الوقت المناسب للسفر الي الخارج

[hossam_elwani]

انت عارف انا مشكلتي ايه؟ اني مش عايز اعيش بره طول عمري

والمشكله اني بتقالم علي المكان اللي انا عايش فيه وبقارن باللي قبله
يعني انا عشت شويه في القاهره في الحي التامن في السنتين اللي فاتو وكنت شغال في المنطقه الحره يعني العربيه مكنتش بتلحق تسخن والمشوار ميكملش 5 دقايق ولا زحمه ولا غيره

رجعت تاني الأسكندريه في سيدي بشر وشغلي في سموحه والدائري اللي كنت معتمد عليه اتكسر وباظ وبقيت اجي من علي البحر وكل يلوم اخبطلي ساعه او اكتر واروح البيت مش طايق نفسي

فتخيل بقي لو سافرت دبي او كندا او ي دوله نظيفه كام سنه وبعدين رجعت مصر تاني

مش هعرف اعيش نهائي

فعلا فرق راحه

انت حتقولى على طريق البحر دايما الى نازل ناحية سيدى بشر بيشوف الويل من الطريق الى عمله ياخد جايز نوبل فى الغباء عرض الطريق فى اتجه سيدى بش اقل من عرض الطريق فى الاتجاه المعاكس والعربيات كل يوم بتزيد بقت ولا القاهره

لنا الله

[hossam_elwani]

ربنا يكرمكم علي ردودكم

انا لو هسافر هاخد عيالي ومراتي لاني مستحملش اعيش من غيرهم

بالنسبه للأصدقاء فالحمد لله مليش وبحب العزله حتي من اهلي كمان وبحب اعيش لوحدي قوي ومش بحب الأخنلاط بالناس كتيير

عمري ماهسافر الا اذا كان المرتب يكفي عيشتي هناك واحوش منه ولما سالت شويه لقيت ان الشركات مممكن تتحمل سكني ومواصلاتي وتامين ومدارس الولاد كمان

ايه بقي ؟

كده تمام انفد بجلدك

[hossam_elwani]

أنا أول مره نزلت أجازه كان بعد سنتين سفر وأول ما العربيه طلعت من المطار (كنت نازل على مطار برج العرب) وبدأت تمشي في الشارع كنت عمال أتلفت حواليا وكأني سايح وأبويا خد باله وقالي انت عمال تبص حواليك ليه قلتله أنا حاسس اني ركبت أله الزمن مش طياره. كأني رجعت 20 سنه ورا. الشوارع ضيقه ومكسره والناس كتير. الامهم اني متعلمتش الدرس ونزلت مصر نهائي من سنه ووقتها كل الناس محدش كان موافقني على النزول ولا أهلى ولا مراتي ولا أصحاب اللي هناك ولا أصحابي اللي هنا وبرضه نزلت ودلوقتي عايز أرجع وحدش موافقني في الرجوع وبيقولولي انت استقريت هنا خلاص وملوش لازمه الغربه تاني وشكلي برضه هعمل اللي في دماغي وأرجع تاني. العيب الرئيسي في دول الخليج هوه الحر والرطوبه العاليه اللي مش بينزلو حتى لو الفجر تلاقي الحراره فوق 35 وممكن تبقى الساعه 2 بالليل والحراره 40 عادي والعيب التاني ان مفيش أي مناسبات يعني العيد عباره عن زحمه في المولات زي الخميس والجمعه في أي اسوبع ورمضان ولا الهوا لو انت متعرفش انه رمضان مفيش حاجه تعرفك غير يمكن تلاقي اعلان تهنئه من شركه موبايل على الطريق مش أكتر من كده.

يعني تقدر تقول ميزه مصر الجو المعتدل والمناسبات اللي احنا اتعودنا عليها غير كده مفيش أي مميزات ولو على موضوع الغربه انت في أي حته هيبقالك أصحاب وتزور ناس وناس تزورك يمكن أكتر من مصر كمان ولما تنزل مصر هتحس ان شهر الاجازه ده هوه الغربه.

خد بالنصيحه فى بعض الاحوال وما تعندش العند مش تمام

انا عندى عمى كان مدرس فى السعوديه من الثمانينات وبيقبض 4000 ريال وقتها والسكن والتنقلات عليهم رجع فى اواخر التسعينات وكتب على نفسه انها تكون بلا رجعه وندم اشد الندم حاليا وبيحاول يرجع تانى مش عارف

ووالدى كان قاعد 21 فى الرياض وكان مدير مالى لمؤسسه وبيقبض 12000 شهريا وقتها وبرضه نفس الكلام مكملش سنتين على بعض ومات من القهر المصرى للمصريين

[hossam_elwani]

انا سافرت السعودية في شهر يناير 2009
اخدت سلفة فورية من الشركة وجهزت الشقة وجبت مراتي في مارس 2009

الغربة متستاهلش تعيش يوم واحد بعيد عن عيالك.

لو حتسافر السعودية،
لو مثلا مرتبك 6000 ريال
طبعا محروم فحتركب عربية جديدة سيراتو مثلا قسطها 1400-1500 ريال .
ايجار الشقة الصغيرة 1500-2000 ريال
يدوب تاكل وتشرب بمستوى متوسط 2000 ريال
تليفون وموبايل ونت 500-700 ريال

المجموع: اكتر من 6000 ريال مصاريف شهرية

تعالى بقى لو عندك عيال في الحضانة او المدرسة
المصاريف بتبدأ من 5000 ريال في السنة للمدرسة الاهلية المعفنة
يعني علشان تدخلهم مدرسة معقولة مش اقل من 10000-12000 ريال للطفل الواحد(اهلية بردو مش انترناشيونال)

الخلاصة لو انت يدوب عايش في مصر، ممكن تقبل مرتب 6000-7000 ريال عشان يدوب تعيش هناك في مستوى افضل قليلا.
كل 1000 ريال زيادة بعد كده هيحسن مستوى معيشتك اكتر او هتحوشه.

ممكن تحوش طبعا من اللي انا كتبته في الاول بس حتيجي على نفسك وعيالك كتير.

بلاها عربيه زيرو يجيب مستعمل كويس ويمشى حاله

[The_Last_Rebel]

اخي الكريم

كانت لي مشاركة سابقة في موضوع مماثل منذ اكثر من سنة تقريبا وقد وضعت اجاباتي مع اسئلة الزميل صاحب الموضوع القديم
أتمنى أن تجد فيها ماقد يفيدك
وفقك الله لما فيه الخير في الدنيا والاخرة

اقتباس
المشاركة الأصلية


انا مهندس اعمل في مصر للاسف علشان اقدر اعمل حاجه لازم اسافر
صحيح انا نزلت التحرير يوم 28 علشان مبهدلش نفسي في غربة سعيا وراء توفير حياة كريمة لاولادي واهلي
لكن لسه شوية، الامر محتاج وقت وصبر

اسافر ولا لئه

أولا وأخيرا ...إستعن بالله ولاتعجز...واعلم يقينا أن رزقك لن يصيب غيرك ولو هربت منه...تماما مثل الموت.

هذا القرار...بعد الاستعانه بالله , يعتمد على وضعك الحالي من جميع النواحي :

اجتماعيا: هل انت عازب أم متزوج؟
هل عندك أولاد ام لا وماهي اعمارهم ؟
هل انت العائل الوحيد لأسرتك كأمك واخواتك؟

ماديا: هل عندك رصيد يكفي لتغطية نفقاتك حتى يتيسر لك دخلا معقولا بناءا على وضعك الإجتماعي سواء كنت عازبا أو معك أسرة؟

وظيفيا: أين أنت في حياتك الوظيفية ؟
هل مازلت في بداية الطريق ام وصلت إلى مركز محترم بعد سنين طويلة ؟
هل هناك job offer محترم ينتظرك ام ستسافر وتبحث هناك؟
هل هذا العرض سيرتقي بك من الناحيه المادية أو العلمية أو الوظيفية ؟

طباعك الشخصية: هل انت سهل التكيف مع المتغيرات التي تحدث حولك ؟
هل تستطيع تقبل ثقافة الأخر ؟
ماهي حالتك الإيمانية ؟ هل تستطيع الحفاظ على هويتك الإيمانية ولاهلك وأولادك ؟

المخاطرة أحيانا تكون مطلوبة شرط أن تكون محسوبة
take calculated risks...that's quite different from being rash.
.

هل الغربة تستحق ان الواحد ينفق فيها عمره ويضحي بذكرياته واهله ويتمزق بين بلده وبلد غريبة بعيدة عنه

هل الغربة هتفيدك فعلا ولا كله محصل بعضه ومش جايبه همها

.
ان كنت قد قمت بأداء الواجب عليك بعد الإستعانة بالله وحساب المخاطرة كما في الاسئلة السابقة ولم تكن غربتك عشوائية...إن لم تستفد ماديا أو علميا أو وظيفيا... فأقل القليل الفائدة الإنسانية والشخصية تستحق.

ستتعلم من الغربة الكثيير الذي أن عشت في بلدك مائة عام لا تتعلمه أبدا وهذه الفائدة لا يستطيع أحد ان يصفها لك في كلمات ...يجب أن تعيشها بنفسك وتتعلمها وتكتسبها بنفسك وتأكد أن نظرتك للحياة ستتغير تماما وان عدت الى بلدك بعدها...بالتأكيد نظرتك للامور ستختلف عمن حولك.


هل اللي بيسافر بيقدر يرجع فعلا زي ما كان بيقول


بعد قدر الله, أنت وحدك ملك هذا القرار ثم الظروف المحيطة بك.
هل في هذا الوقت الذي قررت ان ترجع فيه هو الوقت المناسب ؟
هل وصلت الى ذروة الأمر الذي سافرت اليه بمعنى هل مر عليك وقت طويل لم تتعلم أو تستفيد شيء جديد سواء ماديا أو علميا أو وظيفيا ؟
وعلى الجانب الاخر هل الظروف متاحة في بلدك لاستقبالك واستقبال خبراتك المكتسبة مع تعويض مادي مناسب؟
هل وصل اولادك الى سن معينة تخاف عليهم من الفتنة؟
هل الوالدين بارك الله فيهما بحاجه اليك ولا يجدان من يعولهما (ليس لك اخوات)؟


هل لما بيرجع بيقدر يعيش في مصر تاني بعد لما اتعود علي حياة معينه باسلوب معين

اسئلة كتير محتاجه واحد خبرة مر بالتجربة يقول رأيه

للاسف لأ... خصوصا اذا كان البلد الذي ستسافر اليه معروف عنه النظام والانضباط.
ثم ايضا يعود الامر الى طبيعتك الشخصية هل انت سهل التكيف مع المتغيرات التي تحدث حولك؟
هل التعويض النفسي أو المادي برجوعك يكفي ان يطغى على شعورك الصادم بالتغيير ؟؟
بمعنى: قد تكون عودتك مؤلمة بالنسبة لك ولا تستطيع التكيف ولكنك عدت على منصب محترم بمرتب مجزي جدا فهل التعويض المادي يكفيك؟
أو مثلا اذا كانت طبيعتك عاطفية ووجودك بين أهلك واصدقائك وجيرانك هل هذا كافي ان يعوض أو يتغلب على التغير الحادث؟؟



تاني حاجه ناس كتير بتقول المصرييين وحشين في بعض في الغربة

ليه كده


للأسف...الحقيقة المرة...ولكن يجب ألا نعمم فهناك الكثيرين منهم على خلق واصحاب دين ويحبون الوقوف بجانب اخوانهم.


انا رأيي الوحش وحش، سواء كان جوه او بره
وصعب يكون حلو جوه ويبقي وحش بره الا لو دي حقيقته

بيقولك المصريين بتوع مصلحتهم وممكن يضرب اسافين في زمايله
ويحس كأن زميله هياخد من رزقه

هل الكلام ده صح وايه سببه



للأسف كتير من الوحش (وليس الكل) هو اللي بيقدر يسافر...والكويس مطحون ومدفون في مصر...

صحيح تماما الانسان هو هو في أي مكان والمعدن النفيس لا يتغير بتغير الزمان أو المكان
ولكن ... الخبيث يسعد ويطرب بالغربة حيث لا رقيب...فيظهر الخبث جليا.
وصدقني أنا لا اتكلم عن شخص من مستوى مادي أو علمي معين...هناك أناس في الغربة يدرسون الماجستير والدكتوراه وسامحني في هذا الوصف البواب عندنا عنده من الأدب والرقي مايفوق هؤلاء الاشخاص. وفي الأعم الأغلب ستجد المحترم والطيب والخلوق والمحب لفعل الخيرات منهم هو في الاساس نابع من دينه وليس لانتمائه لبلد معين

اطلبوا الخير من بطون شبعت ثم جاعت , فان الخير فيها باق
ولا تطلبوا الخير من بطون جاعت ثم شبعت فان الشح فيها باق


انتظر ردكم
يمكن ده يتوقف عليه طريقة تفكيري او قرارتي في الفترة القادمة .



وفقك الله لما فيه الخير في دينك ودنياك...

والسلام عليكم ورحمة الله وبركاته...