عايز أشترى تيشرتات بأسعار معقوله وبجوده عاليه .

[wisambasha]

المشكله ان الصيف لسه بادئ يعنى مفيش تخفيض
:u_thin1[1]:

حيره حيره حييييييييييره .

يا باشا ولا حيرة ولا حاجة
لو عاوز محل في المعادي عندك براندز اللي علي الكورنيش وانت جاي من المعادي بعد مطلع الدائري مباشرة هاتلاقي عنده كل اللي انت عاوزة (اقطان - كاجوال - كلاسيك - بدل ومستلزماتها - جينز - حريمي - اطفال)

وهو رأس مال واحد للحكيم للملابس الجاهزة "كونكريت" بس دي بتبقي ماركات متفرقة اخري بتتصنع في مصانعهم و بتتصدر للخارج
وهاتلاقي اسعارهم ارخص من برة بكتييييييييييييييييييييييير مع جودة عالية

[ahmed_h_g]

يا باشا ولا حيرة ولا حاجة
لو عاوز محل في المعادي عندك براندز اللي علي الكورنيش وانت جاي من المعادي بعد مطلع الدائري مباشرة هاتلاقي عنده كل اللي انت عاوزة (اقطان - كاجوال - كلاسيك - بدل ومستلزماتها - جينز - حريمي - اطفال)

وهو رأس مال واحد للحكيم للملابس الجاهزة "كونكريت" بس دي بتبقي ماركات متفرقة اخري بتتصنع في مصانعهم و بتتصدر للخارج
وهاتلاقي اسعارهم ارخص من برة بكتييييييييييييييييييييييير مع جودة عالية

تمام الله ينور عليك
أوصله ازاى من مدينة نصر بعربيه معلش أصلى مش دايس أوى فى البلد
وأسعاره ؟؟؟؟؟؟

[chicobon]

استني شويه اليومين دول عشان اول الموصم الاسعار بتبقي غاليه حبيتين عشان بيقولك حاجة جديدة كمان شهر لما الحر يدخل هتلاقي تشكيلة اكبر و المحلات ياما افتكر جنينة مول و طلعت حرب مول هما احسن مكانين تلاقي فيهم ملابس رجالي عشان المحلات جنب بعض و سعات بيعملو خصم اتنين بي 100 و كده

[Ghamrawy]

انا بصراحة ما انصحش حد يجيب اى حاجة من دانيال هيشتير
خاماته سيئة و الحاجة لما تلبسها مرتين او تلاتة بيبقى منظرها كأنك لابسها من 100 سنة و تلاقيها مطت و الوانها راحت
ده غير انه فى التخفيضات فى شهر 8 بينزل حاجات درجة تانية و تالتة كمان و لازم تدقق فى الحاجة علشان تطلع العيوب

[egyptawy2010]

انا مش عارف تقدر تيجى اكتوبر ولا بعيد عليك
اذا كان مفيش مشكله عندك يبقى عليك وعلى المنطقه الصناعيه باكتوبر فيه هناك مصانع الملابس للعديد من الماركات المشهوره زى مادوك وتيدلاموند وكونكريت ..وبيبقى عندهم تخفيضات ممتازه علشان انت بتشترى من المصنع على طول وفيه تشكيله كبيره من التيشرتات والقمصان النصف كم والكم والبنطلونات الكلاسيك والجينز يعنى كل الاذواق

طيب فين المنطقة ده وااوصلها ازاى

[mada121977]

طيب فين المنطقة ده وااوصلها ازاى

المنطقه الصناعيه باكتوبر سهل الوصول ليها جداا .. حضرتك هتدخل اكتوبر وتمشى فى المحور المركزى على طول لا يمين ولاشمال لغايه ماتعدى ميدان ليله القدر فى الحى السادس بعد الميدان بحوالى 300 متر هتلاقى مطابع الاهرام على ايدك اليمين كده انت فى المنطقه الصناعيه وبعد مطابع الاهرام بحوالى 300 متر كمان هتلاقى على ايد الشمال سنتر خاص بشركه تيدلاموند فيه حوالى 6 محلات جنب بعض (رجالى كاجوال وكلاسيك واحذيه وحريمى واطفال ) وفيه هناك خصم كبير على المعروضات علشان انت بتشترى بسعر المصنع ... وفيه خلف السنتر ده بحوالى 200 متر مصنع مادوك ومصنع كونكريت وفيه فى نفس المنطقه توكيلات اديداس وكام شركه ملابس جنب بعض ...
يعنى انت هتلاقى اللى انت عاوزه سواء كاجوال او كلاسيك وباسعار مناسبه جدا
اى استفسار تانى انا فى الخدمه

[wisambasha]

تمام الله ينور عليك
أوصله ازاى من مدينة نصر بعربيه معلش أصلى مش دايس أوى فى البلد
وأسعاره ؟؟؟؟؟؟

بص يا باشا
من مدينة نصر قدامك طريقين
1- تاخد صلاح سالم علي طول لغاية ماتعدي كوبري السيدة عائشة وتنزل وتمشي علي طول هاتلاقي بنزينة موبيل علي شمالك تروح عامل يو تيرن كأنك رايح لها ومن جنبها تخش يمين طريق اسمه الخيالة تمسك الطريق ده علي طول لحد ما يسلمك لكوبري العاشر اطلعه وانزل هاتلاقي نفسك علي الكورنيش في الزهراء تكمل علي الكورنيش باتجاه حلوان والمعادي شوية هاتلاقي كوبري امام مستشفي السلام الدولي والنيل بدراوي خليك في اقصي اليمين علشان تخش تحته وتلف شمال بجانب معرض المصرية للسيارات وترجع شوية من اللي مشيتهم في الاتجاه المقابل وانت رايح
امشي شوية صغيرة هاتلاقي الطريق الدائري فوقيك عديه وحضن يمين وادخل بين العمارات اللي علي يمين الطريق هاتلاقيه (انت هاتكون شايف اليافطة بتاعته من علي الكورنيش قبل ما تخش يمين)

2- ممكن تاخد الدائري من مدينة نصر (بس هي ابعد شوية) وتنزل نزلة الزهراء عند محطة مترو الزهراء وتكمل علي طول وبعدين تاخد يو تيرن من تحت كوبري العاشر وتمسك اول الكورنيش من هناك وبعدين تكمل زي ما وصفتلك في الطريقة الاولي

فهمت حاجة
بالنسبة للاسعار
بنطلونات جبردين 75-90
تيشرتات 45-75
قمصان 70-90

[wisambasha]

المنطقه الصناعيه باكتوبر سهل الوصول ليها جداا .. حضرتك هتدخل اكتوبر وتمشى فى المحور المركزى على طول لا يمين ولاشمال لغايه ماتعدى ميدان ليله القدر فى الحى السادس بعد الميدان بحوالى 300 متر هتلاقى مطابع الاهرام على ايدك اليمين كده انت فى المنطقه الصناعيه وبعد مطابع الاهرام بحوالى 300 متر كمان هتلاقى على ايد الشمال سنتر خاص بشركه تيدلاموند فيه حوالى 6 محلات جنب بعض (رجالى كاجوال وكلاسيك واحذيه وحريمى واطفال ) وفيه هناك خصم كبير على المعروضات علشان انت بتشترى بسعر المصنع ... وفيه خلف السنتر ده بحوالى 200 متر مصنع مادوك ومصنع كونكريت وفيه فى نفس المنطقه توكيلات اديداس وكام شركه ملابس جنب بعض ...
يعنى انت هتلاقى اللى انت عاوزه سواء كاجوال او كلاسيك وباسعار مناسبه جدا
اى استفسار تانى انا فى الخدمه

انا رايح بكرة الصبح ان شاء الله مع واحد صاحبي
هما بيفتحوا من الساعة كام كدة اصل احنا هانتقابل الساعة 9.30 في الهرم

[mada_76]

بما انك في مدينة نصر روح النهاردة بص بصه على Nile stock اللى في مدينة نصر في شارع النادي الاهلي امام النادي علطول بس قدام شوية .
ده بيبيع بواقي الماركات العالمية التصدير .
روح واهتتبسط

[mada121977]

انا رايح بكرة الصبح ان شاء الله مع واحد صاحبي
هما بيفتحوا من الساعة كام كدة اصل احنا هانتقابل الساعة 9.30 في الهرم

من 9 صباحا الى 5 مساء

[Terrible_DaRsH]

مفيش محلات فى القاهرة يا جماعة خالص !

اكتوبر ده يعتبر سفر , و العاشر من رمضان برده .

[ahmed_h_g]

بما انك في مدينة نصر روح النهاردة بص بصه على Nile stock اللى في مدينة نصر في شارع النادي الاهلي امام النادي علطول بس قدام شوية .
ده بيبيع بواقي الماركات العالمية التصدير .
روح واهتتبسط

يا سلااااااااااام
ده جانبى ... أنا هروح النهرده ان شاء الله أتفرج وهقولك عملت ايه .
نايل ستوك .... الأسم ده لمحته فى المعادى مش عارف هوه ولا لأ !!!

[human]

فين بالظبط
يعنى أنا على طريق أسماعيليه أروح فين ياريت تشرحلى المكان بالتفصيل ربنا يكرمك .
هل الفرق يستاهل ؟؟؟ يعنى لو روحت ب400 جنيه مثلا" تمام ولا ايه

الاسعار ارخص بكتير

تحت الكوبرى بتاع العاشر من عند كنتاكى اسأل على المنفذ الاوروبى

انا بشترى من هناك بدل فى guy larcohe ارخص نص التمن و القمصان ارخص بكتير

و كمان فيه بتوع اديداس رخيص عن بره بمراحل ممكن 50% خصم و حاجات كتير

هوه ستور كبيييير

[mada_76]

يا سلااااااااااام
ده جانبى ... أنا هروح النهرده ان شاء الله أتفرج وهقولك عملت ايه .
نايل ستوك .... الأسم ده لمحته فى المعادى مش عارف هوه ولا لأ !!!

هو يا باشا
انا كنت عايز اقولك على فرع المعادي بس قولت اكيد هاتتوه زيي . بس فرع المعادي احلى عشان الاجانب اللى عايشين هناك . بس انا معرفش العنوان انا بروحه بالشبه كده . انا المعادي دي بالنسبة ليا بلد تانية خالص معرفش فيها اي حاجة .

[age]

معظم المحلات مصانعها في العاشر من رمضان بس السعار هناك ارخص بكتيير