سؤال الى النساء :هل تبيعين ذهبك لسد ديون زوجك

[rockana9112007]

قلت الي كان نفسي اقوله من اول الموضوع

بس ازيد علي كلامك بمثال شوفته قدامي وحضرته ومش لاقيله تفسير لحد دلوقت

واحد جاري كان اخد ارض وكان لازم يبني الارض دي في مدة 15 يوم ولو عواميد بس كده والا الارض دي هتتاخد منه ومش هيعرف يحط فيها قشايه بعد كده

طبعا ميل علي اخواته وميل علي معارفه وقدر يعمل مبلغ وكان ناقصه 15 الف جنيه

بص لمراته ومراته ابداااااااااااااااااااااااااا

الي يضحك في الموضوع ان الارض دي اصلا باسم مراته

وهيا راسها والف جزمه قديمه متبعش جرام واحد من دهبها

كانت النتيجه ليها دلوقت سنتين في بيت ابوها

ايه بقي رايك في الحريم دي

مش بزمتك الصنف ده يستاهل الحرق؟؟؟؟

طيب سيبك من دي

ايه رايك في الي هيا وجوزها قاسمين كل حاجه (الاتنين بيشتغلوا ومرتبهم تقريبا واحد)

تخيل حتي الاكل والشرب قاسمينه وكل واحد بيجيب اكله لنفسه

والي ضايع في الليله دي العيال

انا مش عارف طيب ايه الي جابرهم علي العيشه دي

وهيا دي عيشه اصلا

انا لما سمعت الموضوع ده كان ردي واحد بس

يعني هما كويسين مع بعض في اوضة نومهم بس؟؟؟؟؟

وزي ما في الوحش في الكويس

زي الي تاني يوم دخلتها(بس دول متجوزيين من 10 سنين وكان حالهم علي قدهم اوي اوي قبل ما يتجوزوا) باعت جزء من دهبها واشترت تليفزيون للشقه

(الاصيل اصيل برضه)

يووووووووووووووووه الامثله كتير

بس فعلا انا شوفت بلاوي وامثله بقيت محتار قدامها ومش لاقي اجابه

المعظم هيستغرب انا عارف ده كله منين مع ان دي اسرار صعب تكون معروفه كده

بس ده لان والدي يعتبر كبير العيله فدايما بيبقي الحكم في قعدات كتير وكنت بروح معاه قعدات زي دي

ربنا يرحمنا ويرزقنا ببنت الحلال الي تعرف تتقي ربنا

وبكرر الجمله الي فوق

علي الاصل دور

A.Yakout

فعلااااااااااا انتا والاستاذ mtakجبتو خلاصة الكلام بس لازم فعلااا جلسة المصارحة دى عشان اللى غلطان ميكررش غلطة واللى كان عشمان ميفضلش شايل ومغلول
وعلى فكرة معظم حالات الطلاق مبتحصلش من خلاف واحد كبير لأ دى بتحصل من مواقف صغيرة بس بتجمع فى الاخر وتلاقى الانفجار
وشكرااا

[misoalex]

وبكرر الجمله الي فوق

علي الاصل دور

فعلا
بس الموضوع متوقف عل حاجتين
اولا الاختيال من الاول
ثانيا الموقف نفسه هل هى فعلا مقدره انك فى موقف صعب ولا مش فى دمغها
افضل حل انا شايفه انك فعلا تقعد معاها وتصفى الموقف عشان تعرف نفسك حتعيش ازاى وتأقلم نفسك على كده

[tahayt]

طبعا انا ملاحظ ان معظم اللى ردوا على الموضوع
لم يدخلوا القفص بعد "يا بختكم :) " لذا فالردود ممكن تكون مثاليه شوية
الموضوع ليه ابعاد مختلفه

اولا مع كامل احترامى لصاحب الموضوع و كمان تصديقه الكامل و لكن
لم نسمع الا وجهة نظر جانب واحد
بعد اذن صاحب الموضوع هاتكلم فى المطلق و ليس على حالتك و اى تشابه بين ما اقول و بين حالتك هو من قبيل المصادفه :)

الراجل و مراته هما شخص واحد
يعنى ما موجود مع الزوجه حتى لو كان يخصها "مال خاص بعيد عن الزوج" هو لها و لزوجها بعد رضاها طبعا و فى الحكاية دى هناك شخصيات مختلفه
ممكن تكون مديون مثل حالة صديقنا لدرجة البكاء و لكنك لم تطلب منها و استحت ان تعرض عليك لانه ممكن يكون جرح لكرامتك و تكون غير مقدرة لأى مدى هى ازمتك
شخصيات كتير كده حتى لو كانت الزوجه
--
ممكن نقطة تانيه خالص
تكون الزوجه مش مصدقه زوجها لظروف مشابهه سابقه
او سبب الدين كان لشئ يغضبها ففى تلك الحالة ممكن تكون خايفه تديك الفلوس تضيعها فى الفاضى.
لا اعتقد ان زوجه و زوجها فى حالة طيبه مع بعض و يحدث هذا
لان اى عاقله تعرف ان ما يؤثر على زوجها بالتبعية سوف يؤثر عليها و على بيتها
الا لو كانت ...... و على الاصل دور
----------------
نصيحه شخصية لصاحب الموضوع
الحمد لله ان الدنيا استقرت و الهم راح
من الافضل حتى لا تشعر بالمرارة من هذا الموقف و يترك جرح فى نفسيتك من ناحية زوجتك
انك تجلس معها جلسة صراحه و تصارحها باللى كان "و لا تقول انها كانت عارفه كل حاجه" برضه استعرضوا الموضوع بهدوء و كل واحد يعرض وجهة نظرة
و ربنا يزيل ما علق و يبعد الشيطان عن النفس

كلام حضرتك كويس و من حقك طبعا انك تفترض اسباب للموضوع لانك ماتعرفنيش
احب ااقول بس ان الازمة كانت حقيقية و هى عارفة و سبب الديون دى كانت مصاريف الجواز و عدم التنازل من جانبهم عن اى كماليات يمكن يكون لانهم عارفين انى و الحمد لله مرتبى كويس و كانت غلطة منى انى لم اصر على تأجيل شراء بعض الاشياء لبعد الزواج
و على فكرة انا مراتى ست كويسة و اصلها طيب بس ماتعودتش تشيل مسؤولية و بتخاف من امها جدا و انا اتجنب الصدام مع امها لانها من العيلة و لكى لا احمل زوجتى فوق طاقتها
و احب يا جماعة انى انصح الشباب اللى لسة ماتجوزوش انهم مايستعجلوش و يحاولو قد ما يقدرو يتجوزو و هما مش مديونين لان الهم دة ممكن يدمر الحياة .و لازم اى واحد هيتجوز يفهم اهل مراتة كويس امكانياتة من الاول و لا يحمل نفسة فوق طاقتة

[misoalex]

بتخاف من امها جدا و انا اتجنب الصدام مع امها لانها من العيلة و لكى لا احمل زوجتى فوق طاقتها

هى دى المشكله
اوعى اوعى اوعى تفضل على النظام ده
انا قبل متجوز كنت حخطب وحده ومقتنع بيها كل الاقتناع وهى كمان كانت موافقه
بس رجعت فى كلامى بسبب انها بتسمع كلام امها وقريبتها وبعتبرها زى اختها وبتسمع كلامهم بدون تفكير وبتنفذه
لدرجه ان مره قريبتها دى قالتى كده وش وقالتى هى مبتسمعش كلام حد غيرى واوعى تزعلنى عشان مفركش الجوازه
طبعا انا راجعت نفسى على طول وعرفت انى حتعب معاها وخصوصا انى لاقتها ير مقتنعه بكلامى ومصممه انها تسمع كلامها
وفركشت الموضوع
الخلاصه ان المفروض ان كل حاجه بينك وبينها بس المفروض ميكنش فى حد من بره بيأثر على حد من الطرفين صدقنى دى كارثه

[نور القمر]

انا لو لا قدر الله حصلت مع جوزي هساعده لاني مبخلش عليا بحاجة ولا بدهب والناس بتحكي وبتتحاكى بدهبي
وفعل في موقف معين من زمان مع انه كان لسه قليل طلعته وسيبته مع اهله لحل موضوع يخصنا وسافرنا لدرجة اني كنت مقسماه 3 أقسام على حسب درجة الاولوية في البيع لان كان في حاجات عزيزة عليا وحاجات كنت بحبها ومش هالاقي نفسها لكن ربنا فرجها من عنده والدهب ومتبعش
في نفس الوقت لي قريبتين تعرضوا ازواجهم لمشاكل مادية ونصحتهم بعدم المساعدة
هتسألني ليه ؟؟؟؟
هقولك واحدة منهم جوزها كل يوم والتاني طاردها من البيت بعيالها ومهددة بالطلاق في اي لحظة وانسان ملاوع وخبيث يعني لو في اي مشكلة بينهم وهي في بيتها بيرفض يصرف عليهم

دي حالة الحالة التانية جوزها بتاع حشيش وكازينوهات لما يكون معاه فلوس مش بيبخل عليها وفي نفس الوقت بيصرف ببذخ على المحرمات
فلما تساعده بدهبها جزء كبير منه هايتصرف فيما يغضب الله ومش بيعمل حساب اليوم اللي بيكون مزنوق فيه

يعني المقصود من كلامي انه ما ينفعش نعمم الكلام هناك من الرجال من يستحق وهناك الانذال كمان الستات فيهم الجدعة بمائة رجل وفيهم الانذال

اما بالنسبة لموقف حضرتك يجوز والدتها مأثره على شخصيتها و يجوز احساس بعدم الامان خصوصا لو الدهب مش مكتوب بالقايمة

حاول تسامح وتنسى عشان ترتاح

[allo]

انا اتعرضت للموقف ده لما جيبت العربية بس الفرق ان مراتي كان نفسها فيها ههههههه

شرعاً ذهب المرأة حقها لوحدها لأن ده مهرها ومش من حق الزوج انه يقولها هاتيه ولكن
زي ما الإخوة قالوا الست اللي متقفش مع جوزها في ديقته متستهلش تعيش معاه وانا لا أتخيل ان راجل يستحل دهب مراته لأن كرامته متسمحش بكده لكن هي المفروض تبقى حاسة بيه لأنهم في مركب واحدة
وأكيد أي حد فينا مراته ساعدته بحاجة بيبقى بياخدها وهو نفسيته تعبانة وعند أول فرصة بيسدده

وربنا يفك زنقتنا جميعاً وميحوجناش لحد

[Abo_Lina]

مش محتاجة سؤال
لو عكسنا الوضع و إفترضنا إن فيه واحد عنده عربية و فجأة مراته تعبت و محتاجة فلوس العربية عشان تتعالج..هل مفروض يسيبها تموت و لا يقعد يستنى لما مراته هي اللي تيجي تقوله بيع العربية ..

[nabaster]

اما بالنسبة لموقف حضرتك يجوز والدتها مأثره على شخصيتها و يجوز احساس بعدم الامان خصوصا لو الدهب مش مكتوب بالقايمة

حاول تسامح وتنسى عشان ترتاح

معلش يا نور تعليقا علي كلامك

قايمة ايه ودهب ايه؟؟

حضرتك اكيد فاهمه يعني ايه جواز ومعني كلمة شريك حياتك

شريك حياتك يعني الغطا والستر بتاعك

شريك حياتك يعني حضنك وقت البرد

شريك حياتك يعني اسره وبيت واطفال

يعني بتاكلوا من طبق واحد

يعني الي بيتعب فيكم اكن التاني تعب

يعني دموعك متنشفش لغاية لما ربنا يتممله الشفا

لما شريك حياتي يفكر في قايمه وبيفكر في الخيانه ومش واثق فيا

يبقي ايه الي باقي بعد كده؟؟؟؟

معلش وقتها يبقي هقرا علي حياتنا الاسريه الفاتحه

لما شريك حياتي يتخلي عني في اصعب اوقات حياتي

يبقي هيقف جمبي وهلاقيه امتي؟؟؟؟

الوقوف جمب شريك حياتك مش لانه جايبلك وجايبلك فعطفا منك هتقفي جمبه

الحكايه مش في دهبك قد ايه ولا هوا جايبلك من ايه علشان تفكري تدهوله ولالا

مش شرط يكون جايبلك دهب

في حاجات تاني قيمتها في الحياه بينكم كاسره اكتر من قيمة الدهب

الحاجات دي ممكن تكون ماديه علي معنويه تشكيله كده غريبه علي بعض هيا الي بتكون معني كلمة اسره

مع احترامي لو البيت اصلا الي انا داخله مش مديني الثقه وبيفكر من الاول في قصة تامين حياة البنت والكلام ده

انا مش هعتبه من الاساس

وبالمناسبه وقت ما الراجل مش هيبقي طايق البيت

ولا هيهمه قايمه ولا هيهمه دهب ولا شقه

وهيسيب البيت بالي فيه وينفد بجلده ويبقي علي الاقل كسب نفسه

وقتها لا دهب هينفعها ولا قايمه هتنفعها

A.Yakout

[نور القمر]

انا فاهمة يعني ايه زوج وشريك حياة بدليل اني قلت مش ممكن اتأخر عن مساعدة زوجي وقلت اني فعلا قدمت له دهبي قبل كدة لكن في الاخر مش احتاج له وربنا فرجها وعلى فكرة الدهب اللي في قايمتي كمية لا تُذكر بالنسبة للي قدمته قبل كدة

وقبل مقول قايمة قلت مش يمكن مش حاسة بالامان
يعني الحالة اللي انا ذكرتها بتاع قريبتي اللي بتقعد في بيت باباها اكتر من بيتها وبيستندل معاها ومش بيصرف عليها وعلى اولاده هل ننصحها بمساعدته بالدهب وهو ممكن يتخلى عنها في يوم من الايام والدهب في الحالة دي رصيد للزمن ولغدر الزوج ؟؟!!!!!
انا ملخص كلامي ان لكل حالة ظروف مختلفة منقدرش نحكم عليها لاننا منعرفش الطرفين ومسمعناش وجهة نظر الزوجة
وفي الاخر احنا لازم كلامنا يكون تخفيف على صاحب الموضوع مش نقوله

بص

انا عايز ارد وفي نفس الوقت مش عايز ارد

لاني لو اتكلمت في احتمال انا مراتك ترجع بيت اهلها متطلقه (بعد الشر يعني)

فخليني ساكت احسن

a.yakout

[dr.amr]

هى دى المشكله
اوعى اوعى اوعى تفضل على النظام ده
انا قبل متجوز كنت حخطب وحده ومقتنع بيها كل الاقتناع وهى كمان كانت موافقه
بس رجعت فى كلامى بسبب انها بتسمع كلام امها وقريبتها وبعتبرها زى اختها وبتسمع كلامهم بدون تفكير وبتنفذه
لدرجه ان مره قريبتها دى قالتى كده وش وقالتى هى مبتسمعش كلام حد غيرى واوعى تزعلنى عشان مفركش الجوازه
طبعا انا راجعت نفسى على طول وعرفت انى حتعب معاها وخصوصا انى لاقتها ير مقتنعه بكلامى ومصممه انها تسمع كلامها
وفركشت الموضوع
الخلاصه ان المفروض ان كل حاجه بينك وبينها بس المفروض ميكنش فى حد من بره بيأثر على حد من الطرفين صدقنى دى كارثه

انت في مصر بتتجوز الواحده من دول +امها +صحابتها كلهم وخصوصا الانتيم
انا لا اقصد كل الجوازات ولكن فعلا الموضوع ده زاد عن حده
احنا عاملين زي مانكون داخلين حرب اهليه مش جواز
حاجه بقت تقرف
انا برضه فركشت بسبب ام البنت
شيء مستفز ومحزن
وبعدين بصراحه كلمه لصاحب الموضوع طالما انت كويس مع مراتك يبقي ليه تبخل عليك
ويعني ايه بتخاف من والدتها حضرتك المفروض دلوقتي ولي امرها
يعني لازم تسمع كلامك وده واجب عليها انها تساعدك انا مش مع الكلام اللي بيقول انه حسب رغبتها وكده
بصراحه لازم حضرتك تلاقي سبب مقنع عندها للي حصل غير انها بتخاف من والدتها
انا اسف لو كلامي جامد شويه بس انا اتخيلت نفسي مكانك والموضوع ضايقني جدا
ربنا يعينك

[nabaster]

انا فاهمة يعني ايه زوج وشريك حياة بدليل اني قلت مش ممكن اتأخر عن مساعدة زوجي وقلت اني فعلا قدمت له دهبي قبل كدة لكن في الاخر مش احتاج له وربنا فرجها وعلى فكرة الدهب اللي في قايمتي كمية لا تُذكر بالنسبة للي قدمته قبل كدة

وقبل مقول قايمة قلت مش يمكن مش حاسة بالامان
يعني الحالة اللي انا ذكرتها بتاع قريبتي اللي بتقعد في بيت باباها اكتر من بيتها وبيستندل معاها ومش بيصرف عليها وعلى اولاده هل ننصحها بمساعدته بالدهب وهو ممكن يتخلى عنها في يوم من الايام والدهب في الحالة دي رصيد للزمن ولغدر الزوج ؟؟!!!!!
انا ملخص كلامي ان لكل حالة ظروف مختلفة منقدرش نحكم عليها لاننا منعرفش الطرفين ومسمعناش وجهة نظر الزوجة
وفي الاخر احنا لازم كلامنا يكون تخفيف على صاحب الموضوع مش نقوله

يا نور لكل قاعده شواذ ومينفعش نعمم القاعده علشان مجموعة الشواذ دي

انا زيك برضه جبت امثله فوق لستات عايزه الضرب بالنار

يعني مثلا الراجل جاري ده جزاته انه لما جاب الارض احترمها وقال مش خساره فيها وكتبها باسمها

جزاته يشوف منها الي حصل ده؟؟؟

ولحد دلوقت مش عارف يطول لا ارض ولا غيره وزاله اهل الي جابوه

زي ما في رجاله ميملاش عنيها غير التراب

في برضه ستات متستهلش انها تعرف معني كلمة اسره حتي

لانها مش قد المسئوليه لحاجه زي كده

بس دول شواذ يا نور مش العكس

لان اغلبنا ولاد ناس وبنقدر كويس كلمة اسره بكل معانيها

اخر جزء الي يخص موضوع كلامي مع صاحب الموضوع انا قريته بنفس الكلام الي مكتوب وحسيت بيه اوي

يمكن لاني شوفت امثله زي كده فده السبب في حساسيتي دي

ففعلا دمي اتحرق

وطبعا انعكس علي ردي

فغصب عني نسيت انها من طرف واحد ويمكن الطرف التاني يكون عنده مبرر يتسمع

كلمه اخيره

الطيبون للطيبات

ربنا يسترها علينا جميعا

A.Yakout

[نور القمر]

مش محتاجة سؤال
لو عكسنا الوضع و إفترضنا إن فيه واحد عنده عربية و فجأة مراته تعبت و محتاجة فلوس العربية عشان تتعالج..هل مفروض يسيبها تموت و لا يقعد يستنى لما مراته هي اللي تيجي تقوله بيع العربية ..

على فكرة الوضع مختلف تماما
اولا المرض غير الدين
يعني انا واثقه مليون في المية انه بعد الشر لو كان محتاج عملية مكنتش هتتأخر عليه
ثانيا احنا منعرفش سبب الدين ياريت صديقنا صاحب الموضوع مياخد كلامي بحساسية لاني بتكلم عموما وغير مثطالب بالرد على السؤال
لان كل غرضي اخفف عليك شعورك تجاه زوجتك وحضرتك بينك وبين نفسك اسأل
هل سبب الدين سبب مشروع زي خسائر عمل او حد نصب عليه؟؟
هل سبب الدين بذخ واسراف بما يفوق طاقته المادية يعني على سبيل المثال شراء عربية غالية وكان ممكن يستغنى عنها بعربية عادية ؟؟ او رحلات ومصايف في شرم ؟؟ تبخل بالمصاريف على بيتك ؟؟ في مشاكل دائمة بينكم ووصلت لدرجة الانفصال ؟؟

في الحالة الاولى مخطئة بدون نقاش
في الحالة الثانية معاها الحق

انا ملخص كلامي ان لكل حالة ظروف مختلفة منقدرش نحكم عليها لاننا منعرفش الطرفين ومسمعناش وجهة نظر الزوجة

يا نور لكل قاعده شواذ ومينفعش نعمم القاعده علشان مجموعة الشواذ دي


a.yakout

اذن متفقين في الرأي وان اختلف اسلوب عرض الرأي

[Samah AbdAllah]

اهدوا بس ما تزعلوش نفسكوا
هو انا كل ما اسيبكوا شوية ارجع الاقيكوا ماسكين فى بعض
ههههههههه

انا فى حاجة صغيرة عاوزة اقولها للعضو صاحب الموضوع
الحمدلله انت عرفت تتصرف وسددت ديونك
ليه مفكرتش انها ممكن تكون كانت واثقة انك هتقدر تتصرف وقالت تخلى الدهب ده لوقت ازمة اكبر او ظرف طارئ مرض مثلا لا قدر الله ؟؟؟؟؟؟

[human]

انا عاوز اسأل الأخوات اللى معانا هنا لو جوزك مديون فى فترة ما و انت معاكى دهب يسد ديونة هل تبيعى الدهب لسد ديونة
و بالنسبة للرجالة اية شعورك لو كنت فى حاجة ماسة الى المال و مراتك معاها دهب كتير(و انت اللى جايب معظمة) و عارفة الحالة اللى انت فيها و ما عرضتش عليك انك تاخدة تبيعة ربما خوفا من زعل امها
انا اتعرضت للموقف دة كنت مديون لدرجة البكاء و مراتى معاها دهب يفك ازمتى و زيادة
انا لم اطلبة منها و معاملتى ليها ماتغيرتش نهائى لانى مقطنع انها مش ملزمة تعمل كدة
دلوقتى الحمد لله كل حاجة اتحلت بس كل اما افتكر الموقف دة اشعر بمرارة فظيعة
هو انا ياجماعة كدة بأتدلع و لا اية

عزيزى
المراره اللى بتحس بيها مش هتروح
استحمل اللى انت حسه و دايما حاول تفتكر اشياء ايجابيه

الستات دايما ليهم حسبه و نظره للأشياء بعيد عن تفكير الرجل
ممكن يكون التفكير او عدم عرضها او عدم رضاءها لسبب فى غايه التفاهه و لكنه لها جليل الشأن

ممكن يكون خوف عليك و انت موش عارف ممكن يكون خوف من الزمن ممكن يكون مستنيه انك تقدر يعنى نوع من انواع النفس الطويل

عزيزى عمرك ما هتفهم ليه هيه عملت او ماعملتش حاجه

و الغضه اللى بتحصلك و المراره مش هتروح منك بس مع الوقت ممكن تقل

و اكرمها زى مانت كارمها عشان ربنا يوسع عليك

ماتعرفش الخير كان فين يا عزيزى

و تذكر ان هما دايما عندهم هاجس بالخوف و التخوف و انت بيتها و مسكنها -- يعنى برضه مالهاش غيرك

و كل سنه و انت طيب

و هاتلها هديه عشان الفالانتيم :)

[نور القمر]

والله يا هيومان كلام موزون وعين العقل وده اللي بحاول اوصله لكن برغي كتير ومش عارفه
اوجزت فأنجزت