اخبار لجنتك الانتخابية ايه

[Karim_Monir]

السلام عليكم يا شعب
كيف الحال
كل واحد يحكي اخبار لجنتة الانتخابية ايه
عمل ايه
اتصور مع صباعة :-) ولا ماتصورش
ممكن توقل انتخبت مين عشاننعرف توجهات عامة لاعضاء المنتدي
بس مفيش تعليقات على انتخبت مين وليه
يعني اللي هايغير مسار الموضوع هانحذف المشاركة
انا هابتدي
روحت الساعة 8 الصبح انا زوجتي مدرستها جنبي
هي قعدت ساعة وشوية وانا خلصت في ساعتين
زحام بس مقبول وانا ماشي كان بالنظر كدة اللي جه 10 هايمشي 3 مثلا
انتخبت ابو الفتوح
و3 صوابع :-(
عشان علمت الخنصر الشمال مشرف اللجنة قالي لاء لازم سبابة عملت السبابة الشمال لقيت القاضي فوق دماغي وبيقولي سبابة يمين حضرتك
قولتلة ده تعنت انا ايدي اتشلفطتت قاللي ده القانون عملته السبابة اليمين وانا مش مقتنع عشان انجز واخلص الناس اللي ورايا وبقيت ب 3 صوابع
صوبع صوبع :-) على راي فيلم بلبل حيران
وصورت ورقتي الانتخابية للذكري :-)

[aif]

الرجال مفيش طابور ودخلت انتخبت في 5 دقائق
النساء طابور طويل
ودي حاجة غريبة
وقت ماروحت كان بعد صلاة الظهر الساعة 12.30
اغلب اللي شوفتهم انتخبو مرسي ... وفيه برضو ابو الفتوح ... لكن ماشفتش حد قال انه انتخب فلول غير واحد بس
ناس كتير مش عارفة تنتخب مين وهي ف اللجنة
ماشوفتش اي دعايا او محاولات تأثير
الأمور هادية جدا عندنا
لجنة مدرسة الشهيد عدنان بالعباسية

[romieh]

انا رحت اللجنة لقيت قدام المدرسة طابور طويييييييييييل

سألت قالولى ان ده طابور بتاع لجنة 13 بس (انا لجنتى 15)

بسأل العسكرى فين طابور لجنة 15 قالى انت تدخل على طول

دخلت لقيت واحد بيدور على اسمه فى الكشف انا قلتلهم رقمى وخلصت على طول

مضيت واخدت الورقة وانتخبت ابو الفتوح وحطيتها فى الصندوق (كل ده وماكملتش 1.5 دقيقة)

بس عجبنى جدا جدا موضوع ان اخر رقمين فى البطاقة مش موجودين وانت بتكتبهم من واقع البطاقة (علشان الموظفين واللجنة ماتقدرش تمضى مكان حد ابدا الا لو هى عارفة رقم بطاقته)

[abou-yahia]

وقفت من 7.30

دخلت باب المدرسه الساعه 9.15

خرجت من اللجنه 9.45

والحمد لله

والي اللقاء في جوله الاعاده

[osama.m]

الطابور كان نص ساعة
كان ممكن ياخد اقل من كدا بس كان في ناس كتير كبار في السن فكنا بندخلهم الاول عشان الشمس
انتخبت حمدين
مفيش حد برة اللجنة قادر يوجه الناس ويقولهم انتخبوا فلان .. تواجد للجماعة جمب المدرسة بس مش بيقولوا حاجة عشان الجيش مشدد

[Elawany13]

أنا صليت الظهر وروحت خلصت فى أقل من 10 دقائق والحمد لله

[friendship7897]

كان فيه طابوررررررررررر طوييييييييييييل
من الساعة 9 حتى الساعة 11 في الشمس الحامية - بس الحمد لله الناس راضية ومش متضررة ، وكان فيه حاجة غريبة زي ما الحاج / أحمد قال الرجال طابور صغير والستات كتير أوي ، وأنتخبت خالد على

[Karim_Monir]

النوبي شايفة دخل الموضوع
هاتروح بليل ولا ايه عشان شمسكم جحيم طبعا
اجمل حاجة فعلا مفيش تاثير حوالين اللجان
انا عندي احساس رائع اني رجعت بني ادام ليا صوت
عندي حق انتخابي
حتى لو اللي هانتخبوه مانجحش طالما راي الاغلبية انا هاحترمه
ما عدا واحد بس لو نجح ممكن وقتها يكون في كلام وده مش وقته :-(

[ahmed_mido1889]

نزلت 12 اتمشيت لحد المدرسه وصلت 12.15
الفنيه المعماريه في دار السلام

دخلت لاقيت طوابير بسال فين طابور 6 قالي ادخل علطول

كان معايا 4 اشخاص

انتخبت صباحي ورجعت البيت 12.33 واتمشيت وانا راجع

والدي كان نفس المدرسه

بس لجنه 1

نزل 9.00 رجع 12.30

[Karim_Monir]

من بروفايل صديقي واخويا هاني ادام حد لسه فاكره ؟
المهاتما :-)
--------
Hany Adam


ليلة الحنة يا مصر
يا تري عريسك دكر و لا دكر بط
يا ما نفسي اشوفك محنية الكعب و مخطيه همك و معديه
بكره حرقص في فرحك و اللجنه راح تبقي الكوشه
يا ما نفسي الليله تعدي و ما تنميش يا مصر موكوسة
مع تحيات اخوكم الهن (ده جزء من قصيده احييييييه للشاعر هاني ادم)

[ossamayk]

وصلت لجنتي في مدرسة الأميرة فوزية بالمعادي على الساعة 11 خلصت 11:40
اللجنة الفرعية بتاعتي كانت رايقة إلى حد ما اللجان الفرعية الأخرى داخل نفس المدرسة زحمة شوية
النظام والانضباط هو سيد الموقف
مفيش أي دعاية انتخابية لأي مرشح
سمعت بعض الحوارات الجانبية بين انصار المرشحين داخل الطوابير والحوار كان يسوده الاحترام
انتخبت د.محمد مرسي

[kimo-nubira]

انا لسه مرحتش بس انا ليا تعليق هو مش المفروض اننا نعلم بس علامه صح ؟؟ انت كاتب نعم ؟ وعلي حد علمي ان صوتك كده باطل يا كريم

[M.Hosni]

وصلت لجنتي مدرسة عثمان بن عغان التجريبية في شبرا الساعة 9:10 ,
الطابور مكنش طويل قوي خلصت الساعة 9:50 ,
الحمد لله الدنيا كانت هادية و كل الناس اللي واقفة في الطابور بتتكلم عن اد ايه هما مبسوطين انهم بيشاركوا و ان صوتهم ان شاء الله هيكون ليه دور و تأثير , و محدش سأل التاني هتنتخب مين , كل الناس كانت بتقول كل واحد حر في اختياره

ربنا يديمها علينا نعمة و يكون الشعب كله ايجابي و فعال لمصلحة البلد

[assaf]

انا نزلت الساعه 10 و انتخبت في 5 دقائق لجنتي كانت فاضيه بس وانا ماشي شفت لجان زحمه مش عارف ليه
انتخبت د. محمد مرسي

[aly_hosny]

انتخبت في ربع ساعة
مفيش تاثير
انتخبت حمدين
واحد صحبي جمبيه مدرسة ال بيروحها ناس من منطقة شعبية قالي الصوت لمحمد مرسي كان ب50 جنيه
التوجيه لاحمد شفيق و مرسي في لجان السيدات كبير جدا