لو كنت مكانى هتتجوزها ؟

[acqa12]

السلام عليكم
اولا اعتذر انى عامل عضوية جديدة علشان بس اعمل الموضوع ده بس هو موضوع حساس شوية ليا

انا هدخل فى الموضوع على طول , واتمنى ان كل واحد عنده رد يفيدنى بيه ياريت يرد على الموضوع

دلوقتى انا شاب عندى 24 سنة

ومن حوالى 9 اشهر , اتعرفت على انسانة , وبدانا نتكلم شوية مع بعض
وفى وقت قصير جدا , انجذبنا لبعض اوى لان كل واحد فينا لاقى اللى نفسه فيه فى التانى
يعنى تقريبا فولة واتقسمت نصين

وكل ما الوقت يعدى ارتباطنا وانجذابنا يزيد لدرجة اننا كنا مع بعض تقريبا كل يوم على التليفون

وجه الوقت وصارحت البنت بمشاعرى وهيا كذلك

المهم مع الوقت كل واحد بيشوف التانى على حقيقته اكتر وبيتعمق ف حياته اكتر واكتر

لحد لما جه الوقت حسيت نفسى فيه انى المفروض اتقدم واخطب البنت طالما هيا عاجبانى اوى كده وبنت حلال

بس خلينى اقولكو هيا عاملة ازاى وايه المشاكل :

اولا انا لو لفيت الدنيا , عمرى ما هلاقى حد يحبنى للدرجة ده , البنت بتحبنى جدا جد جد ومستعدة تضحى باى حاجة علشان اكون بس مبسوط , ولو حد كنت زعلتها برضه كانت اهم حاجة عندها انى مكنش متعصب او زعلان

وبجد حمووولة جدا وست بيت بامتياز ومطيعة وفيها كل المميزات اللى استحالة تتجمع ف بنت واحدة

غير انها بسم الله ما شاء الله زى القمر

انا عارف ان بعد كل ده هتقولو طب انت مستنى ايه

المشكلة ان البنت ده عندها مشكلة مرضية , تتلخص ف انها عندها صرع , بمعنى انها لو اتعصب اوى اوى ممكن تتشنج وتدوخ او ممكن تكسر حاجة قدامها وتفضل تترعش

هيا ف الفترة اللى فاتت ده محصلهاش حاجة من ده غير لما والدها زعقلها جامد واهانها فاتشنجت وراحت للمستشفى يومين
هيا متابعة مع دكتور اعصاب , وهو يعطيها دواء اسمه ديباكين , هيا بتاخد منه حبايتين , مرة الصبح ومرة بالليل
ياريت حد من الدكاترة يقولى ده بتاع ايه

ده غير انها ساعات بتدوخ فجاة لو شافت نور قوى يزغلل عنيها
وقلبها ضعيف بجانب انها حساسة جداااا

ومعرفش هو المرض ده ممكن يبقى وراثى ؟ يعنى لو خلفت ان شاء الله ممكن ينتقل للاولاد ؟

يعنى هيا عندها مشكلة مرضية وانا بفكر طب ف اول حياتنا هتبقى قاعدة مع مين الصبح وانا ف الشغل مع العلم انها حساسة جدااااااا ناحية مرضها ومش عاوزة حد يعرف من اهلى
وانا طبعا ميجيليش قلب اسبها لوحدها فى البيت

الى جانب انى لسة بادئ حياتى العملية , انا مهندس , وكان طموحى انى اتجوز على 27 28 سنة على ما اكون شديت حيلى شوية وعملت مبلغ كويس واشتغلت كتير وخدت خبرة

فدلوقتى لاقيت نفسى لازم اتقدم للبنت , طب انا لو ارتبطت بيها رسمى هتكتف ف وقت انا بشتغل شغلانتين , يعنى لازم اتنازل عن شغلانة علشان اكون فاضى ليها لان ليها عليا حق

الى جانب انى مش عاوز اخد فلوس من والدى , مش عاوز حد يكسر عينى , كفاية انه جايب لى شقة

طب انا لو اتقدمت دلوقتى يبقى اكيد هحتاج لابويا

كل ما افكر ف ده , ارجع الاقى البنت اللى وثقت فيا وبتحبنى حب غريييب ومتمسكة بيا للنهاية

مش عارف اعمل ايه , انا مشوش ومحتاج حد يفيدنى بجد

اتمنى انكون تفيدونى واعتذر للاطالة

[alexaway]

مع احترامي ليك وبدون زعل , سبها لانك مش بتحبها لو بتحبها بجد عمرك ما حتفكر فى مرضها وحتشيل همومها وحتستحملها وحيبقي علي قلبك زي العسل , انما انت واخد الموضوع بيعه وشاروه , قاعد تحسب الامور بالورقة والقلم .
البنت دي عايزه حد يحبها مش حد يكتب موضوع علشان يسأل الناس اتجوزها ولا لا .

[Esam Mosaad]

والله انا فى بدايه الموضوع وقريت ان سنك 24 سنه كنت عاوز اكتب وقتها
انت لسه صغير يا عم وكنت هقولك عيش واتمتع بالدنيا ولسه قدامك المستقبل

بس بعد مقريت الموضوع انا شايف انك اكيد لو سلكت الطريق الشرعى اكيد ربنا هيكرمك
لانك بتراعى ربنا فيها ومش عاوز تعمل حاجه غير الى قال عليها ربنا
وانت بتقول البنت كويسه وبنت ناس ومتفهمين
يبقى راى انك تتوكل على الله وتسبها على ربنا واكيد ربنا هيرزقك سواء دلوقتى او بعدين

وبرضوا اتاكد من ناحيه مرضها انوا مش هياثر على الانجاب والكلام ده وميكنش وراثى لان ديه هتبقى اكبر مشكله
وصلى صلاه استخاره ومتمسعش كلام حد يقولك انت لسه صغير ولسه قدامك العمر ومتستعجلش والكلام ده وحاول يكون ليك ديما قرار خاص بيك لانك سيد قرارك
ديه كلها ارزاق
ولو على الفلوس اتقدم واخر شويه الجواز ولو نى مش افضل بس على متكون ابتديت تكون نفسك

وبرضوا انتظر رد بقيت الاعضاء

[zangry]

لو انا بحبها وعايزها اكيد هتجوزها لأن زي مابتقول انها كويسة جدا وبتحبك وعايزة ترضيك !

[rahmanboud]

مفيش داعى تعمل إستطلاع على موضوع خاص بحياتك لأنك أدرى واحد بقدراتك وطموحك وأمنياتك - كمان لما بتحكى الحكايه إنت بتحكيها من وجهة نظرك ومن زاويتك إنت وبالتالى الردود حتكون على موضوع معروض من زاويه وحيده ولو إنت شاريها يبقى مفيش داعى للحسابات لأن حسابات البشر غالبا ما بتكون خاطئه وربنا أعلم بالغيب يمكن لما البنت تتجوز وتستقر تشفى من مرضها ويكون مرضها بسبب نفسي من خلال معاملة أهلها مثلا .
واللى أنا مختلف معاك فيه وميصحش تقوله جملة مش عايز حد يكسر عينى أكيد مفيش أب فى الدنيا فى إيده يسعد إبنه حيتأخر عليه ولو صرف عليه مال قارون عمره ما يمن عليه ولو إنت بتفكر كده يبقى كان من المفروض تشتغل من زمان وتصرف على نفسك وتجيب شقتك بنفسك وكمان لو ده تفكيرك يبقى إنت تفكيرك مادى جدا ومن الأفضل تسيب البنت علشان لو طلعت حساباتك خاطئه ولقيتها خسرانه فى الآخر حتطلع كل ده على جتتها .
وأخيرا بعتذر لك لو ردى قاسي شويه لكنك عملت العضويه من أجل النصيحة وواجب على كل الأعضاء إنهم يصدقوك النصيحة ولا يجاملوك فتكون النتيجة عكسيه وفى النهايه مرحبا بك عضو فى أسرة نايل موتورز

[m_elkhishin]

بص يا سيدي
مرض الصرع مع المواظبة على العلاج بشكل منتظم بتكون النوبات قليلة جدا جدا۔
مرض الصرع مرض وراثي۔
ولكن انا مثلا جدي كان عنده صرع۔ ابويا وعمي وعماتي واولادهم جميعا مجالهومش صرع۔

[bisoo]

يا باشمهندس اصرف نظر تماما عن انها مريضة و حضرتك بتقول انها بحبك وبتخاف عليك
يبقي مفيش سبب انك تتقدم ليا طالما مفيش حاجة تمنعك
وعلي رأي المثل خد اللي بتحبك ومتخودش اللي بتحبها
مسالة والدك بيساعدك ده عاااااااااااااااااااااااااااااااااادي جدا وعلي فكرة لما تتجوز وتخلف ان شاء الله هيفضل برضه قلقان عليك ومش هيسيبك ف حالك د ابوك يا جدع يعني يعرفك من ايام ما كنت ف kg1 ثق فيه تماما انه مش هيكسر عينك والكلام ده
اتوكل علي الله و ارتبط بيها ومتنساش تعزمنا (مش بشرب البيبسي و مش بحب الجاتوه اللي بالشكولاته)

[أحمد كمال]

د ابوك يا جدع يعني يعرفك من ايام ما كنت ف kg1 )

قتلتني ضحكا هههههههههههههه

[dedi]

هى حياتك انت و انت الذى تقرر يعنى بعد فترة من الزواج لا قدر اللة و حصل لها كدة هاتندم و لا لا
بس ملحوظة صغيرة انت ممكن تتجوز واحدة بكل المواصفات و بعد الزواج لا قدر اللة يحصل معاها اى مرض مين ضامن حياتة و لا مرضة ربنا يختار لك الصالح
تحياتى

[Angel_wolf]

واحدة بكل الصفات الحلوة الى انت بتحكى عليها دى حرام انك تسبها طبعا ودة مفيهوش جدال واذا كان على موضوع المرض انت بتقول الموضوع بيجلها لما حد بيعصبها اوى اوى

حضرتك فى ناس سليمة ولما بتتعصب على اقل حاجة بتقتقل قتيل

ومعلش والى بيتجوز واحدة زى الفل وتيجى يجلها مرض وحش لاقدر الله بيرجعها تانى وياخد فلوسة صلى استخارة واتكل على الله انت ابن وهى بنت حلال و بتحبك وملهاش زنب فى الى هيا فية

[eleanor]

بص حضرتك المرض اللى بتحكى عليه ده مش صرع ده اسمه كهرباء فى المخ وده مختلف عن الصرع هى النوبه اللى بتيجى الدكاتره بيسموها نوبات صرعيه
والعلاج اللى بتاخده اسمه دباكين وده بتاع الكهرباء فى المخ والمرض ده مش دايم يعنى ليه علاج بس بياخد وقت ممكن يوصل لسنتين تلاته بس بشرط ان ميعاد الدواء مايتاخرش 5 دقايق عن ميعاده وهو كل 12 ساعه يعنى لازم المواظبه عليه
ولازم الاكل يكون كويس والنوم يكون كويس فى الحاله دى حتى لو اتنرفزت مش هاتجلها الحاله تانى
ملحوظه لو فى برشامه اتنست وماتاخدتش يرجع كورس العلاج من الاول يعنى لازم الالتزام الشديد ومتاخفش ان شاء الله خير

[أحمد كمال]

يا جماعة بلاش تفكير عاطفي

مرض يعني مسؤولية

مرض يعني احتمال ماينفعش حمل و اولاد

مرض يعني احتمال لو فيه اولاد يورثوه


الجواز مسؤولية مش عواطف و خلاص


و اللي عالشط دايما عوام ....... و اعتقد ان ناس كتير من اللي بترد ما اتجوزتش اساسا !

[mohamed878]

توكل علي الله بس شوف بس انتا بتقول ان قلبها ضعيف فهل هيستحمل انها تخلف اتاكد من الجزئيه دي بس عشان ميكونش الجواز خطر علي حياتها

[acqa12]

اولا يا رجالة بشكركوا على التفاعل وردكو , ربنا يطمن قلبكو

بس انا عاوز اوضح كام حاجة , والله انا بحبها جدا ومش واخدها شروه ولا بيعة ولا الكلام ده

بس انا متخيل حياتى بعدين معاها , تخيل واقعى , لان ده مسؤلية مش مجرد اندفاع حب وخلاص

انا اعترف ان هيا بجد معاها مفتاح السعادة بتاعى وربنا يباركلى فيها

بس بجد انا موضوع الفلوس ده مأثر ف نفسيتى جدا , انا مش عاوز الجأ لوالدى كفاية انه هيجيب شقة
ومعلش ده موضوع نفسى عندى وانا مش هتطرقله

فيبقى الحل انى اخطب وانتظر فترة سنتين او سنة ونص لحد لما ربنا يكرمنى واكون جهزت الشقة والعفش والامور ده
انا كنت جسيت نبضها على فترة الخطوبة فقالتلى انها تستنانى اى وقت بس قالتلى نحاول نتجوز بسرعة علشان ربنا يكرمنا وميحصلش اى تجاوزات ف فترة الخطوبة , انتوا عارفين الحب الزيادة ليه مشاكله .

انا بتكلم معاكو بصراحة يا رجالة

وبعدين موضوع المرض يا جماعة انتوا مش عارفين تتخيلو الموقف , يعنى مثلا قلقى الدائم عليها لما تبقى لوحدها هياثر عليا وعلى تركيزى ف شغلى , وطبعا لازم اقنعها انى والدتى تعرف علشان تبقى معاها لما مكونش ف البيت لان هيا مش من القاهرة ووالدتها مش هتكون قريبة منها

انا لازم اتاكد انى اكون قد المسؤلية بتاعة مرضها فعلا , مش مجرد جواز وبعدين لا قدر الله اكون ف الشغل يحصلها حاجة من غيرى !!!

وبعدين انا عارف ان هيا مش ذنبها , بس ده مسؤلية , يعنى مثلا لا قدر الله طلع المرض ده ف حد من الاولاد , هيبقى ايه الموقف ؟

انا بتكلم بصوت عالى بس معاكو

بس ان شاء الله انا هصلى استخارة مع ان قلبى مايل انى اتقدم ان شاء الله وربنا يجعل اللى فيه النصيب

[hazemhany]

انا شايف ان الموضوع صعب بصراحة ..اصل انت ضامن منين شكل حياتكم بعد الجواز مش يمكن يحصل ما بينكم مشاكل كتير لاقدر الله تتسبب في مشاكل صحية ليها واضرار نفسية ليك! ...اكيد الموضوع ده قرارك انت عشان انت اللي تقدر تحدد اذا كنت هتبقي قد مسئولية تحمل مرضها بعد الجواز ولا لأ هتقدر تتحمل لو جالها نوبات زي دي قدام حد او في الشارع او قدام عيالك او لأ ...الموضوع مش سهل دي هتبقي زوجتك طول عمرك مش شهر ولا اتنين والحياة الزوجية مليانة مصاعب ممكن البنت بظروفها الصحية دي متتحملهاش ...