حرق الزيت

[Adham]

يادكتور حضرتك مش حاتعرف الشمايز كويسة و للا لأ الا لما وش السلندر يتحل و تشوفها بنفسك, تمسح بصباعك على اول الشميز من فوق لو لقيت بعد حوالي 2-3 مم من اول الشميز (أخر مشوار البستم) فية زي عتب بسيط او تآكل (تخيل ان الشميز دة ماسورة ملساء بيتحرك فيها البتسم, لو مش ملساء 100% من الداخل و فيها زي تعريج بسيط من اولها من فوق ) يبقى تجيب موتور استيراد و ماتصرفش مليم عالموتور دة

لان لو خرطت شمايز تركب شحط في الشميز دة خامة الصلب اللي متوفر في السوق غير الصلب اللي بينزل في المواتير, بيبقى اضعف و اسهل كتير في التآكل و مش حايكمل معاك 50 الف كيلومتر و يتآكل تاني و يبقى اسوأ من الأول

الحل الأفضل هو توسيع الشميز و تركيب بستم اكبر 010 او 020, و دة مكلف جداً , لأن طقم بستم عربيتك الاصلي مش حايبقى رخيص و حايبقى بتمن موتور استيراد و زيادة, ضيف كمان طقم سبيكة و خراطة و طقم شنبر و طقم صباب (ماهو لازم بقى عمرة كاملة لأن ماينفعش تحكم البستم وتسيب الصبابات و السبايك زي ماهيه, علشان الموتور يبقى متوازن بدل ما تعمل حتة يضرب من حتة تانية)

انما لو لقيت الشمايز مافيهاش عتب يبقى طقة شنبر و و تودي الوش للخراط يجلخ الصبابات و يفرز القواعد و يراجع عالدلايل و يركب طقم اويلسيل صباب و يعمل رودية و تقفل الموتور على كدة و ماتقلقش خير ان شاء الله

[Dr. Halawa]

وش السليندر محلول برة العربية و شوفت المواسير دى زى ماباقولك ملساء تماما الحمد لله الفكرة ان الوش مقفول هو نفسه و خوفونى من فتحه لان ليه تظبيطة فى قفله ما أظنش الميكانيكى يعرفها فى حاجة اسمها كدة أصلا؟ ولا الوش كدة كدة بيروح للخراط؟

[Adham]

وش السليندر محلول برة العربية و شوفت المواسير دى زى ماباقولك ملساء تماما الحمد لله الفكرة ان الوش مقفول هو نفسه و خوفونى من فتحه لان ليه تظبيطة فى قفله ما أظنش الميكانيكى يعرفها فى حاجة اسمها كدة أصلا؟ ولا الوش كدة كدة بيروح للخراط؟

طيب كدة تمام قوي الحمد لله

يبقى طقم شنبر و بس

بص حضرتك الوش يتحل المقصود بيها انة يتفك من بلوك الموتور

انما وش السلندر هو نفسة مابيتفكش من بعضة لانة هو عبارة عن جسم حتة واحدة من الالومنيوم و فية فتحات للمياة و مجاري للزيت و فتحات فيها القواعد و الدلايل و راكب فيها الصبابات و بس

و دة تودية للخراط و هو يفك الصبابات و يجلخها و يفرز القواعد و يراجع عالدلايل (لو فيهم دليل و للا اتنين تقال شوية مثلاً) و يركب طقم اويل سيل صباب جديد و تستلمة منة بعد يومين متقفل زي ما وديتهولة و تودية للميكانيكي يركبة و يقسم و يدور

فية ورشة خراطة اسمها المتحدة في عين الصيرة تحت مجري العيون (و انت جاي من السيدة عائشة في طريقك لعين الصيرة بعد مجرى العيون يبقى اول يمين على طول
انا دايما باتعامل معاهم

[Dr. Halawa]

شكرا يا باشا انا كدة فهمت

[Dr. Halawa]

طيب دلوقتى الميكانيكى بيقوللى هو هايغير الاويل سيلات و بيقولى مش محتاجة خراط ايه رأى حضرتك؟

[Adham]

ايوة تغيير الاويلسيلات الميكانيكي ممكن يعملة

انما تجليخ صبابات و تفريز قواعد و رودية لازملهم خراط بالطبع