ساجا ولا بريليانس ولا اسبرانزا ولا رينو ولا لانوس ؟

[kimotop]

السلام عليكم

معلش يا جماعة مينفعش نعمل استفتاء لاني محتار جدا وبتزيد حيرتي اكتر كل ما اقرأ المقارنات خصوصا ان القيمة السعرية الي هتكلم فيها بتحصر الاختيارات بين مجموعة عربيات متشابهة جدا

وقرأت كتير وللاسف موصلتش لحاجة

انا بتكلم عن عربيات بقيمة من بين 65 ل 75 الف جنية وطبعا وانتوا سيد العارفين ان اشهر العربيات في المجموعة دي والي انا محتار بينهم كالاتالي وان شاء الله اجيب عربية منهم

بروتون ساجا
بريليانس fsv
اسبرانزا m 11
رينو لوجان
لانوس

يمكن في انواع تانية بس هم دول الي انا بختار بينهم
فيا ريت اوصل معاكم لحل خصوصا اني لمست في منتداكم الجميل ان ما شاء الله معظمكم على دراية جيدة بعالم السيارات

وشكرا

[MOUSTAFA_SAAD]

تانى

مواضيع المقارنات ماليه المنتدى وللاسف كل واحد بيتعصب لعربيته وفى الاخر الموضوع بينتهى بايقاف عدد لاباس به من الاعضاء
انصحك دور بنفسك فى كل قسم واعرف العيوب والمميزات واعرف احتياجاتك الاول من العربيه
بس انا عموما عندى عقدة الصينى

[kimotop]

تانى

مواضيع المقارنات ماليه المنتدى وللاسف كل واحد بيتعصب لعربيته وفى الاخر الموضوع بينتهى بايقاف عدد لاباس به من الاعضاء
انصحك دور بنفسك فى كل قسم واعرف العيوب والمميزات واعرف احتياجاتك الاول من العربيه
بس انا عموما عندى عقدة الصينى

اهلا وسهلا بيك
انا تابعت المنتدى وشوفت فيه كتير حتى انت شوفتلك مشاركات كتير وتقريبا فيها مشاركات بتحمل نفس معنى مشاركتك دي
انت فعلا عندك حق
كل واحد بيتعصب لعربيته او على الاقل مش عايز يحس انه دفع فلوسه في حاجة مش كويسة
وانا مؤمن جدا ان كل عربية فيها مميزات وعيوب واكيد مفيش شركة هتنزل عربية فيها كل حاجة وبالسعر دا
دا حتى البي ام والمرسيدس ممكن نسمع عن عيوب فيها

انا بس هسألك سؤال محدد ليه عندك عقدة من الصيني لاني شايف سوقه ماشي برغم التحذيرات
وبيني وبينك انا ميال جدا للساجا الاوتوماتك وعايز بس اطمن

وشكرا لاهتمامك

[amr.elsayed]

وبيني وبينك انا ميال جدا للساجا الاوتوماتك وعايز بس اطمن

يبقى الموضوع مكانه قسم بروتون وزى ما انت عارف كل عربية لها مميزاتها وليها عيوبها
وانا معايا لوجان وبقولك ابعد عنها وشيلها من المقارنة علشان لو اشترتها حيتحرق دمك كل شوية

[HanyHanyHany]

ساجا

اهلا وسهلا بيك
انا تابعت المنتدى وشوفت فيه كتير حتى انت شوفتلك مشاركات كتير وتقريبا فيها مشاركات بتحمل نفس معنى مشاركتك دي
انت فعلا عندك حق
كل واحد بيتعصب لعربيته او على الاقل مش عايز يحس انه دفع فلوسه في حاجة مش كويسة
وانا مؤمن جدا ان كل عربية فيها مميزات وعيوب واكيد مفيش شركة هتنزل عربية فيها كل حاجة وبالسعر دا
دا حتى البي ام والمرسيدس ممكن نسمع عن عيوب فيها

انا بس هسألك سؤال محدد ليه عندك عقدة من الصيني لاني شايف سوقه ماشي برغم التحذيرات
وبيني وبينك انا ميال جدا للساجا الاوتوماتك وعايز بس اطمن

وشكرا لاهتمامك

الساجا الاتوماتيك احسن اختيار توكل على الله واستخير وهاتها

[sayed911]

لو حضرتك ها تبص على اوتو يبقى ملكش غير ساجا !!!
انما لو فتحت وبصيت بقى على مانويال ها اقولك هنا اختار حضرتك تعجبك ولكن الحاجة الوحيدة اللي تشجعك هيا الساجا اوتو في الفئة دي !!! والأوتو بتاعها يستاهل بصراحة

[kimotop]

ربنا يكرمكم يا جماعة
انا فعلا قناعتي بتزيد بالساجا خصوصا بعد مشاركتكم
وربنا يبارك لكل واحد في عربيته و يكفيه شرها ويرزقه خيرها

[bassem.naguib]

المفروض حضرتك تحدد أنت عاوز أيه من العربية بالظبط .. هل هي استخدام أسرة .. أم استخدام شاب .. بتسافر كتير .. مصاريف تشغيلها (استهلاك البنزين ... قطع الغيار ..إلخ) .
وبما أن حضرتك ميال للأتوماتيك .. يبقى حتستبعد الاسبرانزا واللوجان واللانوس من الاختيارات .. حيتبقى البريليانس والساجا اللي بيبقى فيهم أتوماتيك .. وأرشح ليك إضافة byd أتوماتيك للمقارنة .. وده لينك فيه تقرير عنها
http://www.nilemotors.net/Nile/220537-byd-f3.html

[Ghosts]

يبقى الموضوع مكانه قسم بروتون وزى ما انت عارف كل عربية لها مميزاتها وليها عيوبها
وانا معايا لوجان وبقولك ابعد عنها وشيلها من المقارنة علشان لو اشترتها حيتحرق دمك كل شوية

طب ممكن نعرف من حضرتك أية هى المشاكل اللى قابلتك مع اللوجان ؟

[MaZaGAngeE]

لانوس : لو انت عايش في الأقاليم و ده بسبب ان العربية منتشرة هناك و الصنايعية فهموها و قطع غيارها كتيرة و رخيصة .
لوغان : لو انت عايش في القاهرة أو اسكندرية لأن العربية انتشرت فيهم و الصنايعية عرفوا العربية .و قطع الغيار بقت موجودة .
ساجا : لو انت مش فارق معاك الانتشار و لا قطع الغيار .... يعني لازم تكون غاوي التوكيل .
بريليانس أو اسبيرانزا : أنا مش بفضلهم و لكن دي أزواق

[SALLAM569]

يبقى الموضوع مكانه قسم بروتون وزى ما انت عارف كل عربية لها مميزاتها وليها عيوبها
وانا معايا لوجان وبقولك ابعد عنها وشيلها من المقارنة علشان لو اشترتها حيتحرق دمك كل شوية

يتحرق دمه ليه انا اول مرة اسمع الكلمة دى !!!!
ممكن تكون عربيتك فيها حاجة او عملت حادثة مثلا يعنى لو عربيتك عاملة حادثة لازم يتحرق دمك كل شوية لأن عمرها مهترجع زى الأول تانى يا راجل دة الورقة لما بتتكرمش عمرها مبترجع زى الأول تانى ما بالك الحديد و الصاج ...
او ممكن تكون معكش لوجان اساسا و بتكتب كلام فى الهواء و خلاص ..
بص انا العربية مستلمها فى 26\1\2011 و باسم الله ما شاء الله رااااااائعة فوق الوصف و اقتناعى بيها و حبى لها بيزداد يوم بعد يوم و ببقا عاوز المشوار يطول علشان افضل راكبها و استمتع بسواقتها بصراحة عربية رائعة و صفقة ناجحة لمصر و ناعمة فوق ما تتخيل و عفشتها اكانك جالس على ريشة و واسعة و ثابتها على السرعات العالية راااااائع و سحبها فوق الممتاز و عالية عن الأرض و انا شايف ان ارتفاعها عن الأرض اللى بشكل مش طبيعى ميزة خصوصا فى شوارع مصر اللى مليانة نقر و مطبات فى كل حتة و مش مأثر على ثبات العربية اطلاقا انا جبت بيها 180 و كانت ثابتة و كنت بغرز بيها على 140 و مقلتش لأ و الأبشنز بتاعتها رائعة و تكيفها محترم..
هاتقولى بس موتورها 8 صباب 90 حصان هقولك مش مأثر على اداء العربية اطلاقا ولا على سحبها انا جبت بيها 100 على التالت و 150 على الرابع و 180 على الخامس اعتقد ان مفيش سحب اكثر من كدة ....
انما صالون العربية فيتميز بالبساطة مع مواد محترمة جدااااا ..
صاج العربية محمل و لله الحمد و قفلة الباب محترمة جداااا ..
و بعدين العربية نازلة بقلها سنتين فقط و مع كل ذلك انتشرت و اكتسحت السوق و خلصت من السوق فجابوا دفعة اتحاد اوروبى و بمجرد انهم اعلنوا عنها خلصت و فى ناس منتهزة الفرصة و ان مفيش لوجان فى السوق فاللى عنده عربية او اتنين بييبعها على الأقل 73000 جنيه و دلوقتى مفيش غير مغربى و تحجز و تستلم فى شهر 8 لأن نسبة الحجز عليها كتير جداااا و مع ذلك الناس بتحجز برضه ...
توكيلها محترم للغاية و يعد من افضل التوكيلات فى مصر و بيحل اى مشكلة فى العربية بسهولة تامة و مش بياخد منك مليم طول ما العربية فى فترة الضمان ...
العربية بسيطة جدا و يسهل على اى ميكانيكى انه يشتغل فيها لأنها غير معقدة مثل باقى الرينو ....
العربية نزلها قطع غيار خارج التوكيل و متوفرة و اعضاء اللوجان المحترمين قالوا على اسماء المحلات فى مختلف المحافظات و قالوا على ارقام تليفونات هذه المحلات و نزلها قطع غيار استعمال خارج فى السويس ...
و على فكرة احنا مكبرين دماغنا خلال فترة الضمان ( 3 سنوات او 100 الف كيلو ) و بعد هذه الفترة هنلاقى قطع الغيار متوفرة و مرطرطة زى الانوس و ربنا ميجعلنا نحتاج لقطع غيار و يهدى لوجى ....
و بعدين رينو و وكلاء eim مش هينزلوا عربية غير و هما واثقين انها هتحقق نجاح و مش هتبوظ سمعتهم و بالفعل العربية حقت نحاج باهر و الكل اجمع انها عربية محترمة سواء اللى معاه لوجان و اللى ممعهوش ...
بذمتك مش دة دليل على انها عربية ناجحة و انت عاوز ايه اكثر من كدة فى عربية بالسعر دة ....
انما بخصوص الساجا فأنا معرفش عنها حاجة لأن مفيش غير عربية او اتنين اللى بيلفوا اسكندرية كلها بس اللى اعرفه ان توكيل عز العرب له سمعة سيئة جدااااا و مش موفرلها قطع غيار بس انا شايف انها محترمة برضه بس مركبتهاش شفتها شكلا فقط ...
فى النهاية انا قولت وجهة نظرى عن العربية و بكل صراحة و بدون تحيز و ربنا يعلم و شاهد على كل كلمة بقولها و خوش على قسم كل عربية فيهم و قارن بنفسك و تقبل تحياتى و اسف على الأطالة ..

[SALLAM569]

طب ممكن نعرف من حضرتك أية هى المشاكل اللى قابلتك مع اللوجان ؟

بالضبط كدة قول المشاكل اللى قابلتك مع العربية و يا ريت تبقى المقارنة بموضوعية شوية و منتكلمش كدة و خلاص و اتقى الله يجعل لك مخرجا و تأكد انك لو قولت على مشكلتك هحاول اساعدك انا و اعضاء اللوجان بقدر الأمكان و مش عاوزك تزعل منى و تقبل خااااااااالص تحياتى ....

[kimotop]

متابع ....

بصو يا جماعة الصراحة انا متابع كل عربية من العربيات دي ومتابع مشاركتكم ومواضيع كل عربية

وسألت ناس راكبين بعضها
فمثلا اسبرانزا سالت سواق تاكسي كان بيغسل عربيته في مغسلة وانا بغسل عربيتي وقولتله اسبرانزا عاملة ايه معاك وقالي
العربية تحفة التحفة وكل حاجة فيها ليها سنسور وناعمة وبلف بيها طول النهار مبحسش اني سايق

اللانوس مع واحد صاحبي وقالي
انها عربية ناعمة جدا وقطع غيارها متوفرة بس عيبها انها واطية و كل شوية يغيرلها الشكمان علشان الخبط في المطبات دا غير شكلها القديم

البريليانس
معرفش حد معاه بس زيها زي اي عربية صيني فيها تكنولوجيا عالية و كماليات كتير بس صيني

الرينو الوجان
حلوة وناعمة وعالية وصاجها كويس بس قطع غيارها غالية دا غير شكلها كلاسيكي شوية وفقيرة في التكنولوجيا مش زي اسبرانزا مثلا

بروتون ساجا
الصراحة نادرة ومش بلاقيها كتير زي الوجان مثلا او الانوس بس قرأت عنها وانها ماليزي وفي القسم المخصص ليها هنا ناس كتير بتشكر فيها لكن بتشتكي من التوكيل الرسمي و بيفضلوا صيانتها بره وبردو فقيرة في التكنولوجيا

انا زي ما احد الاخوة سأل كدا عايزها في ايه واحتياجاتي
الصراحة انا مش جراي اوي يعني سواقتي هادية واصلا اصلا في مصر مفيش مجال غير انك تبقى هادي وبارد لدرجة اني ساعات لما بجيب الرابع بحس اني اتبرجلت لاني مش متعود على السرعة غير بقى لو على الدائري او الصحراوي او اكتوبر ودا كلام تاني لكن انا بتكلم علشان معظم مشاويري داخل القاهرة والجيزة
وطبعا اسرية
حكاية البنزين مش مهم انا متعود على الكع في البنزين
عايز عربية تكون مستعدة للاضافات يعني مثلا اركب على الكراسي من ورا شاشات ال سي دي علشان الاولاد اضيفلها مثلا جي بي اس مكان للمسند مكان للموبايل والكلام دا

فهل من افادة ؟
وشكرا

[amr.elsayed]

بالضبط كدة قول المشاكل اللى قابلتك مع العربية و يا ريت تبقى المقارنة بموضوعية شوية و منتكلمش كدة و خلاص و اتقى الله يجعل لك مخرجا و تأكد انك لو قولت على مشكلتك هحاول اساعدك انا و اعضاء اللوجان بقدر الأمكان و مش عاوزك تزعل منى و تقبل خااااااااالص تحياتى ....

اه طبعا زعلت منك جدا
ايه الاسلوب دة .. ومساعدة ايه اللى حاخدها منك بعد الاسلوب اللى انت كلمتنى بيه دة
وموضوعيه ايه اللى حتكلم بيها اذا كان حضرتك لم تذكر اى عيب من عيوب العربية .. فين الموضوعية !!
وعلشان سعادتك تعرف اد ايه انك متسرع فى الحكم على الاخرين انا ماعنديش مشاكل فى العربية
وحرقة الدم بتيجى من الكلام اللى بيتقال على العربية مش من عيب فى العربية
ولعلمك الاسلوب اللى بتتكلم بيه دة احد الاسباب اللى بتجعل ناس كتير متحفزة لاى موضوع يجى فيه سيرة اللوجان ودة من اهم اسباب حرقة الدم
ولعلم حضرتك انا ممكن اخد المشاركة بتاعتك واحولك المميزات دى كلها عيوب واعملك احلى قائمة عيوب
................................
يا ريت لو سمحت لو واحد معاه لوجان او معهوش عايز ينتقد اللوجان او يقول انه عنده مشاكل فيها
يا ريت ماتحجرش على رأيه وسيبه يتكلم بدل ما تتهمه بالكذب وانه ماعهوش العربية وانه من الثورة المضادة على العربية
ويا ريت تفتكر انه كما تدين تدان .. لانك ممكن فى يوم من الايام تدخل المنتدى تعرض شكوى ليك وتلاقى هجوم وتكذيب وانك ماعكش العربية وداخل تقول كلام فى الهواء زى ما بتقول

[kimotop]

خلاص يا جماعة صلوا على النبي عليه الصلاة والسلام

لوجان ايه الي هتزعلنا من بعض دي
خلاص هجيب سيات موديل 70 ولا تزعلوا نفسكوا