سؤال الى النساء :هل تبيعين ذهبك لسد ديون زوجك

[nabaster]

و كل سنه و انت طيب

و هاتلها هديه عشان الفالانتيم :)

ما انتا كنت ماشي كويس

بلاش سيرة الزلانتين دي علشان بيتقفل فيها مواضيع

ومقفول موضوعين قبل كده علي ايدك

انا كرهت سيرة الزلانتين ده حاسس انه جابلي هس هس

A.Yakout

[Samah AbdAllah]

ايه ده هو الموضوع بتاع الفالنتين اتقفل؟؟؟؟؟؟؟؟؟؟

بطل اشاعات بقا الموضوع شغال اهو

احنا عندنا حرية رأى
خلاص كلها يومين واعملكوا واحد ماليان دباديب وورد

[Most_H]

على فكرة الوضع مختلف تماما
اولا المرض غير الدين
يعني انا واثقه مليون في المية انه بعد الشر لو كان محتاج عملية مكنتش هتتأخر عليه
ثانيا احنا منعرفش سبب الدين ياريت صديقنا صاحب الموضوع مياخد كلامي بحساسية لاني بتكلم عموما وغير مثطالب بالرد على السؤال
لان كل غرضي اخفف عليك شعورك تجاه زوجتك وحضرتك بينك وبين نفسك اسأل
هل سبب الدين سبب مشروع زي خسائر عمل او حد نصب عليه؟؟
هل سبب الدين بذخ واسراف بما يفوق طاقته المادية يعني على سبيل المثال شراء عربية غالية وكان ممكن يستغنى عنها بعربية عادية ؟؟ او رحلات ومصايف في شرم ؟؟ تبخل بالمصاريف على بيتك ؟؟ في مشاكل دائمة بينكم ووصلت لدرجة الانفصال ؟؟

في الحالة الاولى مخطئة بدون نقاش
في الحالة الثانية معاها الحق

سبب الدين زى ما هو قال

حاجات اهلها كانوا طلبنها منه للتجهيز قبل الجواز

يعنى حاجات ليها وللبيت

[nabaster]

ايه ده هو الموضوع بتاع الفالنتين اتقفل؟؟؟؟؟؟؟؟؟؟

بطل اشاعات بقا الموضوع شغال اهو

احنا عندنا حرية رأى
خلاص كلها يومين واعملكوا واحد ماليان دباديب وورد

الموضوع اتقفل واتفتح ويظهر انه موضوع شؤم فعلا

عموما انا بحذرك من قصة الموضوع دي

والحمد لله انك مجربه قبل كده في موضوع راس السنه متهيالي

فبلاش مشاكل لان الاجتماعي اليومين دول فعلا مش مظبوط وناس كتير ماشيه بالبنزين

وناس اكتر نفسها تولع الكبريت

A.Yakout

[dolly13]

انا احب اشارك برايى فى الموضوع ده بصفتى زوجة
طبعا ابيعه وقبل مايطلب وده حصل اكتر من مرة
اولا لانه لايتاخر عنى فى اى طلب
ثانيا لانى احبه جدا وصعب اشوفه مجرد متضايق ولو فى ايدى اكتر من كدة اعمل بدون لحظة تردد واحدة

[rockana9112007]

عزيزى
المراره اللى بتحس بيها مش هتروح
استحمل اللى انت حسه و دايما حاول تفتكر اشياء ايجابيه

الستات دايما ليهم حسبه و نظره للأشياء بعيد عن تفكير الرجل
ممكن يكون التفكير او عدم عرضها او عدم رضاءها لسبب فى غايه التفاهه و لكنه لها جليل الشأن

ممكن يكون خوف عليك و انت موش عارف ممكن يكون خوف من الزمن ممكن يكون مستنيه انك تقدر يعنى نوع من انواع النفس الطويل

عزيزى عمرك ما هتفهم ليه هيه عملت او ماعملتش حاجه

و الغضه اللى بتحصلك و المراره مش هتروح منك بس مع الوقت ممكن تقل

و اكرمها زى مانت كارمها عشان ربنا يوسع عليك

ماتعرفش الخير كان فين يا عزيزى

و تذكر ان هما دايما عندهم هاجس بالخوف و التخوف و انت بيتها و مسكنها -- يعنى برضه مالهاش غيرك

و كل سنه و انت طيب

و هاتلها هديه عشان الفالانتيم :)

انتا راجل عسل واوجزت فأنجزت

[Samah AbdAllah]

الموضوع اتقفل واتفتح ويظهر انه موضوع شؤم فعلا

عموما انا بحذرك من قصة الموضوع دي

والحمد لله انك مجربه قبل كده في موضوع راس السنه متهيالي

فبلاش مشاكل لان الاجتماعي اليومين دول فعلا مش مظبوط وناس كتير ماشيه بالبنزين

وناس اكتر نفسها تولع الكبريت

A.Yakout

لا ممكن لازم الدباديب
وبفكر نبعت طلب للادارة تعملنا nile red وتشغلهولنا مرتين فى السنة 14-2 و 4-11
اعتقد ان الادارة مؤمنة بحرية الفكر وحرية ابداء الآراء
وممكن اجدد الموضوع اللى عملته فى 4-11 افضل
ولا انت ايه رأيك نعمل واحد جديد؟؟؟؟

http://www.nilemotors.net/Nile/104407-happy-valentines-day.html

مش عاوزين نخرج عن الموضوع
خلى موضوع الفانتين نتكلم فيه هناك فى الموضوع بتاعه
اعتذر للعضو صاحب الموضوع عن الخروج عن نطاق الفكرة

[tahayt]

على فكرة الوضع مختلف تماما
اولا المرض غير الدين
يعني انا واثقه مليون في المية انه بعد الشر لو كان محتاج عملية مكنتش هتتأخر عليه
ثانيا احنا منعرفش سبب الدين ياريت صديقنا صاحب الموضوع مياخد كلامي بحساسية لاني بتكلم عموما وغير مثطالب بالرد على السؤال
لان كل غرضي اخفف عليك شعورك تجاه زوجتك وحضرتك بينك وبين نفسك اسأل
هل سبب الدين سبب مشروع زي خسائر عمل او حد نصب عليه؟؟
هل سبب الدين بذخ واسراف بما يفوق طاقته المادية يعني على سبيل المثال شراء عربية غالية وكان ممكن يستغنى عنها بعربية عادية ؟؟ او رحلات ومصايف في شرم ؟؟ تبخل بالمصاريف على بيتك ؟؟ في مشاكل دائمة بينكم ووصلت لدرجة الانفصال ؟؟

في الحالة الاولى مخطئة بدون نقاش
في الحالة الثانية معاها الحق

شكرا يا مدام نور على المشاركة ,بالنسبة للديون كانت بسبب مصاريف الجواز و مطالبها اللى انا مارضيتش اتأخر فيها و هى نفسها اعترفت بعد كدة انها طلبت حاجات مالهاش لازمة
بالنسبة للعلاقة بيننا هى و أهلها فى كل مكان بيحلفوا بيا و باخلاقى معاهم و حسن معاملتى لها
و انا كل فلوسى و وقتى ليها هى و ابنى و بس .عمرى ما بفكر اجيب حاجة لنفسى الا بعد ما أتأكد ان هما مش محتاجين حاجة
و على فكرة انا طول عمرى متعود انى أشيل المسؤولية لوحدى و مابحبش أخلى اللى معايا يشيل هم
يمكن دة مش صح على طول لكن هاعمل اية طبعى كدة

[ghazy12]

انا عاوز اسأل الأخوات اللى معانا هنا لو جوزك مديون فى فترة ما و انت معاكى دهب يسد ديونة هل تبيعى الدهب لسد ديونة
و بالنسبة للرجالة اية شعورك لو كنت فى حاجة ماسة الى المال و مراتك معاها دهب كتير(و انت اللى جايب معظمة) و عارفة الحالة اللى انت فيها و ما عرضتش عليك انك تاخدة تبيعة ربما خوفا من زعل امها
انا اتعرضت للموقف دة كنت مديون لدرجة البكاء و مراتى معاها دهب يفك ازمتى و زيادة
انا لم اطلبة منها و معاملتى ليها ماتغيرتش نهائى لانى مقطنع انها مش ملزمة تعمل كدة
دلوقتى الحمد لله كل حاجة اتحلت بس كل اما افتكر الموقف دة اشعر بمرارة فظيعة
هو انا ياجماعة كدة بأتدلع و لا اية

أخي الفاضل... خلينا نتكلم واحده واحده...

لازم الأول نتفق ان بما انك اشتريت لمراتك ذهب, يبقى ملك ليها تماما, و مش فارق كتير عن الذهب
اللي كان والدها شاريه لها أو اشتريته من مالها الخاص (بتاع شغلها)....

لازم كمان نتفق اننا بنسمع من طرف واحد بس, و كمان لا نعلم الظروف العامه و المحيطه بالموضوع..
يعني كل الآراء مجرد اجتهادات, و انت بس اللي تعرف تقييم الموقف صح, مش حد تاني...

الوضع دلوقتي ان حصلك أزمه ماليه و على حد تعبيرك انها كبيره فعلا, و في امس الحاجه للمسانده...
هنا احنا بصدد حل من اتنين... ( في ما يتعلق بمراتك )
1- اما ان مراتك فعلا تساعدك بذهبها (من نفسها و بقرار خالص منها لوحدها)
2- او ان مراتك مش هتبيع ذهبها...

لو حصل و خدت قرار بالحاله الأولى....
- هتحس بفخر كبير و امتنان و حب و تقدير لمراتك...
- هتحس بضيق كبير بردو لأن مافيش راجل يتمنى يشوف مراته بتبيع ذهبها...
- ممكن ماتخليهاش تبيعه, لكن انت بردو هتحس بالامتنان و التقدير...

للأسف بعض الناس بتتخيل ان ده فرض عليها و كان غصب عنها هتبيع ذهبها... انا ضد ده تماما

لو حصل و مراتك خدت قرار بالحاله التانيه... ما باعتش ذهبها
- هتحس انك في الوقت اللي كنت محتاجلها في ماكانتش موجوده, و هو ده سبب احساسك بالمراره دي

السؤال اللي بيدور في بالك و جواك... ليه هي مافكرتش تبيع ذهبها او حتى تعرض عليا ده؟؟؟؟

الاجابه و بكل صراحه ان ممكن جداا يكون في أكثر من سبب...
1- زي ما قلت ان والدتها ليها تأثير عليها.. و في الحاله دي انصحك انك تتكلم معاها و تحاول تتفق
معاها على مبدأ... ان الأهل ليس لهم أي تدخل في كل ما يخص البيت, و مشاكلنا جوه باب بيتنا و بس

2- ممكن تكون مش مصدقه ان عندك مشكله حقيقيه, أو مش حاسه انها كبير للدرجه دي
و في الحاله دي انت محتاج تقرب من مراتك و تقربها ليك و تشركها في كل شئ علشان تحس بيك أكتر

3- افتراض حسن النيه, و هو انها كانت منتظره لما تلاقي كل السكك اتسدت و ساعتها تبيع ذهبها
و بكده تكون دي رؤيتها للأمور اللي ممكن تكون صح و ممكن خطأ.. لكن في النهايه هي لم تخطأ

4- انها شايفه ان ذهبها عزيز عليها فعلا و مش عايزه تفرط فيه لأي سبب من الأسباب حتى لو عشانك...
و في الحاله دي انت محتاج لوقفه مع مراتك و تتكلم معاها علشان تصحح الأوضاع الغير متزنه بالمره
لأن كده موازين الأمور عندها غلط تماما... لازم تفهمها ان الانسان و بيتنا و حياتنا أهم من ذهب الدنيا
و لازم من نفسها تحس بكده...

و في كل الأحوال... لو مازلت حاسس بالمراره و مش قادر تنسى او تتجاوز الموضوع مع نفسك
أرجوك أتكلم مع مراتك مباشرة و صارحها بكل ما يدور في تفكيرك و جواك (كل حاجه)
و اوعى تشيل حاجه جواك طالما خدت قرار انك تتكلم... لازم تعرض الموضوع بالكامل زي
ما انت حاسس بيه بالظبط, و شوف هي هتعمل ايه... لكن السر في الحوار و المصارحه

اقسملك ان فعلا لو كل زوج و زوجه بيتكلموا مع بعض و بيصارحوا بعض بكل ما يدور بداخلهم (في كل شئ)
عمر ما في بيت هيتخرب, ولا هيكون في مشاكل الا قليل منها و انتوا قادرين عليها تماما

لو ده حصل فعلا... صدقني مع الوقت هتلاقي مراتك بتفهمك من غير ما تتكلم أصلا...

انصحك لوجه الله بالحوار و المصارحه... و خرج الشيطان من دماغك تماما و بلاش تدخله بينكم

ربنا يهديهالك و يباركلك فيها و في بيتك ان شاء الله....

[gouda]

مش عارف
احنا ممكن نعمل تصويت

هل تبيعين ذهبك لسد ديون زوجك
أم تبيعين زوجك للأحتفاظ بالدهب

[أحمد كمال]

انا مش هاطول لان كل الناس قالت اللي انا عايز اقوله ..... و للتلخيص في نقاط

1- الهبة ملك للموهوب. يعني الدهب بتاعها ملكها ..... انت اللي جايبه ما يفرقش عن اللي ابوها جايبه

2- لازم الست تشيل جوزها (الا لو ما يستاهلش عشان بيصرف في حرام و بتاع زي ما نور قالت)

3- بس برضه .... هو مش فرض عليها

4- however ... لو الموقف بالعكس ..... هو هيبيع اللي قدامه و اللي وراه عشانها ..... يبقى اشمعنى؟

5- قدم السبت تلقى الحد قدامك .... مافتكرش اي واحدة هترفض تتوقع من جوزها بعد كده يبقى سخي معاها و بزيادة .. يعني زي ما هو مش فرض انها تبيع دهبها ..... مش فرض اما هو يغتني انه يشتريلها دهب اصلا !!!

6- لو من الاول شايف ان زوجة المستقبل مسلمة ودانها لأي حد ..... بلاش منها اصلا

7- مفيش حاجة اسمها مراتي عايزة تعمل كذا بس خايفة تزعل أمها ..... اعتقد لو الوضع مقلوب هي هتغضب (يعني لو قلتلها انا مش هقدر اشتريها الخاتم ده مثلا لان أمي هتزعل مني عشان اي سبب ...... هيبقى ايه رأيها؟؟؟) ..... انا مثلا اما أمي بتسمع اني افكر اسافر بتقول لي لأ مفيش سفر طول ما انا عايشة (بدلال يعني مش امر و لا زعل) مراتي بتتضايق ..... و ده مثال ..... غير ان شرعا طاعة الزوجة لزوجها أولى و أبقى من طاعتها لأمها و أبوها ... اما الزوج فطاعته الأولى تكون لأمه ثم أبوه ..... و زوجته مالهاش عليه طاعة أصلا !

8- كبر دماغك و طنش تعش تنتعش ...... سيبك ...... ارمي ورا ضهرك عشان تعرف تعيش حياتك ..... و فعلا .... محدش هيحبك زي أمك ...... و انت مش هتحب زوجتك اكتر من ولادك ..... و ده الطبيعي ..... ولادك حتة منك .......

9- الكثير من زوجات اليومين دول بسبب كتر الفرجة على التمثيليات للاسف مقتنعين ان كل الرجالة وحشين و غدارين و لو ما قرصكيش النهاردة هيقرصك بكرة و بتاع ..... فبتعتبر انها لازم تاخد حذرها منه و ما تخونش ...... يعني دايما تشيل قرشين من وراه ..... تشيل الدهب ليها و للزمن ..... الخ ...... و للاسف ما تضايقش نفسك لان فيه الكثير منهن كده بسبب الزفت المدعوق التليفزيون .....

[medo_2060]

فى النهايه يا جماعه الذهب مع ان قيمته كبيره بس اصغر بكتير من العلاقه الى المفروض تكون بين الزوج وزوجته.... وزى ما اتذكر فى الموضوع ان ابسط واسرع حل ان حضرتك تواجه مراتك براحه وتعرف منها السبب وممكن لما تعرف انه كان سبب مقنع تقتنع انت كمان وتستريح لكن لو كان حاجه تانيه يبقى لازم تقف معاها وقفه وتحاول تصلح الامور عشان المستقبل(وعلى فكره فعلا زى ما حضرتك ذكرت ان فى ستات كتير بتخاف تتصرف فى حاجتها عشان خايفه من امها وكأن امها هى المسئوله عنها فى المقام الاول ودا للاسف بيهد حياه عائلات كتير وافتكر كانوا مستضيفين راجل مصرى متجوز اوروبيه والمذيعه بتسأله ليه فضلتها قال عشان انا خدتها كدا بس هى لوحدها لكن فى مصر تتجوز الواحده مع عائلاتها واصحابها وكل قرايبها بمشاكلهم وتكون لازم تتدخل فى حل المشاكل دى)
عموما ما تستعجلش وفكر براحتك واكيد انت هتوصل لحل يرضيكم لانك ادرى بالموضوع دا وبحياتك ككل مننا كلنا

[enas75]

انا طبعا متفقه معاكم جميعا في الي قلتوه
وفي بدايه الموضوع اللي قريته كنت هاين عليا اخنق مراتك
بس فيه حاجه لخبطتني وخلوتني افهم ليه مراتك عملت كده

1- سبب الدين ....انه حاجات باعترافها هي مالهاش لازمه ومع ذلك انت رحت اتداينت وجبتها....وافقت علي كل اللي طلبوه مع ان واضح من كلامك عنهم لو كنت وضحتلها اخرك ايه في الفلوس كان ممكن ماتجبوهاش ....واضح من طبيعتك انك دائما بتحاول توجد الحلول للمواقف بدون طلب المساعده من حد وبدون توضيح ابعاد الموضوع ايه ......فطبيعه الحال هي اتعودت انك حتتصرف ومش هي وبس واهلها كمان...وانك بتعصر نفسك وتجيبلها كل حاجه بدون مناقشه وفي بعض الاحيان الكلام ده مينفعش في الجواز دي شريكه حياتك علي الحلوه والمره ان ماكنتش تبقي عارفه اولوكو من اخركو معاك حتكملو ازاي .....امتي تعرف هي اذا كانت الحكايه جامده ولا بسيطه
............................
علي فكره يمكن لو كان سبب الدين حاجه بجد جت من شغلك او ظروف مرض ...تكون هي اول واحده بايعه دهبها وعفش البيت كله
..............
بس اكيد فيه خلل في الاتصال منك ....خلاها مش قادره تستكشف ابعاد الموضوع صح
اتكلم معاها اكتر .....
وبعدين مراتك مش وحشه وبتقول ان كان ليها ايجابيات كتيره
يعني اكيد مش مستخسره فيك شويه دهب ....لكن ممكن تكون وجهه نظرها ان لسه مجاش سبب البيع
اما بخصوص مامتها انت برضه تقدر تقلل ده
احتويها اكتر ....اجذبها ناحيتك اكتر
ماتخلهاش كل ما نفسها تتكلم مع حد عن حياتها تروح لمامتها
لا تتكام معاك انت .....ساعتها حتلاقي الوضع اختلف
................................
طلب تاني
ماتاخدش كلام الاعضاء انه امر مسلم بيه
بمعني انت ادري واحد بابعاد علاقتك بمراتك واهلها
احنا هنا بنفتحلك سكك تعرف المشكله فين
والخلاصه النهائيه
ان اي ست في الدنيا تبيع دهبها وكل ما تملك لو شعرت بالامان والاحتواء من جوزها
غير كده يبقي تعرف ان فيه سبب

[samirayad]

حاول تسامح وتنسى عشان ترتاح

هذه العباره أفضل ماقرأت فى هذا الموضوع

وأقنع نفسك بالكلام ده

انا فى حاجة صغيرة عاوزة اقولها للعضو صاحب الموضوع
الحمدلله انت عرفت تتصرف وسددت ديونك
ليه مفكرتش انها ممكن تكون كانت واثقة انك هتقدر تتصرف وقالت تخلى الدهب ده لوقت ازمة اكبر او ظرف طارئ مرض مثلا لا قدر الله

[نور القمر]

انا مكنتش واخدة بالي في البداية من سبب الدين
بس عايز الحق المشكلة مبدأتش من اول زنقتك وتخليها عن مساعدتك بالدهب
المشكلة بدأت من زمان لما حملتك وحضرتك وافقتها انك تتحمل فوق طاقتك المادية
مفيش سبب في الدنيا يخلي البتي ادم يتداين إلا لا قدر الله المرض لانه شيء خارج عن الارادة لكن اللي يتداين عربية ولا اثاث فاخر ولا شقة ولا فرح 5 ستارز يبقه ظلم نفسه اولا وشريكته كانت شريكة له في الظلم