ايه المشكلة لما تتكلم انجليزي بلهجة مصرية ؟

[abou_ruqi]

99.9% من الايرانين ما بينطقوش ال واو او w رغم انه حرف سهل على اللسان وهما يعرفوا يقولوه بس تحس انهم بيعندوا ، ده حتى الكلام الديني العربي اللي المفروض يتقال زي ما هو بيقولوا ميرفت بدل مروة واحنا بجهل بنسمي بناتنا ميرفت ، مع ان ربنا سماه السعي بين الصفا والمروة!

[تامر.محمد]

اول مرة اعرف , يالمسخرة :)))

[CryptonX]

انا بصراحة بحاول اتكلم على قد ماقدر باللكنة الصحيحة لكن مبعايرش حد ابدا انه بيتكلم بلكنة مصرية .. المهم المعنى و المغزى يوصل ..


يعني انا بكلم ناس اوروبيين ساعات بيشكوا اني امريكي :) و والدي الله يسميه بالخير الي معلمني كل حرف اعرفه تقريبا لكنته مصري :)


بس في ناس ساعات بتشلني الصراحة مش بتبقى مشكلة لكنة ... لكن بتبقى مشكلة نحوية او نطقية .. و ساعتها مبرعفش اسكت ابدا ! بالذات في ال E-mails :)


بس لا يعيبني في شيء اني عايز انطق الكلام صح و اتكلم بلكنة مختلفة .. و لايعيبك شيء انك بتتكلم انجليزي كويس بس مش فارق معاك اللكنة


الي بعيبهم هما الي الناس الرمادية الي في مصر ... تلاقي في جامعة اجنبية و مدرسة اجنبية و بتيكلم انجليزي 24 ساعة في اليوم ... و في الاخر لا هو محصل مصري و لا محصل اجنبي ... بيرقص على السلم ! وبيعتبر الناس الي بتتلكم بلكنة مصري فلاحين ..

انا الناس دي بقى بشلها :)
يكلموني انجليزي امريكي ... ارد بالعربي ... و اتحاور بالعربي و هما يكملوا انجليزي ... كل ماتسال او يجي الكلام عليا اقلب عربي لحد ماكله قلب عربي :)

[Terrible_DaRsH]

نفسي يدرسوا للطلبة سواء مدارس او جامعات ( الاعتزاز باللغة العربية )

تحس ان من ممارسة الشباب للانجلش , بيستعروا من اللغة العربية مع الوقت !

خاصة البنات يعنى بيعيشوا دور انهم خلاص مش قادرين يفهموا عربي , ممكن تتكلم مع بنت تقولك ( سورى ممكن تقولى الاكسبرشن علشان افهمك ) :(

ده للاسف علشان مفيش رقابة من دولة العالم العاشر اللى احنا عايشين فيها

مدارس اجنبية وجامعات على عينى لكن لغة الدولة والدين والاسلام و المجتمع قبل اى حاجة .

[abou_ruqi]

حقولك على حاجة تانية مالهاش علاقة قوي بالموضوع ، بس كنت سمعتها من دكتور لغات فحبيت انشرها

لو حتقول الكلمة الاجنبية في وسط الكلام العربي زي ما اهلها بينطقوها ، ماشي
لو حتقولها زي ما مجتمعك اتعود يقولها ، ماشي
انما لو قلتها باي طريقة تالتة ، بتبقى زبالة

زي ايه ؟

لو قلت جاكيت ماشي
لو قلت جاكيتة ماشي
لو قلت شاكيتة حيبقى شكلها وحش قوي

اللي عاوز اركز عليه التانية ، طالما المجتمع كله اتفق على نطقها كده ، متبقاش عيب، في لغات تانية بتضيف الكلمة الاجنبية باللهجة الشعبية داخل قاموس اللغة نفسها
زي مثلا school الماليزيين بيقولوها sekolah لو دخلت دلوقتي على ترجمة جوجل وكتب school وترجمت بالماليزي حتلاقيها sekolah.لان الكلمة الشعبية بتبقى كلمة شريعية بعد فترة

وفي الاسباني المخدة اسمها Almohada شالوا الخاء
وبرضه كلمة جد او ابو العيلة المفروض يكون abuela لكن لان المذكر في الاسباني لازم ينتهي ب o والمؤنث لازم ينتهي ب a فكلمة abouela يعني جدة وكلمة abuelo يعني جد ( على فكرة الاسباني فيه الاف الكلمات العربي مش ابو العيلة ومخدة بس )
وفي كمان الاكلة الشعبية في اسبانية اسمها paella وبتنطق باييا دي اصلا كانت بقية بالعربي بس الاسبان ما بينطقوش القاف فخلوها ياء ومعناها بقايا الاكل لان الاسبان كان بيشحتوا من العرب فيخبطوا علي البيوت ويسألوهم بقايا اكل البيت "paella por favor " ويلموا بواقي اكل العرب ويطبخوا بيها الاكلة الشهيرة اللي لسه بياكلوها لحد دلوقتي PAELLA

[abogogo]

the sphinx is Great Building ... face face man .... body body lion
الجملة الاسطورية دي زمان قالها واحد صاحبي لواحدة امريكية مصاحبها وكانت جايه زيارة لمصر وبيفسحها في الاهرامات ( ابو الهول بناء عظيم ... الوش وش انسان ... والجسم جسم أسد ) انا بعديها اترميت في الارض من الضحك ... والبنت كانت فاتحه بقها وصاحبنا عامل فيها المرشد السياحي واحنا شغالين حرت وبنستعرض لغتنا وعاملين فيها Charles Dickens كنا بنتكلم انجليزي والبنت بتقولنا انتم ليه بتتكلموا زي بتوع نشرة الاخبار ...!!! كانت ايااااااااااام

[SeiffoZ]

اللى يعوز يتعلم لغة لازم لازم يتقن نطقها كويس ..

[abou_ruqi]

the sphinx is great building ... Face face man .... Body body lion
الجملة الاسطورية دي زمان قالها واحد صاحبي لواحدة امريكية مصاحبها وكانت جايه زيارة لمصر وبيفسحها في الاهرامات ( ابو الهول بناء عظيم ... الوش وش انسان ... والجسم جسم أسد ) انا بعديها اترميت في الارض من الضحك :pointiy2[2]:... والبنت كانت فاتحه بقها وصاحبنا عامل فيها المرشد السياحي واحنا شغالين حرت وبنستعرض لغتنا وعاملين فيها charles dickens كنا بنتكلم انجليزي والبنت بتقولنا انتم ليه بتتكلموا زي بتوع نشرة الاخبار ...!!! كانت ايااااااااااام :0002014a:

لا اللغة دي مش موضوع حلقتنا النهاردة خالص :-)

[abou_ruqi]

اللى يعوز يتعلم لغة لازم لازم يتقن نطقها كويس ..

يتقن نطقها بانهي لهجة فيهم اذا كانت اللغة نفسها ليها خمسين لهجة ؟

[dede_dodo88]

بما أنا بنتكلم على الايشيبشان أنجلش lol

[youtube]http://www.youtube.com/watch?v=XMfmGc3kNeE[/youtube]

[dede_dodo88]

خاصة البنات يعنى بيعيشوا دور انهم خلاص مش قادرين يفهموا عربي , ممكن تتكلم مع بنت تقولك ( سورى ممكن تقولى الاكسبرشن علشان افهمك ) :(

هو في ناس بتعمل كده كفزلكة أو فاكرين أن الناس هتشوفهم لما يقولوا كلمتين في النص على أنهم كده هاي كيلاس lol
بس في ناس تانية و أنا منهم لازم أتكلم كلمتين أنجليزي في نص الكلام و ممكن أقول جملة بالكامل بالأنجليزي.. و ده بسبب أني بستخدم الأنجليزي أكتر ما بستخدم أي لغة تانية حتى العربي.. فبقى طبيعي أن تفكيري يجيب الكلمة بالأنجليزي بعد كده أترجمها بالعربي عشان أقولها, لكن في بعض الأحيان و أنا بتكلم عربي عادي فبلاقي أني هاخد وقت شوية عشان الأقي المرادف بتاع الكلمة بالعربي فبقولها بالأنجليزي على طول خصوصاً لما أكون عارف أن اللي قدامي هيفهمني لما أقولها بالأنجليزي.. لكن لو هو مش هيفهم بعصر على نفسي لمونة و أحاول أفتكر ما يوازي الكلمة بالعربي..
يمكن ده حال ناس كتير من اللي بيستخدموا لغات أجنبية أكتر من لغتهم الأم.. لكن عن نفسي فمازلت بعرف أكتب عربي كويس جداً بجانب الأنجليزي لأن كان ليا سوابق في كتابة روايات فالحمد لله عندي قواعد اللغة لسة متبقي منها شوية.. هي مشكلتي الحقيقة في الكلام مش الكتابة..

[تامر.محمد]

( على فكرة الاسباني فيه الاف الكلمات العربي مش ابو العيلة ومخدة بس ) paella

الهندي نفس الوضع وبصورة مذهلة برده :)

[besso]

على فكره نفس الشىء اللى بينطبق على الانجليزى هو اللى بينطبق على العربى
ما احنا عندنا العربى بيتنطق بكذا لهجه وفيه منهم اللهجه السهله لينا كمصريين وفيه لهجات صعبه عادى

انا بحاول اقرا الكلمات صح بس مش بركز دى بقى بانهى لهجه المهم انى بتكلم صح فى العموم لان انا مش فى دوله اجنبيه علشان ادور على لهجه معينه واتبعها

انا بقى اللى غايظنى من ده كلوا اللى بيدخل العربى فى الانجليزى او اللى بيتكلم فرانكو الصراحه بتخنق منه

اللغه العربيه بقت عار يعنى ولا ايه ولا بقت دقه قديمه