تشترىلابتوب (نوتبوك) ايه؟

[Karim_Monir]

فعلا توشيبا جهاز رائع ويعتمد عليه بشدة وحمال اسية

[cazanova555]

بص انا خبره في المجال ده 3 سنين

من الاخر كله صيني دلوقتي في البلد

طبعا لو لاب توب يبقي توشيبا

بعد كدا ديل

و الاتش بي بقي هو و كومباك شركه واحده

طبعا اللاب كورتديو او سيليرون يكون افجر

[abdelaziz-waleed]

طبعا اللاب كورتديو او سيليرون يكون افجر

مش فاهم معنى كلام حضرتك

[zeyad1810]

بصراحة انا ماجربتش غير نوع واحد هو سونى فايو كورديو و هو جهاز ممتاز بس للاسف مش متوافر فى مصر وانا كنت جايبة من برة

[OsKaR]

بصراحة انا ماجربتش غير نوع واحد هو سونى فايو كورديو و هو جهاز ممتاز بس للاسف مش متوافر فى مصر وانا كنت جايبة من برة

متوافر في مصرفي فروع فيرجن بس ارخص جهاز ب 10000جنيه فمحدش بيشتريه
لكن الصراحه تتقال الجهاز 100 100

[Dr Ahmed]

نصيحة أحب أضيفها بعد شرائى للاب توب إتش بى

لابد أن تتأكد أن فترة عمل البطارية المصاحبة للكمبيوتر تفى بإحتياجاتك

ودى ممكن تعرفها من الرقم اللى مكتوب وراها:
32 wh يعنى بتقضى شغل تقريبا ساعتين
64 wh يعنى أربع ساعات
وهكذا

[tutankhamoun]

نصيحة أحب أضيفها بعد شرائى للاب توب إتش بى

لابد أن تتأكد أن فترة عمل البطارية المصاحبة للكمبيوتر تفى بإحتياجاتك

ودى ممكن تعرفها من الرقم اللى مكتوب وراها:
32 wh يعنى بتقضى شغل تقريبا ساعتين
64 wh يعنى أربع ساعات
وهكذا

دكتور أحمد يا جميل
كلام حضرتك جميل و زي العسل
بس الكلام ده و هي البطارية جديدة بس
لأن البطارية حالها و حالتها بتقل بعد تقريبا 6 شهور و بتلاقيها مبقتش تديك نفس الوقت اللي كانت بتقعده و هي جديدة ......... علشان بس الناس تكون عارفة المعلومة المهمة دي

[Dr Ahmed]

منا قصدى واحنا بنشترى الجديد

إنما المستعمل لابد من التجربة

اللى جبته (ومكنتش أعرف) أبو 32
بيشتغل بالكتير ساعة ونص وهو لانج

يعنى بعد 6 شهور لو كمل نص ساعة يبقى كتر خيره

[engamrnour80]

انا ارشك و بكل ثقة الديل عن تجربه
و مش هتكلم عن الكفاءة و المتانة لان دى مصفات الديل و اخرون و لكن الاهم خدمات شركة ديل على الموقع لو حصل اى مشكلة فى جهازك مجرد ما تكتب السيريال بتاع الجهاز على الموقع و هتلاقى كل حاجة عنه و عن كيفية تشغيلة و كمان البرامج يتاعت الجهاز كلها
بجد دى شركة محترمة
انا قلت رايى بس ولكن شوف ظروف(الماديات) هى اللى بتحكم

[pendodo2002]

بص يا باشا ... انا هقولك بناء على خبره يجي كتير اوي اوي في الليله دي ...
اولاً لازم تكون عارف انتا عايز ايه ؟
بمعنى ..
هل انتا مهندس (او من مدمني الالعاب ) مثلا ومحتاج جرافكس عالي
يبقا في الحاله دي تدور على لابتوب فيه كرت شاشه فوق ال 512 (وممكن 256)
هتلاقي منه نوعين ...
الاول Shared Memory وده غالبا هيكون Intel وده سيء جدا وبيحمل على الرامات على الفاضي و مبيديش النتائج اللي هيا بالاضافه ان في خاصيات كتير جدا و العاب كتير مبتشتغلش عليه ... (في بعض الاحيان بيكون كرت الشاشه open GL وهو بيحسن الآداء نوعا ما بس مش اوي و بيكون كرت الشاشه واخد 8 او 16 ميجا من الرام وهوا بيعمل شوية عمليات مضاعفه بيخليهم من 64 إلى 256) .... المهم ابعد عن ال shared memory بقدر الامكان
النوع التاني وهو كرت شاشه مستقل يعني له بروسيسور لوحده و رام لوحده و غلبا بيكون البروسيسور بتاعه اما من ATi او Nvedia ... الاتنين كويسين بس Nvedia افضل من نايحه القدره على المعالجه بشكل اسرع (العاب) ... اما ATi افضل بالنسبه للمهندسين

هل شغلك بيتضمن تحميل عالي على البروسيسور و الرامات (شغال في بورصه مثلا)؟
يبقا تشوف لابتوب بروسيسور عالي Core Due اوCore 2 Due او Centrino و.... اوعى اوعى انك تشتري بروسيسور Celeron (مع انه الارخص بفارق كبير) ...
ليه ؟ .... علشان السيليرون دا استهلاكه للكهربا عالي جدا و بيسخن وعمره الافتراضي قليل جدا جدا ... وبالتالي لا البطاريه هتعمر معاك اكتر من ساعه زمن والمروحه بتاعته بعد شوية هتلاقيها بقا صوتها ولا مروحه الردياتير في العربيه و صوتها عالي جدا

تبص برضو كويس على كاشات البروسيسور وياريت انها متقلش تحت اي ظرف كان عن 2 ميجا هتلاقي منها 4 و 8 (بس طبعا اغلى)

لو الرامات RAMs قليله ... ممكن تزودها بفرق قليل بعد عمليه الشراء (يعني ال 2 جيجا بـحوالي 300 جنيه كـ تشيب واحد) ... .. بالإضافه ان في بعض الاحيان بيكون في خاصيه مهمه وهي Dual Channel وهي مهمه لما تحب انك تشتغل بضعف قدره الرامات بتاعتك (بشرط انهم يكونو متطابقين -تماما- في كل شئ ... حجم وماركه و باص )
ولاحظ ان اللابتوب فيه حاجتين اتنين بس اللي ممكن تعملهم upgrade وتطورهم .
الاولى وهي الرامات ... والتانيه و هي الهارد ديسك
(والاتنين تحديثهم مش مكلف عموما من 150 إلى 500 جنيه )

البطاريه لازم تاخد بالك منها و تسأل الراجل وانتا بتشتري ... البطاريه بالشغل عليها كتحميل متوسط زي برنامج الوورد هتقعد قد ايه .... ولو تحميل عالي زي العاب جرافكس جامده هتقعد قد ايه ....
متاخدش بالكلام اللي بيكون مكتوب اللابتوب انه بيقعد 4 ساعات و 5 ساعات و الكلام ده ... لانه دا بيكون محسوب على اعتباره idle او الكمبيوتر في وضع استعداد ولكن من غير حتى تحريك الماوس (وارجع افكرك تاني اوعى تقرب للسيليرون لان حتى في عمليه اعاده البيع
هيخسرك كتير اوي اوي )
ولاحظ ان في بطاريات سفر بتتباع بشكل منفرد بتقعد من 5 إلى 8 ساعات .. ممكن تبقا تسأل عنها لو حبيت بس سعرها غالي

موضوع الوزن ده لازم تحطه في الاعتبار كويس .... وده عن تجربه سفر كل 100 جرام تخسرهم من وزن اللابتوب هيريحوك كتييييييييييييييييييييييييييييييييييييير جدا خلال السفر سواء بالقطار او الطياره او غيرهم ... وده عن تجربه ما بين لابتوبين Dell و Acer الفرق بينهم حوالي كيلو ... فلازم تاخد بالك من الموضوع ده علشان متقعدش تسب و تلعن

الشاشه ... الوانها لازم تكون مريحه (يعني متحسش انها منوره في عينك اوي) عرض الشاشه متناسب مع ارتفاعها ... يعني هتلاقي شاشات عريضه جدا و ارتفاعها صغير ... وشاشات ارتفاعها كبير و عرضها صغير و في كلا الحالتين تلاقي الشاشه مكتوب عليها 15 بوصه (ده لان شاشات الكمبيوتر بتتحسب بالطول القطري من الزاويه العليا في اليمين للزاويه السفلى في الشمال )

لازم تعرف هل اللابتوب اللي هتشتريه ده معاه اسطوانه وندوز اصليه و لا مجرد اسطوانه ريكوفير (لان ده بيفرق احيانا من 100 إلى 1000 جنيه)

نيجي بقا للماركات

IBM
دي اشهر من نار على علم بس لابتوباتها غاليه و شكلها نوعا ما مش اللي هوا و الامكانيات منخفضه ... (وده يرجع لانك بتشتري اسم الشركه قبل ما بتشتري اللابتوب شخصيا )

Acer
دي شركه قويه جدا و اثبتت مكانتها في الاسواق الدوليه بس اللي موجوده هنا في مصر مضروبه ... لو عايز ممكن تجيب من برا مصر و هي تعتبر الارخص و الافضل (وده اللي انا شغال عليه حاليا) و معظم الاجزاء صناعه ماليزي نظيفه ....بس حسب آخر كلام ليا مع الشركه هما ملهمش توكيل صيانه معتمد في مصر (طبعا ده نقلاً عن مسؤول المبيعات في الامارات - ابوظبي) .... (افكرك تاني ... اوعى تشتريه من مصر)
ميزاتها : امكانيات عاليه بسعر منخفض جدا مقارنه مع مثيلاتها بالإضافه لوزنه الخفيف
سلبيات : عمر اللابتوب الافتراضي صغير ... (يعني سنه او سنه ونص و هيبدأ مستوى الآداء بتاع اللابتوب يقل ) ... واضف لده ان بطارياته عمرها الافتراضي صغير جدا (من ساعه ونص إلى ساعتين و نص (تحميل متوسط ))
بالإضافه انه بيسخن

وده قسم خاص من شركه ايسر بيطلع لابتوبات عاليه جدا من ناحيه الامكانيات بس عيبها الوحيد انها معالجات AMD ( مع انها لا عيب ولا حاجة ... بس هيا مش مقبوله في العموم) ... طبعا سعرها غالي و لو انو برضو رخيص في نفس الوقت مع مقارنته مع الانواع التانيه Ferrari Acer

Sony
طبعا هنرجع لنفس مشكله ال IBM انك بتشتري اسم الشركه قبل اللابتوب علشان كدا هيا غاليه ... ولكن امكانيات اللابتوب و تصميم اللابتوب الخارجي يخليه نوعا ما يستحق المبلغ
الصناعه مشتركه ما بين اليابان والصين (يعني هتلاقي حته من هنا و حته من هناك)
ميزات : تصميم خارجي جميل و امكانيات عاليه وبطاريه قويه و افضل سماعات في مجال اللابتوبات
السلبيات : ثقيل و مرتفع السعر

Dell
طبعا هوا لا خلاف انها من افضل الشركات في مجال اللبتوبات و لكن نرجع ونقول ان الشركه دي مكانها مش هنا ... دي شركه سيرفرات و سوبر كمبيوتر ...
من سنتين حصل مشاكل كتير اوي في الشركه بسبب ان بطاريه اللابتوب بتنفجر (ايوان يا باشا زي ما بقولك ... بتنفجر) ... الشركه وقتها سحبت اكتر من 3 مليون بطاريه من السوق علشان المشكله دي ... ومن ساعتها الناس مقلقه من الشركه دي
ميزاتها : اسعارها متوسطه نسيبا بالإضافه إلى بطاريه قويه و طويله الامد و سريعه الشحن و مش بيسخن بسرعه
عيوبها : وزنها ثقيل جدا (تاني اثقل نوع من انواع اللابتوبات)

Toshiba
دي برضو احد افضل الشركات ما لم تكن الافضل ولكن لابتوباتها هي الاثقل بجداره ... البطاريات قويه جدا و التصاميم الخارجيه جميله ....و الشاشات غالبا كبيره نوعا ما ... المنتج برضو ياباصيني (ياباني و صيني)
ميزاتها : البطاريه و الاداء بشكل عام جيد ان لم يكن الافضل
عيوبها : الوزن و الحجم الضخم (اثقل و اكبر لابتوبات)

Fujitsu Siemens
شركه كويسه والتصاميم بتاعت اللابتوبات كويسه بس كامكانيات هيا متوسطه و بطاريتها جيده
بس سريع البهدله (اللون بيروح و الزراير بتلاقي مناطق بقت ناعمه و التانيه خشنه و نفس الكلام على التاتش باد)
ميزات : صناعه اوروبيه (في حد علمي) جيده جدا و امكانيات متوسطه مع سعر متوسط مع وزن جيد و الامكانيات مناسبه
عيوب : عيوب مظهريه ليس إلا ... بالإضافه للعمر الافتراضي قصير نسبيا (سنه و نص ) و تلاقي الاداء بعد كدا بينخفض
(طبعا هتلاقي انتاجات منفصله لشركه Fujitsu و شركه siemens ابعد عنها )

Asus
الشركه دي هيا اكتر الشركات من ناحيه السيطره على السوق المصريه بشكل عام في متعلقات الكمبيوتر ... هيا فرنسيه ... و اجهزتها جيده من ناحيه الامكانيات ولا تختلف كثير عن السيمنس و لكن يعيبها نقسه واحده وهي التصاميم حيث انها نوعا قديمه شبيهه بال IBM .... فيه منو امكانيات عاليه جدا بس ده بينعكس على مدى ضخامه اللابتوب و وزنه
ميزات : شبيه بالسيمنز
عيوب : التصميم الخارجي سيئ
Asus-Lamborghini
دا قسم خاص بالتعديلات على لابتوبات ال asus .... طبعا هنا هما بيعدلو في شكله تماما وبيخلوه افضل بكتير من السابق و الامكانيات عاليه جدا و بالنسبه لسعر فهو ندا بند ضد Acer-Ferrari

Compac
شركه كويسه بس بقالها كام سنه كدا متفيه لا حس ولا خبر ومفيش اعلانات كتير عنها ... بس من ناحيه المواصفات عموما هيا شبيهه بالتوشيبا بس ارخص بنسبه معقوله

HP
ودي الشركه اللي تعتبر المنافس الاول لشركه Sony ... امكانيات و تصاميم عاليه جدا واسعارها اقل من سوني بنسبه كبيره ووزنها معقول بالإضافه ان لابتوباتهم فيها افضل سماعات ممكن تسمعها

Apple MAC
ودا من انتاج شركه ماكنتوش وهو الاصغر و الاشيك و الاقل وزنا وبطاريته معمره جدا ... بس هو ممكن يعتبر تاني اغلى (بعد التوشيبا) او اغلى لابتوبات ممكن تشتريها بشكل عام ...
البروسيسور بتاعهم G4 غالبا 3.2 جيجا هيرتز ز باصات بتاعته عاليه جدا
امكانياته عموما جيده بس عيبها الوحيده هوا نظام التشغيل اللي كلنا مش متعودين عليه وهو نظام تشغيل Apple Macintosh X O/S ... علشان كدا برامجه قليله و له برامج مخصوصه علشانه طبعا ممكن تقول ان نظام التشغيل ده (نظريا) ملهوش اي فيروسات ممكن تصيبه نظرا لانها مش متوافقه مع انظمه التشغيل نفسها (زي اللينكس و اليونيكس)...بس برضو لو حبيت انك تشتغل على الوندوز ممكن تنزل عليه برنامج اسمه Virtual PC ومن خلاله تقدر تنزل وندوز XP او Vistaو تستعمل الكمبيوتر عادي جدا


في بعد كدا انواع نص كم (او هيا مش نص كم اوي بس ملهاش سوق خالص )
زي
BenQ
Averatec
Daewoo
Flybook ... <<<< وده لابتوب و موبايل في نفس الوقت
Lenovo
LG ....<<< طبعا هيا شركه كبيره ومحدش ينكر ... بس انتا هتشتري لابتوب مش غساله
NEC
Philips ... <<< مقاطعه
Wacom ... <<< دول لابتوباتهم من نوع تابلت كلها بمعنى ان مفهاش كيبورد كلها بتشتغل زي ال i-mate كدا تتش سكرين و بتكتب و ترسم عليها



واخيرا اتمنى اني اكون وضحت ليك الفروقات و خليتك تحتار اكتر :D

وابعد تماما عن المستعمل تحت اي ظرف إلا إذا كنت عايز تجرب في فلوسك

تحياتي
وبالتوفيق

[Ahmed Hassan]

الله ينور عليك

[kamalantivirus]

بعد كدا انواع نص كم (او هيا مش نص كم اوي بس ملهاش سوق خالص )

زي

Lenovo


lenovo =ibm

[M_HaFeZ]

بالنسبه لموضوع سحب البطاريات ده مش بس على Dell
بالعكس الامر ده وصل ل HP , Sony , Sanyo battaries

http://arabic.cnn.com/2005/business/10/15/hp.battery/index.html

http://www.alriyadh.com/2006/09/30/article190584.html

http://www.aljazeera.net/NR/exeres/4ABB89B5-7D12-4D2F-82BC-F93DF98F5AF4.htm

http://arabic.cnn.com/2006/business/9/5/panasonic.recalled/index.html

http://www.alnilin.com/news/modules.php?name=News&file=article&sid=16055

http://www.saudiinfocus.com/ar/forum/showthread.php?t=31111

http://www.qatifoasis.com/gdo/index.php?showtopic=3769&mode=threaded&pid=39047

بالنسبه لسونى انا شايف انها Overpriced اوى اوى اوى
مش عن تجربه الصراحه بس تجارب اصدقاء ان السونى مش عايز بهدله
يعنى ادفع فى جهاز مثلا 12-14 الف جنيه وفى الاخر يبوظ علشان اتبهدل !!!
عموما عن تجارب الIBM بتاع شغل اوى بالنسبه للينوفو التجارب معاه مع الناس اللى اعرفها مش كتير بس فى الاخر صينى

[Dr Ahmed]

أعترض جدا على وصف معالج سيليرون أنه بيسخن وبيسحب طاقة أعلى

العكس تماما

المعالجات الجديدة الثنائية والمتعددة تحتاج طاقة أعلى جدا وتسخن قطعا بدرجة أكبر وتحتاج نظام تبريد أعلى كفاءة

ولينوفو نص كم؟؟؟

بصراحة النقطتين دول خلوا ثقتى بباقى المقال أقل جدا

[M_HaFeZ]

مع احترامى برضه
ال HP فى التصميمات مش اد كده بالعكس معظم التصميمات فى فئات المتوسط سئ جدا والالوان فعلا بتروح وعن تجارب .... نفس الكلام بالفوجيتسو سمينز ... تصميمات سيئه وانا هنا باتكلم عن الفئات المتوسطه يعنى اللى اسعارها من 4500 - 6000 جنيه مش الفئات الاعلى او ال tablets
ال Compaq مختفاش ولاحاجه كل الموضوع ان HP اشترته ب 25 مليار دولار
وعلى فكره ال Compaq كانت تانى احسن مصنع فى فترات كتيره لل PC بعد IBM وقبل DELL
كلامك عن السيليرون صح جدا لانك لو وفرت الف جنيه او حتى الفين فى تمن الجهاز علشان تشترى سيليرون هتتذل وتتخنق ب اربع الاف ... بجد السيليرون من اول مانتل عملته حرام فيه الفلوس
انا اشتغلت على سيليرون سنه 2000 كان زيرو كاش ... مجاتش الفرصه انى اكشف عليه بس مجرد استخدامه حاجه زباله فوق الوصف كان بيهنج حتى عند فتح ال سونيك البرنامج الاشهر وقتها لتشغيل الاغانى وبيهنج بمعدل كل دقيقتين ...
اشترى دماغك واشترى اعصابك وزود وبلاش السيليرون اللى شايف انه فى النسخ الجديده الاستخدام الوحيد له جهاز فى مكان اقصى استخدامك عليه هو تشغيبل الاغانى او تشغيل البرامج الضعيفه

بالنسبه لل Apple MacBook كلامك صح اجهزه ابل ممتازه بس عيبها الاسعار العاليه وكمان نقطه مهمه اوى انك لما تشترى حاجه Apple هتضطر انك تحط رقبتك فى ايد بائعى الابل القليلين جدا فى مصر والاسعار هتبقى غاليه جدا جدا ده غير ان مفيش على حد علمى مصنعين كتير زى اجهزه IBM Compitable اللى موجوده فى السوق
وهتضطر تشوف نفس المواقف اللى قابلتنا فى اواخر التسعينات لما كنت تلاقى الاسعار مرتفعه جدا من الموردين وازاى انك تلف علشان تشترى اى حاجه للكمبيوتر