تقرير معاينة سيارة مستعملة: الدروس المستفادة والخسائر

[Dr. Elsaadani]

تقرير جميل جدا ومفيد
ربنا نجاك - ما شاء الله
انت كسبت مش خسرت فلوس - كسبت راحة بالك

ان شاء الله يهديك للخير

[bebom]

ربنا نجاك منها. هو كمان نادرا ما هتلاقى حد كاتب الحاله الفعليه للسياره و يجب عدم الانخداع بمظهر البائع لانه احيانا بيبقى اسلوب لخداع المشترى

والله فعلا انا العربية الي اشترتها اتخدعت في الي شاريها(عباس العقاد عند كشري الشيخ وشغال توكيل رينو وعربية المدام وصاحبها القديم ظابط)والحمد الله اشتريتها واديني بشتري ماتور بدل الي ادحك عليا فيا يعني بشدها مردتش احط زيت تقيل في الماتور عشان بيرزع وابعها لحد عشان حرام التاجرام دول شوية نصابين قليل الي يراعي ربنا بقلك اتجارة شطارة

[د.أبونضال]

كلاكيت ثاني مرة وبنتكلم على لانسر أرنبة موديل 1998 لأني قررت أشتري أنضف حاجة من فئة من 45 ل 55 ألف.....
وصلت زهراء المعادي الساعة واحدة الظهر قبل ميعادي بساعة كاملة واتصلت وردت علي الست الطيبة اللي ردت علي امبارح برده ... أكيد الست دي صاحبة العربية وأكيد ما عندهاش وقت تروح السوق وتعرض نفسها لبهدلة التجار فبتبيع عن طريق النت...
أخذت وقت على ما لقيت المكان ... عمارة كبيرة ضمن عمارات اسمها عمارات طيبة ونزلت سيدة كبيرة في السن معها مفاتيح السيارة وبجانبها البواب وتقريبا اكتمل في ذهني انطباع العربية البيتي استعمال سيدة وكمان كبيرة في السن والعربية عاملة كم قليل ... الست كانت طيبة قوي ومحترمة جدا .. سألتها العربية معاكم من امتى يا حاجة؟ ...قالت لي: معانا من الاول .. الله أكبر كمان أول يد ..استكملت قائلة ..وكمان فيها رخصة 3 سنوات لسة في أولهم ... الله أكبر كمان فيها رخصة.... سألتها كمان : وحضرتك اللي بتسوقيها ؟ لأ يا بني ده ابني هو اللي بيسوق والباص بياخده الشغل ومش بنركبها كتير يا دوب لو راحين للدكتور ولا حاجة... جميل جدا ... الوضع حتى الآن مثالي...
بدأت أتفرج ... الإعلان قال أن العربية فابريكة برة عدا الإكصادامات ... بمجرد النظر لقيت المعجون طاقق في كذا مكان على الرفارف الأمامية ولما كلمت ابنها في التليفون اكتشفت إنه بيسمي الرفارف اكصدامات وبالتالي فهمت إنه كان قصده فابريكه ما عدا الرفارف ... الصوت مكتوم على الأبواب كمان وفيه معجون طاقق ومتشال ومدهون مكانه بنفس لون العربية وسايب حفرة كدا محيط ثلاثة سم على القايم الخلفي يعني السقف واكل معجون هو كمان ... فتحت الكبوت الموتور مبهدل وفيه رمل مختلط بزيت مليط حوالين خزن الزيت والعزل اللي ورا الموتور متبهدل ومتقطع والخراطيم مشققة ... الشنب واخد خبطة ومردود على البارد ودهان الحوض مبهدل وفيه مناطق صدا تحت قربة زيت الباكم ... طلبت من البواب يزود بنزين ... الموتور صوته حلو بس مش قوي ... رجعت اتفرج على الشنطة .. واكلة معجون حتى الاسبويلر واكل معجون هو كمان ... الشنطة من الداخل فابريقة لكن في فيه قايم مفكوك من مكانة يعني الشنطة اتخبطت قبل كده من الجانب الشمال ... وكانت متبهدلة جدا من الداخل لكن بدهان الفابريقة .... والاكصدامات واخدة مسامير بريمة من كل مكان ... بصيت على المكان بين البرابريز الخلفي والسقف ..البرومة مفقعة فقاقيع صغيرة في كذا مكان ... فتحت الابواب ونزعت جلد الباب الخلفي شمال ... الدهان بيلمع نفس اللمعة اللي بره وفي سنة معجون خفيفة باينة على حرف الدهان ...بدأت أقلق خصوصا لما فحصت باب السائق ولقيت على الزاوية اللي تحت الدركسيون دهان محبب ... ولقيته في نفس المكان الناحية الثانية ... لقيت كمان بارومة ورا الأربع دلايات وخصوصا قدام وبتاع الدوكو ماليهم معجون وبج فوق البارومة .... تقريبا أنا قررت إني مش هاشتري العربية دي ..لكن كان عندي شك إن المشكلة مشكلة غشم صنايعي الدوكو مش عيب في العربية ... وعلشان ما اظلمش اصحابها طلبت منهم نرفعها في بنزينة علشان أشوفها من تحت وقد كان وفي الوقت ده كان زوج الست اللي العربية باسمه جه وهو اللي راح معايا البنزينة... العربية من تحت مخبوطة في كذا مكان تحت العتب ... الشكمان ملحوم لحام واحد نضيف ومش مصدي ولا متبهدل ..والشاسيه سليم ومش ملحوم في أي حته ...تقريبا اتاكدت إن المشكلة مشكلة صنايعي دوكو لكن العربية دي مش ممكن تتباع ب 50 ألف زي ما الراجل طالب ولا ب 48 زي مثلها جوة وبره .... وآخرها معايا ممكن يكون 43 ألف على اساس إني أنزل المعجون بالصاروخ وأعمل البارومة اللي فيها وارشها بنضافة وده هيتكلف حوالي ثلاتة آلاف... وكنت سألت صاحبها العربية معاكو من امتي فقال لي من 2004 وبالتالي حصل تضارب بينه وبين زوجته فعرفت إنه ممكن يكون اشتري العربية كده وما يعرفش اللي فيها لأنه مش فاهم يعني إيه العربية فيها معجون حتى لما قلت له إن الشركة ما بتحطش معجون وإن طالما فيه معجون في العربية ما تبقاش فابريكة ...قام قايل لي : والله فابريقة ... قلت له ألف42 راح راكب العربية وهو بيقولي العربية دي ب 50 وغير كده إن شالله عنها ما اتباعت هي لا بتاكل ولا بتشرب ... المهم وهو بيركب العربية قلت له طيب يا حج 43 ألف من الآخر... طبعا سابني ومشي وهو بيبرطم وواضح إنه اتعرض قبل كده للموقف ده لأنه ما كانش طايقني وأنا باتفرج على العربية...
الخسائر اليوم عشرة جنيهات تكلفة رفع السيارة في البنزينة + المواصلات وضياع يوم
تحياتي الخالصة وربنا يكرم في العربية الجاية

[lovely_love]

انت لسة ياما هتشوف المستعمل فيه بلاوى كتير

[د.أبونضال]

انت لسة ياما هتشوف المستعمل فيه بلاوى كتير

ربنا يستر ..أنا زهقت من ثاني عربية ورجعت تاني أفكر في الزيرو القسط

[amrrashed]

اسلوبك جميل فى السرد وتجربتك رائعة

[د.أبونضال]

اسلوبك جميل فى السرد وتجربتك رائعة

الله يكرم حضرتك ... ده بس من ذوقك