الريان هل هو اسطورة اقتصاديه .. ام نصاب محترف ....!!؟

[hesham_tawfiq]

دي كانت شركة قانونية و ورقها سليم و كل مودع كان شريك في الشركة بقدر مساهمته
و لاتنسي ان ماليزيا و تركيا تحولوا تماما و كليا خلال عدة سنوات قليلة
لا تصدق كلام الحكومة الفارغ ان التغير يحتاج عقود و قرون
عجلة الخير سريعة لو سابوها تمشي
و شوف اي ميزانية لاي شركة في البورصة شوف المصروف كام و شوف المكسب كام و انت تعرف ان 25% في بعض القطاعات شئ سهل جدا خصوصا لما تكون رائد مش بس في البلد لكن في الشرق الاوسط كله و افريقيا

خلاص

مش ماليزيا ولا تركيا بس وانا متاكد ان الحكومه لما بتقول التنميه محتاجه قرون تبئى كدابه
بالنسبه للشركه اللى ( صافى ربحها ) 25% على راس المال فانا اشك ان فيه بزنس كده

[hesham_tawfiq]

و ايه الغلط انه يعمل كدة؟؟


ثانيا: مين قال لحضرتك ان ربح 25% لأي تجارة ده ربح خرافي؟؟ معظم الشركات بتكسب أكتر من كدة بكتير و ده مكانش بيبيع و يشتري لأ ده كان بيزرع و يصنع بنفسه يعني مكسبه أكبر من أي شركة بتتاجر بس.

ثالثا: مفيش حاجة أسمها هل الفائدة اللي بيديها دي هي مبلغ الربح الفعلي و لا لأ. هو أصلا مش مفترض انه حيدي الناس المكسب كله, لأ طبعا ده عقد بين طرفين واحد بيشغل فلوس واحد مقابل انه بياخد جزء من الربح لنفسه. عقد مرابحة أسلامي 100%. و حتى النظم الربوية برضوا بتعمل كدة, يعني أي بنك مثلا المفروض انه بيدي المودعين فايدة على فلوسهم اللي هي رأس المال اللي بيشتغل بيه, هل الفايدة دي هي كل الأرباح اللي بتدخل للبنك؟؟ لأ طبعا, هو بيدي المودعين جزء و البنك بيحتفظ بجزء اللي هو بيعتبر الأرباح السنوية اللي البنك بيحققها.

لا صافى ربح 25% ( صافى مش اجمالى ) على راس المال شيئ مش خرافى بس صعب يتحقق فى فتره قليله زى اللى طلعت بيها مجموعة الريان دى مجموعة اوراسكوم او طلعت مصطفى على الرغم من طول عمرها فالسوق واستثماراتها الضخمه ( زى الريان ) مبيعملوش الرقم دا
وبالنسبه لنقطة هو بيوزع كام فانت برضه مفهمتنيش
مفيش حاجه فالدنيا اسمها شركةتوظيف اموال تشتغل مش بفلوسها وبعيد تماما عن رقابة البنك المركزى اللى هو اصلا مسؤوليته الرقابه على حجم النقد المتداول فى السوق
الغلط مش فى انو عمل شركه بالشكل دا الغلط فى اللى اخترع شركه بالشكل دا مشفناهاش غير فى مصر
بذمتك عمرك سمعت عن شخص او شركه تلم فلوس عشان تشغلها وتوزع ربح من نفسها كده
دا الشركات المساهمه نفسها لما بتوزع ارباحها بيبئى فيه اجراءات منظمه لكده من ضمنها موافقة الشركاء ( الجمعيه العموميه ) واعتماد ميزانياتها من مراقب خارجى مستقل

وبعدين سؤال برييييييئ جدا هو اصلا راس ماله فين ومنين لو هو اشتغل بفلوس الناس ؟
فيه تعليق على الموضوع بيقول انو كان بيلعب فالبورصه ب 25 مليون وهو فالجامعه جابهم منين - لو الرقم دا صح - ولو اصلا كان فيه بورصه فالثمانينات
انا لا مع الحكومه ضد الريان ولامع الريان ضد الحكومه انا معرفش غير مخى اللى ربنا اداهولى افكر بيه ولما اشوف مجموعه كبرت بالسرعه دى وفى 3 سنين بالكتير - من 1985 - 1989 وفيها حجم الفلوس دى لازم اشك
انا معاك ان عجلة الخير بتمشى بسرعه والكلام دا بس العالم كلله بياخد بالاسباب وبيفكر بالمنطق

[hazoom2006]

كلامك جميل..فعلا مفيش حد يبقى عاوز يسرق يشتغل في الحاجات دي..أرز..سكر..قمح ذرة..لحوم..كشاكيل وأدوات مدرسية
الحاجات دي كانت عاملة إشباع للناس..وكانت نموذج لقيام القطاع الخاص بدوره الاجتماعي الحقيقي ومساعدة الحكومة في توفير احتياجات الناس الأساسية....لكن ده لما تبقى الحكومة عاوزة تحقق احتياجات الناس الأساسية فعلا..لكن لما يبقى لها هدف تاني..لازم يطلع الريان وأشباهه حرامية

حاجة مهمة بس عاوز أقولها..وهي حول فكرة (إنه بيستغل الدين لتحقيق أغراضه)..الكلام ده خطير جدا وفيه محاولة متعمدة للتشويه...أليس من حق المتدينين أن يتجاروا ويكسبوا من عرق جبينهم ومن الحلال حتى لو كسبوا المليارات...وهل حتى يستطيع الإنسان أن يعمل في البيزنس عليه أن يسمي نفسه ساويرس مثلا حتى تفتح له جميع الأبواب...المتاجرة بالدين معناها أن الإنسان يعطيك صك غفران مقابل المال..أو يتاجر بالحرام ويوهم الناس أنه يتاجر بالحلال لتدينه..أما أن يكون متدينا ومجتهدا في التجارة الحلال فهذا حق من حقوقه...
وبالمصطلحات المعاصرة كان عثمان بن عفان وعبد الرحمن بن عوف من المليونيرات وهما من المبشرين بالجنة

لا طبعا لايوجد اى محاولة متعمده لتشوية الدين لكن الناس دى موجود فعلا

للاسف فى ناس كتير بيتاجرو بالدين وهما دول اللى بيشوهو صورة الدين من اجل المال الا من رحم ربى

انا اقصد بالمتاجرة بالدين انه يكون مظهر بس ولكن فى داخل نفسة مبيراعيش ربنا فى شغله
بيكون عايز يظهر انه متدين علشان الناس تثق فيه اكتر ويحقق مكاسب اكبر يعنى مش متدين علشان الدين لا ده متدين علشان التجارة

[mmans]

انا سمعت انه وهو في الكليه كان بيتاجر ب 25 مليون في البورصات

الريان قال امبارح مع عمرو اديب انو و هو فى سنة 3 كلية كان معاه 250 مليون مش 25 ( مجتش على صفر يعنى هههه) و خلى بالك 250 مليون سنة 1980

[MASERATI]

السلام عليكم و رحمة الله و بركاته

أولا: لو كانت الحكومة سابت الناس اللى زى الريان و السعد و الشريف و بدر للاستثمار و الهدى مصر يشتغلوا و وفرتلهم 10 بالميه من التسهيلات اللى بتوفرها لرجال الدولة و أصحاب السلطة دلوقتى لحد ماياخدوا قروض من البنوك و يهربوا و بعد كده ترجع تتحايل عليهم عشان يرجعوا , كان الاقتصاد المصرى بقى أقوى من اقتصاد أمريكا و أوروبا الغربية و كان المصريين اللى دايقيين المرار و الدل و المرمطة فى بلاد الخليج و فى ليبيا و اليمن , كانوا رجعوا قعدوا فى بلدهم و عمروها و كان الشعب المصرى عاش أحلى عيشة , بس ازاااااااااااااااااى الحكومة تسيب الشعب المصرى يعيش عيشة كريمة , لازم تدله و تهينه و تدوس على رقبته بال........ .

ثانيا : هامش الربح ال 25 بالميه بالنسبة لأى رجل أعمال أو بالنسبة لأى مجموعة استثمارات ضخمة زى الشريف و الريان و السعد أيام زمان , او زى أوراسكوم أو أوليمبك جروب الآن مش حاجة صعبة ولا حاجة , لأن على رأى محمد فريد خميس بتاع النساجون الشرقيون أن, رجل الأعمال اللى مابيضاعفش ثروته كل 3 سنين , يبقى بيلعب , مابيشتغلش !!!!!!!!!!!!!!!!!!

مازيراتى كواتروبورتيه

[AhMeD EzZ]

تصوري ان خروج الريان في الوقت دة تحديدا وراة شيء غريب

[mahmoudysf]

أنا يكفينى إنه اتحبس علشان أعرف إنه مش حرامى ولا نصاب

الحرامية والنصابين مش بيتحبسوا فى بلدنا بالعكس ممكن يبقوا .........

+1

[Dr Zezo]

يبدو ان هناك شبه اجماع علي صحة موقف الريان

[بحري]

مفيش حاجه فالدنيا اسمها شركةتوظيف اموال تشتغل مش بفلوسها وبعيد تماما عن رقابة البنك المركزى اللى هو اصلا مسؤوليته الرقابه على حجم النقد المتداول فى السوق
الغلط مش فى انو عمل شركه بالشكل دا الغلط فى اللى اخترع شركه بالشكل دا مشفناهاش غير فى مصر
بذمتك عمرك سمعت عن شخص او شركه تلم فلوس عشان تشغلها وتوزع ربح من نفسها كده

وهي البنوك أصلا بتعمل إيه مع المودعين..بتلم فلوسهم وبتقولهم استنوا لآخر الدورة ونديكم أرباح متعرفوش جت منين ولا هي حقيقية وللا لأ..لا حد بيشترك في صناعة قرار ولا مراجعة ميزانية ولا غيره

شرعا وقانونا مفيش مشكلة إن حد يلم فلوس من الناس ويشغلها نظير نسبة في الأرباح..سواء لم فلوس من واحد أو من مليون واحد..مش هتفرق...مش كل الناس بتعرف تشغل فلوسها بنفسها ..والناس عشان تبقى في أمان من تقلبات التجارة بتودي فلوسها البنك..فإيه الفرق هنا

..ومين اللي قال إن مكانش في رقابة من البنك المركزي

الأنشطة كلها كانت معلنة ومعروفة ومصادر الأموال معروفة صناعات وزراعات وتجارات في مصر وداخل مصر..وكانت معروفة للناس قبل الأجهزة الرقابية..وتجارة بهذا الحجم طبيعي جدا إنها تحقق أرباح مهولة

الدور والباقي على الكثير والكثير من أصحاب الأموال حاليا والجهات- ومنها دينية- التي التي لا تخضع للرقابة ..ولا تدري هل أموال هذه الشركات هي أموال المساهمين المعلنين فعلا أم أموال من يجلسون في الخفاء مقابل نسب جبرية على الأنشطة

وبعدين سؤال برييييييئ جدا هو اصلا راس ماله فين ومنين لو هو اشتغل بفلوس الناس ؟

عنده رأس مال..بتاعه..وارثه..لقاه في كنز..حد اداهوله يشغله..أيا ما كان ..طالما الأنشطة مشروعة وعليها رقابة لمنع الانحراف وغسيل الأموال يبقى إيه المشكلة..هل هو اتسجن عشان مصادر أمواله أم لأسباب أخرى منها عدم قدرته على رد أموال المودعين كما ادعت الحكومة عندما شنت ضده وضد غيره حملة إعلامية ضارية..برامج..صحافة..مسلسلات

[eng/muhamad]

الريان كان اسطوره اطفأت نورها الحكومه بتعلميات عليا من امريكا
هو ده ملخص القصه

[MaZaGAngeE]

شوف قائمة بشركات السعد و انت تتأكد من ان الناس دي كانوا أصحاب تجارة و صناعة حقيقية مش نصابين
شركات السعد تاريخ لن يموت - منتديات أشرف السعد

[dr-mohamed]

ولو هو اسطوره ليه مقدرش يسدد الفوايد للناس بالاضافه طبعا لاصل مبلغ الاستثمار ؟
مجرد سؤال بريئ

هقول لحضرتك في شرحي للتفاصيل

مستنيك علي احر من الجمر يا رايس

ابويا وامي بيحكولي درر ومستني اكمل منك

a.yakout

وانا بردو مستنى بقية التفاصيل

ربنا يستر واقدر اقول حاجة مفيدة

ومين قال ان وظيفته يللم مدخرات الناس ويشغلها ويديهم ارباح اصلا ؟
اللى انا اعرفه وموجود فى الكتب وبيتدرس فى كل حته ان دى يا أما مسؤولية الحكومه لو الحكومه بتتبنى اقتصاد موجه يا أما مسؤولية القطاع الخاص سواء شركات مساهمه او شركات اشخاص والارباح بتاعة النشاط تتوزع على الشركاء
انما اعمل شركه الم بيها فلوس الناس بدون اى صفه واديهم ارباح محدش عارف اتحسبت على اى اساس وهل دا فعلا مبلغ الربح ولا لا وبدون اى رقابه من اى جهه فدا مسموش اقتصاد
وبعدين اى تجاره او صناعه دى اللى تكون بالحجم دا وتدى ربح 25% على راس المال وكمان بدون اى مخاطره على المستثمر بيتهيئلى مكنش حد غلب وكمانبيتهيئلى يعنى السرعه اللى كبرت بيها مجموعة الريان والسعد والشريف والذى منه مفيش شركه او مجموعه بتكبر بالسرعه الرهيبه والوقت القصير دا مش غريبه شويه دى ؟
احلى حاجه بئى فى شعبنا الذكى اللى كانت صوره ماليه الجرايد اياميها وهو بيلطم على الخدود على ضياع تحويشة العمر هو نفسه الشعب اللى اتضحك عليه اكتر من مره وبنفس الطريقه

احد الاخوة رد على حضرتك وردي هيكون في مشاركتي التالية

تصوري ان خروج الريان في الوقت دة تحديدا وراة شيء غريب

كل ما في الامر ان كل القضايا اللى عليه انتهت وكان لابد من الافراج عنه او اصدار امر باعتقاله وهو ما كان سيثير هجوم على الحكومة ليست في حاجة اليه الان

[dr-mohamed]

احمد الريان
شاب مصري حاصل على بكالوريوس طب بيطري ومن قادات الجماعات الاسلامية في الجامعة في هذا الوقت حيث كانت تسيطر عليها سيطرة تامة في السبعينات
بدا العمل في تجارة البلاستيك من منتجات شركة مصانع الشريف وتعرف على اشرف السعد وبدآ معا العمل في تجارة العملة وبمرور الوقت اتسع نشاطهم حتي انهمااصبحا رجال على حسن اكبر تاجر علمة في مصر في هذا الوقت حيث لم يكن مسموحا بالاتجار في العملة كما هو الحال مع شركات الصرافة الان وكان الفرق بين تغيير العملة في البنك وفي السوق السوداء كبير لدرجة ان الدولار كان يتم تغييره في البنوك ب 78 قرش بينما يمكن تغييره في السوق السوداء بجنيه كامل وهو ما يفسر سر زيادة ثرواتهم في وقت بسيط بشكل كبير

بعد فترة من العمل في العملة تم القبض عليهما بتهمة تمويل نشاط الجماعات الاسلامية وهي تهمة براهما منها اللواء فؤاد علام نائب ريس ان الدولة فلم يتم محاكمتهما

بعد الافراج عنه اتجه احمد الريان الى التجارة ليصبح عمله مشروعا واسس مجموعة شركات الريان وهي مجموعة شركات تعمل في كل شئ خصوصا السلع الاستهلاكية ودورة المال فيها تكون سريعة ومع كبر حجم لاتجارة يمكن ان تحقق ارباح خرافية وبدا الريان في توظيف الاموال وفي هذا الوقت كانت البنوك تعطي فوائد 9 % زادت لمواجهة شركات توظيف الاموال الي 17% بينما كانت شركات توظيف الاموال ومنها شركات الريان تعطي 25% ارباح (وليس فوائد حتي يصبح التعامل شرعي) وتدفقت الاموال من كل انحاء الجمهورية ومن العاملين المصريين بالخارج وكان عددهم ضخما في هذا الوقت

زاد اقبال الناس على شركات توظيف الاموال بشكل رهيب خاصة مع التزامها بصرف الارباح حتي انه يقال ان هناك مديرين لبنوك كانوا يحصلون على الاموال المودعة في البنوك ويضعونها كوديعة في شركات توظيف الاموال ويحصلون على الفارق لانفسهم

استعان الريان برجال الدين لاضفا المشروعية على عمله الذي كان مشروعا في الاساس فكان الشيخ الشعرواي اكبر مرجعية دينية في هذا الوقت ممن يقومون بافتتاح المشروعات الجديدة للريان

في نفس الوقت قام الريان بتعيين كبار المسؤلين السابقين من لواءات الشرطة والمحافظين والوزراء السابقين للعمل في شركاته بمرتبات خيالية باسعار هذا الوقت وهو نفس ما قام به الشريف والسعد لتسهيل اعمالهم

هناك اقاويل كثيرة عن ان الريان تدخل لمساعدة الحكومة لتوفير العملات الاجنبية للاستيراد ولا يخفي على احد ان العملات الاجنبية كانت الحكومة تعاني من قلتها في هذا الوقت للاستيراد

الخطوة الخاطئة من الريان كانت حين نسي نفسه واعتقد انه اقوي من الحكومة وكانت الاشارة البسيطة لقدرته التي لم ينتبه اليها احد لكنها لفتت انتباه اصحاب الشأن في هذا البلد هي برنامج احمدك يا رب تقديم جمال الشاعر الذي كان يقدم في رمضان ويمنح رحلتين حج كل يوم وهي جائزة ضخمة بمقاييس هذا الوقت وكان الاشتراك فيها يتم بالاتصال هاتفيا بعد انتهاء الحلقة مباشرة قبل المغرب حتي الساعة 10 صباح اليوم التالي ليتم اعلاان الفائزين في الحلقة الجديدة وهو ما ادي لانقطاع الاتصالات التليفونية في مصر اول اسبوع في رمضان في مصر كلها نظرا لشدة الضغط على شبكة الاتصالات الارضية الضعيفة اصلا وهو ما ادي لجعل الاشتراك بالتلغرافات فانتقلت الازمة الى السنترالات
هذه الخطوة نبهت من يهمهم الامر اكثر الي ان الريان لم يعد مجرد رجل اعامل لكنه يمكن ان يوجه الجماهير لتحقيق اهدافه بسهولة اليوم في الاقتصاد وغدا في غير الاقتصاد خاصة ان مصالح كثير من المصريين انذاك اصبحت مرتبطة بمصالحه هو وباقي اصحاب شركات توظيف الاموال

تم القبض عليه بتهمة توظيف الاموال والاتجار في اسواق النقد الاجبنية بالعملات وهو ما ادي لحدوث حالة رعب وسحب جماعي للمدخرات مما ادي بالطبع الى انهيار اعماله

الطبيعي في عمل اي بنك انه يحتفظ بنسبة بسيطة من الودائع لديه في شكل سيولة لمواجهة طلبات السحب ويقوم بتوظيف اغلبية امواله ليدفع منها الفوائد ويغطي تكاليفه وارباح المساهمين بجانب احتياطي قانوني اجباري في البنك المركزي تكون في حدود 10 - 15 % اجباريا وفق تعليمات البنك المركزي
فاذا واجه البنك سحب فجائي اكبر من نسبة الاحتياطي لديه يقوم بالسحب من البنك المركزي لمواجهنة السحب حتي لا يمتنع البنك فتحدث هستيريا جماعية تؤدي لانهيار البنك كما حدث في اسواق اسيا وفي الارجنتين حين خفضت الدولة قيمة العملة

قيام الحكومة بالقبض على الريان ادي لحالة الرعب الجماعي فقام الجميع بالتوجه لسحب مدخراتهم وبالطبع لم تكن هناك سيولة كافية لان معظم امواله مستثمرة في التجارة مما ادي لعدم القدرة على رد المدخرات (وبالطبع لم يقم البنك المركزي بدعمه لانه ليس بنك مع ان الظيف ان سامي حسن الذي قلنا انه كان اكبر تاجر عملة قام وقتها بفتح بنك ولو تعرض لنفس الامر لدعمه البنك المركزي ههههههههههههه)

لم تستطع الحكومة ادارة تجارة الريان وشركاته لطبيعة الادارة البيروقراطية مما ادي الى ان اصبحت المدخرات اكبر من الاصول مما ادي لتوزيع نسب اقل مما تم ايداعه والظريف ان الحكومة وقتها كانت توزع على المودعين نسبة 10% نقدي والباقي بضائع من مخازن الريان
طبعا تعرضت الشركات للنهب وسوء الادارة والتصفية في النهاية وقضي الريان سنين شبابه في السجن حوالى 23 سنة


مؤخرا تم الافراج عن الريان بعد ان كتبت ابنته شيك بقيمة 900 الف جنيه اخر شيك على ابوها للافراج عنه والله اعلم الشيك برصيد ام لا



هل كان الريان نصاب ام اسطورة اقتصادية ؟؟؟؟؟؟؟
الريان رجل اعامل ناصح زكي غير تقليدي لو كان دخل تحت عباءة الدولة لما ظهر الان رجال عامل من عينة رامي لكح الذي اشار اليه البعض في مشاركاتهم ومن عينة احمد عز وفريد خميس والكثيرين غيرهم
تاجر في العملة في بداية حياته ؟ نعم ومن منهم لم يفعل
انشان مجموعة شركات ضخمة تتاجر في كل شئ من بيع الذهب للاسماك ومن السلع الاستهلاكية للمعمرة ؟ نعم
منح ارباح 25 % ؟؟؟؟؟؟ نعم
هل يمكن تحقيق هذه الارباح ؟؟؟؟؟ نعم
ونحسبها سوا
لو افترضنا ان واحد بالحجم ده بيتاجر في سلعة وبيكسب فيها 1% بس وسرعة دوران المنتج كبيرة جدا ممكن اسبوعيا يبيع كل المنتج ويكسب صافي 1% يعني 52 % سنويا ده اقل شئ ولو حد عنده القدرات المالية اللى عند الريان واشتغل في سلعة واحدة بس هايكسب اكتر من 100% سنويا كمان
وهنروح بعيد ليه دلوقت فيه اتنين بيسكبوا اكتر من كدة تعرفوا واحد منهم كلكم والتاني بعضكم يعرفه هما سيد السوريطي بتاع التوحيد والنور وعيد لبيب صاحب محلات عيد لبيب والاتنين بيتاجروا في سلع استهلاكية وبيلعبوا لعبة الدين واحد مسلم والتانى مسيحي والاتنين بيكسبوا كويس جدا وارباحهم تزيد عن 100% والا فسروا لي ازاي فروعهم بتزيد بالشكل السرطاني ده
ولما السويركي الشيطان وزه وافتكر انه ممكن يبقي حاجة فتحوا له قضية تعدد لازوجات واتربي كام سنة في السجن وخرج لانهم مش عايزين يدبحوه

انما الريان كان فيه اصرار على ذبحه لخطورة النموزج الاقتصادي اللى هو بيقدمه وهو الاقتصاد الاسلامي بعد ما تعدي مرحلة التجارة في العمل وبدا في الاقتصاد الحقيقي

لكن رايي الشخص واللى بعيب فيه على الريان والسعد والشريف انهم كلهم اتجهوا للسلع الاستهلاكية محدش اتجه للسلع الانتاجية اللى ممكن تخلينا دولة محترمة زي صناعة لااليكترونيات او السيارات اللى دول بداتها في التمانينات زي كوريا والتسعينات زي مالزيا ودلوقت انتم شايفين اصبحوا ايه

طبعا ده اللى بعيبه على اصحاب شركات توظيف الاموال ومحدش يقولي طيب مبتقولش كدة عن رجال الاعمال دلوقت ليه
مبقولش عن رجال الاعمال دلوقت لانهم مش رجال اعمال دول في معظمهم شوية لصوص

[hazoom2006]

كلام جميل جدا اشكرك عليه

انا سمعت من فتره ان الريان اشتغل فى بورصة لندن وخسر مبالغ ضخمه وحصل عجز ودى كانت بداية الانهيار ؟؟

[dr-mohamed]

كلام جميل جدا اشكرك عليه

انا سمعت من فتره ان الريان اشتغل فى بورصة لندن وخسر مبالغ ضخمه وحصل عجز ودى كانت بداية الانهيار ؟؟

شكرا جزيلا اخي حازم على ردك الاجمل
وحكاية انه اشتغل في بورصة لندن دي والله اعلم غير حقيقية وكانت مجرد سبب من اسباب القبض عليه وتشويه سمعته وبيان ان الارباح اللى كان بيعطيها كانت غير مشروعة ومن تجارة العملات في بروصة لندن