بيجوا 508 2013 ام فلوينس 2014

[memo_zezo]

السلام عليكم
ياجماعه انا خلاص نويت باذن الله هشترى عربيه من هنا ف السعوديه اعيش بيها هنا وخصوصا ان مشاويرى مش كتير يعنى العربيه هيبقى متحافظ عليها ومش هتبقى ماشيه كتير وكمان هتنزل معايا ف الجمارك لما تقعد 4 او 5 سنين باذن الله وانا روحت زورت التوكيلين عندنا للبيجو والرينو والاختيار بين العربيتين الفئه العاليه الهاى لاين باذن الله فرق السعر بين الاتنين تقريبا 30 الف ريال هل فرق السعر ده يستاهل لصالح البيجو؟؟ اانا بصراحه اللى معجبنيش في الفلوينس الطابلوه بتاعها مش اد كده بعكس البيجو عربيه بسم الله ماشاء الله من جوه ومن بره مفيش عليها اى كلام بس كمان بفكر ف موضوع ان ممكن ينزلها فيس ليفت قريب ف دى هتبىق حاجه مضايقانى ف الاختيار لكم ياريت تساعدونى اتوكل على الله في اى من العربيتين؟؟؟

[M I D O]

انا بميل للفلوانس لاكن مادام انت مرتاح للبيجو يبقي توكل علي الله فيها

[saddam]

صديقي المواطن
فلوانس قولا واحدا عربية تحسها من اﻷمام مدرعة أو مصفحة البيجو حلوة بس مش بتسيب بصمة في الشارع والفلوانس أبيع ومنتشرة أكثر
ودمتم للنضال

[memo_zezo]

اولا اشكركم على الردود والاهتمام بس الموضوع مش موضوع انى بميل للبيجو انا الفكره حول سؤالى هو هل الفرق ال 30 ريال يستاهل ؟؟ والا الفلونس عربيه هتكفينى عن كل اللى انا منتظره من البيجو وسؤال تانى مهم الاتساع الداخلى ف الفلوينس نفس البيجو والا اضيق؟

[Hany Saad]

حضرتك البيجو ٥٠٨ فئه أعلى من الفلوانس، البيجو ٥.٨ تقارن بالفورد مونديو و السكودا سوبيرب و الباسات

[Mostafa.Mahran]

ال508 افضل طبعا

[mazagngi2010]

508 شريحه اعلى بس معرفش ظروفها مع ال 92

[janagabr]

سيدي الفاضل ممكن ذكر سعر السيارتين وكام سي سي ثانيا الم تعلم ان السوق الخليجي وبالاخص السعودية تكرة شئ اسمه صناعة فرنسي فكيف ستعيش بها خمسة سنوات في السعودية قبل انزالها مصر في نكتة بتتقال علي المصريين وهي ( المصري يركب البيشو والزلموكة والمقصود بالبيشو هي البيجو ) وممكن ذكر حدود المبلغ ونرشحلك عربية عشان متغلطش غلطه اصحابي لما فكروا بنفس فكرة حضرتك

[memo_zezo]

سيدي الفاضل ممكن ذكر سعر السيارتين وكام سي سي ثانيا الم تعلم ان السوق الخليجي وبالاخص السعودية تكرة شئ اسمه صناعة فرنسي فكيف ستعيش بها خمسة سنوات في السعودية قبل انزالها مصر في نكتة بتتقال علي المصريين وهي ( المصري يركب البيشو والزلموكة والمقصود بالبيشو هي البيجو ) وممكن ذكر حدود المبلغ ونرشحلك عربية عشان متغلطش غلطه اصحابي لما فكروا بنفس فكرة حضرتك

اولا متشكر جدا على اهتمامك ياباشا
ثاننيا بالنسبه للعربيتين ف هما 1600 سي سي نفس مواصفات اللى بتنزل ف مصر بخصوص الموتور وبخصوص السعر البيجو ب 100 الف والرينو بحوالى 70 الف وبعدين هنا بيجو عاملين ضمان 3 سنين ومفتوح الكيلومتر والفتره الاخيره فعلا بقيت اشوف كتير فلوينس وبيجو 508 ف الشوارع ومع سعوديين كمان يعنى النظريه دى انتهت خلاص مع الطفره الكبيره اللى عملتها ال 508 بالرغم من ان ف نفس سعرها ممكن تجيب حاجات عاليه زى شيفروليه ماليبو او فورد تورس او بفرق بسيط تجيبلهم مازدا سى اكس 9 او شيفروليه امبالا الجديده المهووووله ف ده معناه ان الناس هنا بدات تثق ف بيجو عن طريق ال 508 وعموما ياريت حضرتك ترشحلى اى عربيه 1600 ب بلاش ال بى ام 316 لان سعرها 115 الف مع عرض لاخر الشهر وهترجع بعدها 130 الف ف اكيد عاليه عليا وبخصوص السعر اللى انا حاطه انا عموما هجيبها تقسيط واقدر لحد 100 الف ريال واقسطها على 4 سنين . منتظر رد حضرتك بالترشيحات

[semsem5144]

البيجو 508 احسن من الفلوانس فى كل حاجه موتور تيربو تصميم خارجي ثوري وداخلي فخم جدا جدا
الفلونس الخليجي غير المصري مواصفات وتصميم وتجميع فدور على اختيارات تانيه لو مش عاوز البيجو
انا زيك لاقيت البيجو من كام شهر ب 96 الف والسكودا اوكتافيا بنفس السعر والبي ام دبليو اغلى منهم ومواصفاتها اقل بكتير من الموجوده فى مصر وكمان هتطلع اغلى لان فى مصر تجميع مصري بيفرق كتير فى السعر
انا ريحت نفسي واشتريت تويوتا اوريون 3500 سي سي وقولت اركب هنا اللى مش هركبه فى مصر وخلاص
اتفرج على سيتروين الds5 اسطوره او اصبر شويه لغاية مالكورولا الجديده تنزل بس ارجع واقولك البيجو اعلى منهم كلهم
وربنا يوفقك

[Silent~Dream]

الاثنين عربيتين رائعتين بالاختيار هيكون عايز اداء اعلى شويه يبقى البيجو مش فارقه الاداء و عايز كماليات ووسع الاثنين زى بعض تقريبا وحضرتك ممكن تشوف الموضوعات دى :

http://www.nilemotors.net/Nile/291613-508.html

http://www.nilemotors.net/Nile/379125-2014.html

[Hosam_Optrawy]

انا مع الرأى ان نزول عربيه مصر موضوع فاشل , لأنها هاتقف عليك أغلى من تمنها فى مصر

لو العربيه ب 100 الف ريال , يعنى تقريبا 188 الف جنيه بسعر الريال النهارده

الجمرك هايكون حوالى 119 الف يعنى الإجمالى 307 ألف جنيه تقريبا , دا غير الشحن وإشتغالات الجمارك

طبعا الحسبه دى تقريبيه وفى حالة إنك هاتنزل بيها فى نفس السنه

لو هاتنزل بعد 5 سنين إن شاء الله الجمارك هاتبقى أقل بس فى الأجمالى مش هاتنزل كتير وتعتبر لسه غاليه

الجمرك هايكون 97 الف يعنى الإجمالى 285 الف جنيه , يعنى أغلى من تمنها زيرو فى مصر النهارده !!! دا بعد 5 سنين , يعنى أكيد الشكل هايكون إتغير والله أعلم كمان الريال هايكون بكام

وللعلم برضه أقل مبلغ هاتاخده الجمارك فى حالة لو هاتنزلها بعد 9 سنين أو أكتر هايكون 79 الف جنيه تقريبا يعنى هاتقف عليك ب 267 الف جنيه

من الأخر إركب العربيه اللى تعجبك تكون كسر زيرو أو مستعمل سنتين تلاته أو أكتر براحتك , وإبقى إشترى من مصر لما ترجع إن شاء الله

[memo_zezo]

انا مع الرأى ان نزول عربيه مصر موضوع فاشل , لأنها هاتقف عليك أغلى من تمنها فى مصر

لو العربيه ب 100 الف ريال , يعنى تقريبا 188 الف جنيه بسعر الريال النهارده

الجمرك هايكون حوالى 119 الف يعنى الإجمالى 307 ألف جنيه تقريبا , دا غير الشحن وإشتغالات الجمارك

طبعا الحسبه دى تقريبيه وفى حالة إنك هاتنزل بيها فى نفس السنه

لو هاتنزل بعد 5 سنين إن شاء الله الجمارك هاتبقى أقل بس فى الأجمالى مش هاتنزل كتير وتعتبر لسه غاليه

الجمرك هايكون 97 الف يعنى الإجمالى 285 الف جنيه , يعنى أغلى من تمنها زيرو فى مصر النهارده !!! دا بعد 5 سنين , يعنى أكيد الشكل هايكون إتغير والله أعلم كمان الريال هايكون بكام

وللعلم برضه أقل مبلغ هاتاخده الجمارك فى حالة لو هاتنزلها بعد 9 سنين أو أكتر هايكون 79 الف جنيه تقريبا يعنى هاتقف عليك ب 267 الف جنيه

من الأخر إركب العربيه اللى تعجبك تكون كسر زيرو أو مستعمل سنتين تلاته أو أكتر براحتك , وإبقى إشترى من مصر لما ترجع إن شاء الله

هو كلام حضرتك مظبوط بس انا مش بحسبها كده انا بحسبها اولا بالنسبه للبيجو مثلا هنا كمالياتها اكتر من مصر زى النافيجاشن والاى درايف وتكييف افضل ثانيا بحسبها من ناحية انى هاخدها بالتقسيط يعنى مش هحس بتمنها وخصوصا انى عارف نفسي مسرف شويه وقيمة القسط هتخليني اشتغل اكتر لتوفير قيمة القسط من خارج راتب العمل يعني كبدلات سفر والامور دى ف وقتها بعد اربع سنين هلاقى انى معايا عربيه محافظ عليها ومش ماشي بيها كتير ووتمنها دفعته من غير مااحس بيه ووقتها كل اللى هحس انى هدفعه قيمة الجمارك اللى هتكون بالنسبالى ده تمن العربيه وثالثا بحسبها من ناحية انى كده كده هجيب عربيه هنا ف بدل مااجيب عربيه وممكن اى وقت تصرف ف خلال اربع سنين ف هيكون معايا عربيه معاها ضمان 3 سنين وكيلو متر مفتوح يعنى مش هصرف عليها حاجه تقريبا طول فترة تواجدى هنا بس اللى انا بتكلم فيه هل فعلا في فرق ين الفلوينس والبيجو يستاهل انى ادفع فرق 30 الف ريال والا اخلينى ف الفلوينس بحكم انها هتكفينى وزياده ؟

[memo_zezo]

الاثنين عربيتين رائعتين بالاختيار هيكون عايز اداء اعلى شويه يبقى البيجو مش فارقه الاداء و عايز كماليات ووسع الاثنين زى بعض تقريبا وحضرتك ممكن تشوف الموضوعات دى :

http://www.nilemotors.net/nile/291613-508.html

http://www.nilemotors.net/nile/379125-2014.html

والله كلام حضرتك ممتاز انا بس مشكلتى مع الفلونس لما دخلتها محستش بالفخامه من جوه زى البيجو طابلوه وصالون ومستوى جامد . طب رايك استنى التويوتا هى هتنزل كمان اقل من شهر باذن الله وقتها ادخلها معاهم ف الاختيار لما يبان سعرها وكمالياتها هنا؟

[تامر.محمد]

ال508 شريحة اعلى في كل حاجة من الفلوينس
الفلوينس تتقارن بال408