هل من العيب ان تغسل سيارتك بنفسك ؟؟؟؟؟؟

[Ashraf_Ibrahim]

عادي جدا ايه المشكلة يعني؟
في الحقيقة انا كنت بغسل عربيتنا القديمة بس من ساعة ما جبت العربية الجديدة مغسلتهاض خالص بنفسي مش لشيء بس غير اني مش بفضى كتير ويوم الاجازة بخصصه للنوم
لكني بمسحها بنفسي يوميا حتى سايس الجراج ييجي ويقلي يا دكتور وميصحش وبتاع اقله ايه المشكلة يعني مهي عربيتي وبتاعتي هو انا بعمل حاجة غلط
طالما مبتعملش حاجة غلط يبقا زي الفل مفيش مشاكل من اي حاجة اطلاقا

[KHALED AYMAN]

هو مش عيب ولا حرام ...
بس
ممكن لضيق الوقت تخلى حد يغسلهالك ...
او لظروف صحيه
انا مش بغسلها بنفسى كل يوم
بس لما اكون فاضى بنزل اغسلها بالكامل برا و جوا وبلمعها كمان
لكن كل يوم فى واحد بينضفها و الموضوع مش تناكه هو فقط لضيق الوقت

[wisenada]

أنا نفسى أغسلها بإيدى لأنى دايماً فيه حاجات مش عاجبانى فى الغسيل اللى بيعملوه ... شغل مشى حالك وعايز يقلب العربية ويروح للى بعدها ... ولو قعدت تقول له على كام حاجة يظبطهم .. يبقى نفسه يخبطك بحاجة فى دماغك.
لكن المشكلة المكان عندى قدام البيت مش مناسب .. من حيث توفر الاحتياجات اللازمة للغسيل .. بالإضافة للإرهاق من الشغل بيخلى الواحد يكسل عنها.

أنا بس بنضفها من جوه وأعطرها بنفسى غالباً .. بالمكنسة والفرشة والفوط المبلله ... على قد ما بقدر ...
وطبعاً الموضوع ما فيهوش أى عيب .. لكن الوقت والجهد............

تحياتى
محمد

[opelawy]

و انا كمان بغسلها بايدى بس مش على طول....لما بكون رايق بس لان الغسيل بصراحة مجهد شوية و عايز بال رايق.

[hazemhassan]

انا ما مبحبش حد يغسل العربية لانى مش بكون مبسوط
وبحس بسعادة لما انا اغسلها حتى لو مش نفس اداء المغسلة ومع العلم ان محدش عندنا فى الشارع بيغسل عربيتة غيرى انا وواحد عندة تاكسى والسايس اللى بيغسل عربيات الشارع كلة وصحابى بيقولولى وديها المغسلة
برد عليهم اقولهم مش هتحسو بالمتعة غير لما تجربو وتشوفو نتيجة التعب على العربية وهى نضيفة
ولللاسف اخويا العكس تماما....................

[mesaharaty]

لا عيب ولا حرج فى غسيل السيارة
المشكلة بس إنها بتبقى مجهدة حبتين وخصوصا إن كنت غير مؤهل لذلك
فضلا عن أهمية توفر الأدوات اللى حتنضف بيها من الداخل والخارج

الموضوع مش عيب قد ما هو مستغرب

[EslaM_NagY]

سبحان الله لسة طالع من تحت كنت بغسل العربية
جوة وبرة وكبوت وبلاستيكات

بروح البنزينة لغسيل العفشة بس غير كدة صنعة اديا وحياة عنيا

[shaddadfalcon1]

اوحش حاجه لما بغسل الرفارف
ساعات ايدي بتتعور وخصوصا ان الدنيا بتبقي ضيقه قوي ومش عارف ادخل ايدي جوه

[khaled_bibo]

عادي بس الناس بتبصلك على انك كائن من الفضاء بس

[TheStig]

السياره عنوانك..لازم تعتنى بيها زى ما بتعتنى بنفسك..انا بغسلها بنفسى

[mhmdalsaadany]

عادي جدا كل يوم بمسح العربيه بنفسي ولكن لازم اوديها تتغسل نظرا لنقص الامكانيات عندي

[neemmohamed]

عادى جدا مفيهاش حاجة

بالعكس الواحد بيحس بسعادة و انت بتعمل سيارتك بايدك و هاتكون اكثر حرصا من اى حد تانى عليها

و على فكرة لو الشخص بيحب النظام الترتيب و عنده وقت متوفر ها يحب يعمل كدا فى عربيته خاصا لو كانت زيروو

[M.Elgergawy]

انا لسة غاسل العربية حالا ومخليها بتبرق وبتلمع كدا

[Everlasting]

دي عملية ممتعة ومسلية جداً.

[Ashraf_Ibrahim]

كان معايا جاري من كام يوم فدخل الجراج وانا بمسح العربية -هو باع عربيته من شهرين تلاتة- فبيقلي مبتخليش حد يمسحهالك ليه؟!
قلتله دي متعة مش هتحسها غير لما تجربها
وبعدين الوقت متوفر ايه المشكلة؟!
وانا مبعملش حاجة غلط دي عربيتي
طبعا سكت معرفش يرد
هههههههههههههههههه