اية رايكم فى مدينة الشروق

[MaZaGAngeE]

اختي ساكنة في الشروق من 2006 و انا بزورها دايما من ساعتها و ملاحظ تطور مستمر هادئ و نمو في الخدمات و عدد السكان و المحلات
باتمنى ربنا يرزقني عشان اسكن جنبها عشان نكون قريبين من بعض و عشان الشروق حي هادئ جدا و مريح للاعصاب

[mr_safwt]

متابعة جداااااااااا لو فيه اي جديد
لان ان شاء الله شقتي هتكون في الشروق والموضوع ده كان مضايقني جدااااااا
لاني رحتها مرة من حوالي سنتين وكنت حاسة اني في مدينة اشباح
ولحد دلوقتي مرحتش اشوف الشقة ومعرفش هي فين وكنت رافضة اصلا الشروق
بس بصراحة بعد كلامكم على كارفور ومدينتي ااديتوني امل .. ياااااارب اشوفها زي الرحاب كده :d

صحيح كتير مننا مشافش الشروق من مدة كبيرة زى حضرتك
انا عندى اقتراح
كل واحد يروح الشروق يصورلنا كام صورة ويقولنا دية صورة للحى الكام
اهو ناخد فكرة عن تطور البناء ومستوى الاحياء المختلفة
لان فى ناس معندهاش وقت تلف على كل الاحياء عشان تقارن
اى حد عندة صورة او خريطة للشروق نحطها هنا وتكون لينا مرجع وانا هبدء بنفسى هاحط خرايط لجميع احياء
مدينة الشروق

[mr_safwt]

خريطة للمدينة الشروق كلها

[mr_safwt]

.

[Nile Heart]

ايه ياجماعه القلق ده!!

انا ساكن فى الشروق من 2006 فى الحى الثامن فيلات ملاصق لمطعم نانيدا
الحقيقه المدينه بتتطور وتعمر بسرعه هايله
ولا ينقص هنا اى شىء الا اماكن الترفيه (وهى مش مهم قوى يعنى, الرحاب على بعد 15 دقيقه)
ده حتى ماكدونالدز فتح هنا من 6 اشهر وكان يوم عيد لمراتى

الميه فعلآ بقت لا تنقطع هذا الصيف والفضل كما قال زميل هنا لشبكة الميه العكره اللى عملوها لرى الحدائق العامه واللى خففت السحب من الميه الحلوه.. وان شاء الله الميه حتتحسن اكتر مع توصيل الميه العكره دى للحدائق الخاصه كمان عشان دى مسطحات كبيره جدآ

خاليا يتم بناء وتشطيب 4 مدارس خاصه فى نفس الوقت.. منهم واحده ضخمه جدآ جدأ على طريق الاسماعيليه قريبآ ملاصقه لمشروع كارفور

وكارفور وهايبر وان قدامهم سنه أو اتنين على اقصى تقدير على الأفتتاح..

والله ياجماعه نصيحه لوجه الله تعالوا اسكنوا هنا واشتروا اعصابكوا وخللوا ولادكم يلعبوا فى الجناين والشوارع زى زمان.. والأسعار معقوله جدآ بالنسبه للقاهره الجديده والرحاب ومدينتى

المشكله الرئيسيه هنا ,, وهى مشكله بجد مهمه... هى المواصلات
ان شاء الله القطار الكهربى السريع اللى هيوصل من العاشر مرورأ ببدر والشروق والعبور وحتى مترو الانفاق بعين شمس هيخلص على 2015 (العمل بدآ فيه فعلآ).. بس لغاية مايحصل لازم يكون معاك عربيه (أو اتنين لو مراتك بتسوق) وتكون كويسه ومعمره
لأنك هتعمل فى السنه بتاع 35-40 الف كيلو

ثانيا.. ودى مشكله ناس كتير بتجهلها.. ان نمط الحياه المصرى المعتاد بتاع ساعتين النوم العصريه ونزول مشاوير بعد العشا لا تنفع مطلقآ!!!! مش هاينفع تعمل المشوار ده مرتين فى اليوم!.. لازم تلم كل مشاويرك فى اليوم الكامل وترجع بيتك المغربيه وتقعد فيه زى الناس فى امريكا ما بتعيش

تحت امركم فى اى سؤال ,,

[mr_safwt]

شوية صور عن معالم مدينة الشروق

الجامعة الفرنسية





اكاديمية الشروق








الجامعة البريطانية





يلا يا جماعة انا شجعتكم اللى عندة صور بقى عن مدينة الشروق ما يبخلش بيها

[omaroof]

ياترى الاسعار هناك ايه؟

[moatazbunny]

أنا كمان بدور على شقة اليومين دول

اليومين دول أنا كمان بدور على شقة ينفع أتجوز فيها ... مع العلم إني ساكن في الهرم وشغلي في التجمع وأخويا في أكتوبر
المهم أول حاجة عايز أسأل عليها
الانترنت في الشروق موجود ولا كله usb
التليفونات ارضي ولا هوائي

تاني حاجة عايز اخد رأيكم في شقة جبتها من الوسيط
هي في المجاورة السادسه - المنطقة عائلي - حي العمارات من المدخل التالت مدخل السويس
قطعة 484 و 486
90 م بالخدمات وصافي 83 م
محارة وحلوق
90 ألف توتال السعر كاش
108 ألف توتال السعر تقسيط على 72 شهر (للشركة مش ل بنك)

ياريت أعرف رأيكم إيه في المنطقة دي عشان أنا لسة مرحتش أشوفها لغاية دلوقتي

استلام 8 /2011

[Nile Heart]

اليومين دول أنا كمان بدور على شقة ينفع أتجوز فيها ... مع العلم إني ساكن في الهرم وشغلي في التجمع وأخويا في أكتوبر
المهم أول حاجة عايز أسأل عليها
الانترنت في الشروق موجود ولا كله usb
التليفونات ارضي ولا هوائي

تاني حاجة عايز اخد رأيكم في شقة جبتها من الوسيط

ايه ياسيدى بس انت محسسنى انى عايش فى اوغندا.. المدينه فيها كل حاجه.. مش ناقص الا الوصله المسروقه بتاعت الدش.. ودى مستحيل تتعمل لان المسافه بين العمارات كبيره قوى مش زى القاهره

الشقه بقى دى لازم لازم تشوفها الاول... لان المدينه بتتغير كل شهر ومن منطقه لمنطقه اختلاف كبير

بس هنا عمومآ الشقق طلعت نزلت سعر المتر على المحاره من 1000 الى 1600 ..من اقل منطقه الى افخم منطقه

[egyptawy2010]

طيب ياترى سعر الايجار كام لشقة 100 متر

[mr_safwt]

ايه ياسيدى بس انت محسسنى انى عايش فى اوغندا.. المدينه فيها كل حاجه.. مش ناقص الا الوصله المسروقه بتاعت الدش.. ودى مستحيل تتعمل لان المسافه بين العمارات كبيره قوى مش زى القاهره

الشقه بقى دى لازم لازم تشوفها الاول... لان المدينه بتتغير كل شهر ومن منطقه لمنطقه اختلاف كبير

بس هنا عمومآ الشقق طلعت نزلت سعر المتر على المحاره من 1000 الى 1600 ..من اقل منطقه الى افخم منطقه

طب حضرتك اية رايك فى مستوى الاسكان العائلى
معروض على شقة هناك 100 متر ب135 الف على 5 سنين
استلام بعد 6 شهور
هل الاسكان العائلى دة مستواة زى مناطق العمارات

[Nile Heart]

الحقيقه انا معنديش فكره عن التفاصيل دى.. بس زى ما قلت قبل كده, لازم تروح وتعاين بنفسك, لان المناطق بتتغير وبتعمر بسرعه جدا
انا لما نقلت هنا من 4 سنين كان البلوك بتاعى فيه 4 فقط من 14 قطعه مبنيه والباقى رمل.. دلوقت فاضل واحده بس

لازم تشوف بنفسك. اوعى تعتمد على السمع او الكلام .. ولازم تشوف كل شويه .. مش تقول انا كنت هناك من سنه ....

[amir]

انا ليا تعليق بسيط علي الموضوع في الجزء الخاص بمدينه بدر
انا كنت شغال فتره في مدينه بدر و لاحظت التالي
تحس ان بدر دي مدينه مجرمين
و بالاخص منطقه صبحي حسين و الزلزال
تحس ان لا وجود امني هناك
و الاوضاع في الشارع متروكه للمعلمين و البلطجه و فرض السيطره
ده غير المواقف اللي شفتها بعيني و المواقف التانيه اللي اتحكتلي
من ساعتها و انا بعتبر مدينه بدر دي وباء مدمر زيها زي عزبه الهجانه تماما

[solid_khaled]

كنت عايز أعرف أسعار الفيلات الحجم ال-small ٣٠٠ م داخل و خارج الكومبوندس

[mr_safwt]

شوية صور عن معالم مدينة الشروق

الجامعة الفرنسية





اكاديمية الشروق








الجامعة البريطانية





يلا يا جماعة انا شجعتكم اللى عندة صور بقى عن مدينة الشروق ما يبخلش بيها

طب اية يا جماعة محدش عجبة اقتراحى ان الكل يضيف اى صورة عن مدينة الشروق
بدل ما نلفها كلهاعشان نعرف جميع احياءها