اخبار لجنتك الانتخابية ايه

[Samah AbdAllah]

السلام عليكم يا شعب
كيف الحال
كل واحد يحكي اخبار لجنتة الانتخابية ايه
عمل ايه
اتصور مع صباعة :-) ولا ماتصورش
ممكن توقل انتخبت مين عشاننعرف توجهات عامة لاعضاء المنتدي
بس مفيش تعليقات على انتخبت مين وليه
يعني اللي هايغير مسار الموضوع هانحذف المشاركة
انا هابتدي
روحت الساعة 8 الصبح انا زوجتي مدرستها جنبي
هي قعدت ساعة وشوية وانا خلصت في ساعتين
زحام بس مقبول وانا ماشي كان بالنظر كدة اللي جه 10 هايمشي 3 مثلا
انتخبت ابو الفتوح
و3 صوابع :-(
عشان علمت الخنصر الشمال مشرف اللجنة قالي لاء لازم سبابة عملت السبابة الشمال لقيت القاضي فوق دماغي وبيقولي سبابة يمين حضرتك
قولتلة ده تعنت انا ايدي اتشلفطتت قاللي ده القانون عملته السبابة اليمين وانا مش مقتنع عشان انجز واخلص الناس اللي ورايا وبقيت ب 3 صوابع
صوبع صوبع :-) على راي فيلم بلبل حيران
وصورت ورقتي الانتخابية للذكري :-)

ده انت داخل تتفسح فى اللجنة بقا وتطلع موبايلات وتتصور
مش بعيد تكون كنت بتكمل اتصالاتك وتليفوناتك جوة :-))
وبعدين انت كاتب نعم ليه مش هى علامة صح وخلاص :-)))

انا وصلت اللجنة الساعة11 ونص تقريبا دخلت اللجنة الساعة 1 الا ربع :))
ده يعتبر انجاز تاريخ طبعا بعد صراعى الطويل مع الطابور يوم مجلس الشعب كان اكتر من 6 ساعات يومها :-(
انا كنت لجنة 26 زحمة جدا فى كمان لجنتين 25 و27 بينشوا اللى يوصل يدخل يصوت على طول :-))
لجنة 26 يطلق عليها لجنة الشباب فى المدرسة لان فعلا مفيهاش كبار سن
اللجنة منظمة جدا جدا تعاون شديد من الشرطة العسكرية واهتمام بالمواطنين بيجيبولهم كراسى وتخت يقعدوا عليها وكمان جابوا مية معدنية
حقيقى انا اندهشت الشرطة اتغيرت تقريبا بجد ولا ايه :)
الطابور فى الظلة تحت المبانى لحد ما اللجنة تفضى يعدوا 5 عشان ميقفوش فى الشمس وميكونش فى تكدس جوة اللجنة
اللجنة جوة مقسمة ل أ و ب و ج
المستشارة المسؤلة بتنظم الدخول بنفسها على حسب الموظف الفاضى
يعنى كان عليا الدور لكن كشف ب مزدحم فانتظرت دقايق
جوة اللجنة منظم جدا براحتك حالص تدخل ورا الساتر الالوميتال ده وتعلم ولو عاوز تصور زى كريم كده تصور براحتك محدش هيشوفك
بس انا ماجاش فى بالى
مش كنت تبتعتلى مسج تفكرنى :-))
بعدها طبقت الورقة وبهدوء حطيتها فى الصندوق
وجه وقت ختم السلخانة واصروا عالسبابة اليمنى ويادوب بحط طرطوفة صغننة عشان اخد نقطة زى يوم مجلس الشعب اذ بالموظف قام رافع البرطمان كله مغرق صباعة بالختم المهبب بتاعهم ده قولتله
ليه كده طيب الله يسامحك :-(( ورحت اخدت بطاقتى ومشيت لقيت ايدى كلها كان البرطمان عمل معاها الواجب وتقريبا الختم فى كل حتة فيها :-((
لكن اهم حاجة بجد بقا ان مفيش تجاوزات زى الانتخابات بتاعة مجلس الشعب
مفيش دعاية على باب اللجنة مفيش محاولات للتأاثير عالناس تقريبا حتى فى الطابور محدش بيتكلم
يمكن عشان لجنتى المرة دى غير المرة اللى فاتت :-))
تحية فعلا للتنظيم الشديد والالتزام المبشر من المرشحين ومن الناس بالقانون والنظام
نتمنى يكون ده حال كل البلد

[mostafa3000]

نزلت 8.30 وقفت طابور طويييييييييييييييييييييييييل ورجعت علي الساعة 11.00 وانتخبت ابو الفتوح

[Karim_Monir]

انا لسه مرحتش بس انا ليا تعليق هو مش المفروض اننا نعلم بس علامه صح ؟؟ انت كاتب نعم ؟ وعلي حد علمي ان صوتك كده باطل يا كريم

لاء مش بطل ولا حاجة وقاضي اللجنة شافني وانا بصور وقولتلة عليه قاللي عادي اي اشارة تدل على اختيارك لمرشح معين وخلاص

[aly_hosny]

ما عدا واحد بس لو نجح ممكن وقتها يكون في كلام وده مش وقته :-(

ممكن نعمل وقف اسبوع هدية للناس ال صوتت للشخص دا :)

[mohameds]

الحمد لله الانتخابات المرة دية شكلها يفرح القلب , ومافيش اى دعاية حول اللجان ولا اى حد بيوجهك لشخص معين , والمستشار الموجود فى اللجنة هو الى بينظم اللجنة بنفسه
بس الحاجة الغريبة ان فى لجان فرعية داخل المدرسة تلاقيها رايقة جدا زى لجنتى ,ولجنة جنبها تلاقيها زحمة مووووت مش عارف ليه
انا تقريبا 20 دقيقة فى الانتخابات , ربع ساعة مشى لغاية مدرسة باحثة البادية فى شبرا , و5ق داخل اللجنة
وانتخبت الدكتور /محمد مرسى

[mohameds]

ممكن نعمل وقف اسبوع هدية للناس ال صوتت للشخص دا :)

+11111111111

[Samir Elshahawy]

أنا وصلت اللجنة الساعة 10 و نص تقريبا
- اللجنة رقم (42) بمدينة نصر
- مدة التوقف بالطابور : 20 دقيقة
- أدليت بصوتي لصالح : حمدين صباحي

[kimocyc]

دقيقتين..

زحمة متوسطة قبل اللجان الفرعية .. الايقاع سريع

انتخبت حمدين صباحي

[ابو ليلى]

لجنة مدرسة عزيز المصرى - الهرم
وصلت 8 صباحا لقيت حوالى 30 قدامى وعند الستات طابووووووووووور طويل
واتفرج على الحلاوة ..حلاوة.... فاكرين نفسهم واقفين فى طابور عيش
وظابط الجيش جاله صرع منهم
انا جيا الاول ... مشينى انا عيالى فى البيت لوحدهم ....والنبى دخلنى انا عندى شغل
وكل دقيقه خناقات بينهم وصوت عالى ....الرحمة يارب
وقفت حوالى ساعة فى الطابور ..محدش بيكلم حد ...واللى يتكلم بس
تلاقى اللى طلع من الناس اللى واقفة ...فى صمت انتخابى ممنوع ...ياعم ده صحبى
ممنوع ...ياعم انا كلمتك .....ممنوع .....
دخلت الفصل المكان منظم مندوبين المرشحين قاعدين والكل مركز
ست بنت حلال عطلتنا اسمها مش موجود ولا رقمها ...
ياستى انت اللى اللى جابك هنا ...ابنى قالى انى هنا ...وماسكة ورقة
فيها 3 ارقام بتقول للراجل شفلى انا انهى رقم فيهم ...
ياستى انتى جبتى الارقام دى منين ..مرة من النت ...ومرة من 140
ومرة من اليفطة اللى بره ...ولا رقم صح ....الاخر طلعت لجنتها
المدرسة اللى بعدينا
اجمل شى انى افتكرت نفسى وانا بجيب نتيجة ابتدائى والفراش قدامى
وانا بديله رقم الجلوس ...ويدور على الاسم ويدينى النتيجة
بس ماخدتش الحلاوة ....اخيرة اخدت الورقة بصيت عليها ملقتش ختم
فين الختم قلى لا دى من غير ختم ...الختم بارز
فعلا لقيته بارز ....وانفردت بالورقة اللى مستنيها من 30 سنة
واخترت .....واحد مننا ...حمدين ربنا عليه
مستشارة زى العسل بتضحك فى وش الجميع فى ثبر جميل سالتها على الختم قاللتى لا يا فندم
الكشوف بس اللى مختومة انما ورق الترشيح عليه علامة بارزة
وانا واقف وصباعى رفعه كانه مقطوع وبينزل دم ....صعبت عليها
اتفضل منديل ....ربنا يباركلك
الحمد لله ويارب تكمل على خير

[ابو ليلى]

انت تحمد ربنا ياكريم كان زمانا جيبنلك عيش وجبنة شيدر دلوقتى

ضبط شاب يحاول تصوير استمارة الاقتراع وتحويله للنيابة

[RUN]

انا روحت الساعه واحده ونص

طبعا مفيش زحاام خالص خلصت فى دقيقتين وانتخبت حمدين وخرجت

[amdd]

وصلت اللجنة بعد الشغل فى مطروح الساعة 3:30 وخرجت منها 3:35
انتخبت حمدين وكل شىء عادى محدش بيكلم حد حتى القاضى بيشاور بس

[TARAXAN]

النوبي شايفة دخل الموضوع
هاتروح بليل ولا ايه عشان شمسكم جحيم طبعا
اجمل حاجة فعلا مفيش تاثير حوالين اللجان
انا عندي احساس رائع اني رجعت بني ادام ليا صوت
عندي حق انتخابي
حتى لو اللي هانتخبوه مانجحش طالما راي الاغلبية انا هاحترمه
ما عدا واحد بس لو نجح ممكن وقتها يكون في كلام وده مش وقته :-(

ههه لو احنا انتخبنا الشخص دة ونجح
عايزين نشوف الظواهر الصوتية هاتعمل اية

[ahmed_su]

مدرسة عجيبة فى الزهراء ..

وصلت الساعة 11 صباحا المدرسة فيها 3 لجان 38 - 39 - 40

39 - 40 اللى يجى ينتخب ويروح فى دقيقتين اما اللجنة الملعونة 38 اللى انا فيها

فضلت فى طابور عملاق لحد 1:30 مساء

انتخبت حمدين صباحى ... اثناء الساعتين ونص ونقاشات مع الناس فى الطابور... اغلبهم للاسف

هيختار ابو الشفاشق ... مصيبة لينجح ..!!!!!!

ما فيش دعاية برة اللجنة والناس ملتزمة

حطيت صباعى الصغير فى الحبر بكمية قليلة الموظف بيقولى لا كمان شوية ...

قولتله لاء علشان الحبر يقضى دى الناس كتيرة اوى ...

[Samah AbdAllah]

انا كمان انتخبت حمدين صباحى :-))
لجنتى كانت فى جناكليس مدرسة جناكليس الثانوية بنين