هل تقبل التهكم و السخرية من سيارتك-استطلاع

[Ahmed Anwer]

أنا ملاحظ ان الناس بتتضايق جدا لما حد ينتقد سيارتهم

و بيقفوا وقفة جادة مع انتقادها او محاولة التقليل من شأنها

اعتقد النقد الموضوعي واختلاف الأراء و تنوع وجهات النظر دي هدف المنتدي و غرضة

و من اساسيات حرية الرأي

الإختلاف اللي طرحه للنقاش علي اسلوب النقد

اسلوب السخرية و التهكم الصريح

زي العربية الفلانية برقيتها ،

تضربها بالجزمة ،

دي عربية زبالة ،

هيا دي عربية اساسا ،

اكبر مقلب ،

دي مكواة ،

شوية صفيح ،

كأمثلة بس ،،

السؤال الآن هل تقبل السخرية و التهكم علي عربيتك ؟؟

خيارات الإستطلاع

نعم اقبل هيا من بقية عيلتي

سيارتي دي اختياري زي لبسي و سكني و السخرية منها اهانة لاسلوب تفكير مالكيها و قلة ذوق

و محبتشي احط اختيار ثالث محايد زي اقبل لو كان في نطاق النقد الموضوعي و عن خبرة

الموضوع نفسي بحت

و يا ريت كل واحد يحط رايه المحايد و ميبالغشي في ادعاء تكبير دماغه

و تقبله للنقد و السخرية

[kareem_Ashmawy]

لأ طبعا مقبلش
لو نقد بأسلوب محترم .... ماشى
انما لو بقلة أدب...هرصله عيوب عربيته من هنا لبكرة
مفيش عربية مفهاش عيوب...و انا عارق عيوب معظم العربيات
و هختم كلامى انها مش بالعربية باللى قاعد على الدريكسيون

[MoToRiZeR]

ممكن يتريق علي لبسي و شعري و الحتة اللي ساكن فيها و تفكيري و اسلوبي انما العربية لأ .. العربية لأ :boxing_smiley:

[tutankhamoun]

طبعا أقبل و لا أزعل
و ممكن أتناقش مع الناس لو حد قال العربية فيها كذا و كذا
و ممكن أتناقش ...........

إنما أزعل .................. لاءة .......... خالص
اللي عايز يقول يقول ................... هي من بقية أهلي
دي شوية حديد ................. بس طبعا لازم النقد يكون بناء و متحضر

[mohamed2002]

طالما نقد موضوعي وسليم وتطليع القطط الفاطسة وخلاص يبقي اهلا وسهلا ,كل عربية لازم تلاقي فيها عيب حتي ولو كان صغير اوي ,اللي قطع غيارها عالية ,اللي سعر اعادة البيع بتاعها وحش ,اللي منتشره اوي !! ,لولا اختلاف الاذواق لبارت السلع

[CryptonX]

لو تريفة للتريفة موافق طبعا :)
انا اكتر واحد احب اتريق

و لو نقد بناء برده اهلا وسهالا ممكن نتناقش للصبح .

كدة و لا كدة مهما كانت الماركة او الموديل الي بتحبه و بتدافع عنه اوي .. كلها سنوات و تغير لحاجة تانية خالص و حتحس ان " ولائك " كان تعصب لسيارتك مش اكتر .

[Ghamrawy]

لو نقد فاضى مش موضوعى و الغرض منه الاستفزاز حايبقى الرد بتهكم و كلام اصفراوى سم بس من غير زعل برضه
و لو كان النقد موضوعى و بيقول على عيوب موجودة فى كل العربيات اللى من نفس الموديل او عيب جديد ظهر اقبل طبعا و بصدر رحب و اتناقش جدا
من الاخر مبدأ الزعل و التعصب ده مش عندى و الحمد لله،دى كلها حتة حديد ممكن فى ثانية تروح و ربنا يستر

[OlaOsman]

هو عموما السخرية أو التهكم على حاجة خاصة بأي واحد بتضايق.. حاجة من اختياري و مقتنعة بيها، صعب أقبل طريقة حد بيسخر و يتهكم و يتريق عليها.. ماحدش قال لك اشتريها يا سيدي، بس برضه مش من حقك تقلل من قيمة اختياري للأشياء "اللي تخصني".

[Chicco]

و يا ريت كل واحد يحط رايه المحايد و ميبالغشي في ادعاء تكبير دماغه

و تقبله للنقد و السخرية

اللي حيجيب سيرة أي عربية جبتها قبل كده أو كنت بفكر أجيبها أو معايا دلوقتي أو ناوي أجيبها بعدين أو احتمال أفكر فيها أو مش عجباني دلوقتي بس ممكن أغير رأيي فيها بعدين يبقى ذنبه على جنبه
أهو مش مكبر دماغي خالص يا صديقي :)
الجد بقي... النقد في حدود الأدب و الذوق مقبول طبعا و على راسي من فوق كمان

[Ahmed Samy]

دي مكواة ،

لأ لأ عند المكوة و حاسب :embarrassed2:
انت ماتعرفش انت بتشتم ايه

انا المكوة بتاعتي بخار و فيها تسع درجات حرارة غير الشاسيه التيفال

انا أساس عارف كل عيوب عربيتي الحالية و مقتنع انها الأنسب للفترة دي من حياتي

اللي عايز يتريق يتريق

بس العربية الجديدة ..أوعدكوا

ماحدش هايتريق عليها :coolgleamA:

و اللي هايتريق هااا

[PRO-DRIVE]

مفيش اي مشكله ان حد يتريق ولا يشتم

ممكن اتناقــش معاه و دا اللي حيحصل


بس اني حزعل عشان اتريق عليها ولا كدا ,, ابدا في الاخر انا مليش اسهم عندهم :)


غير كدا اغلب اصحابي من المنتدي هنا شركات عربياتهم انا مش بحبها و بتريق عليها كتير

[cobraa2008]

بصراحة حاتبقى حسب
واحد صاحبك بيتريق وما عندهوش عربية وده تديلوا على نفخه واقعد اتريق انت عليه وعلى العربية اللي هيا موش معاه
واحد بيتريق على العربية بس تريقة ونقد بناء وهو معاه احسن ولاكن فيها عيوب لا نقعد ونستمع لبعض وكلنا نستفييييييييييد

[Ahmed Anwer]

الجد بقي... النقد في حدود الأدب و الذوق مقبول طبعا و على راسي من فوق كمان

ما هوا ده السؤال ،،

الأدب والذوق معاك يا دكتور أو مع أي شخص

ده امر مفروغ منه ،، و منصوص عليه في قواعد المنتدي و قبلها في قواعد الدين و قواعد الأخلاق

لكن الأدب و الذوق مع العربية بقه ؟؟؟

لأ لأ عند المكوة و حاسب :embarrassed2:
انت ماتعرفش انت بتشتم ايه

حظي السئ ،،

أنا مش قصدي خالص علي اللانسر ،،

فيه عربية تانية بيتقال عليها مكواة أو أحيانا كشك ،،

فهمتني غلط

مع الإعتذار لديه و ديه

بصراحة حاتبقى حسب
واحد صاحبك بيتريق وما عندهوش عربية وده تديلوا على نفخه واقعد اتريق انت عليه وعلى العربية اللي هيا موش معاه
واحد بيتريق على العربية بس تريقة ونقد بناء وهو معاه احسن ولاكن فيها عيوب لا نقعد ونستمع لبعض وكلنا نستفييييييييييد

أمممم ،،
اه ده اكتر رأي يا كوبرا باشا انا مختلف معاه ،،

يعني اللي معاه ( مش عارف بقه احسن عربية في العالم تكون ايه لو موجودة ) يتريق علي خلق الله كلهم و يبقي ده حقه ،،

و الغلبان ميفتحشي بقه

[som3aa]

لو الكلام موضوعى و فعلا اللى بينتقد بيقول على حاجة حقيقية فى العربية يبقى طبعا مزعلش و لا اى حاجة دى قطعة حديد الواحد بيغيرها كل مدة بس برده دى بتعكس زوقه زى اللبس , انما كلام فارغ مرسل و لا حد يقول دى كورى و طالما كورى يبقى مش اوى و الكلام الفارغ دا لأ طبعا.
لو واحد مش عاجباه شكلا اهلا و سهلا , يعرف حد عنده العربية فيها عيب معين اهلا و سهلا انما فتى بقا و مقارنتها بعربيات تانية فى فئتها متجيش ربع الoptions اللى فيها و لا ربع قوتها علشان المانى يبقى دا لأ طبعا مسكتش

[hazem_khidr]

انا عن نفسي اقبل النقد و عادي اصل لا اول ولا اخر عربيه حركبها يعني.
انما يتريق علي اساس ايه العربيه القديمه اللي انت راكبها دي
او يا راجل هو حد لسه بيركب المشنات دي لحد دلوقتي
او هيا دي عربيه انت تروح تحطها جنب الحيط
دا بيبقي الرد عليه باسلوب تاني خالص
ابسط حاجه بقوله انت راكب عربيات بقالك كام سنه علشان تيجي تتكلم معايا كده
و للعلم اي واحد راكب عربيات طول حياته عمره ما بيتريق علي عربيه
حد بالاسلوب التاني انما ممكن ينتقد حاجات معينه من العربيه .

و هختم كلامى انها مش بالعربية باللى قاعد على الدريكسيون

يا كيمو يا جاااااااااااااااااااااااامد
ايه الحلاوه دي
كلمه في الجون