عاااااجل جداااا - تويوتا ياريس ولا نيسان تيدا

[Haitham Yehia]

انا متابع من زمان للمنتدى واستفدت منه كتير لكن اناقدام قرار صعب جدا ولازم آخده خلال اسبوع فأي مساعدة منكم حاتبقى مفيدة جدا. بس ارجوكم اللي يرد يكون جرب واحدة من العربيتين على الأقل.

أجيب تويوتا ياريس ٢٠١٣ هاتشباك اوتوماتيك

ولا

نيسان تيدا ٢٠١٣ هاتشباك اوتوماتيك؟



انا عايز اعرف انهي احسن من ناحية

١- الثبات
٢- صلابة الشاسيه في الخبطات
٣- سعر البيع للمستعمل
٤- قطع الغيار والتوكيل
٥- استهلاك البنزين

[S O P H O S]

١- الثبات (اعتقد فصالح الياريس بنسبة كبيرة) بحاجة لمصدر
٢- صلابة الشاسيه في الخبطات (ربنا يستر ومنوصلش للشاسيه)
٣- سعر البيع للمستعمل (الاثنين تقال بعض الشئ هتشباك والخ لكن التيدا عروفة اكتر الياريس اول سنة ليها بس اسم تويوتا ولما العربية تنجح هتعمل اعادة بيع كويسة فأعتقادي )
٤- قطع الغيار والتوكيل (الاثنين شركات كويسة فقطع الغيار الياريس لسه شوية علشان تبقي فكل مكان مع ملاحظة ان توكيل نيسان افضل)
٥- استهلاك البنزين (التويوتا هتكون افضل لانها ماتور 1300 وكسور وتويوتا معروفة فمحركات توفير البنزين)
فالنهاية العربيتين كويسين من رأي
التيدا ماتور قوي توكيل كويس ثبات لحد 140 تقفيل مكسيكي
الياريس ماتور جديد فراي رائع وهيكون سحب جميل مع توفير فالبنزين بشكل رائع واسم واعتمادية تويوتا
وتقفيل فرنسا وشكل افضل من راي
-------------
فالنهاية لو هختار بشكل شخصي هركب الياريس عربية جميلة وهتثبت نجاحها ان شاء الله وصالون افضل فرأي وتصميم كذلك عربية اعتمادية وقوة اليابان بجمال التقفيل الفرنسي المعروف ,,,
-------------
والله اعلم
مجرد راي ليس الا ..

[kotimg2]

يارس يبانى طبعا. تيدا مكسيكى

[Haitham Yehia]

شكرا يا جدعان. انا سمعت ان الياريس مش ثابتة في السرعات وان اعادة بيعها تقيلة. ومالهاش قطع غيار لسه عشان جديدة ولسه ماحدش غيرلها حاجات. صح ولا ايه؟

[gha]

يارس يبانى طبعا. تيدا مكسيكى

يارس يابانى تصنيع فرنساوى....وتيدا يابانى تصنيع مكسيكى......

[وائل الجندي]

اكيد من غير كلام التيدا يارس ايه بس يا راجل
التيدا تقارنهابالكورلا

[Dr'AhmZZong]

فعلا التيدا عربية لا تقارن مع ياريس ولا حجما ولا موتور ولا أي حاجة بصراحة ..

لو معاك فلوس التيدا توكل على الله عربية ممتازة بمعنى الكلمة تقفيلها المكسيكي احسن من الياباني !

الياريس احسن منها في استهلاك البنزين فقط لا غير ..

تحياتي ..

[Haitham Yehia]

طب التيدا حد بيسوقها؟ ايه مشاكلها غير انها مش مريحة قوي؟ قطع غيارها متوفرة؟ سعر اعادة بيعها ايه أخباره؟

[S O P H O S]

يا جماعة علشان الناس تبقي عارفة المقارنة مع الياريس الهتشباك الجديدة
مش الياريس السيدان القديمة ..

[cheetos_892005]

شاركونا يا جماعة انا في نفس الحيرة

بس عايزين مقارنات تفصيلية زي اللي بيعملها اخونا formulater

[kliken]

التيدا عربيه ممتازه ما شاء الله و لا تقارن بالياريس الشكل القديم
لكن الشكل الجديد بصراحه لا اعرف عنه شىء بس شكلا جميل و لو حد ركبها و ساقها يفيدنا اكتر ان شاء الله

[Formulator]

السلام عليكم يارجالة،

هى مقارنة غير تقليدية :) بس فيه إختلافات جامدة بين العربيتين..

- الموتور:
التيدا 1.6 أعلى فـ الباور بفرق طبعا، HR16DE قوته 118 حصان تقريبا
لكن موتور التويوتا Dual-VVTi 1.3 هيوفر أكثر فـ البنزين!

- الفتيس:
هنا فيه فرق كبييييييييييييير أوى الصراحة:

لو عايز جرى: فتيس التيدا 4-سرعات أوتو.. بيجريها ومابيخنقش العربية فـ السحب،
(بيقولوا ان JATCO فرع نيسان للفتيسات -اللى عملهم X-Tronic هينزل للتيدا الجديدة CVT بـ7-سرعات زى بتاع التويوتا)؟!!

لو عايز توفير بنزين: فتيس الياريس الجديدة Multidrive-S بـ7-سرعات طبعا CVT مش real
بس السحب والجرى هيقل جامد (خصوصا فـ التسارع)، بما يوضح ضعف التويوتا فـ الفتيسات دى؟!!
(شوفوا الفرق بين الياريس مانيوال و CVT، وشوفوا النيسان فـ المقابل بتعمل أيه)؟!
- الحقيقة نيسان طورت جامد فـ فتيسات الـX-tronic CVT دى..!

العفشة والتعليق:
مفيش فرق كبير الـ2 torsion-beam بالـsetup اليابانى.. نعومة rather than الثبات!

باقى الحاجات: تقفيل وخامات وعوامل أمان.. العربيتين كويسين -فـ مستوى اليابانى المتوسط
(أنا شفت الياريس الجديدة مرة واحدة- تقفيلها كويس زى القديمة، إن لم يكن أفضل شوية)!

يمكن الياريس تتفوق فـ الأوبشنز عن التيدا (بتكلم عـ أعلى فئة بالجنوط -الفوج-بلوتوث...etc)

بالنسبة للمقارنة overall:

أعتقد الـTiida تتفوق فـ موتور، جرى، وسع، توكيل وصيانات.. وهى كـpkg على بعضها أفضل من الياريس..
خصوصا ان توكيل تويوتا بيبالغ أوى فـ أسعار الصيانات وقطع الغيار؟!! مش بيبالغ؛ بيستهبل!

Rgds،

[Haitham Yehia]

يا جماعة انا شاكر جدا لكل واحد فيكم. انشاء الله حانزل احجز النهاردة التيدا الهاتشباك على بركة الله. يارب بس الأسعار تفضل زي ماهي لحد ما استلم



انا استفدت جدا من المنتدى ده وحابب اقولكم انكم بتعملوا خدمة جليلة لأي حد مستجد في عالم السبارات. بجد بيتعلم كتير جدا.

[midnightman_74]

هية الهوندا سيتى بتخرج برة المقارنات لية ؟؟

[Y a r i s]

لالالالالالالالالالا استنا ياجدع تحجز ايه بس

اولاً : اليارس الجديد مصنعة في مصنع تويوتا الي في فرنسا بأيدي فرنسية
ثانياً : هل انتا الايام الجاية لمن تاخود ٥ لتر في اليوم مدعم هتقدر تدفع فلوس لعربية ١٦٠٠ سي سي بانزين ؟
ثالثاً : بنسبة لعربية اليارس ان مفيش قطع غيار ليها السوق العربية ساعتك مكمليتش شهر ولا شهرين في السوق ( الشكل الجديد) ورغم ذلك قطع غيارها في التوكيل ومتوفرة . يعني لسه نازلة طازة .
رابعاً: اليارس اثبت من التيدا على الاسفلت .
خامساً : المبيعات العالمية لليارس اعلى من المبيعات العالمية للتيدا ... بمعنى انك هتلاقي قطع استراد لليارس اكتر من التيدا .
سادساً : ربنا وفقك وتختار الي فيه الصلاح والمناسب .... وتحياتي