للاسف انا اتخدعت في الكثير من التيارات اللي ظهرت علي الساحة حاليا

[م. حاتم السباعي]

الاخوة الافاضل
اقر بأني قد انخدعت في الكثير من القوي السياسية التي ظهرت علي الساحة خلال هذه الفترة المصاحبة للثورة
فلم يمضي سوي عدة ساعات علي اعلان النتيجة و اذ بحملة منظمة مرتبة لتشويه سمعة ( الفصيل الوحيد بينهم ذو الشعبية )
لا اتحدث هنا عن افراد انا اتحدث علي حركات و لاني لي اصدقاء في الكثير من هذه الحركات و التنظيمات المخالفة للاخوان
فأنهم في صدمة للاسف من نجاح ( تيار الاخوان من خلال الشعب ) و هناك حسرة سواء في مداخلاتهم او نظراتهم و تشكيكهم في النتيجة بطريقة غريبة
حينما تسأل هل كانت نزيهة يكون الجواب بنعم
و حينما تسأل طب ايه المشكلة بتطعنو في ايه يكون الجواب اصل التيارات الدينية مثل الاخوان و السلف و غيرهم كل دول استخدمو الدين في حشد الحشود و حينما ترد عليهم طب ما هوه ده الطبيعي لان دول ناس هيه ديه مبادئهم و لا يخدعو بها احد يعني هما لم يتلونو علي الناس و لم يرتدو رداء ناس غيرهم فهذه هي مبادئهم من اكثر من 50 سنة و هي ما جعلتهم يلقبو ( بالمحظورة ) في العهد السابق الساقط و الناس عارفه ده كويس و السلفيين الناس عارفة كويس افكارهم لانهم منتشرين بيننا في مدارسنا و مصانعنا و جامعاتنا و شوارعنا و مساجدنا و بيحتاجهم العلمانيين في تغسيل موتاهم بل في الكثير من الاحيان بيخلوهم يصلو هم علي موتاهم و الكثير و الكثير مما يثبت انهم منتشرين و معروفين في حياتنا كويس اوي و لم يحلو علينا من الخارج
تكتشف بقي اخيرا انهم بيعترضو ان الناس انجذبت ليهم لانهم اتكلمو بصورة الدين و يظلو يصرو علي هذه الفكرة مثل هذه النقاشات مستمرة حتي الان و هذا شئ غريب بصراحة جدا
احنا لسه هنقعد نحلل ليه الشعب وافق علي التعديلات بأكتساح
رسالتي هذه بوجهها للاخوة الاعضاء و اذكر الكل بأننا وافقنا جميعا علي اننا سنصبح كتلة واحدة هل من صوت بلا هل حضراتكم ترون ان هذه النسبة الكبيرة و هي نسبة 77 %
الا تمثل هذه النسبة حال الاغلبية الساحقة و الديمقراطية تستلزم الالتزام بما اختاره الشعب حتي لو اختلف احد مع رأي الاغلبية
هل ما يحدث من مهاجمة للاخوان و الجماعات الاسلامية علي طول الخط اثناء النظام الساقط مع انهم كانو يمثلو اغلبية هل سيستمر هذا الضغط و التخويف و التخوين في ظل الثورة
و قبل الدخول في تفاصيل انقل لكم ما ظهر الان علي الساحة من مطالب ناس كتير ممن قالو لا
الحديث الان علي ترك الفرصة لاجراء الانتخابات حتي تتاح فرص للاحزاب و تجد صوت ظهر يقول لا اللجنة التأسيسية يجب ان تكون من ناس معينين لا يكون حق تأسيسها لمجلسي الشعب و الشوري تقولهم ليه ده غير اللي وافق الناس عليه يقولك اصل الانتخابات مش هتجيب الناس الصح
بجد القادم خطر و خطورته ان الكثير ممن قال لا للاسف مازالو مقتنعين انهم المثقفين من الشعب و بما ان الكثير من الشعب في نظرهم ناس غير مدركين لمصالحهم و ان هناك فئات تستطيع التأثير علي هذا الشعب بجد الموضوع محزن جدا الكل خارج منهم يقول ايوه احنا مع الاغلبية بس تجد التناقض واضح في استكماله لكلامه مباشرة
ارجو ان نتقي فتنة من الان و ان يتكاتف الكل
و ارجو من اي عضو يريد مناقشتي الا يقتبس جزء من كلامي و يسيب جزء فأذا كان الكلام للرد علي الكلام جزء جزء او للموضع ككل اهلا و سهلا و انا ارحب اما ان يسحب اخ ثلاث او اربع كلمات فهذا سيفقد الحوار و النقاش الحيادية و هذا ما ارفضه ان كان لي حق في ذلك

م.حاتم السباعي

[jisso82]

على فكرة عشان ما تسطحش تفكير الناس اللى متضايقة من الإخوان و السلفيين فى استخدام الدين فى حشد الحشود احنا ما قلناش انهم كفرة و عربيد و ما لجؤوش للدين غير عشان يكسبوا أصوات احنا مقرين بإن الدين هو منهجهم وسلاحهم أصلا و لكن التضليل المباشر بأن لا نتيجتها الحتمية هو إلغاء المادة التانية و إن اللى هيحكم مصر هيبقى علمانى أو قبطى و إن مصر مش هتبقى دولة إسلامية بعد كده و واجب شرعى على كل مسلم إنه يقول نعم و من يقول لا فهو ملحد أو علمانى أو ليبرالى و ربنا هيحاسبه (ده ربط خاطىء للأغراض السياسية بالدين و استمالة كاذبة لمشاعر الناس الدينية و استغلال لضعف تفكير البعض بإيهامهم بأكاذيب تخدم أغراضهم السياسية)

[mertahgedan]

اللهم بارك في مصر وفي شعب مصر . نتيجة الاستفتاء مع اني من أنصار لا. لكني أري انه لا يوجد سبب للاختلاف لكن هذا سبب للتقدم إلي الامام

[kono]

انا من انصار لا ... ومتقبل النتيجة بصدر رحب ...طالما ده رأى الأغلبية ..والمجلس العسكرى قال انه هيعمل اعلان دستورى يتضمن المواد المعدلة خلال 48 ساعة

ومش شايف اى سبب لنقاش النتيجة وتفرقة المصريين الى مؤيدى نعم ومؤيدى لا ...واللى بيهاجم الاخوان المسلمين غالبا غيران منهم لانهم القوى السياسية الوحيدة المنظمة

المفروض اننا نتخطى الموضوع ده ونشوف اللى جاى هيبقى ايه

[م. حاتم السباعي]

على فكرة عشان ما تسطحش تفكير الناس اللى متضايقة من الإخوان و السلفيين فى استخدام الدين فى حشد الحشود احنا ما قلناش انهم كفرة و عربيد و ما لجؤوش للدين غير عشان يكسبوا أصوات احنا مقرين بإن الدين هو منهجهم وسلاحهم أصلا و لكن التضليل المباشر بأن لا نتيجتها الحتمية هو إلغاء المادة التانية و إن اللى هيحكم مصر هيبقى علمانى أو قبطى و إن مصر مش هتبقى دولة إسلامية بعد كده و واجب شرعى على كل مسلم إنه يقول نعم و من يقول لا فهو ملحد أو علمانى أو ليبرالى و ربنا هيحاسبه (ده ربط خاطىء للأغراض السياسية بالدين و استمالة كاذبة لمشاعر الناس الدينية و استغلال لضعف تفكير البعض بإيهامهم بأكاذيب تخدم أغراضهم السياسية)

فعلا انا من الناس اللي استفدت من الثورة
فأنا زمان كنت مسالم و حينما كان يتحدث معي احد بهجوم مستفز و غير مبني علي خطأ صادر مني و انما علي سوء ظن منه
و من يوم الثورة و من النقاش مع ناس كتير زيك كده عرفت ان افضل شئ ان الواحد يعمله انه يرد علي كل واحد بما يليق به
اولا _ انا لا اسطح من تفكير احد
ثانيا _ حينما يخرج قبل الاستفتاء و يعلن المرشد العام بأنهم لم يكفرو احد من الذين سيختارو لا و حينما يعرف الناس كلها الشيخ محمد حسان و غيره من العلماء السلفيين او التيارات الاسلامية علي وسائل الاعلام و ينفي اي كذب و ادعاء بهذا و حينما يخطب الشيخ القرضاوي يوم الجمعة من قطر في خطبة الجمعة قبل الاستفتاء و يقول انه سمع كلام من الشيخ المحلاوي بيحمل ان الواجب شرعا هو اختيار نعم و يرفض ذلك و يؤكد بأن الواجب شرعا هو الذهاب للتصويت اما الافضل من وجهة نظرهم كعلماء دين فهو التصويت بنعم اري ان كل القيادات انكرت مثل هذه الادعاءات
ثالثا _ لو انته حاسس انك عايش و سط ناس اغلبهم بيتنصب عليهم بسهولة كده و بيتخدعو في الناس بسرعة كده و ان معظم شيوخ البلد خداعين كده لخدمة اغراضهم السياسية من كلامك ما الذي يدعوك للاستمرار في هذه البلد و ما الذي يدعوك للخوف علي بلد اغلبيتها تراهم كما عبرت عنهم انت الان
و الحمد لله الاغلبية ليست بمثل ما تراه
منتظر الرد بموضوعية لان من هنا ورايح الناس هتعرف مين اللي بيجادل و مين اللي همه الوصول لنقاش بناء يهدف اولا و اخيرا للارتقاء بمستوي تفكيرنا و ان نستفيد من النقاش و كل منا يفيد الاخر
منتظر الرد بموضوعية

م.حاتم السباعي

[M.Mostafa80]

بالرغم من انى من من قالو لا الا انى لااحترم التشكيك والأتهامات مع انى من طبيعتى الشك فى الأمور المعقده ومؤمن بنظريه المؤامره وذلك لأنى ارى ان اللجان كانت فى منتهى الشفافيه وانها نتيجه عادله واذا كان كما يقول البعض ان الأخوان نجحو فى توظيف شعارهم الدائم بالصبغه الدينيه فهؤلاء نجحو فماذا فعلت انت خلال العقود الماضيه للمحاوله للظهور على الساحه فاعلينا احترام رأى الأغلبيه مهما كانت النتيجه علما بأننا قد نتضرر اذا كان ما اختاروه هو الخطاء بعينه ولكن هذه هى الديمقراطيه التى نناشدها
اعلن انى من اعطو صوتهم بلا ولكنى متقبل النتيجه بصدر رحب لأنى لم ارى اى من مما يقوله البعض فكما كان يوزع الأخوان منشورات بالحس على نعم فكان هناك منشورات توزع بالحس على لا وكلا منا حكم عقله وكان له وجهه نظر وذهب وادلى بصوته بناء على قناعه فأذا كنت لا تملك مكونات القدره على اقناع الغير فهذا عيب فيك انت وليس فى الناس فهم لهم من يقدر على اقناعهم وغزو عقولهم وهذه هى السياسه فأذا لم تكن لديك القدره على الأقناع فلا تلوم الا نفسك
خالص احترامى للجميع
كلامى على المستوى العام ولا اوجه كلامى لأى شخص او عضو

[human]

كتبت الكلام ده من شويه وشايف ان ليه فايده هنا
فانا استأذنك فى نشره فى الموضوع
اشدد انى متفهم لاقصى درجه ضيقك

مش قادر افهم ليه مش واضحه المشكله؟؟

المشكله ليست فى الديموقراطيه المشكله فى تطبيقها كيفيه ممارستها

خد مثلا اى مشكله هتقابل الشعب ونزل فيها استفتاء
الناس المفروض على درجات متفاوته من الوعى

المفروض معظم الناس عندهم الوعى الكافى انهم يسمعوا ويفكروا

بس اللى هيحصل ان التيار الاسلامى هياخد رأى ويقول ان ده الراى من الاسلام (ممكن يكون كوبرى مشاه حتى) يمر من هنا ولا هناك

اصبح الامر هكذا الدين يريد ذلك
معظم الناس الدين هو المسيطر و بالذات فى الامور الغير مفهومه يعنى ممكن يكون بيسب للناس ميت مله بس يقولك لا كله الا الدين لا لازم ندافع عنه ولازم نقول كذا(راى الدين)
اللى ممكن يبقى من شيخ جامع او اجتماع او فى صوان وما شابه خصوصا بعيدا عن القاهره

كويس؟؟

دلوقتى الناس ديه هما الاكتريه و فوق دماغى من فوق وصوتهم يحترم

بس الاصل فى التصويت انه صوت حر قادر انه يقرر

يعنى الراجل هيسمع الدين هيقولك نمشى وراهم عشان ربنا يكرمنا - وهو مغمض

فى تلك اللحظه صوته لم يعد صوت حر وظلم الجميع

واللى بيمليه ظلمه لانه افهمه ان الطريق الى الله عن طريق ما يقول
عشان مافيش هنا طريق لربنا وطريق للشيطان اصلا

مثل الفيديو بتاع السلفيين - لما يقول ان تامر حسنى والنصارى اختاروا لا يبقى اكيد اللى بيقول لا اما ماجن واما كافر
وبكده يكون صحيح الدين هو نعم

السؤال هل تعتقد ان هذه ديموقراطيه؟؟

[mahmoudysf]

التجربة السابقة افرزت صنفان صنف محترم بيحترم راي الاغلبية حتى لو مخالف ليه لان المصلحة الاهم والاشمل مصلحة مصر
وصنف اخر يبحث عن مصالح شخصية وجزء من الترته حتى لو اثر ذلك على مصلحة البلد

[تامر.محمد]

بفرض ان الجهلة كتير , بصراحة شديدة
زي ما قالت نوارة نجم , العيب على اللي ما عرفش يوصل للناس , سواء الناس دول جهلة ولا لأ

[windofchange]

ممكن فيديو السلفيين ده ولو واحد منهم قال كده ياريت منعممش مش كلهم مستغلين للدين زي لما قسيس ينكر حاجات فالقرآن هنعمم علي كل قساوسة النصاري

[م. حاتم السباعي]

اللهم بارك في مصر وفي شعب مصر . نتيجة الاستفتاء مع اني من أنصار لا. لكني أري انه لا يوجد سبب للاختلاف لكن هذا سبب للتقدم إلي الامام

و بالفعل اخي الكريم انا كنت مع نعم و كنت مجهز نفسي ان الاغلبية ستكون بلا و بدأت استعد لان اتبني فكرة و منظور الاخوة الذين رفضو الاستفتاء و احاول ان اقنع نفسي بها لو ظهرت النتيجة للاغلبية بلا
و لكن كما اشرت انا اعلاه بأني سمعت من اصدقاء لي بكل ما حكيت سابقا و طوال اليوم النهاردة جالس اكذب سمعي و لكن هالني ما شاهدته قبل كتابتي مباشرة لحلقة ال ( o tv ) و جزء من مصر النهاردة
تأكدت شكوكي و لهذا كتبت الموضوع

انا من انصار لا ... ومتقبل النتيجة بصدر رحب ...طالما ده رأى الأغلبية ..والمجلس العسكرى قال انه هيعمل اعلان دستورى يتضمن المواد المعدلة خلال 48 ساعة

ومش شايف اى سبب لنقاش النتيجة وتفرقة المصريين الى مؤيدى نعم ومؤيدى لا ...واللى بيهاجم الاخوان المسلمين غالبا غيران منهم لانهم القوى السياسية الوحيدة المنظمة

المفروض اننا نتخطى الموضوع ده ونشوف اللى جاى هيبقى ايه

فعلا استاذ kono هذا ما كنت اعد نفسي له و كنت فاكر ان اغلبية التيارات التي دعت ل ( لا ) صدمت حين رأيت و سمعت ارائهم من قبل حتي النتيجة ما تظهر
ربنا يهدينا و لا يفرق من شملنا

[human]

بفرض ان الجهلة كتير , بصراحة شديدة
زي ما قالت نوارة نجم , العيب على اللي ما عرفش يوصل للناس , سواء الناس دول جهلة ولا لأ

الدين والجنس والمال
ثالوث السيطره يا عزيزى

اللى معاه واحده تكفى انها تغسل اى افكار

[amr100]

بالرغم من اني قلت نعم ولكن عاوز اقول شئ للناس اللي بتقول ان الاخوان الطريق مفتوح قصادهم في انتخابات مجلسي الشعب و الشورى القادمة انا اللي عاوز اقوله ان الانتخابات الجاية هي اصعب انتجابات جاية للإخوان بالعكس الانتخابات السابقة كانت من اسهل الانتخابات للاخوان
اولا علشان في ناس كتير ماكنتش بتروح تنتخب علشان مش واثقة صوتها هيتزور ولا لأ
ثانيا اللي بيروح ينتخب للاخوان من الجماعة بس مش حد تاني
ثالثا اعتقد في ناس كتير دلوقتي هتحاول تطلع بطاقة انتخابية علشان الانتخابات اكيد يعني مش كلهم اخوان
لهذه الاسباب هذه الانتخابات ستكون اصعب انتخابات للإخوان

[human]

ممكن فيديو السلفيين ده ولو واحد منهم قال كده ياريت منعممش مش كلهم مستغلين للدين زي لما قسيس ينكر حاجات فالقرآن هنعمم علي كل قساوسة النصاري

ده الاكتر من انه بيقول - هو انه معلق اليافطه
موجود هنا الفيديو ممكن تدور عليه

اسامى نصارى وماجنين والبرادعى اللى عايز يبقى مع دول يقول لا

الموضوع قتل مناقشه و لو حتى مش مصدق اعتبر انه خيال قابل للتصديق من خلال واقعنا

[ashrafkemo]

يا جماعة انا ساكن في منطقة ريفية وشوفت بعيني ما حدش قالي الناس اللي ركبو علي الثورة اللي هما اخواننا دخلوا في دماغ البسطاء ان التصويت بنعم جهاد في سبيل الله وان الدين في خطر وفي احد المناقشات بيني وبين مجموعة من البسطاء محاولة مني توضيح ان هذا الكلام ليس صحيحا فاتهموني والعياذ بالله باني ملحد ليست صريحة ولكن الرسالة وصلت فحسبي الله ونعم الوكيل في من ارتكب هذه الجريمة في حق الوطن وليكن الحزب الحاكم الجديد هو الحزب الوطني الاخواني اللي شعاره الغاية تبرر الوسيلة