اتنصب عليا ودي حكايتي عشان الناس تستفيد

[amr_lamor]

السلامو عليكم
انا كنت بدور على عربيه من فتره كبيره وكنت مش لاقي..طبعا كنت متابع النت و السوق والحاجات دي وكانت كلها حاجات مضروبه... وعلى فكره نصيحتي لأي حد ميحاولش يشتري من السوق..المهم كنت زهقت من كتر التدوير...و في يوم لقيت اعلان على كونتكت بتاع سبكترا كلمت الراجل قاللي العربيه رشه جنبين واستعمال اطباء و هو دكتور والكلام ده....رحت شفت العربيه وكانت الفلوس في جيبي المهم لما رحت هو قعد يتكلم و يرغي وانا مبصتش عدل عالعربيه المهم قولت اخدها على بنزينه في اول شارع بتاع رابعه العدويه عاليمين...رحت رفعتها قالولي علي فيها وكلها حاجات غير مؤثره...المهم الراجل قاعد يحلفلي بالله و بحياه ابنه ان العربيه مفهاش حاجه و ان هو قاللي على كل اللي فيها والكلام ده وانا استنضفتو دكتور بقى و عمال يحلف وبتاع و اشتريتها في نفس الوقت...حتى وانا بشتريها كنت عارف اني مبصتش كويس..بس قولت الراجل محترم ...المهم خدت العربيه وبعدها بيومين رايح اعمل حاجه في الميكانيكا لقيت الميكانيكي بيقولي فيها ستاره مرشوشه!!!!!!!!!!! طبعا خدتها و جريت عالمعارض قالولي فيها ستاره و فرده يمين و قوايم يمين مرشوشه كلمت .....اللي باعلي العربيه قاللي انا معرفش,ايه الكلام اللي بسمعه ده,ازاي ....قولتلو انا عايز ارجع العربيه ..قاللي الفلوس اتصرفت و بعدين قاللي انت مش شفت العربيه دي مشكلتك مع البنزينه...كل واحد عايز يحلل فلوسه يقول شويه كلام اهبل هو متأكد من جواه انه غلط..بس النصاحه بقى..المهم قعدت اسبوعين اتفاوض معاه وهو يماطل .. ومن بروده يقولي بيع العربيه..اقولو نتشارك في الخساره لما ابيعها يقولي ربنا يسهل..اقوله دي فلوس ورثي وانا في بدايه حياتي يعض يحكيلي عن مشاكله وان ابوه ميت...المهم قاللي خلاص انا هشتري منك العربيه ب 35 مع العلم اني كنت مشتريها منه ب 42 من اسبوع!!!!!!!!!!!!! قاللي اصلي هستلف الفلوس من صاحب المركز اللي شغال فيه عشانك واحنا مسلمين وانت اخويا كلام النصابين بقى ومنتهى الأستفزاز في طريقته....المهم هيا مكانتش جايبالي غير 33 قولتلو ماشي...بس عملت استخاره قولت مبيعاش...... حتى لو هخسر قابلتو عشان يشتري قولتلو انا عايز 2000 جنيه قاللي انت كده بتبخسلي بيعتي قولتلو امال انت بتعمل ايه؟؟؟؟؟؟؟؟؟؟؟ قاللي انا هروح شويه و هاجي طبعا ولا جه ولا اي حاجه..المهم انا حقي عند ربنا لأني بعتها ب 33 وكل طلبي ان الناس اللي تقرا الحكايه تدعي عليه لأني مش مسامحو و ان شاء الله تتردلو فيه مش عايز اقول ابنه بس يارب تترد فيه وربنا ينتقم منه
طبعا انا بحكي باختصار شديد لو حكيت بالتفصيل انا اصلان هيجيلي شلل من حرقه الدم.
شكرا و الحمدلله على كل شئ :)

يرجى مراعة اداب الحوار
11:55pm 27/5/2010
مشرف القسم 9ب

[tareKnokia]

انا تعلمت من هذه الدنيا اني ما اثق في احد مهما كان

[hugan]

ربنا يعوض عليك في الخساره اكيد قبل ما حد يشتري عربيه مستعمله لازم يكون معاه حد بيفهم قوي ويكون عنده ضمير
المستعمل في مصر من اكبر الاسواق اللي فيها نصب
90/منتجار المستعمل مكسبهم من ارتجاع العربيه يعني تكون شاريها ب10000 تكتشف عيوبها رجع وسيب 3000 وهكذا
ما اعرفش الناس دي ازاي تقبل علي نفسها الفلوس الحرام المشكله انهم مش قليل تقريبا كلهم نصابين

[Mohamed-Saoud]

ربنا يعوض عليك.

بس اللي كشفوا عليها في البنزينه ربنا ينتقم منهم... انت عملت اللي عليك بس هما اللي دبسوك فيها بجهلهم

[n_i_t_e]

ربنا يعوض عليك فعلا حاجة تزعل. و أصبر ربنا يعوضك خير...أنا كنت قبل كده أجيب مستعمل بس عشان مبقاش عندي ثقة فى حد عدلت من مدةو قررت أجيب زيرو..كل واحد يغش فى بضاعته و فاكرها "شطارة"

[mr_sameh]

ربنا يعوض عليك وياريت تكون اكتر حرص بعد كده

[al_manara]

ربنا يعوض عليك .زمان حصلي موقف شبهك كدة واحد جيبتة يبص عي العربية وللاسف انا ما اهتمتش اوي ووثقت فية جدا ان لو فيها اي حاجة هايقولي المهم قالي تمام . وبعد ما اشتريتها عرفت انها رشة الكارتيرة الي قدام وجزء من الشنطة . وبعدها بعتها .واتحرق دمي برضة. بس المفروض انك تبص كويس علي العربية . ببساطة جدا العربية قدامك قلب فيها زي ما انت عاوز ولو فيها اي حاجة شاكك فيها ابعد عنها . وسيبك من كلام البائع خالص لو عمل قرد مالكش دعوة . حط عين في وسط راسك .
تاني حاجة ممكن يكون الي انت اشتريتها منة يكون شربها واول ما عرف باعها .
انا مش بدافع عنة لان اتلسعت برضة قيل كدة وحاسس احساسك لانة صعب اوي .
ربنا يعوض عليك ويوفق في واحدة احسن منها
حسبي الله ونعم الوكيل في كل واحد ماعندوش ضمير

[jojooo]

محدش بيتعلم ببلاش خدها كدة انك اتعلمت من اللى حصلك
وياما اتنصب علينا فى التصليح وقطع الغيار والسمكرة والدكو والشراء فى كل حاجة مش فى العربيات بس
وشكرا على الموضوع دة هايعلم ناس كتير وانا اولهم

[hobaz]

ربنا يعوضك ويخاف عليك بالخير وصدقني لو الحكاية ده بجد ربنا مش هيسيبوه لو مش في الدنيا يبقى في الأخرة...

[kasten]

سبحان الله .. كلهم بيقولو وحياة ابنى
انا اللى اشتريت منه العربيه قالى كده برضو
سبحان الله

[PoweRPassioN]

محدش بيتعلم ببلاش
ربنا يعوض عليك
ويكفي انك اتحسبنت عليه
وردد دائما ""اللهم أجرني في مصيبتي وأخلف على خير منها""
وسيحدث ما يسرك بالتأكيد بأذن الله

[mahmoudselim]

حضرتك بتقول انك شاريها منة ب 42 الف!!!!! دا مش سعرها في السوق حضرتك اعذرني في الكلمة "استرخصت"سعر العربية دي اوتوماتيك علي حسب ما اعرف بيبتدي من 48 الف السيفيا ممكن تعمل 42 الف سبكترا استحااالة الا لو فيها حاجة.
غير كدا مش عارف ممكن لما تعرف ان في تجار معرفة واتنصب عليهم في اكتر من عربية وبقالهم في السوق اكتر من 15 سن وفي تاجر والله اشتري عربية وطلعت (بص ال جاية دي) رخضتها مضرووووبة .. يعني ال قصد ان مش انتا بس ويمكن الحكايات دي تخفف من عليك شوية

[fellacd]

أولا : حضرتك شتمت الراجل كذا مرة والأسلوب ده لا يليق بالمنتدىحتى لو كان هو غلطان لكن إنت كده بتعلم القراء الخروج عن الآداب العامة والشتيمة
ثانيا : ممكن يكون هو اشتراها كده زيك من غير ما يعرف العيب اللى فيها والدليل على كده إنه سابك ترفعها فى البنزينة وتاخد راحتك فى فحصها من غير ما يمانع يعنى هو معندوش ذنب.
ثالثا: حضرتك فعلا استرخصت وأكيد قلت فى بالك دى لقطة وأرخص من تمنها الحقيقى بكتيير والراجل ده مش عارف حاجة والدليل إن حضرتك دفعت الفلوس فورا من غير تأنى ولا استشارة لأنك قلت فرصة قبل ما الراجل ياخد باله
رابعا: حضرتك بعتها ليه بالخسارة ؟؟ كان ممكن تستعملها فترة على عيبها طالما مش عاملة لك مشاكل من غير ما تبيع ولا تخسر .. حتى لو فكرت تبيعها تبقى استفدت بيها شوية وعوضت فرق السعر

[amr_lamor]

شكرا لأعضاء المنتدى بجد على كل حاجه..على فكره ده تمنها و اقل من كده كمان..انا اصلا وانا بشتريها عارف انها غاليه قدامي متباعه عربيتين واحده ب 40 رشه جنبين وواحده ب 43 فبريكه بره و جوه...تاني حاجه يا استاذ ياللي كاتب اولا وثانيا و ثالثا انا كده مبشتموش وبعدين انت مش حاسس بيا عشان كده كتبت الخطوات بتاعتك...انا عارف ان انا غلطان ووثقت بطريقه متنفعش بس ده ميشيلش جانب الحرمانيه اللي هو عملها وبعدين هو لو اشتراها زيي يبيعها بالطريقه دي...والله انا لما جيت ابيعها كان اللي ميشوش اللي فيها اروح اوريهولو عشان ميحصلش فيه زي اللي حصلي ... اصل هيا الحياه مش فهلوه...وبرضه انا بقول انا غلطان و البنزينه غلطانه بس اكتر واحدد غلط هو اللي باع العربيه ربنا ينتقم منه.

[tarek elbadry]

ربنا يعوض عليك
وربنا يهدية