إستفتاء : بتاكل اللي يعجبك و بتركب اللي يعجب الناس ؟؟

[Ahmed Anwer]

جاتلي فكرة الموضوع ده

من نصيحة أخونا الكبير ، المشرف العام ،، م/ سبعاوي ل أ/ وائل عطية إنه لما يجيب عربية يخليه في المضمون أو العربيات المنتشرة ،،

زي اللانسر و الماتريكس و الصني في الفئة اللي كانوا بيتكلموا عليها

فكرني بالمثل الشعبي كل اللي يعجبك و البس اللي يعجب الناس ،، مع التحوير

و دي وجهتين نظر مختلفين ،، أجيب العربية اللي كل الناس بتجيبها و خلاص و لا أجيب العربية اللي تعجبني أيا كان حجم إنتشارها ،، كل فريق ليه وجهة نظره ،،

الفريق الاول أسبابه :_
1- إنتشار العربية يضمن سهولة الصيانة و توافر قطع الغيار و إعادة البيع
2- العربية المنتشرة يعني عربية اثبتت وجودها ،، هتبقي كويسة علي الأقل
3- العربيات الجديدة كلها الفروق بينها بسيطة لو في نفس الفئة ايه اللي يخلني أدوخ نفسي بعربية نادرة

الفريق الثاني أسبابه :_
1- التميز
2-مش معني إن العربية منتشرة إنها كويسة و في أمثلة كتير
3- إعادة البيع بعدخمس سنين مش بتفرق و انا مش هانقي عربية للي هيشتريها من بعدي

يا ريت تقولوا أرائكم و تجاربكم الشخصية ،، بالأسباب من وجهة نظركم

[ezshereef]

أعتقد ده هيرجع للشخص إذا كان بيحب يغير العربية على طول واللا يخلي العربية تعمر معاه.

[معاذ الشرباصى]

عن نفسى احب اركب العربية اللى تعجبنى بغض النظر عن اراء الناس

مش بحث عن التميز, بقدر ما هو اقتناع بالسيارة و امكانياتها و توافر قطع غيارها و امكانية الصيانة (مش فارقة اوى عن طريق الوكيل او بره, المهم تكون موجودة)

و ممكن يصادف ان العربية اللى تعجبنى هى اللى بتعجب الناس

سعنى مثلا انا بحب الميجان الهاتشباك جدا, و رغم عدم انتشارها خالص, الا انى لو امكن لى اجيبها, هجيبها بدون تردد

[abo3bdolrahman]

لأ طبعا أركب اللى يعجبنى و آكل اللى يعجبنى و إن شاء الله ما عجب حد المهم تعجبنى أنا و بس :lol:

[sab3aawy]

فى المستعمل كنت دايما بركب اللى على قد فلوسى وبالصدفة كان بيبقى هو اللى ماشى،

بالنسبة لل 3 سيارات زيرو اللى جبتهم فدول حكايتهم كانت غريبة شوية

اول عربية زيرو جبتها كانت لانوس، انا كنت عايز اجيب اكسنت لكن لما ركبت دى ودى حسيت ان فرق الإمكانيات اكثر بكثير من فرق السعر(كان 4 جنيه وقتها) فقررت اجيب اللانوس برغم انها مكانتش منتشرة قوى بالمقارنة بالأكسنت وقتها(كان رقم شاسيه سيارتى قرب العشرين الف بعد سنة ونص من وجود السيارة فى السوق) لكن كيرف البيع كان بيقول انها هتزروط ، وقد كان

تانى عربية زيرو جبتها كانت الشاهين ، وللمرة التانية كان الإختيار بين الأكسنت والشاهين على قد فلوسى وقتها، بس انا رفضت الاكسنت لسبب غريب جدا، انا وقتها كنت نازل من لانوس لضيق ذات اليد، وكانت دايما الأكسنت بتتقارن باللانوس على انها اقل منها، فرفضت اركب الاكسنت وقلت اركب حاجة تانية مش بتتقارن بدول خالص

تالت عربية زيرو هى الصنى، والصنى بصراحة عاجبانى من قبل ما يبتدوا يجمعوها فى مصر، لكنها كانت دايما بعيدة جدا عن امكانياتى، وحصلت المعجزة، والصنى رخصت وانا جالى فلوس وقربنا من بعض ، وبرغم اننى فى لحظة الجد عملت مقارنات بينها وبين سيارات نفس الفئة لكن القلب كان ميال لها من الأول، واشتريتها برغم ان يوم ما اشتريتها كانت بعيدة عن الأنتشار(رقم شاسيه سيارتى اربعة آلاف وشوية) وقلت مش مهم الإنتشار بس انا عايز دى، وسبحان الله، زروطت وبقت مالية الشوارع

[hazem_khidr]

م رط العربيه تنتشر علشان الواحد يشتريها.
هيا العربيه بتنتشر ازاي؟؟؟مش لما انت و انا و هو نشتريها و نركبها و يبدأ الطلب عليها يزيد و ساعتها تبقي منتشره.
الواحد يجيب العربيه اللي علي مزاجه و هو و حظه.
بس اكيد في عوامل تانيه بتحكم الموضوع دا زي غلاء قطع الغيار لموديل معين و عدم اعتماديته بتخلي الواحد لو حابب العربيه و عاوزها يصرف نظر عنها علشان ما تقرفوش

[Ahmed Anwer]

هيا العربيه بتنتشر ازاي؟؟؟مش لما انت و انا و هو نشتريها و نركبها و يبدأ الطلب عليها يزيد و ساعتها تبقي منتشره.
الواحد يجيب العربيه اللي علي مزاجه و هو و حظه.

مش حظوظ أوي في ماركات معينة معروف إنها منتشرة و الناس بتقبل عليها ،، زي الهيونداي و الميتسوبيشي و التويوتا
يعني بتبقي مفقوسة برده من أول ماتنزل

Red_Colorz_PDT_18 Red_Colorz_PDT_18 :P

[hazem_khidr]

هيا العربيه بتنتشر ازاي؟؟؟مش لما انت و انا و هو نشتريها و نركبها و يبدأ الطلب عليها يزيد و ساعتها تبقي منتشره.
الواحد يجيب العربيه اللي علي مزاجه و هو و حظه.

مش حظوظ أوي في ماركات معينة معروف إنها منتشرة و الناس بتقبل عليها ،، زي الهيونداي و الميتسوبيشي و التويوتا
يعني بتبقي مفقوسة برده من أول ماتنزل

Red_Colorz_PDT_18 Red_Colorz_PDT_18 :P

معاك يا احمد باشا
لكن عربيه زي الماتريكس مثلا مش من الفئات المحبوبه للشعب المصري ولكن اخدت نصيبها من السوق و اصبحت منتشره.

[PRO-DRIVE]

لأ طبعا أركب اللى يعجبنى و آكل اللى يعجبنى و إن شاء الله ما عجب حد المهم تعجبنى أنا و بس :lol:

+100000 8) ;)

[Ahmed Anwer]

لكن عربيه زي الماتريكس مثلا مش من الفئات المحبوبه للشعب المصري ولكن اخدت نصيبها من السوق و اصبحت منتشره.

لأ في دي معاك حق دي مالهاش تفسير غير إن غبور ده ساحر بيبيع أي حاجة :mrgreen: :mrgreen:

يأما الناس بقت تشوف هيونداي منزلة ايه و تشتريه و خلاص علي إعتبار إنها الماركة الإقتصادية الأولي في مصر حاليا

ده حتي الإفانزا و اسمها تويوتا و سبعة راكب و حركات و السكودا رومستر معملوش مبيعات تذكر

[fahd_628]

اشتري العربية اللي تعجبني بغض النظر عن إنتشارها بس مش اكون الوحيد فى مصر :mrgreen:

[modux]

اشتري الكويس و شكله حلو ( لازم تكزن عاجبني ) و صيانه سهلة

[Heshaam]

اشتري الكويس و شكله حلو ( لازم تكون عاجبني ) و صيانه سهلة

وعلى قد إمكانياتي

[MMamdouh]

انا كدة كدة حركب اللى يعجبنى مش اللى يعجب الناس لان دة اختيارى و فلوسى و مزاجى و لما حاخد راى الناس حيبقى فى الاختيارات اللى انا رشحتها لنفسى

بس حختار من العربيات المضمونة برضة لانى مش عايز اجيب عربية و اركنها شهر لانى مش لاقى سير كاتينة فى السوق و اضطر استوردة من برة و يقف عليا بمليون جنية و 40 قرش... الا اذا كنت غنى جدا و عندى كذا عربية و متفرقش معايا العطلة او الفلوس

MMamdouh

[CryptonX]

انا كدة كدة حركب اللى يعجبنى مش اللى يعجب الناس لان دة اختيارى و فلوسى و مزاجى و لما حاخد راى الناس حيبقى فى الاختيارات اللى انا رشحتها لنفسى

بس حختار من العربيات المضمونة برضة لانى مش عايز اجيب عربية و اركنها شهر لانى مش لاقى سير كاتينة فى السوق و اضطر استوردة من برة و يقف عليا بمليون جنية و 40 قرش... الا اذا كنت غنى جدا و عندى كذا عربية و متفرقش معايا العطلة او الفلوس

MMamdouh

واه حسرتاه !