كان نفسك في ولد و ربنا رزقك بنت ؟

[MaZaGAngeE]

بمناسبة أخونا و زميلنا abogogo اللي ربنا رزقه ببنت افتكرت الموقف ده و قلت أحكليكوا عليه ...

المدام كانت حامل في الشهر السادس و عرفت من الدكتور انها هتجيب بنت و طبعا طارت من الفرح و جت على البيت بسرعة و استنت لما انا رجعت من المنيا و قالتلي انها عرفت نوع الجنين ( و أنا ما كنتش عايز أعرف بس الدكاترة الحشريين بقى ) و انها هتجيب بنت و عايزة تسميها مريم .. أول ما سمعت كده سهمت شوية و قلتلها و هتجيبيلي بنت أعمل بيها ايه ؟
و زعلت قوي و هيه صعب عليها مني ... المهم انا مقتنع ان ده رزق ربنا و راضي بيه بس من جوايا مش مبسوط عشان كان نفسي في ولد لأنه ده اللي هيشيل اسمي و يفتح بيتي بعد وفاتي ....
المهم لما المدام ولدت نزلت الحضانة أشوف البنت و الممرضة جابتهالي أشوفها بصيت عليها كده من غير نفس و رحت طالع أطمن على مراتي ....
طبعا كنت مخبي اني مش مبسوط و مبين اني فرحان بيها و لما مريم بقى عندها 5 شهور كده و ابتدت تلاغي لقيت نفسي اتغيرت 180 درجة و بقت روحي و حياتي و أجازتي كلها بنلعب و نخرج و نسوق ( مش في الزحمة طبعا ) و نروح نجيب آيس كريم و حلويات مع بعض لدرجة ان المدام بقت بتغير منها جدا و بنقولي انت جاي أجازة عشان مريم .. و دلوقتي مريم عندها سنة و 9 شهور و مفيش حاجة بعملها في الأجازة الا و هيه معايا .....
بس برضه بحلم بخالد ابني و أتمنى ربنا يرزقني بيه ...
يترى انت كمان كان نفسك في ولد و ربنا رزقك بالبنت اللي هتكون أحن عليك من ابنك ( ده رأي كتير من الآباء ) و أحب ليك منه ؟

[vBulletin]

والله شوف ياخى دى ارزاق بتاعة ربنا ولو ربنا ادانا منقولش لا لان فية ناش مش طايلة ربع عيل ومش بتخلف خالص
ولو داخو العالم كلة مش هايعرفو يجيبوا عيل فدة نعمة كبيرة من الله على من اعطاهم الذرية فانا احمد ربنا على الى ادهونى

"اللهم لا مانع لما عطيت ولا معطى لما منعت "

ولكنى لا اقدر ان اكذب عشان كدة اطمع فى كرم ربنا انة يعطينى ولد صالح
وعلى العموم ربنا يخليهالك وتتربى فى عزك ويبارك فيها وفى اهل بيتك ويحفظكم من كل سوء ويقر عينك بكرمة ويديك الى نفسك فية

[elkomy82]

هيا فعلا بتبقي احن من الولد بكتييير
وربنا يديك اللي تتمناه

[محمد بلال]

والله الواحد فينا بيحب البنات بس بينى وبينكم الواحد بيخاف عليهم من العصر الزفت اللى عيشيين فيه اما الولد مش حخاف عليه زى ما بخاف على البنت على فكره انا معايا بلال( خمس سنوات ) وريتال (ثلاثة اشهر ) والبت ريتال كل ما اقعد معاها الاقى نفس اقعد ابوس فى قدمها مش عارف ايه السبب ؟؟؟؟ يمكن علشان صوابع رجليها صغيرة وعلشان انا بحب كل حاجة صغيرة ، أما السيد بلال ولدى فحدث ولا حرج فده فرحة عمرى وساعات بكون عاوز ابوس التراب اللى بيمشى عليه وساعات بكون عاوز اقوم اعلقه فى المروحة بس ما قدرش و بخاف منه ان يشوفنى وانا بلاعب اخته ( علشان موضوع الغيرة )

[mr_sameh]

انا تقريبا نفس قصتك كان نفسي يكون اول حاجه في ابنائي يكون ولد واول ما عرفت انها بنت كنت زعلان لدرجة ان زوجتي قعدت تبكي وجه ميعاد الميلاد وكانت هتموت مني قولت كمان بنت وزوجتي هتموت مني (معرفش ليه انا كنت بفكر كدا ) وشرفت الانسة مريم للحياة ودلوقتي بعد مريم ما تمت سنة ولم تبقي علي اي شئ سليم في البيت ونزلة تكسير في كل حاجة (حيث اصبحت شقة الزوجيه بدون فازات وانتيكات واصبحت اجهزة الريموت معوقة كما انها قامت باحتلال كل شئ في المنزل يعني هنا مكعبات وهنا عرايس وبقايا العاب ربنا يهدي ) واصبحت الانسة مريم كل حياتي وندمت اني كنت زعلان ان جبت بنت ربنا يديمها نعمة ومعنتش هكرر التفكير السئ ده

[mesaharaty]

أنا ربنا رزقنى بولد فى أول مرة
تانى مرة بنت
تات مرة الدكاترة قالوا بنت وحمدنا ربنا وانتظرنا البنت لغاية يوم الولادة
وأثناء الولادة وواقف برة غرفة العمليات لوحدى ومستنى البنت بقى وعمال أفكر فى إسم إذا بواحدة تقوللى زوجتك جابت ولد وحتسميه إيه ؟؟؟

حصلت لى لخبطة شديدة ومشاعر متباينة لكنها كلها ممزوجة بالفرحة

أنا ماكنتش معترض على البنت نهاااااائيا والله وفى نفس الوقت ماكانتش تفرق معايا ولد أو بنت لكن دى أرزاق من عند الله سبحانه وتعالى وليس للإنسان فيها أى تدخل بالمرة

[amro1965]

رغم انى صعيدى وكلنا يعلم جيدا ان الصعايدة بيحبو الاولاد عن البنات الا انى تمنيت ان تكون المولود الاول لى بنت وذلك لكونى اخواتى اربعه وانا خامسهم واصغر واحد فيهم اربعه اولاد وبنت واحده
لكن اقسم بالله العظيم اختى بنا احنا الاربعه لحنيتها الشديدة على والدى رحمهما الله وحنيتها ايضا علينا ولا تستحمل ان حدن فينا يشاك بشوكة ولو حصل لاى فينا مكروة تجدها واقفه بجوارنا قلبا وقالبا افضل من الولد
لكنى بكرت بولد وجأتى هاجر بعدين
واصحب متزوج اثنين البنت وامها بيغيروا من بعض نظر لان هاجر الان فى سادسه ابتدائى
ومينفعش اجيب لامها حاجه وهى لا تتقمص وتزعل والعكس صحيح
الزواج قسم ونصيب وارزاق وكذلك نعم المولى عز وجل على عبادة

البنات وضع بداخلهم المولى عز وجل حنيه زياده

[shaddadfalcon1]

انا كان نفسي في ولد طبعا بس مكنتش هزعل لو جت بنت وخصوصا في مره كنت راكب عربيه وبعدين واحد كان عايز يركب ومعاه بنت صغيره زي القمر وفضلت شايلها علي رجلي طول الطريق ساعتها كان نفسي قوي اجيب بنت

دلوقتي انا عندي محمد ومراتي حامل وكان نفسي انا وهيا نجيب بنت ومراتي بجد هتموت علي بنت عشان تلاعبها وتسرحلها شعرها والحاجات دي
وبرده الجنين طلع ولد

اهلي بقي عايزيني اجيب مليون ولد ولما عرفت ان اللي جاي ولد ورحت البيت قلت لوالدتي انها بنت لقيت وشها اتغير ووالدي قال الحمد لله وبعديها بشويه قلت ده ولد لقيت امي بتقولي ايوه كده اتعدل

بصراحه من اللي الوحد بشوفه في الشارع اليومين دوول انا مش عايز بنات خالص

[the-hero]

بداية انا عارف انك بتتكلم على شعور داخلى نابع من جواك بالرغبة والميل الى ان يكون عندك الولد
بس لازم تنمى الموضوع ده فى قلبك من قبل الزواج وتعرف برضوا اهمية البنت ومتفرقش بينهم عشان ميكونش بعد كدا صعب عليك
وترضي بما قسمة الله لك وتحمده وتشكرة على النعمة دية لن فى ناس كتيرة محرومة منها
ولازم تعرف الفكر ده من
خطى الجاهلية الأولى التي وصفها ربنا بقوله: وإذا بشر أحدهم بالأنثى ظل وجهه مسوداً وهو كظيم يتوارى من سوء ما بشر به أيمسكه على هون أم يدسه في التراب ألا ساء ما يحكمون.
تذكر أن من أواخر ما تلفظ به المصطفى قبل أن يفارق الدنيا: ((استوصوا بالنساء خيراً)).
هذا الحديث أخرجه الإمام أحمد وابن ماجه بإسناد صحيح عن عقبة بن عامر قال: سمعت رسول الله صلى الله عليه وسلم يقول: ((من كان له ثلاث بنات فصبر عليهن وأطعمهن وسقاهن وكساهن من جدته كن له حجاباً من النار يوم القيامة))[1]، وهذا يدل على فضل الإحسان إلى البنات والقيام بشئونهن؛ رغبةً فيما عند الله عز وجل فإن ذلك من أسباب دخول الجنة والسلامة من النار.

[حماده عزو]

يا راجل هوا الواحد مننا سواء راجل او ست ممكن يحكم على حاجه زى دى ولا هيا بمزاجو دى أرززززززززززززاق يعنى زى المرتب والصحه والاكل والشرب والعيله والميراث كل الحاجات دى ملناش يد فيها لكن احنا مكلفين بيها أننا نصونها ونوصلها زى مخدناها او أحسن
ألحمد لله ربى رزقنى ببنو تين هاجر (جوجو) علشان بنت عمها وأول حفيده أسمها ساره
وسلوى (سوسته) على أسم والدتى ربنا يديها الصحه ويخليهالى يا رب
ومش هقولق ساعت لما برجع من شغلى بيكونوا عاملين الزاى
حاجه كده زى متكون انتا اكبر واحلى لعبه شافوها فى حياتهم
ويعينى بقا لما الغيره تشتغل مبينهم هما ومامتهم مين الى يدلعنى ويلاعبنى ويطبطب عليا
بكون كانى انا الى أبنهم مش هما الى ولادى
وأخيرا أذكرك بالقول المأثور (خيركم من بشر بالأنثى )
مع العلم انى والدى متوفى وأخى متزوج من أوروبيه ويقيم فى أوروبا وأولاده لايعلمون عن مصر أكثر من أسمها
يعنى المفروض أنى أتمنا الولد لكن أن من جوايه قناعه أن ده رزقى الى مكتوبلى وأنا ولله الحمد راضى بيه كل الرضى
الهم لك الشكر على ما أعطيت

[MaZaGAngeE]

طبعا ده رزق ربنا و مفيش اعتراض أبدا عليه
يعني انت قاعد لوحدك و مرة واحدة ربنا اداك انسانة تشاركك حياتك
و كمان قلك خد البنت دي و الولد ده هتعترض !!! بقيت 3 و لا 4 يعني عيلة بعد ما كنت لوحدك انت عايز ايه تاني !!

بس غصب عن الواحد و عشم في كرم ربنا و موروث شعبي ان الناس بتفضل الولاد شوية عن البنات و بالزات لو زي حالاتي ولد وحيد , طبعا ان ربنا يرزقني ولد دي حاجة كبيرة جدا ..... بس ربنا حط في قلب الواحد حب البنت و مشهقدر أوصفلكم طبعا انتوا كلكم ربنا رزقكم و رضاكم و رضاني انا كمان ...
بس قلت أشارككم موقف حصل معايا ....

صحيح هوه محدش حط صورة للملايكة اللي عنده ليه ؟
أبدأ أنا :

[Conspirator]

فى مثل اجدادنا قالوه وانا مقتنع بيه جدا

اللى يسعده زمانه يجيب بناته قبل صبيانه

وفعلا عن تجربة الاخت الكبيره بتكون بديل الام بعد كده وهى اللى بتاخد بالها من اخوتها ومن ابوها و مامتها لما يكبروا

[ahmed4000]

يااه لسه حد بيفكر فى المواضيع دى؟

[MaZaGAngeE]

يااه لسه حد بيفكر فى المواضيع دى؟

انا كمان كنت بقول زيك كده بس لما تجرب هتلاقي مشاعرك و احاسيسك مختلفة خالص

الآنسة مريم الصاوي و لعبتها المفضلة في كارفور :

[ecybrarian]

حب والذكور وكراهية البنات عادة جاهلية..وبعدين هو الواحد لما ربنا يبعت له رزق يقوم ينقي ويقول عايز من دا ومش عايز من دا!!!! دا في ناس تتمنى ضفر عيل وربنا لم يرزقهم بالذرية والله اعلم بعباده..وبعدين البنت حبيبة ابوها بجد مش كلام..وربما بنت تكون لك ستر من النار..ولربما بنت تكون افضل من 100 ولد في بر والديها

عن عائشة رضي الله عنها قالت: دخلت علي امرأة ومعها ابنتان لها تسأل فلم تجد عندي شيئا غير تمرة واحدة فأعطيتها إياها فقسمتها بين ابنتيها ولم تأكل منها, ثم قامت فخرجت.
فدخل النبي صلي الله عليه وسلم علينا فأخبرته فقال: من ابتلي من هذه البنات بشيء فأحسن إليهن كن له سترا من النار.( متفق عليه).يقول الدكتور أحمد عمر هاشم أستاذ الحديث بجامعة الأزهر في موسوعته للأحاديث الصحيحة ــ إن السيدة عائشة رضي الله عنها لم ترد السائلة ــ في هذا الحديث ـ خائبة مادامت تملك شيئا ولو قليلا استجابة لقول الرسول صلي الله عليه وسلم لها: لايرجع سائل من عندك ولو بشق تمرة فلما أخذت السائلة التمرة قسمتها بين ابنتيها, ولم تأكل منها شيئا فآثرت ابنتيها علي نفسها, وذلك لما أودع الله سبحانه في قلوب الآباء والأمهات من الشفقة والرحمة والحنان, خاصة في قلب الأم ما لا يعادله شيء.
وأشار إلي أن النبي صلي الله عليه وسلم دخل بعد ذلك فأخبرته السيدة عائشة رضي الله عنها ــ بعد خروج المرأة وابنتيها ــ بما حدث, فقال عليه الصلاة والسلام: من ابتلي من هذه البنات بشيء فأحسن إليهن كن له سترا من النار أي ابتلي وامتحن واختبر جريا علي ما كان الحال عليه وألفه الناس من كراهية البنات وحب الأولاد الذكور, فقد كان معروفا في الجاهلية ذلك, فجاء الاسلام ليرفع من شأن جنس المرأة لأنها البنت والأخت والأم والزوجة, وجعل الاسلام لمن أحسن إلي تربية البنات ثوابا عظيما وهو الستر, أي الوقاية من النار. وأكد أن في الحديث دعوة إلي الانفاق في وجوه الخير ولو بالقليل, كما يوضح مكانة البنات في الاسلام ووجوب رعايتهن وصيانتهن وإكرامهن.
==
المصدر
ط£ظ†ظˆط§ط± ط±ظ…ط¶ط§ظ† - طط³ظ† طھط±ط¨ظٹط© ط§ظ„ط¨ظ†ط§طھ ظˆظ‚ط§ظٹط© ظ…ظ† ط§ظ„ظ†ط§ط±