هي البنات اتجننت ولا ايه

[mahmoudysf]

يا باشا انت راجل جدع
وللاسف الرجالة الجدعان بخ خلاص بقو نادرين
من الاخر انت اي واحدة تخطبها تعرفها الظروف دي
وافقت كان بها موافقتش يبقى السكة اللي تودي
وتقوم تصلي ركعتين شكرا ان ربنا ريحك من واحدة مش اصيلة
وعلى فكرة بنات الناس الاصيلة كتير ما تستعجلش
وربنا جزاء برك بوالدك هيكفاءك بحاجة كويسة
بس ليه سؤال انت عندك سقة فوق شقة والدك ودي حاجة كويسة
هل انت عايز والدك يعيش معاك في نفس الشقة
ولا هما رافضين مبدا انهم يتجوزو في بيت فيه شقة والدك

[hnh_75]

يجب ان تختار الاسرة قبل ان تختار البنت واذا اخترت الاسرة التي نشئت علي القيم والمبادئ والدين فلن تجد الا ما يسرك وتوكل علي الله ستجد ان شاء الله من تسعدك وتسعده وتسعد به

[shaddadfalcon1]

معظم البنات بتوع اليومين دوول كده وطبعا حقها انها تعيش لوحدها بس ييجو يشوفو في الفلاحين يعني ايه جواز والبنت بتتجوز في بيت عيله تفضل تشتغل زي الحمار طول اليوم وتخدم بيت فيه بال 10 رجاله واخر اليوم تبقي تطلع شقتها مش حته راجل كبير

حاول مثلا تشوف عروسه لوالدك طالما لسه بصحته واهو يلاقي حد يونسه ويهتم بيه

خلي بالك انت لو اتجوزت ووالدك معاك هو نفسه عمره ماهيستريح لانه هيحس انه عاله عليك

ومراتك مستحيل تستريح

ده راجل كبير يعني قاعد في البيت طول اليوم او معظمه تخيل بقي واحده لسه متجوزه وعايز تلبس وتروق نفسها وتدلع لجوزها وفي راجل تاني في البيت
لو بصيت من الناحيه التانيه دي هتلاقي ان انت نفسك مش هتبقي مستريح فعلا لان طول الوقت مراتك هتبقي قدامك زي اختك بالظبط :))

معلش انا مقرتش الرد بتاعك اللي بتقول فيه ان شقتك غير شقة والدك
يعني مفيش اي مشكله كده

والدك في عيادته والبنت يادوب هتهتم باكله وشربه وملابسه وده كده كده هتعمله ليك وحاجة والدك هتبقي معاك يعني مش هتبقي حاجه ذياده مثلا

وبالتالي مفيش سبب يخليك تتنازل

[د.أبونضال]

الحمد الله كل واحد راح لحاله بس انا مستغرب من تفكير البنات اليومين دول

ما تستغربش ولا حاجة ..دي ممكن تستكبر تخدمك انت شخصيا وانت زوجها

[mazher_m]

بغض النظر عن اسباب فسخ الخطوبه
لسه نصيبك مجاش
ولسه عروستك مستنياك
ربنا ييسرلك الامور ويرزقك ببنت الحلال ويرزقك بالذريه الصالحه

[S O P H O S]

ربنا يبارك فيك انت صح اكيد
وان شاء الله تلاقي الي تثق انك زي ما بتحافظ علي والدك هتحافظ عليها ..

[bmw323]

مبدأك محترم جدا وأحييك علية جدا انا اعرف واحد ربنا يكرمك ويجازية خير مبيعملش حاجة في حياتة غير أنة واخد بالة من والدتة المسنة ومقنن شغلة جدا وربنا بيرزقة ربنا يكرمة ويكرمك ويكرم كل ألى بيفكر فى بر والدية

والبنات على قفة من يشيل ربنا يرزقك بالزوجة الصالحة

[speed_magnum]

بنت الاصول هتشيل اهلك في عنيها

[dolly13]

هي البنات اتجننت ولاايه ولا انا اللي غلط فسخت خطوبتي اول مره بسبب اني ولدتي كانت تعبانه وماينفعش اسبها لوحدها وشويه اسباب تانيه وخطبتي ماكانتش موافقه اني اقعد مع اهلي ولدتي توفت بعدها وخطبت تاني وقلت من الاول ان ولدي لوحده وانا مش هاسيبه ووافقوا جات من كام يوم قالتلي زميلي بيقولوا انك هاتبقي خدامه لابوه مع ان ولدي الحمد الله ربنا مديله الصحه هي قالت هاقعد في شقتي وابقي روح شوفه قلتلها مع السلامه وفسخت الخطوبه التانيه انا مش عارف البنات حصلها ايه كل واحده عاوزه تاخد جوزها من اهله الا من رحم ربي ولا هو دا الطبيعي ولا ايه انا عارف ان من حق كل واحده يبقي ليها بيتها بس الظروف اقوي مني كدا الخطوبتين اتفسخوا لنفس السبب

صباح الخير اولا
ثانيا انت كنت عايز تقعد مع مامتك وباباك فى الاول ولما والدتك توفت اصبحت تريد العيش مع والدك لانه لوحده ؟
واضح ان من اولوياتك انك تعيش مع حد من الاهل وده حقك وفى الحالة دى الصراحة حلوة من الاول
لكن ماينفعش تخطب على وضع وبعدين تغيره وتلوم البنت لان مش كل الناس عندها القابلية للمعيشة المشتركة ده فى الحالة الاولى
وفى الثانية واضح ان بعد البنت ماوافقت غيرت رايها لسبب فى نفسها ممكن يكون نابع من عدم قدرتها على العيشة المشتركة
وعشان تتخيل الموقف صح ضع نفسك مكان الاخر
لو انت خطبت بنت وبعد فترة قالتلك انا مش هاينفع اسيب ماما وبابا ولازم نفضل معاهم هل كنت هاتوافق ؟
ربنا يدى الوالد الصحة وطول العمر وباذن الله يجيلك نصيبك وتلاقى بنت الحلال اللى معندهاش مانع فى النقطة دى
لكن عدم رضا السابقتين مش معناه ان البنات اتجننت ولاحاجة

[احمد المصرى]

تسمحلى انى اختلف معاك شويه مع انك معاك حق فى امور كتيره بس برضوا انت عليك جزء من الغلط على فكره انا ظروفى ذى ظروفك بالظبط


انت طبعا جزاك الله كل خير انك بتبر اهلك وربنا يجعله فى ميزان حسناتك واى بنت من حقها انها تكون فى بيتها على الاقل تلبس تقلع براحتها من غير اى قيود


طيب الحل ايه ..... الحل انك تمسك العصايه من النص بمعنى انك تخلى المسافه بين سكن والدك والسكن ال انت هتسكن فيه قريبه يعنى لو هتاخد شقه خليها قريبه من والدك لاقصى درجه ممكنه بحيث انه يكون قريب منك وبكدا هتكون انت عملت ال عليك معاه وفى نفس الوقت معملتش مشاكل مع زوجتك



بنات الايام دى نادرا ال هتقبل تسكن مع حد الا ما رحم ربى ومتقدرش تقول دا عيب فى البنت لان دى حريتها بالظبط هل راجل يقبل ان حماته تقعد معاه على طول نادرا ال ممكن يقبل


ربنا يسهلك الحال ان شاء الله ويرزقك بنت الحلال قريبا ان شاء الله

[reda elgohary]

مع احترامى لكلام العضو اللى بيقول أنك طالب أوبشن زيادة ،،يافندم المفروض ع الزوجة رعاية الزوج والآولاد ،،والوالدين وهذا ملحوظ ف الآرياف ،أنا أصغر أخوانى وزجة أخى الآكبر كانت تقوم بشؤن الآسرة كاملة من أكبرهم لآصغرهم ثم شاركتها زوجة أخى الآكبر ثم زوجتى ،،وتبقى زوجة أخى الكبير هى الراعية الآولى للمنزل صاحبة الفضل ،،لذا نصيحتى لك أخى الكريم أن تبحث عن زوجة من بلد تحافظ ع تلك التقاليد والآعراف.

[ahmed1981]

متجننوش ولا حاجة

هذا حق لهم أن يرفضوا هذا الشرط
لأنهم لو وافقوا على هذا الطلب فهو تفضل منهم وتكرم

أحيي فيك صراحتك إنك من البداية بتوضح إنك هتقعد مع والدك في شقته لرعايته

لكن في المقابل لازم تعرف إن زوجتك ليس عليها أي واجب في خدمة والدك
ولو خدمته يبقى تفضل منها وكرم بشرط إنه يكون عن طيب خاطر منها
يعني الموضوع مش إجبار عليها ولا بسيف الحياء ولا فرض أمر واقع زي ما قال بعض الزملاء

لكن والدك مش كبير
61 سنة ربنا يبارك في صحته
دا ممكن جداً يتجوز ويعيش حياته وهكذا كان يفعل الصالحين والتابعين

أنا كنت فاكرك هتقول إن عنده 80 سنة ولا أكثر

أخيراً لو عندك القدرة تاخد شقة لوحدك وتبقى تراعي والدك يومياً
هيكون أفضل للطرفين

لو مصمم على هذا الشرط إنتظر حتى تجد من يوافق على شرطك

مع الملاحظة أن من ترفض الشرط ليس عيب عليها ومن وافقت فإنما هو فضل منها

-
-

[ahmed1981]

مكرر

[assaf]

انت صح ماتسبش والدك
انت ممكن تتجوز اي واحده بس في الاخر ليك والد واحد

[ahmedselaraby]

حقولك كلام خبره

البنات مخهم صغير جداااااا و ساعات مابيفكروش لكن بيتحركوا بعواطفهم و حالتهم النفسيه و المزاجيه أكتر من الدوافع العقليه و المنطقيه

و المفروض انك تكون انت الكبير و تحتوى أى موقف و تعاملها على انها بنتك مش على انها مراتك

يعنى اللى بيتجوز ده بيبقى اب لمراته عشان هما مخهم زى العيال كده تمام

بيعملوا كل حاجه زى العيال

بيشبطوا زى العيال

بيزنوا زى العيال

بيتخانقوا زى العيال

بيفكروا زى العيال

بيزعلوا زى العيال

لحد ما ربنا يهديهم مع الزمن لما يكبروا

عكس الرجل الذى يفكر بمنطقيه و بحكمه و بذكاء

صدقنى مهم أوى موضوع الذكاء ده

ممكن تتجوز واحده تحس ان فارق الذكاء بنكم كتييييييييير أوى

و هما كلهم فل أغلب كده

نصيحه , حاول تدور على الست حمالة الأسيه

يعنى تقدر تشيل مسؤليه كبيره و ملتقولش لاء

لأن الجواز و العيال دول مسؤليه كبيره

و إلا للأسف حتلاقيها طفشانه على طول عند أمها قاعده عندها بالأيام عشان ترمى عليهم المسؤليه

شوف واحده تكون أصلا قبل الجواز شايله مسؤلية بيتها مش بس شايله مسؤلية نفسها و خلاص

يعنى مثلا أبوها متوفى ,, أمها متوفيه ,, عندها أخوات كتير و بتساعد فى تربيتهم و قضاء حاجتهم

مثلا عندها أخوتها مخلفين و هى بتساعدهم فى عيالهم ,, كده انت فاهمنى

هى ديه اللى داقت طعم المسؤليه ,, هى ديه أنسب واحده ليك لأنها حتستحملك

و إلا حتلاقيك بعد الجواز بتفكر تتجوز تانى من القرف و النكد

اللى بتشيل مسؤليه ديه بتبقى أقل نكدا من اللى عايشه فل تراوه ,, عشان بتبقى صبوره أكتر و خلقها واسع , مش بتتنرفز بسرعه

ربنا يوفقك ,,