كنت إنهاردة في مؤتمر شعبي كبير للسلفيين و الجماعة الإسلامية

[hobiko]

بعد صلاة المغرب سمعت صوت ميكروفونات عالي و دوشة غاي من بعيد ....... سألت البواب قالي الاخوان عاملين شادر و صوان كبير و بيكلمو على الدستور


لبست و نزلت جري ...... كان عندي فضول كبير أوي أسمع وجهة النظر التانية مباشرة من مؤيديها


الشارع كبير إتجاهين ...... إلي من اسكندرية عارف شارع محمد نجيب الإتجاه إلي غاي من ملك حفني فوق النفق


إتجاه كامل فيهم مقفول تماماً من أول الشارع لاخره ........ مفروش بالحصير و متحوط بالكامل بالسماعات الكبيرة


في أخر الشارع منصة جلس عليها 4 ملتحين بس اللحية كانت كبيرة و عرفت انهم السلفيين مش الاخوان طبعاً ...... غير شعارات الدعوة السلفية و الجماعة الإسلامية


مشت من أول الشارع متجه ناحية اخره كنت عايز أشوف مين إلي قاعد على المنصة


شباب كتير كلهم ملتحين و لابسين فيستس لونها فسفوري ...... منهم إلي محوت المكان و منهم إلي وقف في أول الشارع بيوزع منشورات


و داخل الشارع واحد من إلي بيوزعو المنشورات قرب مني و هو متردد و لاقيته بيقولي ...... شكلك حتقول لأ ...... قلتله هو باين علي للدرجة دي ( أنا مش ملتحي) و ضحكنا


سبته و كملت لأخر الشارع ....... طبعاً أكتر من ألفين شاب و رجل ملتحين ماليين الشارع واقفين على الرصيف و جالسين على الحصير


في نص الشارع و أنا عمال أقرب من المنصة ..... إعترض طريقي 3 من الشباب ......


- رايح فين ؟؟؟؟
- نعم !!!!!
- حتقف ولا حتعدي ؟؟؟؟؟
- نعم !!!! ..... و إنت مالك
- يعني إيه و أنا مالي ...... حتقف ولا حتعدي ؟؟؟؟؟؟؟؟؟؟؟؟؟؟؟؟؟؟؟؟؟
- حاعمل إلي أنا عايزة ( بصوت عالي )



راجل كبير ظهر ...... سيبوه يعدي ...... و بعد كدة بيكلمني احنا بنحاول ننظم الموضوع بس


قلتله طيب ماشي


و وقفت أسمع المؤتمر ............ و إتصدمت من إلي سمعته


إلي بيقول لأ ...... دة إنسان في ضلال على حافة الكفر ...... لا يريد نصرة دينه ..... لا يريد نصرة رسوله


طب الأقباط بيقولو لأ عشان خايفين من الإسلام ...... إنت بتقول لأ ليه ..... هو إنت مطأكبت ؟؟؟


إيه عايز رئيس مصر يبقى قبطي ...... عايزهم يمحو الإسلام ؟؟؟؟



كل الاحزاب الكرتونية بتقول لأ عايزين وقت نستعد ..... دة كلام فارغ كل ما يريدونه هو إلغاء هوية مصر الإسلامية يريدون إلغاء المادة الثانية للدستور


دول علمانيين ...... لبراليين ..... بينادوا بالدمقراطية التي تختلف في بعض مبادئها مع الإسلام و منهم إلى عملاء للنظام السابق و بعد ما رحل اصبحوا عملاء لأمريكا


دول عارفين كويس ..... اننا أصحاب الأغلبية الكاسحة و إذا ما دخلنا الإنتخابات البرلمانية سوف نكتسح


إكتساحنا للإنتخابات البرلمانية يخيفهم ..... لإن هذا ما سوف يعطينا القدرة على التحكم في صياغة دستور جديد ..... يعيد هوية مصر الإسلامية ....... و يقيم خلافة الإسلام في مصر



لذلك وجب التصويت بنعم ..... حتى نسطيع أن نصيغ الدستور إلي يحقق أهداف دعوتنا الإسلامية


.................................................. .................


أقسم بالله العظيم هذا ما سمعته و ما رأيته ....... ولا أقصد التشويه ولا التجريح انما انقل شهادتي



أنا خايف على مصر بجد

[AhMeD EzZ]

سؤال بسيط ... فين الشرطة ؟؟؟
علي كلامك دة شارع كبير و معروف يتقفل كدة ...!!

و بعدين انا هقول بكرة لا ...يبقي انا كافر !!!

[عمرو عمارة]

ولا أقصد التشويه ولا التجريح انما انقل شهادتي

جزاك الله خيراً على نقلك للمشهد دون قصد التشويه ولا التجريح وهذا واضح من الردود.........ولسة هتسمع ردود من نوعية " أهُم السلفيون بيكفروا كل واحد "
الله وحده أعلمُ بنيتك
وأعلم أنك بالفعل أحدثت التشويه والتجريح حتى لو هم أخطأوا في التنفيذ دون قصد منهم

[أبو عبدالله]

بص يا أخي الكريم
انا بس عاوز اوضح نقطه مهمه

افترض ان انا في وادي وانت في وادي ولكن شايفين بعض من على بعد مثلا او بكلمك في تليفون
وبقولك في خطر عندي
ينفع ترد عليان وتقولي خطر فين انا مش شايفه
هيا دي المشكلة دلوقتي
مش معنى ان انا او انت مش شايف الخطر بتاع العلمانيين والليبراليين في اقحام نفسهم في مسالة تعديل الدستور والكلام عن تعديلات المادة الثانيةوغيرها
يبقى انكر على اللي بيحذر من اللي ماشي معاهم في الطريق وهو لا يعلم انه بيساعدهم على في طريقهم سواء نيته صالحه او فاسده
كلامهم اللي بيقولوه كله موجه للعلمانيين والليبراليين بالتحديد وليس لعامة من يقول لأ
ولكن المشكلة ان اللي بيقول لأ بيساعدهم فقط فهيا دي الاشكالية

وانا عاوز تعمل بحث على النت بسيط هتعرف ان اهداف العلمانيين هيا استبعاد اي ما هو ديني من الحياة وجعله مقصور في مسجده او كنيسته
وصلت فده عدو لده ومن اشد اعدائه كمان
خصوصا ان العلمانية كاذبة جدا في كلامها

اعمل بس بحث بسيط على النت وانت هتشوف المعركة ماشيه ازاي وقديمة جدا يعني

[dr-mohamed]

سؤال بسيط ... فين الشرطة ؟؟؟
علي كلامك دة شارع كبير و معروف يتقفل كدة ...!!

بتعمل نفس اللى عملته النهاردة في التحرير
ميدان التحرير سيطر عليه انصار لا وقفلوا الميدان وسمحوا بمرور سيارة واحدة فقط بعد اقناع من رجال الشرطة العسكرية
اظن ميدان التحرير محوري واكبر واهم من الشارع المذكور في اسكندرية
ونفس ما فعله انصار نعم في اسكندرية فعل اكثر منه انصار لا في التحرير اليوم

[hobiko]

سؤال بسيط ... فين الشرطة ؟؟؟
علي كلامك دة شارع كبير و معروف يتقفل كدة ...!!

اسكندرية الشرطة فيها لسة منزلتش بالشكل المطلوب

و بعدين انا هقول بكرة لا ...يبقي انا كافر !!!

هي دي المشكلة ...... إقحام الدين !!!!!!!!!

جزاك الله خيراً على نقلك للمشهد دون قصد التشويه ولا التجريح وهذا واضح من الردود.........ولسة هتسمع ردود من نوعية " أهُم السلفيون بيكفروا كل واحد "
الله وحده أعلمُ بنيتك
وأعلم أنك نجحت في التشويه والتجريح حتى لو هم أخطأوا في التنفيذ

أقسم بالله ..... أنا بنقل إلي شفته بمنتهى الأمانة


أنا كنت عارف إن في ناس حتقلي كدة ..... بس والله دة إلي حصل

بص يا أخي الكريم
انا بس عاوز اوضح نقطه مهمه

افترض ان انا في وادي وانت في وادي ولكن شايفين بعض من على بعد مثلا او بكلمك في تليفون
وبقولك في خطر عندي
ينفع ترد عليان وتقولي خطر فين انا مش شايفه
هيا دي المشكلة دلوقتي
مش معنى ان انا او انت مش شايف الخطر بتاع العلمانيين والليبراليين في اقحام نفسهم في مسالة تعديل الدستور والكلام عن تعديلات المادة الثانيةوغيرها
يبقى انكر على اللي بيحذر من اللي ماشي معاهم في الطريق وهو لا يعلم انه بيساعدهم على في طريقهم سواء نيته صالحه او فاسده
كلامهم اللي بيقولوه كله موجه للعلمانيين والليبراليين بالتحديد وليس لعامة من يقول لأ
ولكن المشكلة ان اللي بيقول لأ بيساعدهم فقط فهيا دي الاشكالية

وانا عاوز تعمل بحث على النت بسيط هتعرف ان اهداف العلمانيين هيا استبعاد اي ما هو ديني من الحياة وجعله مقصور في مسجده او كنيسته
وصلت فده عدو لده ومن اشد اعدائه كمان
خصوصا ان العلمانية كاذبة جدا في كلامها

اعمل بس بحث بسيط على النت وانت هتشوف المعركة ماشيه ازاي وقديمة جدا يعني

بس بيني و بينك أنا خايف من الاتنين ......... من العلمانيين ...... و من مستغلي الدين


بس بجد الكلام كان فيه نبرة تعميم شديدة ......

بتعمل نفس اللى عملته النهاردة في التحرير
ميدان التحرير سيطر عليه انصار لا وقفلوا الميدان وسمحوا بمرور سيارة واحدة فقط بعد اقناع من رجال الشرطة العسكرية
اظن ميدان التحرير محوري واكبر واهم من الشارع المذكور في اسكندرية
ونفس ما فعله انصار نعم في اسكندرية فعل اكثر منه انصار لا في التحرير اليوم

الاتنين غلط سواء إلي عمل كدة في التحرير ...... أو هنا في اسكندرية

[medo_2060]

النهارده خطيب الجامع كان اخوان طول الخطبه قاعد يقول انقذ مصر الاسلاميه وقول نعم !! والى هيقول لا يبقى علمانى ومش خايف على دينه !! وكلام من دا كتير لحد ما كنت عايز اسيب الخطبه واقوم والله
بيستخدموا الدين عشان مصالحهم وانا هقول لا واى حد منهم يترشح فى الانتخابات البرلمانيه مش هنتخبه

[tamatemo]

انا هاقول نعم

بس للاسف مش عاجبني الكلام دا بصراحة

بس علشان نفهم السلفيين في اقصي اليمين والليبراليين في اقصي اليسار

فلازم كل واحد فيهم يهاجم راي التاني

[أبو عبدالله]

النهارده خطيب الجامع كان اخوان طول الخطبه قاعد يقول انقذ مصر الاسلاميه وقول نعم !! والى هيقول لا يبقى علمانى ومش خايف على دينه !! وكلام من دا كتير لحد ما كنت عايز اسيب الخطبه واقوم والله
بيستخدموا الدين عشان مصالحهم وانا هقول لا واى حد منهم يترشح فى الانتخابات البرلمانيه مش هنتخبه

طيب انت كده افترضت سوء النية
طيب ليه متقولشي في نفسك افرض كان ليه وجهة نظر وهو فعلا شايف كده بنيته ورايه وفعلا عاوز مصلحة دينه
يبقى انت اتهمته بما ليس فيه
ينفع كده بالله عليك
يا جماعه بلاش سوء الظن ان بعض الظن اثم
ايه المشكلة ان يكون فيه حد فعلا شايف خطر على دينه وبيدافع عنه
لازم اتهمه انه بتاع مصلحة وبيتاجر بالدين
طيب ما انا ممكن اتهم الرأي المخالف بأسوا من كده
مينفعشي الكلام ده بجد

[dr-mohamed]

الاتنين غلط سواء إلي عمل كدة في التحرير ...... أو هنا في اسكندرية

طبعا الاتنين غلط
لكن لما يبقي لك الموضوعات مجرد هجوم على ان الاخوان او السلفيين بيدعوا لراي معين والتغافل عن قيام انصار الراي الاخر يقومون بافعال مشابهة تماما هنا المشكلة

الطرفين غلط والمفروض كل واحد يقول صوته ويرجع يشتغل
اللى هاينزل التحرير او اسكندرية للاعتراض على نتيجة التصويت ايا كانت هو فعلا اللى هايبقي خاين للثورة وخاين للامة ومستقبلها

[عمرو عمارة]

أقسم بالله ..... أنا بنقل إلي شفته بمنتهى الأمانة


أنا كنت عارف إن في ناس حتقلي كدة ..... بس والله دة إلي حصل

أنا لم أُكذبك.......لكني أقول لك إنك ساهمت وأحدثت تشويه لصورة السلفيين مثلما يفعل الإعلام الفاسد
سبحان الله !!.......هل هم معصمون من الخطأ

وأعلم أيضاً أنك ساهمت في كل الردود التي كُتبت وسوف تُكتب فيه تجريح وغيبة للسلفيين........هل علمت ماذا فعلت ؟؟؟

[hh]

أنا لم أُكذبك.......لكني أقول لك إنك ساهمت وأحدثت تشويه لصورة السلفيين مثلما يفعل الإعلام الفاسد
سبحان الله !!.......هل هم معصمون من الخطأ

تشويه و لا توضيح لصورة السلفيين؟؟؟؟؟؟؟؟؟؟؟؟؟

الراجل قال اللي شافه و كلنا شوفناه الأيام اللي فاتت باشكال مختلفة.

حسبي الله و نعم الوكيل في كل أنسان بيضلل الناس باسم الدين

[aly_hosny]

أنا لم أُكذبك.......لكني أقول لك إنك ساهمت وأحدثت تشويه لصورة السلفيين مثلما يفعل الإعلام الفاسد
سبحان الله !!.......هل هم معصمون من الخطأ

وأعلم أيضاً أنك ساهمت في كل الردود التي كُتبت وسوف تُكتب فيه تجريح وغيبة للسلفيين........هل علمت ماذا فعلت ؟؟؟

هو التكفير خطا عادي ؟؟؟

[عمرو عمارة]

تشويه و لا توضيح لصورة السلفيين؟؟؟؟؟؟؟؟؟؟؟؟؟

مين هيزود ؟؟!!!.................والعداد بيعد

[medo_2060]

طيب انت كده افترضت سوء النية
طيب ليه متقولشي في نفسك افرض كان ليه وجهة نظر وهو فعلا شايف كده بنيته ورايه وفعلا عاوز مصلحة دينه
يبقى انت اتهمته بما ليس فيه
ينفع كده بالله عليك
يا جماعه بلاش سوء الظن ان بعض الظن اثم
ايه المشكلة ان يكون فيه حد فعلا شايف خطر على دينه وبيدافع عنه
لازم اتهمه انه بتاع مصلحة وبيتاجر بالدين
طيب ما انا ممكن اتهم الرأي المخالف بأسوا من كده
مينفعشي الكلام ده بجد

سوء الظن !!!!!!!!!!!! بقول لحضرتك بيقول الى هيقول لا مش خايف على دينه وعلمانى ... يبقى كدا مين بيتهم مين يا جماعه.... لما يقول الى هيقول لا يبقى مع ساويرس والبرادعى الكافر.. باى حق يكفروا الناس
وايوه هما بيتاجروا بالدين والله دى الحقيقه ... لما ينزلوا القرى النجوع للناس البسيطه يخوفوهم بالماده الثانيه وفزاعه الحكم العسكرى عشان مصالحهم... هو يعنى الى هيقول لا هيبقى بوذى يا جدعان ولا مش خايف على دينه !!!
استاذى انا قاعد فى قريه حاليا مع اهل والدى فى قريه تبع مركز طلخا .. الجوامع شغاله قول نعم عشان الاسلام وقول نعم عشان .. مش عايز اقول كلام كتير عشان منعملش فتن طائفيه ... واحد بدقن معرفش اخوان ولا سلفيين عاطينى ورقه مكتوب فيها انى اقول نعم عشان استقرار البلد وعشن لو قلت لا هيعلن احكام عرفيه ولو قلت لا هبقى زى ما مكتوب فى الورقه علمانى !!!!!!!!
دا غير الورق الى عاملينه وكاتبين فى انصار نعم وانصار لا.. كاتبين انصار نعم كلهم شيوخ واخوان وسلفيين ونسوا يكتبوا الحزب الوطنى.. وكاتبين انصار لا ساويرس والبرادعى وتامر حسنى والكنيسه ونسوا يكتبوا دعاه اسلاميين برضه قالوا لا
يبقى دا اتجار بالدين ولا .... بقى يقولوا علينا علمانين ومش خايفين على دينا والاخر نطلع احنا الى بنتهمهم وكمان بنسىء الظن