استفتاء بتركن في الشارع ولا في جراج و بكام؟؟

[Jato.33]

اول ما شفت كلمه تعليم قلت دى عربيه حضرتك بس اليافطه لذيذه والله مش فضيحه ولا شى

انا بفكر اعمل ذيها عشان اعرف امشى براحتى

سؤال هوا حضرتك حاطط يافطة تعليم عشان تسوق براحتك
أنا أول مرة أعرف
أنا كنت هموت من الضحك بقالي كتير مضحكتش
حضرتك دية حركة جامدة جداً ما شاء الله عليك

أنا بركن في جراج المحافظة إلي تحت الكوبري بـ60جنية شهري
ولو بركن جنب البيت هدفع جامد ومش هاخد نفس الخدمة
بس المشكلة إنه بعيد شوية بس أنا إتعودت خلاص
ويبقولوا حيغلى هيبقى 100 جنية ومضطر أصلي أنا ساكن جمب هندسة شبرا الله لا يبتليكوا

[smsmbakr]

ليه يااااااعني

[mohraga2y]

انا بركن فى الشارع وبدفع 25 جنيه للعامل الى بيغسل العربية كل يوم وبلاقى مكان بالعفية وده علشان مفيش جراج قريب وبالتالى العربية كل يوم الاقى فيها تجريحات اخر حاجه واحد جابلى العربية من اولها لاخرها بخط مزرقش وطبعا باين علشان انا عربيتى احمر دم غزال:arghh::embarrassed2:

[MoToRiZeR]

بالمناسبة اي حد بيركن في جراج اوعوا يوافق انه يسيب المفتاح لأي سبب من الأسباب .. لو قافل علي عربية خليه يحطك انت ورا .. يتصرف انما اوعي تسيب المفتاح لأن العربيات بتتهان بجد

انا والدي كان بيركن في جراج من دول و مرة راح ملقاش العربية ! اتاري البيه اللي شغال في الجراج كان واخدها في فرح من بالليل و مرجعهاش .. و كان يوم جمعة و مش متوقع والدي يخرج بالعربية بدري .. و اللي فاكره ان الواد ده اتعلق يوميها .. الكلام ده كان في في التسعينات ايام ما كانت الدنيا نوعا ما لسة بخير .. ما بالكوا دلوقت بقي

اوووووووووعي تسيب المفتاح

[sleepyhammer]

انا بركن فى جراج ب 200 ج
والسبب المنطقة عندنا مفيهاش ركنة نهائى يعنى ممكن اضيع البنزين كله لف على مكان اركن وكمان الموضه دلوقتى بيحجزو الاماكن بالاتاوة والعافية ووضع اليد

فريحت نفسي وحطيطها فى جراج

[Ahmed Taha]

معندناش جراج

يا ريت في جراج بركن في الشارع في مصر الجديدة بظبط واحد سيكيوريتي بتاع محل دهب ياخد باله من العربية.

و عند بيتي في مدينة نصر البواب بيبات في المدخل.

و في الأول و الآخر ربنا بيستر.

[soundoffear]

بركن في جراج ب 120 جنيه
غير طبعا لازم تراضي السايس كل يوم وانت خارج
بس اهو احسن من الشارع وتلاقي حد يظبطلك العربية وانت طالع

[Ah.Farid]

بركن فى جراج

[mrghost]

الحمد لله احنا عاملين الدور الارضى عندنا فى البيت جراج( للعربية فقط) فبركنها فى بيتى الحمد لله

[chihab18]

لزياده الفائده في الموضوع كل واحد فينا يحدد اماكن الجراشات جانبه واسعارها في كل محافظة في مصر وده مجرد اقتراح

[Hondawy_2008]

بركن في جراج 5 دقايق من البيت مشي ب 120 جنيه بس فيه 3 سياس جوه لازم اظبط كل واحد ب 10 أو 15 جنيه في الشهر يعني بدفعلي من 150 الى 165 جنيه في الشهر ولازم أسيب المفتاح بس أنا براقب الكيلو متر كل ماركن ويا ريت كلكم تعملوا كده مره لاقيته عامل 10 كيلو زياده مسكته بهدلته من ساعتها اتظبط قالي بس يا بيه سيبلي كيلو واحد لأن العربيات أكبر من مساحه الجراج وليه بابين فساعات بيلف بالعربيه عشان يطلع عربيه تانيه بس أعمل ايه أحسن من الشارع و بهدلته برده

[ibrahimsaad]

باركن فى الشارع قدام بيتى ومافيش حراس ولاحاجه والحارس هو الله والحمد لله مستوره لغايه دلوقت وربنا يسترها دايما

[salem]

be3t el 3rbya we lsa magbtsh haga

[Nour_Peugeot]

ركن في الشارع ادام البيت ببلاش

و البواب بينضف العربية كل يوم و 3 مرات في الاسبوع تنظيف جوه ب 15 جنية

[mr_kenawy]

كنت باركن فى الشارع و صابر على الخبطات اللى كنت بافاجىء بيها كل يوم فى العربية , لحد ما جه اليوم المشئوم , جرس الباب خبط لقيت البواب و على وشه ابتسامة من الودن للودن و ماسك فى ايده طوبة و قالى الطوبة دى جبناها من على الكرسى القدمانى فى عربية سعادتك....... بعد ما كسرت الازاز , من يومها و انا باركن فى جراج جنب البيت فى شارع الهلالى فى اسيوط ب 85 جنيه شهريا و كل شهر باتخانق مع الراجل علشان عايز يرفعها ل 100 جنيه.