الشقة اللي فوقينا مسكونة كل ده و انا معرفش :s

[M.Mostafa80]

مرة كنت مأجر شقة فى مطروح قبل الزحمة ، وبعدين كنا خارجين أنا والعيال وكنت آخر واحد خارج وبقفل الباب
لكن بعد ما قفلت الباب بثانية افتكرت أبص على حاجة جوه ففتحت الباب فجأة بعد ما قفلته
أول ما فتحت عينى جت على الكنبة اللى فى الصالة فشفت لعبة من اللعب اللى العيال سايبينها على الكنبة طايرة فى الهوا وأول ما فتحت نزلت تانى
أنا فهمت القصة بسرعة فابتسمت وقفلت الباب تانى
حتى العفاريت بتلعب!!!!

الجن اللهم ما احفظنا بيبقى ساكن جوا اللعب دى وخصوصا لو عرائس أو دباديب او ما شابه ودى حقيقه وعشان كدا معظم علماء الدين يطلبو من الناس عدم الأكثار منها فى البيوت ولا تترك فتره طويله بدون اللعب بها وقرأه القرأن فى المكان المتروكه فيه

[AhMeD EzZ]

أنا بقى هحكى قصه واقعيه وحصلت معايا شخصيا
الموضوع ان جدى الله يرحمه كان راجل طيب جدا وكان عايش فى الريف وكان متعود يؤدى الصلوات فى وقتها فى الجامع القريب من البيت
بينه وبين الجامع حوالى 100 متر المهم فى يوم طلع من البيت عشان يستعد لصلاه الظهر ومشى ناحيه الجامع وعدى على بيت أخوه اللى جنب الجامع من الناحيه التانيه وسأل عليه عشان يصلو سوى قالولو داه هوا تعبان شويه ومش قادر يقوم قلهم طيب بص يمينو لقى عربيه واقفه بتنزل حد وبص شماله ملقاش حاجه جايه بدأ يعدى الشارع عشان يدخل الجامع
وفجأه عربيه من خلف العربيه الراكنه تيجى وتخبطه وتشيله على كبوت العربيه ومينزلش الا جنب الجامع (حسب روايه شهود العيان )طبعا راجل كبير ومستحملش الخبطه نفذ أمر الله فى اللحظه والتو أتجمعنا كلنا طبعا عشان ندفن جدى المهم أثناء عمل الصوان ليلا وأنا جالس أنا وأبناء أعمامى وأذ بنا نجد قطه تلعب مع أحب ابناء أعمامى المقربين الى جدى كل هذا عادى ولا يوجد به اى شئ غريب نوينا ان نقيم مطب صناعى فى هذه المنطقه حتى لا يتكرر الأمر مره أخرى وكان هذا فى حوالى الساعه الواحده ليلا وأذا بهذه القطه تقف معنا وتشاهد ما نفعله
لم نهتم بالموضوع دخل والدى أخر اليوم لينام فى غرفه جدى التى تم تكفينه فيها وهى كانت خاويه والقطه تركناها بعيدا عند الجامع فأذا بوا لدى صباحا يقول ان القطه بجواره طول الليل فيرد عمى الأخر أزاى دى كانت جنبى طبعا محدش جالو نوم من فراق والدهم ومع كل ذلك لم نهتم لاحظو وجود القطه فى غرفتين مختلفتين فى وقت واحد أخذنا هذه القطه بالسياره وذهبنا بيها بعيدا ووضعناها وأذا بنا نرجع لنجد أبى وأعمامى يقولو لنا انتم مشيتو من غير ما تخدو القطه كلنا بلمنا فى هذا الوقت وأصبح الأمر محسوم هذه القطه ظلت موجوده بالبيت لمده أربعين يوم مع كم الأذى الذى كانت تتعرض له من لعب الأطفال ومع ذلك لم تهرب منهم بالعكس كانت تتودد أليهم أكثر وفى اليوم الواحد والأربعين أختفت القطه ولا نعلم أين هى مع العلم بأنها كانت تظهر فى بيوت المقربين والمحببين الى قلب جدى الله يرحمه فى ذات الوقت
رحمه الله عليك ياجدى وأكتب لى نفس شهادته توفى وهو عازم الأتجاه للمسجد للصلاه تخيلو سيبعث على أنه ذاهب للمسجد للصلاه وقبل الأذان

انا حصلي موقف نفس دة بالظبط
في ناس جيرانا في العمارة بس احنا اكتر من اقرب الاقارب كان ليهم خال و اتوفي كان عندة زي عرجة بسيطة في رجلة
يوم ما مات ظهرت في العمارة قطة بها نفس العرجة و فضلت قاعدة قدام الشقة لحد ما جة ولادة راحت مقربة عليهم زي ما تكون بتسلم عليهم و فضلت موجودة لحد 41 يوم برضة و بعد كدة اختفت
انا مرضتش احكي الموقف دة قبل كدة كلت محدش هيصدقني

[نور القمر]

على فكرة انا قعده اشوف فيلم رعب دلوقت على شانيل2 وانا بقرأ المشاركات الاخيرة وكل شوية اتنطر من مكاني

انا كنت بشوف شخص في بيت بابا وانا في فترة الثانوي لاني كنت بسهر لوحدي كتير وكان الموضوع ده تاعبني بجد ومرحش الا لما في ليلة دعيت ربنا باخلاص
ورجعت اشوف شخص بعدها بحوالي 5 سنين وكنت برة مصر وقتها والموضوع انتهى لما صليت بخشوع وبكاء ودعاء وتوسل لربنا يبعده عني
والحمد لله

[Dr Ahmed]

انا كنت بشوف شخص في بيت بابا وانا في فترة الثانوي لاني كنت بسهر لوحدي كتير وكان الموضوع ده تاعبني بجد ومرحش الا لما في ليلة دعيت ربنا باخلاص
ورجعت اشوف شخص بعدها بحوالي 5 سنين وكنت برة مصر وقتها والموضوع انتهى لما صليت بخشوع وبكاء ودعاء وتوسل لربنا يبعده عني
والحمد لله

شخص؟؟
حضرتك تقصدى كائن غريب فى البيت على شكل بنى آدم؟
وياترى كان بيعمل إيه؟
بس الأفضل تجاوبى الصبح

[semsem_uno]

على فكرة انا قعده اشوف فيلم رعب دلوقت على شانيل2 وانا بقرأ المشاركات الاخيرة وكل شوية اتنطر من مكاني

هههههه
طب نصيحة بجد بلاش تكملي دلوقتي علشان ممكن يجيلك كابوس و عن تجربة

[نور القمر]

ايوة كائن على هيئة شخص غير واضح الملامح وعادة الاضاءة كانت قليلة بس ماما كانت ديما تقولي دي تهيؤات من السهر لكن انا مازلت مقتنعة انها مش تهيؤات
انا بقول خليني في فيلم الرعب احسن لانه في نهايته

[M.almaghraby]

سبحان الله العظيم

[نور القمر]

كان ختامها مسك امبارح بعد مقريت قصصكم وفيلم الرعب وذكرياتي الجميلة ختمتها بموضوع شنوري بتاع عمارة رشدي مع اني شايفه الموضوع قبل كدة ومدخلتوش عشان قريته زمان
المهم اني معرفتش انام يدوب خطفتلي ساعتين نوم متقطع

[mahgary]

هقلك من الاخر ما عفريت الا بنى ادم

[M.Mostafa80]

هقلك من الاخر ما عفريت الا بنى ادم

الموضوع مش قصه عفاريت أخى الفاضل دى قصه ارواح وجن والأثنين منقدرش ننكر وجودهم وعلى الأنسان التحصن بالأذكار والتقرب من الله وهو لن يصيبه شئ وهناك حقائق لو ذكرت ستكون أليمه لكثير من الناس وستتسبب لهم فى رعب بلا حدود
تحصنو بأذكار الصباح والمساء واعلمو أن لن يصيبكم شئ ما لم يكتبه الله لكم ولن ينفعكم شئ مدام الله لم يكتبه لكم عند رؤيتكم أو سماعكم لشئ غريب فأذكرو اسم الله وأستعيذو من الشيطان فأحيانا كثيره تكون وساوس شيطان وأحيانا تكون حقيقيه ومن يشعر بمثل هذه الأشياء فعليه تحرى الأمر واحضار أحد من معالجى القرأن والتأكد جيدا انهو ليس بدجال معالج القرأن الحقيقى لا يطلب أجر ولا يطلب أشياء تشترى ولكن يفعل ذلك لوجه الله وان طلب منكم التصدق بشئ بدون ان يذكر مكان بعينه فنفذو ماطلبه منكم وعليكم بصوره البقره والمعوذات ويفضل قرأتها بنفسكم مره كل ثلاث أيام وان شاء الله لن يصيبكم أذى الا ما كتبه الله لكم

[semsem_uno]

كان ختامها مسك امبارح بعد مقريت قصصكم وفيلم الرعب وذكرياتي الجميلة ختمتها بموضوع شنوري بتاع عمارة رشدي مع اني شايفه الموضوع قبل كدة ومدخلتوش عشان قريته زمان
المهم اني معرفتش انام يدوب خطفتلي ساعتين نوم متقطع

هههههه معلش
منا قلت بلاش التكملة بليل
امال انا اللي اول ما حسيت بالموضوع بقي و عملته بليل كان يبقي شعوري ايه ساعتها

[semsem_uno]

هقلك من الاخر ما عفريت الا بنى ادم

معلش انا فاهم قصدك و ان ساعات الجيران بيبقو العن و ان العفاريت عالأقل بتبقي هادية و الله اعلم
بس المشكلة في القلق اللي بتبقي مش متعود عليه و في اوقات صعبة اوي يعني قول البني ادمين هتتكلم معاهم انما دول هتعيش في قلق
و فعلا الواحد يتمسك بالأذكار

[semsem_uno]

الموضوع مش قصه عفاريت أخى الفاضل دى قصه ارواح وجن والأثنين منقدرش ننكر وجودهم وعلى الأنسان التحصن بالأذكار والتقرب من الله وهو لن يصيبه شئ وهناك حقائق لو ذكرت ستكون أليمه لكثير من الناس وستتسبب لهم فى رعب بلا حدود
تحصنو بأذكار الصباح والمساء واعلمو أن لن يصيبكم شئ ما لم يكتبه الله لكم ولن ينفعكم شئ مدام الله لم يكتبه لكم عند رؤيتكم أو سماعكم لشئ غريب فأذكرو اسم الله وأستعيذو من الشيطان فأحيانا كثيره تكون وساوس شيطان وأحيانا تكون حقيقيه ومن يشعر بمثل هذه الأشياء فعليه تحرى الأمر واحضار أحد من معالجى القرأن والتأكد جيدا انهو ليس بدجال معالج القرأن الحقيقى لا يطلب أجر ولا يطلب أشياء تشترى ولكن يفعل ذلك لوجه الله وان طلب منكم التصدق بشئ بدون ان يذكر مكان بعينه فنفذو ماطلبه منكم وعليكم بصوره البقره والمعوذات ويفضل قرأتها بنفسكم مره كل ثلاث أيام وان شاء الله لن يصيبكم أذى الا ما كتبه الله لكم

+111 ربنا يحفظك