اخبار لجنتك الانتخابية ايه

[engtmk]

لجنتي اسماء الثانويه بنات

مفيش صريخ ابن يومين جمبها مدرسه تانيه الناس واقفه اممممممممم

قلت الحمد لله انتخبت وخرجت

[Mahmoud Mosaad]

مدرسة مفيدة عبد الرحمن , روحت 1:30 خلصت 1:35 , مفيش اي طابور , تنظيم واحترام من الجيش واللجنة فوق منظمة والدنيا كويسة جدا وانتخبت ابو الفتوح :)

أنا كمان كنت في نفس المدرسة لجنة 71 رحت 3:30 وخلصت في دقائق ومشيت
انتخبت أبوالفتوح

[Karim_Monir]

وأنا ماليش نفس أشارك معاكوا يعني ولا إيه

أنا كمان لجنتي في الوادي الجديد مركز باريس اللجنة هادية وجميلة والناس بتيجي ورا بعض ولكن بدون تزاحم وأهل البلد طيبين فوق الوصف واللجنة كلها رجال

اللجنة اللى جنبي بقى سيدات وعلى طول فيها طابور كبير شوية ... طبعا مش زي طوابير القاهرة

على فكرة دايما بيكون طابور الرجال قصير جدا بالمقارنة بطابور السيدات لكن في الآخر عدد السيدات بيكون أقل من عدد الرجال وبكتير برضه وهاثبتلكوا ده بالدليل القاطع بس بعد الفرز أكون عرفت اللجنة اللى جنبي جالها كام بالضبط

الرجال بتنجز بتدخل تنتخب وتخرج وخلاص كدة .. لكن الستات بقى ممكن تقعد ترغي معايا في حاجات مالهاش تلاتين لازمة وتيجي في الآخر مش عايزة تحط صباعها في الحبر عشان بتطبخ أو بترضع الواد أو عندها حساسية أو شكله وحش وكل ده طبعا والستات التانية واقفة في الطابور بتغلي منها لكنها لا تتوانى عن فعل ذات الفعلة

على فكرة ياكريم إنت عديت المرة بالتصوير لأن بعد كدة اكتشفنا إن الناس بتصور الورقة بتاعتها عشان تطلع تثبت بالصورة بره قدام اللى بيشتري أصواتهم إنها انتخبت فلان من الناس وياخدوا باقي الحساب الموعود ... وعدد كبير مننا من المتواصلين مع بعض على النت لما خدنا بالنا من الحكاية دي بقى اللى يتمسك بيصور الورقة بتاعته يتقبض عليه ويتحول على النيابة ... طبعا هى مش جريمة ولا تهمة ولا بتاع بس بتخوف الناس الجهلاء دول إنهم يعملوا كدة عشان نتلافى حكاية بيع وشراء الأصوات على قد ما نقدر ... وأكيد برضه القاضي ليه نظرته في اللى بيعمل كدة

اكيد الحمل عليكو تقيل جدا كان الله في العون
تلاقيكون اطحنتو اشراف قضائي وفرز وغيره
انا القاضي بصلي وانا بصور وقاللي ليه قولتلة ذكرى لاول فرحة انتخابية اكيد مش هابيع صوتي ب 50 جنيه :-) ابتسم وكدة

[D . a .\ AYMAN]

اكيد الحمل عليكم تقيل جدا كان الله في العون
تلاقيكون اطحنتو اشراف قضائي وفرز وغيره
انا القاضي بصلي وانا بصور وقاللي ليه قولتلة ذكرى لاول فرحة انتخابية اكيد مش هابيع صوتي ب 50 جنيه :-) ابتسم وكدة

الحمد لله .. يادوب لسة راجع البيت دلوقتي وقاعد ... وبصراحة النتيجة غير متوقعة لأبعد الحدود .. كل لجنة بشكل مختلف عن أي لجنة أخرى حتى لو كانت جنبها ولازقة فيها كل ما أكلم حد وأشوف نتيجته وابتدي أبني تكهنات وافتراضات للى هايعيدوا مع بعض ألاقي الموضوع متغير بدرجة كبيرة جدا .. في الآخر قلت أبقى أعرفها لما تطلع بقى :b4_033:

بصراحة كنت سعيد جدا وبشكل غير مسبوق بمستوى الثقافة والتعليم في مدينة باريس بالوادي الجديد وبصورة لم أرها في اكثر مناطق وربوع مصر .. لدرجة إن لم أجد أي ناخب من إجمالي 3000 ناخب تقريبا في اللجنة قام بوضع بصمة إبهامه على الكشوف بدلا من التوقيع إلا أقل القليل الذي يمكن عده على أصابع اليد الواحدة ... وذلك برغم إن معظم أعمارهم تجاوزت الستين وبمراحل أيضا وبالرغم ان العمل الأساسي لهم هو الزراعة ... يعني بالمختصر المفيد "فلاحين"

نفسي أفهم إزاي الحكومة الجميلة بتاعتنا طوال 30 سنة سايبة مكان زي الوادي الجديد دون الاهتمام به بالرغم انه كان ممكن يكون مصر التانية ويكون واجهة حضارية رهيبة لمصر وذاخرة بكل الإمكانيات المتاحة ... ده كان ممكن ينقل مصر نقلة كبيرة جدا لمصاف الدول الغنية والمتقدمة لو كان تم الاهتمام به وسحب البشر من وادي النيل المزدحم .. زيه زي سيناء وغيرها من المناطق

كل يوم بيعدي بتأكد أكتر وفـ حاجة جديدة ما كنتش أعرفها أننا بقالنا 30 سنة بنرجع للوراء مش واقفين مكاننا حتى

تأكيدا بقى للفرق بين الست والراجل اللى قلت عليه في المشاركة السابقة بالرغم إني الطوابير عندي كانت قليلة نوعا ما أنا جالي في حدود 2700 ناخب تقريبا

اللجنة اللى جنبي كانت سيدات وبالرغم من إن الطوابير فيها لم تنقطع طوال اليومين نهائيا كان عدد الناخبات فيها لم يتجاوز 1000 ناخبة وطبعا طول النهار صوتهم عالي ومناهدة ووجع قلب

بصراحة في النهاية شعوري بالنسبة للتجربة دي مختلف عن أي تجربة أخرى مثلها .. كنت حاسس إن الناس داخلة تنتخب وقلبها على البلد وخايفين يكون اختيارهم اللى اختاروه غلط مش مجرد مناصرة لمرشح معين "بصراحة يمكن كذا مرة كنت هابكي من شدة التأثر لما كنت أشوف واحد كبير في السن وجاي ينتخب بكل جوارحه" يمكن أنا أول مرة أكلم وأوصف مشاعري بهذا الشكل في المنتدى بس فعلا التجربة لا يمكن وصفها بالنسبة لي وحبيت أنقلها يمكن حد يستفيد منها حاجة من ناحية عظمة الشعب المصري وروعته برغم بعض مساوئه الظاهرة ....

والحمد لله على النتيجة الظاهرة لغاية دلوقتي بغض النظر عن إعجابي بها من عدمه . وفي انتظار إعلان النتيجة النهائية بإذن الله