هل بتجامل الستات في الطريق ؟؟؟

[Goodle]

ده فعلا صح يا ابو عبدالله.... ما فيش هنا احترام للكل ... فعلا محدش بيقفلك لما بتبقى بتعدي ....

حصل موقف قدامي من يومين ... وبصراحه كان جامد لدرجة اني هزقت نفسي بعدها ...

كنت في شارع جامعه الدول عند فرغلي كده ومره واحده تاكسي راح كاسر على اللي في الشارع كلهم وركن اي كلام جنب الرصيف اليمين ونزل معدي الشارع كمان بسرعه على رجليه قدامنا ......
وكنت معايا واحد صحبي ... ولسه هنشتم ونبتدي .... بنبص لقيناه عمل اللي عمله عشان لمح واحد اعمى كان بيعدي الشارع من الجزيرة اللي في الوسط وكان لوحده ...وراح عشان يساعده



ساعتها لساني وقف وكنت عايز انزل احيه على عملته بصراحه

والله يا أستاذ محمد مش قادر أقوللك أنا اتأثرت أد إيه بالموقف اللي انت حكيته
ربنا يجعله في ميزان حسناته.. وربنا يزيد من فاعلي الخير

وشوف الراجل الكفيف ده.. نحسبه كان متوكل على الله وربنا رزقه باللي يساعده

والله العظيم انا الموقف ده حرك فيا حاجات كتير لا علاقة لها بالموضوع

ربنا يصلح حالي وحالك... قول آمين

[kareem_Ashmawy]

هل بتجامل الستات في الطريق وتقف عشان يعدو الاول

و لا الرجالة.....:)

[MoToRiZeR]

أنا لو (قطة) حتى بتعدي الشارع باقف ليها

مش كفاية ربنا اداني عربية في اللحظة دي و اللي بيعدي مامعاهوش

و في ظروف كمان خارج النقاش :
انسان مسن
طفل صغير
اي شخص يحمل رضيع او يمسك بيد طفل


و ما بابصش على وش حد بيعدي (لأن ده لله) و مابانتظرش ولا حتى نظرة شكر

يا سلام لو فيه منك 5 في مصر .. و يكون واحد منهم ساكن جنبي
بجد كلام سليم و المفروض هي دي الانسانية .. مش عشان واحد معرفوش و مفيش ما بيني و بينه حاجة ولا مصلحة اجريه في الشارع عشان هتفرق معايا انا ثانيتين ولا 3 ثواني

احييك بشدة و حرارة

[A7madfathy77]

طبعا اعديها الاول و خصوصا لو شكلها حلو طبعا اعديها و انبسط اوى لو بصتلى بصة شكر بابتسامة

[ethan82]

والله علي حسب المزاج ساعات بكون محترم وساعات بكون رزل بس بالنسبة لو كان بنت بتعدي فطبعا بقف اتفرج عليها وهيا بتعدي وساعات ارخم بصوت الموتور وفي حالة ان في بنت كتكوته راكبه عربية فأكيد بيكون في تعامل تاني خالص ويجعلو عامر

[meza]

والله علي حسب المزاج ساعات بكون محترم وساعات بكون رزل بس بالنسبة لو كان بنت بتعدي فطبعا بقف اتفرج عليها وهيا بتعدي وساعات ارخم بصوت الموتور وفي حالة ان في بنت كتكوته راكبه عربية فأكيد بيكون في تعامل تاني خالص ويجعلو عامر

أيوه يجعله عامر ...

حضرتك ليك إخوات بنات؟

[Ahmed Taha]

أنا بخاف منهم

أنا ببعد عن أى ست بتسوق لا يمكن توقع هى حتعمل إيه.

لو بتعدي الطريق ست أو راجل في رأيي لهم الأولوية (فالأول و الأخر بني أدم و العربية حديد)

[OlaOsman]

والله علي حسب المزاج ساعات بكون محترم وساعات بكون رزل بس بالنسبة لو كان بنت بتعدي فطبعا بقف اتفرج عليها وهيا بتعدي وساعات ارخم بصوت الموتور وفي حالة ان في بنت كتكوته راكبه عربية فأكيد بيكون في تعامل تاني خالص ويجعلو عامر

بصراحة مش لاقية تعليق على الكلام ده.. بس فعلا لو نسبة من شباب مصر بالشكل ده يبقى عوضنا على الله فيكي يا مصر.

[Samir Elshahawy]

لو واحدة ست بتعدي الطريق لازم أقف من باب الذوق لان المشاة في اعتقادي لهم اولوية سواء كانوا ستات او رجالة

لكن لو واحدة ست سايقة عربية فبعاملها زيها زي اي راجل من باب المساواة اللي الستات بيطالبوا بيها , و بحاول اعديها او ابعد عنها بسرعة اتقاء لشرها

[2hmed_7osam]

انا هتكلم عن نقطتين والاتنين يعتبرو حاجات منقرضة عندنا فمصر
1- خط عبور المشاة
2- كباري المشاة

*انا بتواجد ف السعودية كتير وهناك في نظام
اشارة حمرا العربيات تقف البني ادمين تعدي من قدام الاشارة على خط عبور المشاة مش تقعد تمشي حوالين العربيات وتحك وتسند وتنط وتخبط زي عندنا

اشارة خضرا البني ادم بيقف والعربيات بتمشي مفيش حد بيعمل زي القرود عندنا ويتنطط بين العربيات ويهوشك بجسمه وممكن تروح فداهية لو خبطته مع انك مش غلطان

*كبارى المشاة معمولة ف الطرق الي ممنوع وخدو بالكم من ممنوع ((ان بني ادم))
يعمل فيها بهلوان ويعدي الشارع عشان المفروض طريق سريع او اي حاجة تانية المهم
ان الكوبري دا حماية ليه وطريقه االاجباري الي لازم يمشي عليه

احنا هنا كسرنا كل القواعد في حماية انفسنا لازم نجري ونتنطط زي القرود وسط العربيات وتحصل بلاوي من التصرفات الغبية دي


السؤال ف المووضوع عن مجاملة الستاات ف الطريق

*اولا لو ماشي فشارع وشايف( بني ادم ) راجل او ست واقف مستني يعدي الشارع ببص فمرايتي لقيت واحد كابس ورايا وبيجري اكيد مش هعرف اقف واعدي البني ادم
فبرفع ايدي اعتذارا مني ليه اني معرفتش اعديه

*لقيت الشارع فاضي او العربيات ورايا بعيدة بدي انتظار وبخلي الشمعات بس منورة عشان متأذيش البني ادم اللي بيعدي من قدامي او تخليه مش شايف العربيات التانية اللي جاية من ورا وبعديه

*كتير جدا من (البنات) مش الستات لما تلاقي شاب بيقف عشان يعديها يبقا عشان يعاكسها

انا بعدي اللي قدامي احترما مني ليه ومراعة لظروفنا ان مفيش مكان للبني ادمين تعدي منه

سواء رفع او رفعت ايدها تشكرني فدا ذوق منها
ولو مشكرتش مش هيبقا في مشكلة معايا لأني بعمل كدا ابتغاء مرضاة الله

اما اذا كانت ست سايقة فحاجة من اتنين لو جمبي بعديها اجيبها قدامي
لو ورايا ربنا يستر احاول ابعد عنها

لأن كل الخبطات اللي بتخبطها من ستات ببقا واقف فأمان الله
ونفس غلطة كل مرة تيجي البنت او الست تدوس بنزين غلط بدل الفرامل وطاااخ تخبط فيا

انا اتخبطت 3 مرات فحياتي كلهم من ستات بنفس الطريقة
مش عارف عربيتي فيها جاذبية ولا ايه

والحمدلله مبيحصلش اضرار

[Samir Elshahawy]

الي الاخ MedoMurcilago أنا اؤيدك تماما 100% و تقريبا بعمل اللي بتقول عليه لكن فيه ناس كتير بتفهم تصرفاتي دي غلط , لكن مش مهم طالما اني مقتنع اني بأعمل الصح و براعي ربنا مش بجامل حد

[abo_hosni]

لو واحدة سايقة عربية باعديها و ابعد عنها الأول لسببين:
1- خوف من العواقب لو هي قليلة الخبرة
2- ذوقياً لأنها في الغالب مش قليلة الذوق + لو رخمت عليها ممكن ترتبك و الله أعلم ايه ممكن يحصل.

ولا علاقة لي بشكلها

لو ثبت العكس (قليلة الذوق أو بتعرف الأصول و واثقة من نفسها و شايفة الأولوية في المرور ليا) باعدي أنا الأول

لو راجل بيعدي تقاطع بالعافية بحاول أقرفه، أطلع ببوز العربية و ماقفش و أشاور له يقعد ببرود من غير ما أبص له (مستفز مش كده :D). لأني لاحظت في ناس لما تشوفك بتبص على عربيتهم و الاكصدام و كده بيفتكروك خايف و يعدوا.

لو (إنسان) بيعدي الشارع على رجليه. مش شرط راجل ولا ست، حلوة أو وحشة. لو الطريق سريع مش باقف لأنه يا أنا هاتخبط من ورا يا هما هيتخبطوا من اللي جاي بعدي على الحارة يميني أو شمالي و هما مش شايفينه. و ياريت بلاش الـ eye contact مع المشاة لو مش ناوي تعديهم.
لو الطريق زحمة و ماحدش راضي يقف لهم باقف و أعديهم و اللي ورايا يستنى

أحياناً باعرف أن العربية اللي قدامي سايقاها واحدة من تصرفاتها (التصاق بالحارة لا تناسب السرعة، فرامل على الطريق السريع بدون داعي، لخمة و ربكة في الزحمة و التقاطعات، فرامل فجائية عند الركن)

[Amrrr]

حسب الموقف والطريق والسرعة وشوية العوامل اللي بتتحكم فينا واحنا سايقين يعني مش شرط عشان واحدة بأجاملها
لو حسيت ان العربية اللي جاية في وشي او بتتقاطع معايا في تقاطع لو حسيت انه ذوق وداخل عامل حساب العربيات التانية اللي في الشارع ومش معتبر نفسة ماشي لوحدة بأجامله
في حاجة بس ان ساعات بعد الموقف مايحصل وتقف تستنى واحد في تقاطع او جاي في وشك والشارع ضيق لازم واحد يقف يستنى وييجي ويعدي وميقولشي شكرا باندم اوي على اللي انا عملته واتمنى اني ماكنتش عملت كدة ولما تقف لواحد او واحدة مشاة وتقول له عدي وينزل عليه البرادة اللي في الدنيا كلها وانت فرملت ووقفت الطريق وراك وينزل يعدي قدامك ببرادة او بزاوية ويديك ضهرة ويمشي في قصادك كأنه عربية داخلة الطريق وطبعا بقى لو اديتله كلاكس مثلا ولا حاجة تاخد نظرة مالهاش لزمة ولا تسمع كلمة مالهاش لزمة !!الموقف دا بجد بيخليني - وأكيد أي حد بيعمل زيي - اطق ومالوش غير خبطة مراية او اكصدام خفيف طبعا من غير أذية عشان في الأول والآخر هو = بني آدم قدام القانون وقدام ربنا
وساعات بقابل ناس ببقى خلاص هدمع لما ألاقي الذوق دا زي ان واحد يرفع ايدة اعتذارا وهو اصلا مش غلطان وببقى نفسي اجري وراة اوقفه واعتذرله عشان انا اللي غلطان وكنت مثلا ماشي صح بس بسرعة زيادة او اترددت مثلا فهو اتلخم و كدة

[shanodaa]

اتعاطف معاها ازاي
اللي ممكن اهمل لها
لو فرده كواتش نايمه ممكن اغيرها
لو عندها عطل ممكن اصلحه
لكن علي الطريق الكل واحد

[R A N A]

كل إناء ينضح بما فيه