مشكلة مع موظفة كانت عندي

[ESO101]

موظفة كانت بتشتغل سكرتيرة في مكتبي
الموظفة دي من أول ماتم توظيفها تم توظيفها بطريقة مش سليمة عن طريق واسطة
مدير توسط لها تشتغل فجابها سكرتيرة في دايرة وإنتقلت في مكتبي بعدها
وهيا معندهاش مؤهلات للعمل في شركة زي دي
ولا عدت في إختبارات الشركة
المهم ... من أول ماشتغلت في المكتب جابتلنا الكلام
بتعد على مكاتب الموظفين وفيه موظفين ( من أقسام تانية ) رايحين جايين على مكتبها
-أنا مقدرش أشكك في أخلاقها-
لكن هيا بتصرفاتها دي خلت الموظفين اللي تحتي يتكلموا وخلتني في موقف محرج
وعلى طول ماسكة التليفون وبتنسى كتير ومش شايفة شغلها خالص
بالإضافة إنها في الإجتماعات بتعملي مشاكل في المواعيد
وبتتكلم مع مدراء الدوائر التانية بطريقة مش رسمية وأكتر من مرة توصلني ملاحظات عليها
من مراجعين أو مدراء
في مراجع قالي موظفتك خلتني واقف ساعة عند مكتبها وهيا ماسكة التليفون وأنا راجل عندي القلب
و راجل كبير أد والدها كلمته بطريقة مش مناسبة
و كل يوم والتاني تجيلي تقولي عايزة أخرج أقولها بس دا وقت العمل تقولي تعبانة ومرة سناني ومرة بطني فقولها طيب إتفضلي
لإني مقدرش أسئلها عن تفاصيل معرفش ظروفها إيه فبتخرج كتير بالشكل دا ومش بترجع بعد ساعة ساعتين مثلًا
لاء دي مش بترجع إلا على تاني يوم وياريت بتيجي على موعد الشغل
بتيجي متأخرة المفروض تكون موجودة 7 دي بتيجي 9 تعد ساعة ساعتين وتتحجج تخرج
مع العلم إن الشغل بيخلص الساعة 4
بتعمل إيه الوقت دا كله
ومش عارف هل أهلها عارفين التصرفات دي أو بتخرج من وراهم
دي لو حصلها حاجة برا الشغل أنا هشيل كل المسؤولية
و هبان متواطئ وبخرجها بدون سبب
فكلمت المدير اللي أعلى مني عنها قالي - إفصلها -
قلتله أنا بس عايز أنقلها أي دايرة تانية يكون الشغل فيها نسائي يتفاهموا مع بعض هما
مش عايز موضوع الفصل دا
قالي بقولك - إفصلها -
قلتله طيب لو فصلتها هل ممكن تشوفلها مكان في إحدى الشركات المتعاقدين معاهم
- لإن متاح لنا أماكن ممكن نبعت فيها موظفين من عندنا -
قالي هوصي عليها
ففصلتها
إتصلت بيا والدتها ودعت عليا جامد وهيا جت تدعي عليا فالمكتب وتعيط وعملت مناحة
والله حسيت بالذنب وضميري أنبني
أنا عايز أعرف هل اللي عملته دا خطأ ولا إيه وإزاي ممكن أساعدها
لإن المدير قالي إحنا مش مسؤولين عن الموظف بعد الفصل ... تتصرف هيا
عندي شعور فظيع بالذنب بعد مكالمة والدتها كان ممكن أعملها نقل بدون مارجع للمدير أو أعملها إنذار

[eng.m7md.ali]

حضرتك اتسرعت في موضوع الفصل ده

كان لازم يبقى في انذار الاول .. ول اتكرر تاني يبقى انذار بالفصل .. ولو الموضوع اتكرر يبقى من حق حضرتك انك تفصلها لانها مش ملتزمة بالشغل

[ابو لؤى]

المفروض فعلا حضرتك كنت اتكلمت معاها بالعقل الاول انذار يعنى

[walidzakzok]

خلاص اللي حصل حصل

ممكن تساعدها لو هية بتاعة شغل اما لو هاتدلع كدة يبقى تقعد فى البيت احسن

[مصطفى-حسن]

انسى
الطبع يغلب التطبع
لو نصحتها مليون مرة مش هتتنصح
الى عاوز يشتغل بيحافظ على اكل عيشة
......
ومن الاخر لو رجعتها
هتكرة نفسك وهتضرب نفسك 100 ...
اسئلنى انا عن مشاكل العمالة والموظفين

[nodey]

واحدة مهملة ومفكرة ان الشركة بتاعتها خلاص خدت جزائها اكيد في فيرها يتمنوا الشغل والتفاني فيه ومعندهموش وقت للمياصة والهق والملق والشرمق هههههههه تستاهل اللي جاها عشان لما تشتغل تاني تبقي تشوف اكل عيشها وتسيب الدلع والمايعه ووووش

[ESO101]

ياجماعة والله إتكلمت معاها مرة وإتنين وعشرة ولكن كانت عملالي ضغط شديد
سواء بالمشاكل اللي كانت بتسببها أو بالكلام اللي مكنش بيخلص من الموظفين
الحجات دي حساسة جدًا وبتتاخد بصورة وحشة من الناس وبتحط الإنسان في ضغط
دا بخلاف تصرفاتها أنا لو هقولكم تصرفاتها مش هتصدقوا
مرة دخلت المكتب وعندي الموظفين و بتاكل آيسكريم بشكل مستفز جدًا
قلتلها لو سمحتي ممنوع الأكل والشرب فالمكتب قالتلي كلكم بتشربوا شاي
طب هقولها إيه بس ! إيه نوع الإنذار اللي هديهولها !
وبعدين الموظفين بيحترموني لما تيجي موظفة تتكلم بالشكل دا معايا محدش هيحترمني بعدها
فيه أكتر من إني جبت موظف ملوش علاقة بالسكرتارية وإديته شغلها
دي عندي فالمكتب أديلها 6 شهور تقريبًا عملتلي كمية مشاكل مشوفتهاش من ساعة ماشتغلت
ووجهتها كتير وعملتلها أكتر من مرة ملاحظة ولفت نظرها للتصرف بشكل مناسب
لكن مفيش فايدة
في المكاتب التانية فيه سكرتيرات أجنبيات والله الوحدة فيهم زي الراجل فالشغل
إنظباط و إهتمام بكل كبيرة وصغيرة وقلتلها إتصرفي زيهم لكن مفيش فايدة
أنا حاسس بالذنب مش لإنها مش غلطانة أنا حسس بالذنب لإن كان فيه تصرف تاني ممكن أعمله يخلصني منها غير الفصل
ومش عارف أتصرف إزاي دلوقتي بعد مافصلتها
ولاحظوا إن أي مساعدة دلوقتي هيكون تدخل مش رسمي ولو حد عرف هتبقى مشكلة

[مصطفى-حسن]

يا فند م اللى انت عملتة دة هوة التصرف الصحيح الوحيد المناسب
متندمش على حاجة
فية مليون غيرها يتمنوا يشتغلوا مكانها
وهتلاقيهم بنات عايزين ياكلو عيش
ولو انت وديتها لاى مكان هتقصر رقبتك وهتخلى شكلك وحش

[elnakshabandy]

اللى ذى العينة ديه ستات او رجاله (للآسف) هما اللى مودين البلد فى داهيه
لانى بقول على امثالهم دول عماله(بطاله) مقنعه بالشغل
وكمان اللى يغيذك تلاقيهم بيقبضوا ذيك زيهم بس الحمد لله ربنا مبارك فى اللى الواحد بيقبضوا

المهم انت عملت اللى عليك ومتزعلش على اللى فات وفى رآى هو ده الصح

[speed_magnum]

دا ايه النوعيات الغريبه دي
هي الناس ناقصه قرف
...
ولو الكلام على روايتك صحيح تماما
فرايي انك تنسى الموضوع واللي انت عملته هو الصح

[lidosasa]

يا بيه فى حاجة إسمها لائحة جزاءات موجودة فى كل الشركات المحترمة تطبق عليها اللائحة الأول وتبقى هى الفيصل بينكم لو غلطت فى حاجة تحولها للتحقيق . لكن حضرتك طاوعتها وسيبت ليها الحبل على الغارب وبعدين قمت فاصلها بدون سابق إنذار .

[AHMADALY1999]

كنت حعمل زيك بالظبط

[minicooper20]

يا باشا فى بولسى للشركه و لا انتو شغلين ازاى
3 خطبات انزار و بعدين ترمنيشن و شكرا لاكت الترمناشن من غير خطباط الانزار ده ظلم
و كنت كلم ال h r كانو شافو حل
ااكن ده معلش فصل تعسفى و لو رحت مكتب العمل هتعملكو حوار
طبعا كلامى ده لو حضرتك فى السعوديه زى مامكتوب
لاكن لو فى مصر اديها بالشالوط عادى هههههههه
دى مصر ام الدنيا يعنى ام السعوديه اصلن
تحياتى
اه متشعرش بلزنب البزنس ملوش قلب لان لو وقعتك محدش هيسمى عليك

[أحمد كمال]

سيدي الفاضل

العلاقة الوظيفية لا تحتمل المشاعر الانسانية و العواطف و مشكلتنا كشرقيين و عرب اننا بنخلط البزنس بالمشاعر

ياما بنشوف ناس المفروض تترفد بس "معلش" و "عشان الظروف" الخ الخ الخ

و موضوع امها و دعاءها عليك و خوفك و شعورك بالذنب ....... انت ما ظلمتهاش و الدعوة بلا ظلم و لا كانها حصلت

دي واحدة غير ملتزمة و هتقرفك و لو رجعتها و الله هتوريك السواد اللي ما شفتوش قبل فصلها


ما تحسش بالذنب ..... انت عملت الواجب تجاه المؤسسة و اصحابها و مالهم اللي انت مؤتمن عليه اللي كان بيروح هدر

[KemozTanta]

انت اتاخرت كتيير علي الخطوة دي والمفروض الفصل يحصل من زمان و رأي انك تنسي خلاص الموضوع دا.. وضميرها فيين وهي بتقبض مرتب هي عارفة انها مشتغلتش بيه وافتكرت نفسها ناصحة وهي بتحرجك كل مرة بظروف ملهاش نهاية..