كان نفسك في ولد و ربنا رزقك بنت ؟

[hesham_tawfiq]

الحمد لله على كل رزقه
انا عندى بنتين ونفسى فالثالثه باذن الله :-)

[ecybrarian]

رغم انى صعيدى وكلنا يعلم جيدا ان الصعايدة بيحبو الاولاد عن البنات الا انى تمنيت ان تكون المولود الاول لى بنت وذلك لكونى اخواتى اربعه وانا خامسهم واصغر واحد فيهم اربعه اولاد وبنت واحده
لكن اقسم بالله العظيم اختى بنا احنا الاربعه لحنيتها الشديدة على والدى رحمهما الله وحنيتها ايضا علينا ولا تستحمل ان حدن فينا يشاك بشوكة ولو حصل لاى فينا مكروة تجدها واقفه بجوارنا قلبا وقالبا افضل من الولد
لكنى بكرت بولد وجأتى هاجر بعدين
واصحب متزوج اثنين البنت وامها بيغيروا من بعض نظر لان هاجر الان فى سادسه ابتدائى
ومينفعش اجيب لامها حاجه وهى لا تتقمص وتزعل والعكس صحيح
الزواج قسم ونصيب وارزاق وكذلك نعم المولى عز وجل على عبادة

البنات وضع بداخلهم المولى عز وجل حنيه زياده

سبحان الله كأنك بتكلم عني..أنا برضه صعيدي وما عنديش غير اخت واحدة (الكبيرة) وكلنا ولاد بعد كدا..وما عندكش فكرة اختي دي ضحت ازاي بعد وفاة والدتي وكمية الحنان النابع منها تجاه كل اخواتها وعلى ابونا قبل وفاته في فبراير السابق..الغريب أنا من عائلة صعيدية بس بتفضل البنات على الأولاد نظرا لقلة البنات في العائلة..البنت إللي بتتولد او تجوز في العيلة عندنا الدنيا بتتقلب علشانها، في حين إن الولاد عادي ي ي ي جدااااا

سبحان الله إللي رزقة ولاد نفسه في بنت..وإللي رزقه بنات نفسه في ولد..وإللي معاه الأتنين بيدعي عليهم ويتمنى يوم لنفسه من قبل العيال ما تيجي!!!!

[أبومعاذ]

الانسان مجبول على حب انجاب الولد بس دا مش معناه كراهية انجاب البنات
انا ساعة مريم كنت فرحان بيها جدا ومكنش نفسي ييجي بدالها ولد بس رغم كدا اسال الله أن يرزقني الولد الصالح

[أحمد كمال]

انا اول حمل كان نفسي في ولد لسبب واحد بس

يبقى الاخ الكبير و الراجل و اتسند عليه (و البسه مشاوير اخواته البنات ههههههههههههههههه)

اما طلعت بنت و الله العظيم ما زعلت ثانية

و اما مسكتها في ايدي بكيت من الفرحة و التأثر

و دلوقتي - عندها سنة و نص - روحي فيها و روحها فيا

اما اتولدت بعض الاقارب قعدوا يقولوا لي معلش البنت رزقها واسع و بكرة الولد ييجي

كنت باتخنق جدا جدا جدا من الكلام ده

عشان انا فعلا مش متضايق و لا راضي غصب و لا حاجة

اولا البنات حنينين على ابوهم جدا

ثانيا عسولة و حلوة و امورة كده تجري عليك و انت جاي من الشغل و تنط في حضنك ..... حاجة بالدنيا عندي


دلوقتي على فكرة المدام حامل في الطفل التاني .... بنت برضه :) .... و انا و الله فرحان جدا ... هابقى ابو البنات و اما اكبر هيشيلوني و يدلعوني اخر حاجة :) .... و كمان يبقى فرق السن بين البنتين بسيط (سنة و 9 شهور) يبقى البنت ليها اختها صاحبتها ..... و لو التالت ولد خير و بركة اهلا و سهلا ..... لو بنت و الله هافرح بيها و يبقى عندي 3 بنات ربنا يقدرني و اربيهم و يبقوا سترة من النار ..... لو ولد و ماله .....

الخلاصة .... انا باحب البنات اكتر .... و باحب الولاد برضه ..... و البطران ليه القطران ! و بلاش بطر عالنعمة عشان فيه ناس بقالها 20 سنة متجوزة و ما بيخلفوش و يتمنوا ان شالله يخلفوا انسان الي !

[makka]

والله انا كنت زيك يا باشا كده بالظبط مع اختلافات صغيرة
من وانا صغير بقول انا مش عايز بنات يمكن عشان اخواتى كلهم ذكور ومفيش ليا اخوات بنات ودا كمان غير اللى بنشوفه فى الشارع يعنى كنت اشوف بنت بتكلم اولاد وانا عارف ان اهلها ناس محترمين ومبيقبلوش العيب بس بنتهم سيئة الخلق واقعد افكر العيب منين فكنت بحمد ربنا على نعمته انى مليش اخوات بنات والا كنت همشى وراهم فى دروسهم والبسى دا ومتلبسيش دا وهقرفهم ويقرفونى دا كان تفكيرى وقلت ان شاء الله هخلف صبيان وكأنه بمزاجى يعنى وقلت على الاقل يبقى الكبير ولد ولو تيجى بنت بعده مش مشكله اهو هياخد باله منها.
المهم اتجوزت ومراتى عارفه وفاهمه شعورى ايه ناحية البنات المهم حصل حمل وكنت بروح معاها عند الدكتوره وهى بالمناسبه معرفه وجارتى من واحنا صغيرين وعارفانى وعارفه دماغى سالتها نوع الجنين ايه يا بنتى تقولى مش عارفه لان الجنين مدينى ضهره حتى بص كده على السونار هو انا شايف حاجه يا بنتى المهم فى مرة معرفتش اروح مع مراتى وراحت معاها حماتى ولقيت مراتى وحماتى جايين ومراتى مبسوطه قوى وبتضحك محطتش فى دماغى قالتلى احنا عرفنا نوع الجنين قلتلها ايه قالت بنت ...... لحظات صمت مطبق وبعدين كسرت الصمت دا انتى بتهزرى قالت لا والله مش بهزر قلتلها على العموم اللى يجيبه ربنا كويس وانا من جوايا ..قلت هو على العموم مش شرط يبقى بنت ممكن بعد فتره لما تشوف تانى تلاقيه ولد حماتى ردت عليا بمثل عمرى مسمعته قبل كده "الجعان يحلم بسوق العيش" عدت الايام وزوجتى ولدت بنت انا اخدتها من ايد الممرضه بلبوصه كده على حضنى وقعدت على سرير فى حجره بعيده واذنت فى ودنها ومتعرفوش الحب اللى رماه ربنا فى قلبى للبنت دا قد ايه انا بقعد اعد الوقت عشان اروح العب معاها بنتى عندها 6 شهور بس انا وهى اصحاب جدا وبنفهم بعض من اول نظرة وبقعد اضحك معاها لحد ميجيلى صداع.

[cerato10]

يا جماعة البنى أدم مننا طماع لو معاه ولد يتمنى البنت ولو معاه البنت يتمنى الولد باختصار اللى ربنا كرمه بعيل يحمد ربنا ويدعى للى معندهوش ان ربنا يرزقه

[brown-eyes]

انا بصراحة كنت حاسس اني هجيب ولد مش عارف ليه بس لما عرفت انها بنت فرحة بردو مش عارف ليه ومراتي كان نفسها في بنت بس بصراحة انا مبسوط بموضوع البنت خصوصا بعد ما سمعت كلامكو وناس كتير بتقولي البنت رزقها واسع مش عارف الكلام ده صح وكده وخلاص حتي الطليان لما بقولهم مراتي حامل في بنت بيقولولي الحظ جايلك :)))) محسسني اني هلاقي شنطة فلوس
المهم انا عايز اعرف ايه الحاجات اللي مفروض اعملها وقت الولادة وايه موضوع اني اكبر في ودنها ده ياريت تقولولي لان الواحد معلوماته صفر

[أحمد كمال]

التكبير في الأذن و الاقامة في الاذن الاخرى باطل و لا يجوز و الحديث الخاص بالتكبير ضعيف و الخاص بالتكبير و الاقامة مكذوب

[MaZaGAngeE]

التكبير في الأذن و الاقامة في الاذن الاخرى باطل و لا يجوز و الحديث الخاص بالتكبير ضعيف و الخاص بالتكبير و الاقامة مكذوب

متأكد من الكلام ده ؟
ممكن تحطلنا مصدر ليه

[hany_mohamed]

الفكرة كما قال الشيخ الشعراوى كل واحد له 24 قيراط وتختلف النسبة من شخص لاخر ده مال وزوجة صالحة
وده ولاد بدون مال وده مال وبنات وصحة و زوجة صالحة
على فكرة بدون اولاد أو بنات هذا يعتبر رزق ونعمة من الله ايضا
وعلى الانسان أن يشكر النعمة سواء لدية او ليس لديه ابناء
ولا يفرق البنت والولد فى الخوف عليهم و فى تحمل المسئولية حينما يكبرون
فيه مثل قديم بيقول البنت للعفن والولد للكفن

[أحمد كمال]

متأكد مليون المئة و شفت بعيني فيديو للشيخ الحويني بيقول كده

[Ahmed Selim]

ههههههه

موضوع فى الجول

أحنا 3 أولاد.....و أنا أصغرهم

أخواتى أكبر منى ب 8 سنين و هما الأتنين توأم.....طبعاً اتجوزوا قبلى بكتير.....و كل واحد منهم معاه 3 بنات بسم الله ما شاء الله.

لما أنا أتجوزت كان نفسى فى ولد بس علشان أبويا....و علشان يشيل أسمى بعد لما موت و يبقى راجل العيلة.....زعلت شوية لما عرفت ان الأولى بنت....بس مش زعل لعدم الرغبة فى البنات......لأ زعل من عشمى أن ربنا يرزقنى الولد الصالح و علشان أبويا.

تانى حمل طلع بنت برضه.....بس فرحت بيه و دلوقتى كل لما أفتكر أضحك على نفسى.....ولد.....ولد مين....دى البنات نعمة.

[حاتم سليم]

فيه مثل قديم بيقول البنت للعفن والولد للكفن

هانى بك محمد

اول مره اسمع هذا المثل

و لم افهم معناه

هل من الممكن ان تشرحه لى

و شكراً ...

[hugan]

كلنا مقتنعين ومتاكدين وواثيق ان الامر ليس بيدينا وانه رزق وامر مقدر من عند الله
لكن الامر في القلب الرغبه في ان يكون المولود ولد اوبنت
90% او 95%
من المصريين يفضلو الولد علي البنت ليس المصريين فقط بل كل المجتمعات ا لعربيه
انا عندي ولدين وبنتين
لكن كل مره كنت اتمني من قلبي ان المولود يكون ولد
لكن ليس معني كده كره البنات
او رفضهم بالعكس دائما ما اميزهم علي اخوتهم البنين وكل طلباتهم اوامر ومجابه عن اخوتهم البنين لدرجه ان اخوتهم رافضين الامر وحاسين ان اخوتهم البنات انا باحبهم اكتر منهم
لكنه شيء في القلب

[mossobhy]

اللهم ارزقنا بالولد الصالح انا عندى بنت وكان نفسى فى ولد فى تانى حمل بس الحمد لله طلعت بنت طبعا الحمد لله بس فعلا زى ما قال الاستاذ كل واحد ليه 24 قيراط محدش يقدر ياخد كله حاجة عشان ربنا سبحانه وتعالى هو العادل
ومن يريد الولد يستغفر ربنا
( استغفروا الله انه كان غفار يرسل السماء عليكم مدرارا ويمددكم بامول وبنين ويجعل لكم جنات ويجعل لكم انهارا)
يارب كل واحد نفسه فى ولد ربنا يرزقه بالولد وكل واحد نفسه فى البنت ربنا يرزقه بالبنت