبي اللي الناس كلها غالبا بتركبه زي الجي تي والماكسيس وال nexen
وده للعربيات الصغيرة يبقى تمام وزي الفل
وده اسعاره تتراوح من 200 ل 250 جنيه حسب المقاس
وفي ماركات جامدة قوي زي البريدجستون والميشلان وده فوق ال 400 الاصلي منها
وفي حاجات وسط زي الكومهو والهانكوك والمارشال ودول كوري واسعارهم من 275 - 350 حسب المقاس
وبصراحة وعن تجربة اشتري البريدجستون الياباني او المارشال الكوري (ماركة ممتازة جدا المارشال ده ) بس مش ناس كتير عرفاه وهو نفس انتاج مصنع كومهو بس نقشات رياضية
وفي ملاحظة لما تيجي تشتري في حرف جنب المقاس وكل حرف ليه دلالة
p سرعة لاتتجاوز 150
T سرعة لاتتجاوز 180
U سرعة لاتتجاوز 200
وال H وده المنتشر في مصر وهو مخصص لاقصى سرعة 240
وفي V وده بقى للعربيات الاسبور
اسف للاطالة واتمنى اكون افدت ودي اول مشاركة ليا عالمنتدى

[S H @ F T]

الشركات بتنصح بالتغيير على 50000 أو 6 سنين

[mshamy]

كل اربعين الف حتى لو شكله جديد .. زى كل السفارات

هين قرشك .. ولا تهين نفسك

+10000000000000000

[Mustafa_Farouk]

يا جمعاة أنا عايز أغير الكوتش بتاعي ١٦/ ٢٠٥/٥٥ بريدجستون وسألت عنه في توكيل الكتوتش واللي العجلة بتعمل ٩٨٠ جنيه مصري ودة أنا شايفو كتير جدا . ممكن لو حد عارف بيتباع بكام ولا دة السعر الطبيعي . ولازم أحط نفس النوع ولا ممكن كونتنتال مثلا

[mshamy]

يا جمعاة أنا عايز أغير الكوتش بتاعي ١٦/ ٢٠٥/٥٥ بريدجستون وسألت عنه في توكيل الكتوتش واللي العجلة بتعمل ٩٨٠ جنيه مصري ودة أنا شايفو كتير جدا . ممكن لو حد عارف بيتباع بكام ولا دة السعر الطبيعي . ولازم أحط نفس النوع ولا ممكن كونتنتال مثلا

انا لسه شاري طقم كومهو كوري 205/45/16 ZR الفرده عاملة 450 جنيه وزي الفل
بالنسب للياباني و الفرنساوي و الألماني الأسعار اللي حضرتك بتقول عليها دي موجوده بس ده طبعا يرجع تماما للقدرات المالية و طبيعة السيارة

[ahmedsiyam]

انا باغير وضعية الكاوتش كل 10000 كم باعمله كروس
و باغير الكاوتش كله على 50000 كم
و المفترض ان الواحد بيجيب افضل الانواع موش باسترخص يعنى
و باغير الاربعة مع بعض
و ربنا يستر طريقنا و طريقكم

[momomania22]

شوف ياسيدي
البريدجستون اسعاره عالية كده في النقشات الرياضية وتقريبا هو ده اللي انت سألت عليه
لكن في بديل
الماركة :كومهمو والموديل: Ecsta Mx
ودي نقشة رياضية وممتازة جدا وسعر الفردة مقاس 16 ب 430 جنيه
وهحاول انزلك الصورة

[درش]

كل 40 الف ودى عمر الفترضى للكاوتش

[momomania22]

ولو مش عايز الكوري وعايز تركب ياباني او اوروبي
هاتلك بريدجستون او ميشلان او كونتينتال بس نقشات عادية
مش Rotation
ودي

[momomania22]

ولو مش عايز الكوري وعايز تركب ياباني او اوروبي
هاتلك بريدجستون او ميشلان او كونتينتال بس نقشات عادية
مش Rotation
ودي اسعارها في مقاس 16 من 450- 550
وده كل اللي اعرفه

[mada121977]

ايام الشاهين كنت بغيره كل 70 الف وبيبقى طالع كويس وممكن يمشى كمان عشره الاف زياده وكنت بجيب نوع اسمه gt اندونيسى او كومهو والاتنين احلى من بعض

[أبو_حمزة]

بريدجستون يابانى يعيش 80 مع التدوير كل 8-10
كومهو كان فى ال127 عامل 45 و مسح خالص
جى تى ممكن يكمل ال100 بس ناشف قوى
القاعدة العامة لتغيير الكاوتش هى عمق النقشة لا يقل عن 1.6 مم و عمر الكاوتش لا يزيد عن 6 سنين
بالاضافة لأن اى اصابه فى الجوانب غير قابلة للأصلاح
طول ما القواعد دى متحققة يبقى الكاوتش لا يحتاج للتغيير عتى لو مشى 200 ألف

[Ahmad Allawy]

انا الكلام اللي سمعته من اكتر من بتاع كاوتش..
ان الكوري ولا الاندونيسي المفروض يتغير كل حوالي من 40 الي 45 الف كيلو..
واللي سمعته برضه ان الياباني يتغير علي 60 او اكتر شوية..
لكن بيتهيألي ان كلام كريم باشا منير بيوضح الامور جدا وان الكلام اللي قاله علي لسان مهندس ف التوكيل..
وكده يبقي اللي يركب ياباني او اوروبي نضيف يعيش معاه لحد 80 لو استعماله حنين..

شكرا جدا يا مستر كريم..

[Sharky]

بغير كل 40.000 الف كم
و ما بجبش غير برجيستون أو ميشيلان

[Karim_Monir]

ميشلان وبيردجستون على 40 الف بس يا شاركي
والله حرام عليك
دول يقعدو اكتر من 60 الف واسئل فيها التوكيل بتاعهم