الاضواء النهاريه او daytime running light اختراع اصاب المصريين بالحيرة

[horas3000]

يا شعب مصر العظيم

ظهر في الاونه الاخيره اختراع جديد ابتدي يغزو الاسواق و الطرق المصريه اسمه الاضواء النهاريه او daytime running light و اختصارا DRL

و هو عباره عن ضوء صغير في منه عادي و LED في مقدمة السياره و يكون مضاء في اوقات النهار لزياده وضوح رؤيه السياره في النهار
و هو اضافه ملزمه قانونا لكل السيارات المنتجه بعد 7 فبراير 2011 حسب قانون المرور الاوروبي
و هو معتمد قبل ذلك في القانون الامريكي و الكندي لكن لاننا مش بيجيلنا عربيات كتير من هناك مشفناهوش قبل 2011


و دي لسته بالعربيات المجهزه بالاختراع دي و المتوفره في السوق المصر
اغلب موديلات BMW الجديده
اغلب موديلات مرسيدس الجديده
كيا سبورتاج,سيراتو,ريو,بيكانتو الهاي لاين
اوبل استرا الجديده
هوندا سيفيك
فولكس جيتا و باسات
هيونداي ix35

اما الهدف من الموضوع ده
ان مش كل عربيه تشوف فيها لمبه شغاله نهارا تقعد تشاور لها بايدك
طبعا انا مقدر ذوقك و هدفك النبيل
بس الامر بيبقي مزعج خصوصا مع تكراره عشرات المرات في كل مشوار

و الحاضر يعلم الغايب

و شكرا

[el_deep]

والله الواحد تعب بس بصبر نفسي ان الناس عاوزه مصلحتي بس ساعات ربنا يوقعك مع

واحد بيقولك لا فيه في دراع النور زرار بيطفيه و انا معنديش (كيا سيراتو الشكل القديم 2013 ) بس نعمل ايه بكره الموضوع يتعرف

[horas3000]

بص
هو الحق يقال في ال bmw ممكن يتلغي فعلا
بس انا معجب بالفكره و التقنيه و مخليه
ده غير انه بيميز العربيه و بيديها شياكه و انه فعلا امان

و انا فعلا مقدر ان الناس عايزه المصلحه
بس الموضوع بقي مزعج فعلا
فانا قلت اوعي الناس لا اكتر و لا اقل

[horas3000]

اضافه للعربيات المجهزه بيه

رينو فلوينس الفيس لفت
تويوتا كرولا الجديده و الاوريوس و الياريس الجديده الهاي لاين

[shaddadfalcon1]

بره لما تشغل العربيه النور الواطي بشتغل معاها ومش بمزاجك ومينفعش يتغلي وشغال ليل نهار

[Ahmed Nasser]

الاوبشن دة نازل فى عربيتى النوبيرا 1997 واللمبة بتنور بتاع drl فى الطابلوة عادى

[Ahmed_Adham]

هوه ايه المشكله لما نور العربيه يبقى شغال بالنهار؟ (مش الاضاءه النهاريه) قصدي ليه الناس بتحاول تنبهك وكأنك ماشي بفرده نايمه؟

[S O P H O S]

معلومة مفيدة برضوا

[horas3000]

بره لما تشغل العربيه النور الواطي بشتغل معاها ومش بمزاجك ومينفعش يتغلي وشغال ليل نهار

هو اللي عندي و اغلب اللي شفته انها لمبه منفصله تماما عن النور العادي
و بتفصل اول ما تشغل النور بما ان مش بيبقي ليها لازمه ساعتها

الاوبشن دة نازل فى عربيتى النوبيرا 1997 واللمبة بتنور بتاع drl فى الطابلوة عادى

كده اعتقد ان عربيتك مش مواصفات مصري
و لا ايه ؟؟

هوه ايه المشكله لما نور العربيه يبقى شغال بالنهار؟ (مش الاضاءه النهاريه) قصدي ليه الناس بتحاول تنبهك وكأنك ماشي بفرده نايمه؟

بجد مش عارف
زي ما تكون هتتحاسب علي الكهرباء دي اخر المشوار هههههه

معلومة مفيدة برضوا

اي خدمه يا زعيم

[Ahmed Nasser]

كده اعتقد ان عربيتك مش مواصفات مصري
و لا ايه ؟؟

انا عربيتى جاية استيراد ومفيش اساسا نوبيرا 1 مصرى

[dede_dodo88]

lol
أنا بحب أريح الزبون فبهز دماغي للي يشاورلي و خلاص..

[horas3000]

انا عربيتى جاية استيراد ومفيش اساسا نوبيرا 1 مصرى

عشان كده فيها drl
و انا مش فصدي انها مصري
انا اقصد انها مش مخصصه للاسواق المصريه و الشرق اوسطيه عموما

lol
أنا بحب أريح الزبون فبهز دماغي للي يشاورلي و خلاص..

ما انا بعمل كده فعلا
بس كده هقلب هندي قريب
و دماغي هتفضل رايحه جايه علي الفاضي و المليان

[D . a .\ AYMAN]

موضوع جميل وجاي في وقته فعلا ... جزاكم الله خيرا

هوه ايه المشكله لما نور العربيه يبقى شغال بالنهار؟ (مش الاضاءه النهاريه) قصدي ليه الناس بتحاول تنبهك وكأنك ماشي بفرده نايمه؟

أنا نفسي أفهم برضه إيه اللى بيكون مضايقهم من النور اللى شغال .. ولما سألت واحد منهم مرة لاقيته بيقولي هايفضي البطارية

وواحد تاني بيقولي حمل على الكهرباء بتاعة العربية

وواحد ثالث بيقوللي بيزود استهلاك البنزين

وواحد رابع بيقوللي بيؤثر على الدينامو

يعني ما شاء الله كلها آراء زي الفل وأصحابها مقتنعين بيها واستحالة تقنعهم بعكسها ... بس هاتقول إيه لناس بتمشي بالليل أساسا على الصحراوي طافيين النور بتاعهم كله ياريت حتى نور التابلوه شغال ... وتيجي تكلم واحد منهم يقولك أنا باشوف كدة أحسن !!!!!!!!

[Mohab.Nabil]

هوه ايه المشكله لما نور العربيه يبقى شغال بالنهار؟ (مش الاضاءه النهاريه) قصدي ليه الناس بتحاول تنبهك وكأنك ماشي بفرده نايمه؟

عشان فيه ناس بتنسى انها شغلت النور فعلا و ممكن تروح مكان و تركن العربية و تسيب النور شغال فترة طويلة مثلا لو رايح شغل او جامعة .. و يطلع بعد 8 ساعات لو البطارية مش تمام هيلاقى البطارية نامت

[Ahmed_Adham]

عشان فيه ناس بتنسى انها شغلت النور فعلا و ممكن تروح مكان و تركن العربية و تسيب النور شغال فترة طويلة مثلا لو رايح شغل او جامعة .. و يطلع بعد 8 ساعات لو البطارية مش تمام هيلاقى البطارية نامت

ماهو المفروض ان النور بيفصل أول ما العربيه تبطل. ولا ايه؟