بعد خطاب الرئيس مبارك

[night_whisper]

العضو mfarag كاتب الموضوع
متسجل من سنة 2008
ليك لحد كتابة هذة السطور 26 مشاركة فى المنتدى مفيش فيهم مشاركة خاصة بالسيارات
كفاية الخراب و الخسائر و انعدام الأمان و هروب السجناء و أنتشار الذعر اللى حصل فى مصر بسبب وجود أمثالك
فى فعلآ فساد
فى فعلآ ظلم
بس انا أحترمت مبارك بسبب موقفة و عدم تنازلة عن الحكم فى الايام السابقة
البلد الأن يتفات ليها بلاد
الراجل دة أكيد شايف حاجات أحنا مش شيفنها
حامى مصر من اخطار كبيرة
و علشان كدة انا شايف ان عايز يوصل مصر لأقل درجات الأمان قبل الرحيل
نستمع شوية لصوت العقل
الحمد الله حصلنا فى خلال أيام على مكاسب لن نستطيع الحصول عليها فى سنين

أتقى الله فيما تقول و تفعل
و أتمنى أن أدارة المنتدى تتخذ أجراءات تجاة أمثالك

كفاية خراب

[Ahmed.TV]

انا غير منضم الى اى حزب , وعايز انزل الشارع واقول للناس يهدوا شوية , هل كدا ابقا مؤيد لمبارك وابقا منضم لحزب وطنى !
فى ناس من اللى نزلوا دول عاوزين الناس تهدا شوية عشان البلد لو فضلنا على الحال ده حتخرب ومش حنلاقى ناكل ولا حنعرف نحل ساعتها ولا نفكر

يا جماعة لازم نهدى شوية ارجوكم البلد فيها ناس تاكل الاسفلت بجد , ولو ملمناش الدنيا حيحصل فوضى اكتر من اللى حصلت كمان

الرئيس انكسر خلاص واستحالة يرشح نفسه تانى ... وبعدين مينفعش مهما كنا مش طايقينه نمشيه بالاسلوب ده .. عشان على الاقل اللى جى بعده .. لان لو مشناه بالطريقة دى , حيطلع اى 50 الف فى التحرير يتظاهروا ويشيلوا اى رئيس ننتخبه عشان مثلا مش عجبهم ... وبعدين الراجل بيتنحى باسلوب محترم مش عشانه .. على الاقل عشان هيبة مصر وشكلها الخارجى .. وكمان بيدى درس الى اى رئيس مصرى قادم انه يكون قوى وهو واقف فى مكانه وميهربش مهما كانت الظروف .. وتنبيه كمان الى كل الدول اللى حوالينا عشان محدش يطمع فينا
بصراحة ولا اى واحد ينفع يمسك البلد من رؤساء الاحزاب ولا واحد فيهم عنده فكر ووعى وهدوء وبناء مستقبلى او شخصية بامانة
احنا عاوزين حد فهم الاوضاع داخليا وخارجيا كويس .. والناس بتحترمه جوة البلد وفى الخارج , ودى نقطة مهمة
فى ناس مندسة والله وسط المتظاهرين فى التحرير وفى ناس بتسخن وانا اول مرة فى حياتى اشوف المعارضين المتشددين ليهم لسان وملهمش ودان
وفى ناس بتتصارع على السلطة , ارجوكم حكم مصر ده مسئولية كبيرة جدا ,فمش اى حد يمسكها فعلا

وموضوع اقسام الشرطة اللى كانت فاضية , كان فى اقسام بردوا موجودة وفضلوا فى مكانهم , واللى يقولوا ان الرئيس هو اللى امر بكدا بردوا دى ناس بتتكلم اى كلام وخلاص
الشرطة خافت من الناس , واكيد حيحصل تحقيقات فى المواضيع دى مع كل واحد ترك مكانه
فياريت نهدى الامور بقا عشان نشوف حنعمل ايه فى اللى جى
محدش يقدر يعتقل حد من اللى كانوا فى التحرير ولا حد يقدر من هنا ورايح يوعد ويخلف باى وعد
لانهم عارفين ان الناس مش حتسكت
فارجوكم لازم نكون عقلاء عشان نعرف نعيش ونحكم ونتكلم ونفكر بهدوء
ولازم نستغل الانترنت بوعى , لان احيانا بيحصل ضلالة فيه وخدع وضحك على عقول الناس واستغلال وتلفيقات لناس شرفاء بدون وجه حق عشان مفيش رقابة على الانترنت

[محمد عز]

انا قرات كل التعليقات

والواضح ان فيه ازمة ثقه

وده شىء طبيعى جدا

بس ياجماعه فكروا فى المستقبل

فكروا فى عجلة الحياة اللى بقالها اكتر من اسبوع فى مصر متوقفة

فكروا في الخسائر اللى خسرناها لحد دلوقتى

انا مش بقول نستسلم

لكن انا شايف ان الشعب حقق مكسب كبير جدا جدا جدا ....

وهو... كسر حاجز الخوف ... والثورة على الظلم

الشعب المصرى كسب اشياء كتيرة جدا خلال الاسبوع اللى فات

كسب الشباب ، كسب الجيش

مافيش حد دلوقتى بيخاف من الشرطة ولكن الشرطة هى اللى بتخاف من الشعب صاحب الحق والقوة

علشان كده بقول نرجع لحياتنا

ولو منفذش اللى وعد بيه ، خلاص احنا عرفنا الطريق وساعتها هتبقى ثورة ال 80 مليون وكلهم ساعتها هيطلعوا ....

[maka]

صعب يا هندسه

العالم كله اتهز من اللي حصل مش الحكومه بس .. وخلاص بقي سهل ان يحصل ثوره تاني وناس كتير بقي عندهم ياخدو العلقه الأولي اللي خدها رجالة 25 و 28 يناير

رجالة الحكومه الجديده ناس محترمه وتستشعر فيهم الصدق والاخلاص

يا باشا انا موافق على كلامك كله الا الجملة الاخيرة ده غير 13 و ساب 15 منهم الفقى و فهمى و عائشة عبد الهادى و اشكال زيهم مفروض يتشالوا من زمان و مبيرعوش ربنا فى الشعب

فيه ناس محترمة اتعرضت عليهم وزارات و رفضوا زى جودت الملط و رشيد

انا اللى غايظنى بجد ليه مغيرش الوزارة بالكامل بدل القص و اللزق و جاب وزارة محترمة بجد ترضى الناس و تخدمهم

[wael3m]

من كلمات الرئيس بتعنا إنه ماكانش عايز يترشح تاني صح ؟؟

اقرا الخبر دا
BBC: مبارك مرشح الحزب الوطنى للرئاسة
اليوم السابع | BBC: مبارك مرشح الحزب الوطنى للرئاسة

وإنت هتعرف إنه بيلعب بينا كلنا


الحل إنه يتنازل ونائب الرئيس يتفاوض مع لجنة حكماء مصر ده الحل اللي يرضي جميع الاطرف

من وجهة نظري

[Col. Eng. Khaled]

للاسف الايام الجايه هتكون زفت علشان الشعب يبطل يمشى زى الغنم ورا اى كلمه
تستاهل ياشعب غبى

حضرتك مش من الشعب ؟؟؟؟؟؟؟؟؟؟؟؟

[mfarag]

العضو mfarag كاتب الموضوع

متسجل من سنة 2008
ليك لحد كتابة هذة السطور 26 مشاركة فى المنتدى مفيش فيهم مشاركة خاصة بالسيارات

طيب دة اية علاقتة باللى انا قلتة حضرتك نافشت نقطة واحدة من اللى انا ذكرتها بمنطقية - يا ريت نناقش افكار بلاش شخصنة للحوار

أتقى الله فيما تقول و تفعل
و أتمنى أن أدارة المنتدى تتخذ أجراءات تجاة أمثالك

يعنى اية امثالك- شكرا اخى لرقى حوارك

كفاية خراب

يا استاذ متاهيالى اننا ذكرت ان الحل دلوقتى التفاوض لان هناك مظاهرات مضادة من الطرفين - وطبعا فى احتكات و هتحصل كارثة

تانى الحل دلوقتى التفاوض

هل الكلام دة فى دعوة للخراب او فية ما يجعلنى مش من المتقين

[maka]

العضو mfarag كاتب الموضوع
متسجل من سنة 2008
ليك لحد كتابة هذة السطور 26 مشاركة فى المنتدى مفيش فيهم مشاركة خاصة بالسيارات
كفاية الخراب و الخسائر و انعدام الأمان و هروب السجناء و أنتشار الذعر اللى حصل فى مصر بسبب وجود أمثالك
فى فعلآ فساد
فى فعلآ ظلم
بس انا أحترمت مبارك بسبب موقفة و عدم تنازلة عن الحكم فى الايام السابقة
البلد الأن يتفات ليها بلاد
الراجل دة أكيد شايف حاجات أحنا مش شيفنها
حامى مصر من اخطار كبيرة
و علشان كدة انا شايف ان عايز يوصل مصر لأقل درجات الأمان قبل الرحيل
نستمع شوية لصوت العقل
الحمد الله حصلنا فى خلال أيام على مكاسب لن نستطيع الحصول عليها فى سنين

أتقى الله فيما تقول و تفعل
و أتمنى أن أدارة المنتدى تتخذ أجراءات تجاة أمثالك

كفاية خراب

يا سيدى الفاضل يشارك او يشاركش هو حر و حر برضه انه يقول رايه بدون حجر

انا عضو قديم و كان بقالى فترة شبه ممتنع عن المشاركة لظروف لكن لما ارجع و اشارك هيبقى حرام و عاوز اعمل فتنة

[Moh.Abdelbaset]

حتى لو ده حصل يا أ/وائل
هو طلع امبارح و قال مش هيرشح
يعني كلامه اللاحق بيلغي الكلام اللي حضرتك جايبه

يا أ/وائل حضرتك مش متخيل احنا عايشين إزاي
مهما شوفت في التليفزيون و قالولك في التليفون
مش هتشعر باللي نشوفه كل يوم
عايزين نهدا و نهدي الناس اللي حوالينا..علشان البلد ترجع أحسن مما كانت إن شاء الله

[Mohamed_Hegazy]

يا اخوان الجماعه المحظوره هى دلوقتى اللى مش عايزه المظاهرات تنفض خايفه ليمسكهم تانى وعلشان كده بتسخن الناس و طلعو فى الظاهرات

الجماعة المحظورة اللى بتتكلم عنها دى فصيل من الشعب ومسالمين باى حق تحجر عليهم - هذا هو التغيير النتشود - احترام كل فئات الشعب بكل الوانة وليس فقط الافاقين

[Ahmed.TV]

مبارك سقط امام الشعب و امام العالم....و الشهور القادمة مجرد فترة انتقالية لتمهيد انتقال سلس للسلطة...و معلش لما يبقي البرلمان بعد كده مش عاجباك انزل اقول لأ ...لما عمر سليمان يحاول يستولي علي السلطة انزل اقول لأ...لما العادلي ما يتحاكمش علي الناس اللي ماتت انزل اقول لأ....لكن دلوقتي الناس اللي لسه في ميدان التحرير بتقول لأ علي ايه؟.....مش لازم نخرب مصر و نجيبها الارض و نبنيها من جديد...لأن ببساطة ممكن مانعرفش نبنيها تاني...أنا مش عايز ولادي يتربوا و يكبروا في بلد زي العراق

الله يفتح عليك , هو ده اللى لازم نقوله بهدوء وبعقل عشان المستقبل

وتونس اهى كمان خربانة من ساعتها ومش عارفين يقفوا على رجليهم

واحنا فى مصر عندنا ناس بلطجية تاكل الزلط وادينا شوفنا عمله ايه فينا , ولسه حيعملوا اكتر لو الاوضاع فضلت على كدا , ولو فضلنا كدا مش حنلاقى ناكل , واللى بيحمونا حيكلونا وحنبقا بلطجية كلنا عشان رغيف العيش مش حنلاقيه

لو اتكلمنا بصوت مفهوش فكر وحكمة وهدوء ووعى وخوف على بلدنا يبقا عليه العوض ومنه العوض

[osmana]

السلام عليكم

يا جماعة الناس عرفو طريق الشارع و عرفو يقولو لا امتي و احمد شفيق الكلام عنو كويس وقال شوفو اللي انتو عيزينو و شوفو هنفزو ولا لا وبعدين حسبوني و الجيش واقف معانا و مش هيسيب البلد لحد لا مبارك ولا غيرو غير لما يطمنو علي الشعب اللي هو اهلهم و مش هيقرب من المتظاهرين والشرطة مش كلهم بلطجية الناس دول اهلنا و اقاربنا وكلنا عرفنا اللي جرالهم بس اغلبهم كان بينفز الاوامر بدون تفكييييييييييييير بس خلااااااااااااص الكلام دة كان زمان دلوقتي كلة بيفكر و بيشغل دماغو يعني لو قالو للشرطة انسحبو تاني قيادات الشرطة هتفكر كويس اوي قبل ما تاخد اي قرار هيخافو علي اهاليهم اللي في البيوت مش هيخافو علي كراسيهم زي الاول مش هيسيبو البلد تاني المفروض نستني اسابيع بس نشوفو هيعمل اية في العادلي و عز و الناس اللي اتسببت في كل اللي حصل و قراراتو هتكون اية في الاراضي اللي اتنهبت في الدولة و هيبان الراجل دة بيتكلم بجد ولا بيستهبل الشعب كلة في حالة تأهب ومستعد ينزل تاني وتالت وعرف مين اللي بيتكلم بجد و مين عايز يركب الموجة حتي الناس الغلابة اللي مكنش ليهم علاقة بأي حاجة بيفوقو شوية بشوية المطلوب بس اننا ننتظر اسابييع قليلة نشوف اية اللي هيتم فيها و بعدين نحكم قبل ما ندخل في ثورة جياع و ندبح في بعض بجد

[mfarag]

استكمالا لخطاب مبارك - الخدعة الكبرى ---- الان وقت التفاوض

السادة

بعيد عن الاتهامات

انا راى ان خطاب الرئيس يعنى انة لن يرشح نفسة - لكن محاولى لترتيب البيت

ومع استمرار نهج المتظاهرين بالخيانة

و مع مظاهرات مضادة تطالب ببقاء الرئيس و ترشيح نفسة فترة اخرى و محاولة للاحتكاك بالمتظاهرين المعارضيييين


فاوضح - عشان مكانش واضح فى الموضوع اللى فات - ان الحل دلوقتى


تفاوض


والا فاننا متجهين لكارثة او فوضى عارمة

[maka]

والواضح ان فيه ازمة ثقه

....

فعلا مربط الفرس ازمة ثقة , ما هو 30 سنة مش قليلين يا جدعان 30 سنة واحد بيخدع ملايين و يجوعهم و يعذبهم و يسيطر على الشباب بالمخدارات و العرى و البعد عن الدين هل هيصدقوه بين يوم و ليلة !!!

بس يكفى جدا كسرته و فضيحته عالميا و المكسب الاكبر ان الناس بدات تدافع عن حقوقها

و يارب يوفى بوعوده و يقدم السبت

[mmffor]

بعد قرائتي لكل تعليقاتكم احب اقول ايه قرءانية: " فاستخف قومه فاطاعوه " صدق الله العظيم