إعـــــــلان

**A7MED_PHARMA** · 19-04-2011, 03:14 PM

المشاركة الأصلية كتبت بواسطة megamoudy مشاهدة المشاركة

بقولك ايه يا احمد بيه بدل التعامل مع الفلاحين ......... ماتيجي هنا الزقازيق ............ في ف الحتة اللي عندنا صيدلية فتحت وقفلت على طول ومجهزة تمام يدوب هتشيل اليافطة وتحط اليافطة بتاعتك

الصيدلية قفلت لأن الدكتور صاحبها والله اعلم مش مهتم بيها وكل ماكنت اروحله واوقوله على دوا يقولي مفيش مش عندي

تقريبا هو ببيشتغل ف مكان تاني ومكفيه

الصيدلية ف الفلل .......... عند مدرسة اللغات بنات كده

ماتعرفش طالب فيها كام؟

**A7MED_PHARMA** · 19-04-2011, 03:23 PM

المشاركة الأصلية كتبت بواسطة marwankh مشاهدة المشاركة

اول حاجه طريقه عرض الموضوع فظه وما يصحش وصف اى دكتور بانه غبى لانه الروشته روشتته و وظيفه الصيدلى انه يصرف العلاج الى مكتوب بدون بديل لانه النتيجه هتتحسب على الدكتور مش على الصيدلى
طبعا السالبين الوينيكتام زى بعض بس اليونيكتام سعره الضغف وبالتالى تركيبته انضف وافضل وتاثيره اعلى او مواصفات الدوائيه بصفه عامه اعلى وافضل
يعنى انا مثلا ساعات بكتب علاج لحالات و بتيجى ليا الحاله تانى مره مفيش تحسن اجى ابص فى العلاج الاقيه حاجات غريبه غير الى انا كاتبها ومع ذلك عمرى ما لمحت للمريض انه الصيدلى خدعه بس بطلب منه يورينى العلاج لانه للاسف الصيدلى بينسى انه دكتور و بيتعامل بمبدأ التجاره الى هو عايز امشى البضاعه الى عندى وخلاص
لو كان الموضوع فى الماده الفعاله ليه مضادات حيويه كتير من نفس المجموعه بس اسعارها بتتفاوت فى حالات معينه بنستخدم الانواع الغاليه
النهارده حاله كاتبلها علاج ترايتون اقراص الصيدلى عاطيها هيدروكين بتاع الملاريا

وكاتبلها ابيدون عشان مش عنده عاطيها موتيليوم
واكتب زيثروماكس 600 شراب يعطى اريثروسين 100 :10d5c8w1107:
لا تعليق
فياريت كل واحد يلتزم بشغله ومهمته المحدده بدون تجريح

يادكتور
فرق اليونيكتام من اليوناسين مش الضعف ولاحاجة
الينيكتام1.5 بــ11
واليوناسين 1.5 بــ9.5

يعني الفرق بسيط جدااا
والإتنين شركات مصرية..ونفس الكفأة تقريبا

وبالنسبة للصيدلي إلي حضرتك بتتكلم عليه ده..طبيعي بطيخ
وأنا أسلوبي مكنش فيه تجريح..حضرتك حط نفسك مكاني
واحد داخل عليك يشتمك...ويقل أدبه..ويسب ويلعن..ويعملك فضيحة..بسبب حاجة أنت ماغلطش فيها..وبسبب إن دكتور (محترم)مش عارف المواد الفعالة بتاعت الأدوية..وبيكتب أي بطيخ
وده مش تعميم على الأطباء

**Dr.SherifMansy** · 19-04-2011, 05:20 PM

الأخوة الأعزاء د/ أحمد فارما ، د/ أحمد عبد الغنى ، و كل الزملاء الأعزاء المشاركين من أطباء و صيادلة ، و الأعضاء الأعزاء المشاركين فى الموضوع:

تابعت بشغف الموضوع على مدى 8 صفحات و ترددت كثيرا فى التعليق و لكن مش قادر اصبر أكتر من كده.

أولا انا كطبيب نادرا ما باعلق على موضوع البدائل التى بيصرفها الصيادلة ، احيانا بعد مكالمة لطيفة ، و كثيرا بدون مكالمات او حتى تنبيه ، طالما المادة الفعالة واحدة و نفس التركيز و الفعالية فمش باعلق ، و لكن لى تحفظات شديدة على الموضوع ده للأسباب التالية :

1) فى كثير من الأحيان للأسف الواقف فى الصيدلية ليس صيدلى اصلا و انما عم فلان أو الأستاذ فلان (حقيقة مؤسفة موجودة) و هؤلاء خبرتهم فى البدائل محدودة (ان وجدت اصلا) و بالتالى باشوف حاجات تشيب من الناس دى ... المشكلة ان عادة اللى بيدخل الصيدلية من اهل المنطقة و بالتالى اللى واقف اصلا جاره و كلامه مصدق عنده و بالتالى بادخل فى مهاترات شنيعة مع المريض اللى عمال ياخد علاج غير اللى انا كاتبه (و طبعا مش بيتحسن) علشان اقنعه ان جاره اللى يعرفه من كذا سنة اداله دواء غلط (و للأسف بعضهم بيصر ان البديل المصروف صح و ان انا الغلطان!!) ... مثلا مرة كنت كاتب لمريضة مرهم Vidisic علشان عندها جفاف ، قام عم مجدى جارهم فى الصيدلية ماعندوش راح مديها من غير ما يقولها قطرة Vegamox و دى مضاد حيوى قوى و طول استعماله بيعمل اثار مش لطيفة على العين ، العيانة رجعت فى الأستشارة بتلعن فى ، و باحاول افهمها ان ده غير ده ترد و تقول لى "مجدى مابيغلطش ابدا ... دى عشرة عمر" ، و سكتت بس لما اخدتها من ايدها و نزلت لصيدلية قريبة و خليتها تدخل تسأله اذا كانوا بدايل ولا لأ و تسمع بودنها...

2) احيانا باكون كاتب قطرة معينة لعلمى بفعاليتها ، مثلا فيه قطرة فعالة و معروفة ، و لكن نزل بديل جديد من كام شهر مابيعملش اى حاجة ، يظهر نسيوا يحطوا المادة الفعالة فيه أصلا ، و بالتالى لما الاقى الصيدلى مطلعه باتجنن ، مش هاقول حاجة غلط على الصيدلى بس هاخلى العيان يطلب القطرة بعينها.

3) ساعات بتحصل تصرفات تنرفز ، اكون كاتب للعيان قطرة ب 10 او 12 جنيه ، و الاقى الصيدلى مديله البديل ابو 48 جنيه و يقول له "أصل القطرة الأولانية ماعادبش بتنزل" و المحزن انى لما اقول للمريض رجع القطرة و شوف فى مكان تانى ، تظهر القطرة اللى انا كاتبها و من عند نفس الصيدلية...

4) أحيانا البديل بيكون غلط و الرد بيكون مستفز ، مرة كنت كاتب لطفل قطرة Tobrex و لقيت الصيدلى مديلهم Tobradex و لما رفضتها متصل بى يقول لى "هما حرفين زيادة مزعلينك ؟؟ ما هى فيها نفس الTobramycin اللى انت عايزة" و لما قلت له ان فيها كورتيزون و ده انا مش عايزة رد "مش هاتفرق مع العيان!!" و راح قافل السكة.. بصراحة قلت للمريض مايجيبش حاجة من عنده تانى ..

5) بيزعلنى جدا لما يكون اللى واقف فى الصيدلية مش عارف الدواء اللى انا كاتبه (عادة بيكون عم فلان او الأستاذ فلان) و يقول للعيان "مافيش دواء بالأسم ده أ أكيد الدكتور غلط" و طبعا المريض بيرجع و هو فاقد الثقة فيا و مش بيطمئن الا بعد ما اخليه يروح لصيدلية انا عارف ان الدواء فيها و يروح يجيبه و يتأكد انى مش باكتب اسماء وهمية..

6) حكاية ان الطبيب يشخص و الصيدلى يكتب الدواء دى رائعة و لكن لابد من دراسة تخصص هو Clinical Pharmacy للوصول الى هذه الدرجة ، و للأسف هذا التخصص نادر فى مصر (أخويا الكبير و مراته الأثنين واخدين التخصص ده بس للأسف مالوش بخت فى مصر) ، و للأسف لو الصيدلى مش واخده ممكن يحصل بعض المشاكل ، ياريت التخصص ده ينتشر و يحصل التعاون المطلوب بشدة ده..

7) فيه دكاترة بتفرس و تنقط لما تلاقيه معلق على نوع واحد لأن مندوب الشركة بيظبطه صح و بيرفض اى نوع تانى و للأسف فيه صيادلة كده كمان..

8) اخيرا انا من المؤمنين بشدة بمبدأ ان لو هاتصرف البديل يبقى بلغنى او خللى المريض يبلغنى و بكده يبقى عداك العيب ، و لو تعذر كده اصرف البديل المناسب المعروف بانه فى نفس الفعالية و فى نفس حدود السعر و بعد ابلاغ المريض.

و أخيرا فالصيادلة و الدكاترة ترسان مشتبكان معا فى الآلة الطبية و لابد من عملهما معا فى تناغم و تناسق لسير العمل كما يجب و ليسوا ابدا اعداء او منافسين ، انها منظومة واحدة لنا معا.

و تحياتى للجميع

**A7MED_PHARMA** · 19-04-2011, 05:50 PM

إزيك يادكتور شريف
منور الموضوع..صدقا
الروشتة بتاعت الطبيب جتلي الصيدلية..مكتوب فيها نوع بعينه
لو النوع ده موجود..هطلعه عادي جداااا..لكن
لكن أطباء كتير مش بيكونوا متابعين حركة نواقص السوق((والنواقص دي أنا بعتبرها قلة أدب من جانب الدولة))
وبعض الأطباء بتتفق على عمولات مع صيادلة..أو مع شركات على نوع معين بيتكتب بداعي ومن غير داعي..وبينزل لصيدلية بعينها علشان المريض يلف عليه مايلاقيهوش غير في صيدلية الدكتور فلان
طبعا كله تجاري وبيزنس
المهم
سيبك من الجانب السئ للشخصيتين(الصيدلي والطبيب)
مش عارف أقولك إيه يادكتور
كل حاجة في مصر ماشية على نظام..المسمار عند النجار..والنجار عاوز منشار..والمنشار عند البياع..و...و.....
يعني كل حاجة بتلف حوالين بعض
يعني
كتير واقفين في صيدليات مش صيادلة؟؟ليه؟؟؟
علشان معظم الصيدليات متقدرش تتحمل تكلفة صيدلي في كل وردية...ليه؟؟؟
علشان خصومات الادوية قليلة..ومصاريف الصيدلية كتير..ليه؟؟؟
علشان الحكومة مالهاش روابط صارمة ع المنتجات الدوائية وإحتكارات الأدوية من قب شركات التوزيع...ليه؟؟؟
علشان أكيد الفساد.والفساد منين؟؟
وكده
القصة كلها مترابطة..وكلها متشابكة
وخلاصة الكلام
إن البديل طالما نفس المادة..ولشركات مصرية..يبق عادي..لكن تطلع بديل مصري لمنتجة أجنبي مستورد...أو العكس..يبقا لأأ
وطالما المواد الفعلاة واحدة...وبدون مغالاة ع المريض في سعر البديل..يبقا عادي
والنقطة المهمة إلي لازم نتفق عليها
ناس كتير فاههمة ..إنه لما يعيب في الآخرين ..ده بيعلي صورته قدام الناس
وأقصد بكده الطرفين....الصيدلي والطبيب
يعني الطبيب مايرميش مسؤلية عدم تحسن المريض أو إصابته بحساسية على الصيدلي
والصيدلي مالوش دعوة بالصنف المكتوب ولا بالجرعات...يقدمه زي ماهو مكتوب
بسسسسسسسس

حصلي موقف غبي
دكتور بشري كان كاتب روشتة فيها 5 أصناف..وكلهم موجودين ماعدا ابيدروكسيل..طلعت مكانه البيودروكسيل (مفيش مشكلة اهوه)
البنت تعبت جدااااا جدااااااااا
رجعوا بالدوا للدكتور..قالهم الكلمة المعروفة المللة((مين الحمار إلي إداكوا الدوا ده..مش ده إلي أنا كاتبه))
الروشتة كان مكتوب فيها سوتريم ..أقراص
وده غالبا هو سبب الحساسية..مش البيودروكسيل أو الابيدروكسيل..وحتى لو كانوا هما سبب الحساسية.فده ذنب يشيله الطبيب البشري
مش يرميها عليا..وكل فترة يتكرر الموقف ويجيلي واحد يدخال يشتمني ويقل أدبه

**احمد المصرى** · 20-04-2011, 01:40 PM

من وجهه نظرى ال غلطان فى الموضوع دا كله البنت ال عندك اولا الدكتور كاتب دواء معين للمريض وعلى ما اعتقد ان البنت ال عندك مش خريجه صيدله يعنى ممكن تعرف ان الدواء دا ذى دا من الخبره ولكن لا تعرف اى شى عن الصيدله الصح انها كانت قالت للسيده الفلاحه مع احترامى كل الفلاحين كانت تقول ان الدواء مش موجود ويوجد البديل والقرار فى الاول وفى الاخر للسيده ولو هنعمل الصح الصح يبق حضرتك الوحيد بما انك خريج صيدله وفاهم جدا انت ال تعطى البديل اما البنت ال واقفه فى الصيدليه لا تعطى البديل علشان هيا مش عارفه تركيبات الدواء ذى حضرتك

اخيرا :- كل شغلانه وفيها متاعب وانا قريت كام مشاركه لحضرتك كنت سبب فى تخفيف الالم على ناس كتير ولو اشتغلت اى شغلانه تانيه هتلاقى متاعب كتير برضوا

**HANTER** · 20-04-2011, 04:02 PM

المشاركة الأصلية كتبت بواسطة saif3s مشاهدة المشاركة

والله يادكتور مع احترامى ,انا شايف البنت اللى عندك هيه اللى غلطانه مش الفلاحه او الدكتور الغبى
المفروض انها تعطى نفس الدواء الموصوف واذا كان مش موجود تشرح ان فيه دواء بديل و تدع الاختيار للمريض و دكتوره المعالج بالقبول او الرفض ولا تفرض عليهم الدواء فرضا

مؤيد هذا الكلام بشدة مع رجاء عدم وصف احد بلغباء . كمان الى عندة حد مريض بيقى عندة يقين ان الدواء الى الدكتور كاتبة هو دة الى هيجيب نتيجة ومعندوش استعداد يغيرو الا بعبم الطبيب . ممكن انت تكون اكثر مرونة فى التعامل وتشرح الكلام دة للعاملين عندك

**Frozen_Pain** · 20-04-2011, 04:04 PM

ماهو يا دكتور حتى لو رحت المدينة ،،، هتلاقى في نوعية اصعب من كده،،، وغير كده بيكون متعلم والله

ودى عن تجربة والله

ربنا يكرمك ان شاء الله

**dramir1** · 20-04-2011, 04:24 PM

المشاركة الأصلية كتبت بواسطة wassim_nasser مشاهدة المشاركة

ارجع واقولك البنت غلطانة .. ليه؟ عشان كان مفروض تشد تليفون للى كتب الروشته وتستأذنه .. عارف الحركة دي تحسس الدكتور انك وقرته واحترمته و مش هايرفض

اؤيد هذا الرد...واحيانا كتير الدكتور بيصمم ان البديل دا ماينفعش على الرغم من انه نفس الماده الفعاله ولكن بعض الشركات المنتجه مش بتراعي ربنا فبيحطو ماده فعاله من الدرجه c في الجوده عشان رخيصه (الماده الفعاله من الدرجه a هي الافضل).... وتكون النتيجه ان الطفل ياخد الحقن 3 ايام مثلا والنتيجه انه كانه ماخدش علاج خالص بل العكس حالته تتدهور.وفي النهايه تحاول تديله علاج محترم من جديد =الاب دفع تمن علاج مرتين والطفل اتهري حقن ...ولذلك الافضل الرجوع للطبيب بالبدائل المتاحه عندك وهو يحدد النوع البديل المناسب ويكون هوه شاف نتائج مقبوله منه...تقبل مروري يادكتور احمد ...وعلى فكره الموضوع مش موضوع ارياف ..حضرتك بردو لو اشتريت صيدليه في مكان راقي بردو لازم تاخد بالك من موضوع البدائل دي ...

**A7MED_PHARMA** · 20-04-2011, 07:05 PM

قريبا فيه مشروع ‘ني أخد صيدلية في المنصورة..او العاشر من رمضان
وربنا يسهل

Comment

Comment

إعـــــــلان

.

كده قلة أدب

Comment

Comment

Comment

Comment

Comment

Comment

Comment

Comment

Comment