سواقة ستات.. كفاية بأه.. ارحمونا

[د. علاء ابراهيم]

فى يوم من الايام كنت استمع الى ازاعة لندن
و كانوا بيتكلمو عن السواقة
و ان فيه دراسة او بحث اتعمل بيقارن بين حوادث السواقة مع الستات و الرجال

و كانت النتيجة:
الرجال، مشكلتهم السرعة الزائدة فمعظم حوادثهم بسببها
السيدات، عندهم مشكلة فى التخيل.
و كنتيجة لهذا عندهم مشاكل فى تقدير مساحات الطريق و ابعاد السيارة. معظم حوادثهم فى الملفات و المحاور و الركنات


و الله العظيم هو ده اللى سمعته بودانى

[allord01]

السلام عليكم
الموضوع متعلق بان الناس اصبحت لا تود مساعدة الاخرين سواء كان
سيده او راجل وبدل ان تصبح النصيحه فى الاذمات تتحول الى هجوم وانتقاد
فتحول الموقف العدائى من سواقة السيدات الى كره داخلى يتحلى بابتسامه فتحول الوضع بالكامل الى.....
استعداد داخلى عالى المستوى +كره داخلى يتحلى بابتسامه الى=تعميم وفرض الاشياء السيئه فقط ولحل تلك هذه العقد والاشتباكات
يجب زيادة الهدوء وضبظ النفس وعدم الانفعال للسيدات فى المواقف المفاجئه والصعبه مما سيعطى نتائج مذهله سرعه فى التصرف وتركيز عالى
زيادة فترات التدريب وعدم التسرع وازالة الخوف
عدم توقع و فرض اشياء خاظئه من اى سيده وازاله نظرية التعميم نهائيا
معرفه وحساب القدرات بين الرجل والسيده فى القوى وفى التفكير
وطبعا كل ده علشان الرجل بيتعامل وسط الناس باستمرار ونسبه الاحتكاك بين الناس عاليه اوى فمفيش توتر وسط الناس انما السيدات نسبة الاحتكاك تقريبا منخفضه عن الرجل فنسبة التوتر بتبقى عاليه وسط الناس
وطبعا فى ناس كتير سواء سيدات او رجال مبيعرفوش يسوقه

[modux]

الشارع المصري كرنفال

الظاهر يا جماعة اني جيت متأخر اويييي

بس عايز اسألكم سؤال هوا برج الحمام يتكلف كاااااااااااااااام ؟

و يا ترا مين احسن خشب و لا طوب ؟



----------------

هدي نفسك يا علا الموضوع مش كده خالص !!!

المشكله اعتقد انها قتلت بحثا

المشكلة مش في راجل و ست
المشكله في مصر كلها

ولاد فعلا ابوهم جايبلهم العربية و مش عارفين قيمتها
تاكسيات عفي عليها الزمن
ميكروباصات عامله زي صناديق تونة بدتحرج مش بتمشي !!!
بنات مش بيعرفو يسوقوا
رجاله كبار سواقتهم علي قدهم اويييييييييييييييي
و هلم جرا !!!!
( حد فاكر مستوي رفيع جغرافيا 3 ثانوي - بيقولك الشارع المصري كرنفال )
(علي رأي خطبيتي - تقولك الشارع في القاهرة عامل زي البحر بامواجه كله بيلاطم في كله )


وعموما كل حاجه في منها كويس و الوحش بس والله شفت بنات و ستات بيسوقوا 10 علي 10
و شباب بيسقوا زي الزفت !!

المهم
كبري دماغك
اتقني السواقة
و حاولي تعلمي زميلاتك و قريبابك السواقة الصح
و لو مش عارفه مش عيب حد يعلمك باباكي اخوكي زوجك او حد ثقة !!
و تنقلي الخبرة لواحده و اتينين و 10

و انا كمان والله لما بلاقي حد بيسوق بنقله خبرتي - بقولو بص اعمل كذا و كذا و كذا علي قد خبرتي في السواقة
بسوق من و انا عندي 7 سنين لحد الوقتي 24 سنه = يعني همهمهمهم 98687646 سنه
ههههههههه

اخيرا
الغلط مش عيب - العيب هوا الاستمرار علي غلط مع معرفة انو غلط


انتي مش السبب انتي ضحية مجتمع ( طبعا لا اقصد حضرتك باذات - الكلام لكل بنات و نساء مصر ) زي ما كلنا ضحايا مجتمع و حياة اصبحت لا ترحم


يا رب اكون عرفت اعبر عن اللي جوايا كويس و اجبلك حل كويس يريح اعصابك :)

---------
بخصوص موضوع برج الحمام اللي فوق
ف دي عباره بابا دايما يقوهالي لما اكون متنرفز من حاجة


و تفضلوا بقبول فائق الاحترام

[د. علاء ابراهيم]

السلام عليكم
الموضوع متعلق بان الناس اصبحت لا تود مساعدة الاخرين سواء كان
سيده او راجل وبدل ان تصبح النصيحه فى الاذمات تتحول الى هجوم وانتقاد
فتحول الموقف العدائى من سواقة السيدات الى كره داخلى يتحلى بابتسامه فتحول الوضع بالكامل الى.....
استعداد داخلى عالى المستوى +كره داخلى يتحلى بابتسامه الى=تعميم وفرض الاشياء السيئه فقط ولحل تلك هذه العقد والاشتباكات
يجب زيادة الهدوء وضبظ النفس وعدم الانفعال للسيدات فى المواقف المفاجئه والصعبه مما سيعطى نتائج مذهله سرعه فى التصرف وتركيز عالى
زيادة فترات التدريب وعدم التسرع وازالة الخوف
عدم توقع و فرض اشياء خاظئه من اى سيده وازاله نظرية التعميم نهائيا
معرفه وحساب القدرات بين الرجل والسيده فى القوى وفى التفكير
وطبعا كل ده علشان الرجل بيتعامل وسط الناس باستمرار ونسبه الاحتكاك بين الناس عاليه اوى فمفيش توتر وسط الناس انما السيدات نسبة الاحتكاك تقريبا منخفضه عن الرجل فنسبة التوتر بتبقى عاليه وسط الناس
وطبعا فى ناس كتير سواء سيدات او رجال مبيعرفوش يسوقه

لا يا سيدى الفاضل، راجع الموضوع من اوله و اقراء مشاركات الاعضاء و خصوصا المشاركات بتاعتى و انتا تعرف ان انا فى اكثر من موقف كنت مقدر ان اللى بتسوق مش عارفة تتصرف و كمان حاولت انصح.
و كانت النتيجة قلة ادب و قلة قيمة

[OlaOsman]

شكرا جزيلا

العفو يا فندم.. بس على ايه؟

[OlaOsman]

انا رائي ان الستات بتبقى خبرتهم قليلة في السواقة فمع طرق مصر العجيبة اللي مالهاش وش من قفى فهذا بيسبب انهم يتضربوا او يغلطوا او يسيروا ببطء ليتعملوا مع هذا الطرق

شفت بأه؟ يعني خبرتهم القليلة و الطرق الوحشة و كمان الرجالة عليهم في الشارع :)

[OlaOsman]

بصى يا علا

المشكلة مشكلة اخلاقية + عدم خبرة فى القيادة وخوف وقلق وتردد

يعنى انا مثلا من ساعة كنت فى مشوار وراجع وداخل شارع يمشى فيه عربيتين

عكس بعض بالعافية المهم انا فى اول الشارع لقيت عربية جاية

والله ما اعرف اللى جواها راجل ولا ست روحت مستنى لما تخرج جت العربية

على اول الشارع وعمالة تزنق عليا بدل ما تخرج على طول من شمالى

روحت راجع بضهرى لورا ومن غير ما اتكلم طبعا المهم لما قربت لقيتها ست

وبعد مارجعت ووسعتلها خالص راحت جاية وبتزعق وبتقولى حد يقف كده !!!

رغم انى كنت ممكن ادخل الشارع وماستناش وبعدين تضطر هيا ترجع علشان

تعدينى ووقفت وبعد ما وقفت ماخدتش غير حرقة الدم سيبتها ومشيت

يعنى عدم خبرة ماتعرفش تعدى فى شارع صغير عايزة شارع واسع علشان

تعدى مش بتقدر الابعاد كويس وديه مشكلة شائعة جداا فى الستات

عموما مش الستات بس اللى مابتعرفش تسوق فى رجالة باردو مش بيعرفو

يسوقو وكمان فى ناس بيبقو متصربعين وعايزين ينطو من فوقيك علشان يعدو

عندك حق.. لكل منا أخطاؤه على الطريق و متهيألي مافيش أخطاء ماركة مسجلة بإسم الستات.. و اي حد في أول سواقته سواء ست او راجل بيغلط تقريبا نفس الأخطاء مع وجود فروق فردية بين الناس و الحل لكل ده هو اننا نتعايش.. دعوة للتعايش :)

[sh23]

[quote=upnemo;302385]علي فكره انا لو مفيش ستات بتسوق انا مش هسوق لأن انا غاوي اعاكس البات اللي بيبقوا سايقين جانبي وعلي فكره انا لسه حالا كنت برخم علي بنوته فوق كوبري اكتوبر
=====
تخيل لو دي أختك ولا والدتك ولا زوجتك ... وحد رخم عليها ... ممكن أنت تعمل فيه إيه ؟؟؟؟!!!
---------
وعلي فكرة أنا أصلاً ضد سواقة الستات - ضد عمل الستات -
حتي أنا بأدعي كل يوم علي قاسم أمين

[tutankhamoun]

معلش يا عُلا ............ متزعليش نفسك

هما فعلا الستات المصريين ما بيعرفوش يسوقوا قوي
بس مش لوحدهم

لأن الرجالة واخدها بالذراع ......................... و حسبي الله و نعم الوكيل

شعب ............ من دول العالم الثالث صحيح

[Ghamrawy]

عندك حق.. لكل منا أخطاؤه على الطريق و متهيألي مافيش أخطاء ماركة مسجلة بإسم الستات.. و اي حد في أول سواقته سواء ست او راجل بيغلط تقريبا نفس الأخطاء

تمام بس المصيبة ان الستات ما بيتعلموش و يفضلوا يغلطوا نفس الغلطة كل يوم

[mohamed ismail]

مش ملاحظين ان موجة الانتقادات زادت جدا
كل واحد مش عاجبه البلد
كل واحد مش عاجبه الشعب
كل واحد مش عاجبه اي حاجة في اي حاجة
طيب ساعدتك عملت ايه؟
اراهن ان كل المنتقدين ( ومن بينهم انا علشان محدش يزعل) بيعمل حاجات اكتر وافظع من اللي بينتقدها .
يعني بنزعل قوي لما بنلاقي حد بيرمي ورقه مثلا من العربية في الشارع
طيب وسعادتك تللاقي نفسك بتفتح الزجاج وبتعمل زيه في احيان كتيرة.
بس للأسف بنشغل بالنا بعييوب الناس ومش ولخدين بالنا من عيوبنا
تعالو كل واحد يبدا بنفسه
وقبل ما ننصح حد بسلوك معين
لازم نكون احنا الاول بنعمله
اعتقد لو عملنا كده الوضع هايتغير

[aif]

الستات لهم اخطاء اكتر من الرجالة بكتير ... ده امر واقع لا ينكره احد
لكن ايه الحل .....خاصة ان في ايامنا دي ما ينفعش الست ما تخرجش من البيت ... كل واحدة لها ظروف تجبرها علي الخروج
انا باكرر كلامي في اول الموضوع ...
امامنا خيارين ..
1 - ان نقول ان الستات ما تسوقش عربيات ويضطرو يركبو المواصلات العامة والخاصة و التعرض لرزالات وتحرشات لا حصر لها ...
2- انها تصون نفسها وتسوق عربيتها ونتحمل بعض اخطاءها ونحاول نساعدها ونعلمها او امكن... في مقابل انها تكون معززة مكرمة في عربيتها
لو الست دي زوجتك او اختك او بنتك او قريبتك تختارلها ايييييييييييييييه؟؟؟؟؟؟؟

[محمد المشد]

مش ملاحظين ان موجة الانتقادات زادت جدا
كل واحد مش عاجبه البلد
كل واحد مش عاجبه الشعب
كل واحد مش عاجبه اي حاجة في اي حاجة
طيب ساعدتك عملت ايه؟
اراهن ان كل المنتقدين ( ومن بينهم انا علشان محدش يزعل) بيعمل حاجات اكتر وافظع من اللي بينتقدها .
يعني بنزعل قوي لما بنلاقي حد بيرمي ورقه مثلا من العربية في الشارع
طيب وسعادتك تللاقي نفسك بتفتح الزجاج وبتعمل زيه في احيان كتيرة.
بس للأسف بنشغل بالنا بعييوب الناس ومش ولخدين بالنا من عيوبنا
تعالو كل واحد يبدا بنفسه
وقبل ما ننصح حد بسلوك معين
لازم نكون احنا الاول بنعمله
اعتقد لو عملنا كده الوضع هايتغير

والله يا باشمهندس كلامك كله مضبوط 100% 000 هذا الموضوع اظهر فجوة كبيرة بين فكر بعض السيدات والرجال فى مصر الان 00 وللاسف كان هذا من نتاج البرامج الحوارية النسائية فى التليفزيونات والمنتديات وبتوع حقوق المراة ومدافعى المراة اليوم 0000 شىء مقزز ان نتبارى من سواقتة افضل ؟ والسيدات لايعرفون السواقة وهكذا كلمات كأننا من كوكب وهم من كوكب اخر ! ، لا ادرى لما الهجوم الكاسح على الستات السائقات بهذا الشكل 000 نعم هناك سيدات كثيرات وللاسف اقول كثيرات سواقتهم سيئة ولكن ليس هذا ذنبهم فالذتب 00ذنب من اعطاهم الرخصة بطريقة غير سليمة وايضاً خطأ زوجها او اخوها او ابوها الذين طلبوا منها القيادة بدون اى مراعاة للاصول الخاصة بالقيادة ، ولكن هناك ايضاً سيدات كثيرات افضل مائة مرة من الرجال فى السواقة وبصفة عامة السيدات افضل خلقاً من الرجال فى القيادة ( هذا راى ) طبعاً السيدات الطبيعيات اللى ازواجهم اناس عاديين ، وليسوا من فئة انتى مش عارف انا بنت مين او متزوجة مين ؟ النعرة الكذابة ! الزائفة !
وايضا على الجانب الاخر من الرجال الكثيرين ، وللاسف يقودون سياراتهم بشكل استهتارى وبالقوة وبدون ادنى ذوق او اخلاق
اذن الجانبين بهم الكثير من العيوب وللاسف كل طرف يكيل العيوب للطرف الاخر 000 بالله عليكم اتركوا المناقشات السفسطائية الجدالية التى لا نفع منها واتركوا كل جانب بعيوبة وممزاتة للطريق واحكامة

[hazem_khidr]

1 - ان نقول ان الستات ما تسوقش عربيات ويضطرو يركبو المواصلات العامة والخاصة و التعرض لرزالات وتحرشات لا حصر لها ...
2- انها تصون نفسها وتسوق عربيتها ونتحمل بعض اخطاءها ونحاول نساعدها ونعلمها او امكن... في مقابل انها تكون معززة مكرمة في عربيتها
لو الست دي زوجتك او اختك او بنتك او قريبتك تختارلها ايييييييييييييييه؟؟؟؟؟؟؟

تصون نفسها طبعا يا احمد باشا
بس من غير اخطاء.
يعني تتعلم كويس
اما بقي واخداها عافيه و و مش عاوزه تعترف باخطائها
يبقي تركب مواصلات و الناس تتحرش بيها بقي علشان تحرم ههههههههههههههه

[aif]

تصون نفسها طبعا يا احمد باشا
بس من غير اخطاء.
يعني تتعلم كويس
اما بقي واخداها عافيه و و مش عاوزه تعترف باخطائها
يبقي تركب مواصلات و الناس تتحرش بيها بقي علشان تحرم ههههههههههههههه

هههههههههههههههههه
اعتقد ركاب الاتوبيسات ح يشجعو رأيك يا حازم ... وح يقولو يا رب ما تحررررم
....
الستات تكوينهم الجسماني وتركيبتهم العاطفية والعصبية مختلفة عن الرجال ....
وده مش ذنبهم ... ربنا خلقنا متفوقين عنهم في بعض حاجات ... وهما برضه متفوقين علي الرجال في بعض حاجات
فيه بعض اشياء الرجال لا يستطيعون فعلها .... عمرك شوفت راجل يقدر يبقي مدرس في حضانة ... كان اتجنن ...ما يقدرش يصبر علي الاطفال ...الستات بقي بيقدرو ...
المقولة بان الرجل بيستحمل اكتر من الست ده خطأ.. الرجل عضلاته اقوي من الست ... لكن الست هيكلها اكثر قوة من الرجل ... لكي تتحمل فترة الحمل والولادة والرضاعة ... الراجل ما يقدرش يستحمل الحاجات دي

الرجال هم صناع الاقتصاد والمال والمصانع والمشروعات ....
لكن الستات هم صناع الرجال .... هما اللي بيربو الجيل ....
لو عندهم قصور في بعض النقاط اللي بتخلي سواقتهم ضعيفة .... نعمل اية ... هما ربنا خلقهم كده ....لازم نستحملهم ... ونصبر عليهم ...وبعدين الزحام الشديد والعصبية الجارفة هي السبب اننا مش مستحملين بعض ... دي اسمها اخلاقيات الزحام .....
وفي النهاية الشارع مش حلبة سباق ... الصبر طيب ..... يا راجل يا طيب