متي تاخد قرار الطلاق ؟

[shaddadfalcon1]

السلام عليكم ورحمة الله وبركاته

دعوه للمناقشه للاخوه المتزوجون والمطلقون واي حد عايز يشارك

ياتري امتي بتقول كفايه قوي كده؟
ياتري امتي تقدر تقول خلاص انتي طالق ومش قادر تكمل؟
هل عشان مش بتسمع كلامك مثلا؟ هل عشان مش مدلعاك؟ هل عشان مسرفه ؟
هل عشان مش بتهتم بدينها او مش بتهتم بنفسها؟
هل لانك خلاص مش حاببها ؟ او كرهتها ومش طايق تعيش معاها؟
هل لانك اصبحت تفكر في امراه اخري في خيالك علي انها زوجة العمر؟
هل لانك اسأت الأختيار من البدايه؟
هل لانها خلاص مش ماليه عينك خلاص؟
هل لاتها مش مكفياك؟ ومش مهنياك ؟
هل لانها مش بتبذل مجهود انها تسعدك ؟

طيب لو عايز تتطلق ومش قادر :
هل لان في ولاد؟
عشان المظهر الأجتماعي؟
عشان العيله والقيل والقال؟
هل لانك حاسس انك لو طلقتها ممكن تحن ليها تاني؟
هل حب تملك ومش عايزها تتجوز حد بعدك؟
هل خايف لو اتجوزت حد تاني تعيش انت تعيس وهي تظبط جوزها الجديد وتعيشه في سعاده؟

الدعوه مفتوحه للمناقشه العقلانيه من كلا الجنسين وياريت اللي يرد يبقي عن خبره يعني حد متجوز او مطلق او علي الأقل خاطب يعني مش عايز ردود حد لسه متحمس ومشفش ولا جرب ولا اتعامل

[khaled_legend]

اكيد كل شخص اتجوز بعد دراسه متأنيه للطرف الاخر و للظروف المحيطه و موضوع الطلاق بينتج عن عدم التأني في تلك الدراسه و المفروض من الازواج التجاوز عن التفاهات و محاوله ملاحظه الفروقات بينهما و تقريب وجهات النظر

عن نفسي اكتشفت اختلافات بيني و بين زوجتي و تلك الاختلافات فوجئت بها بعد الزواج و لكن انا بحاول بقدر الامكان معالجه تلك الاختلافات "و بعدين بعد الخلفه الحلوه بتاعتنا الواحد اخره يفكر هيصحي تاني يوم امتي او هيتوكل علي الله من الدنيا امتي ايهما اقرب"

[mazher_m]

اكيد كل شخص هيكون ليه اسباب تختلف عن التاني
ممكن الطلاق يحصل لاسباب تافه جدا لا يستطيع احد تخيلها
وممكن بيت يكون فيه مشاكل لا تطاق ويستمر الزواج
ربنا يسترها علينا وعليك وعلي الناس كلها ويجعل لنا من ازواجنا وزريتنا قره اعين
اللهم امين

[shaddadfalcon1]

اكيد كل شخص هيكون ليه اسباب تختلف عن التاني
ممكن الطلاق يحصل لاسباب تافه جدا لا يستطيع احد تخيلها
وممكن بيت يكون فيه مشاكل لا تطاق ويستمر الزواج
ربنا يسترها علينا وعليك وعلي الناس كلها ويجعل لنا من ازواجنا وزريتنا قره اعين
اللهم امين

ماهو ده الغرض من الموضوع
اننا نعرف ايه الأسباب دي وازاي بتختلف من حد للتاني
جايز لما حد يشوف اسباب خيره تهون عليه بلوته ويحس انه في نعمه مثلا

[yousef1978]

لما تكون الحياة مستحيلة والتغيير مستحيل والخسائر قليلة على الطرفين والبدائل أفضل لكل طرف





.

[aif]

مرة واحد صاحبي كان متجوز ومخلف بنت
ومش قادر يعيش مع زوجته وحياته جحيم وعاوز يطلقها
وبالفعل طلقها
وكل اللي حوله ضغطوا عليه ( وانا منهم ) ولازم تستحمل عشان البنت والكلام اللي انتو اكيد حافظينه
وبالفعل رد زوجته قبل نهاية فترة العدة بأيام واعتبرنا ان ده درس لها وح ينصلح حالها بعد كدة .... لكن هو كان على حق
رجع لزوجته وعاش معاها 4 او 5 سنوات عبارة عن مشاكل يومية وخناق مستمر .... انجب طفلين تاني
وبردو رجع طلقها نهائي ..... بس بعد ما بقى عنده 3 عيال
ولما عرفت انه بيفكر يتجوز جابت العيال بشنطة هدومهم وسابتهم عند بيت امه ومشيت ... وكان اصغرهم اقل من 3 سنوات
مش عاوز اقولكم ان حياته اتدمرت مابين شغله وبيته واطفاله
لو كان طلقها ولم يستجيب لضغوط من حوله في المرة الاولى كان زمان معاه طفل واحد بدل 3 مطلعين عينه تربية ومصاريف
والحمد لله اتجوز تاني بعد سنوات .... وربنا يوفقه
احيانا بيكون الطلاق حل .....
مش لازم الطلاق يكون فشل
ممكن يكون بداية صحيحة
وكل حالة لها وضع خاص بها

[A7MED_PHARMA]

هو قرار الطلاق
المفروض يتاخد يوم الصباحية على طول

[shaddadfalcon1]

هو قرار الطلاق
المفروض يتاخد يوم الصباحية على طول

الله يكرمك يادوك احنا بنتكلم جد وبنتلكم في حلول فعليه وحاجات نابعه م تجارب

[shaddadfalcon1]

لما تكون الحياة مستحيلة والتغيير مستحيل والخسائر قليلة على الطرفين والبدائل أفضل لكل طرف





.

معني ايه الحياه مستحيله؟
يعني لو بقيت مش بتحبها مثلا؟ ولا بتكرهاا؟
ولا عايش كانك مش متجوز والدنيا ماشيه وخلاص؟

[waelfarid]

ايه ياعم شداد الموضوع الجامد ده
دا ممكن يقلب بمسلسل تركي الي مالانهاية
حاجة كدة ينضرب لها مثل بلدي جدا -----زي اكل الحمير في النجيل لا النجيل بيخلص ولا الحمير بتشبع
سامحوني ياجماعة عالمثل

بص ياسيدي الطلاق بيبقي مقدر ومكتوب بييجي في لحظة تهور وبييجي علي اهون سبب زي القشة التي قصمت ظهر البعير نتيجة تراكمات-حجر ضربته 99 ضربة ومتكسرش وفي الضربة ال100 اتكسر اكيد ال99 ضربة لهم دور
لان مش كل حاجة ينفع تتجاب بضربة مرزبة اللي هو الطلاق ولا ميت شاكوش وقلة عقل او منتهي العقل احيانا
المرأة كالضلع استمتع بها علي عوجها واذا ذهبت تقيمها كسرتها لان اعوج مافي الضلع اعلاه اللي هو دماغها المتركب شمكال وكسرها هو طلاقها

الراجل في مصر واكيد كمان في تونس ومعظم بلاد الدنيا زي امريكا بتاخد نص ثروته هو الخسران ماديا اكتر في موضوع الطلاق

والمثل بيقول- اللي بلا أم حاله يغم -

حيث ان
الرجل زي الفيل والجمل لا ينسي الاساءة ابدا ولو بعد 50 سنة ولكن لا يظهرمشاعره تجاهها في حينها في حين انه مايعرفش يداري فرحته ودا كله عكس النساء (بالفحص التشريحي والفسيولوجي بيأكد الكلام ده)
حيث ان
النساء صعب تبدي فرحتها لكن من السهل ابداء غضبها بسهولة (بالفحص التشريحي والفسيولوجي بيأكد الكلام ده)

ناهيك عن ان -سبحان الله -طبقات ونبرات صوت البنات والستات في الغالب بتكون حادة وده في حد ذاته بينرفز لو الواحد مش مستحمل لانها منوطة بتربية الاطفال دا غير لو حصل عليها محاولة اعتداء تصرخ فيسهل سماعها ودا غير الرجالة وطبعا لكل قاعدة شواذ

وشكرا عالفاتوحة دي ا---اقصد الموضوع ده

[ibn_seena]

اللهم ارزقنا زوجة صالحة تقيه تقر بها اعيننا وتسكن اليها نفوسنا


لو الجواز ما فيهوش غير خناقات وزعيق وضغط وسكر وعكننه يبقي بلاه جواز


.
علشان كده الاختيار ثم الاختيار.
يا رب وفقنا جميعا في الاختيار .
وليعلم كل شخص ان المراة خلقت من ضلع اعوج. اذا اردت ان تقيمه كسرته. ...
.

[yousef1978]

معني ايه الحياه مستحيله؟
يعني لو بقيت مش بتحبها مثلا؟ ولا بتكرهاا؟
ولا عايش كانك مش متجوز والدنيا ماشيه وخلاص؟

الموضوع ده يقدر حسب الحالة

عن تجربة شخصية ممكن أحكيهالك بعدين

ما حدش يقدر يحدد اصل الخلل فين غير ربنا سبحانه وتعالى ثم الزوجين فقط

لو دخلوا أيييييي حد هتلاقي كل واحد من الزوجين ممكن يجيب أي سبب إلا الأسباب الحقيقية



وساعات بيكون الطلاق حل وأسمع أن سيدنا عمر كان يرسل حكما من أهل هذا وذاك فإن لم يستطيعوا الحل انزعج وقال لهم فيما معناه لو نويتم الإصلاح لتوصلتم إليه ويذكر قوله تعالى (( إِنْ يُرِيدَا إِصْلَاحًا يُوَفِّقِ اللَّهُ بَيْنَهُمَا) )

وأسمع أن سيدنا عثمان كان يرسل الوفد فيقول لهم إن رأيتم الطلاق فطلقوا فإن في بعض التطليق إصلاح


وعلى فكره قرار الطلاق صعب جدا على الرجل بغض النظر عن التفكير المادي لكن مسألة الإضرار بتطليقها صعب عليه

في حين أن طلب الطلاق سهل على المرأة






.

[Hussein_Emara]

الموضوع ده خطر, و غالبا حيقلب بغم.

[khaled_legend]

هو قرار الطلاق
المفروض يتاخد يوم الصباحية على طول

هاهاهاهاهاهاهاهاهاهاهاها

المرأة كالضلع استمتع بها علي عوجها واذا ذهبت تقيمها كسرتها لان اعوج مافي الضلع اعلاه اللي هو دماغها المتركب شمكال وكسرها هو طلاقها كلام سليم بس في بعض الاحيان الامور بتخرج عن دائره المنطق و "الواحد مرارته مفقوعه لوحدها"

الراجل في مصر واكيد كمان في تونس ومعظم بلاد الدنيا زي امريكا بتاخد نص ثروته هو الخسران ماديا اكتر في موضوع الطلاق ياليتها بتقف عند هذا الحد

الرجل زي الفيل والجمل لا ينسي الاساءة ابدا ولو بعد 50 سنة ولكن لا يظهرمشاعره تجاهها في حينها في حين انه مايعرفش يداري فرحته و هذا هو اكبر خطأ لان لو تم حل كل مشكله في وقتها مكنش هيبقي هو هذا حال المتزوجون ودا كله عكس النساء (بالفحص التشريحي والفسيولوجي بيأكد الكلام ده)
حيث ان
النساء صعب تبدي فرحتها لكن من السهل ابداء غضبها بسهولة ده علي الفاضيه و المليانه حضرتك (بالفحص التشريحي والفسيولوجي بيأكد الكلام ده)

ناهيك عن ان -سبحان الله -طبقات ونبرات صوت البنات والستات في الغالب بتكون حادة وده في حد ذاته بينرفز tell me about it لو الواحد مش مستحمل

[khaled_legend]

احدي اسباب الطلاق ايضا عدم فهم كل طرف لطبيعه الطرف الاخر