ازاي أمنع قرايبي من دخول شقتي وأنا في الغربة، بدون إحراج؟

[aif]

أنا ممتن وشاكر لكم جميعاً ردودكم واقتراحاتكم.. جزاكم الله خيراً

أنا في الحقيقة سأتجنب جميع الحلول التي لا تتضمن الصدق، مثل أن الشقة اتسرقت أو المفتاح ضاع.. لأنها بعيدة عني كشخص، ولأنها غير منطقية.. الشقة في كمباوند ويوجد أمن 24 ساعة..

أيضاً لن يمكنني تأجير الشقة لأنها فيها أثاث بيتي وجهاز زوجتي، وهي بيتنا ومقرنا.. ففي الأجازة أين نذهب؟

الحل الأسلم حتى الآن هو أن أنتظر وأختار أهلي وأحتسب أجري على الله

ده مش حل
كدة انت بتقول يبقي الوضع كما هو عليه
انت كدة عامل زي اللي عاوز يعمل عملية جراحية بس من غير ولا نقطة دم
انا شايف انك حتي لو استحملتهم دلوقتي وتركت الوضع كدة عشان ماتزعلهمش
ح ييجي وقت وانت مش ح تستحمل او زوجتك مش ح تتحملهم او اولادك بعد كدة
وساعتها الخسائر ح تكون مضاعفة للأسف

[friendship7897]

المواجهة .... المواجهة
ولازم هيكون فيه زعل
أشمعنى أنت زعلان ومحدش حاسس بيك أو بزوجتك
لازم تعرفهم أنك زعلان ومضايق من اللي بيحصل في شقتك وعفشك
وعندي سؤال ليك !!
أنت معاك مفتاح شقة حد فيهم ؟
أعتقد الإجابة لأ
أشمعنى هما بيتهم مستور وعندهم حرمة لبيتهم وأنت لأ
أقترح أنك تقول لهم كدا
وتعرض عليهم أنك تدفع ثمن أيجار شقة في القاهرة للي مضطر ينزل القاهرة
وعلى فكرة كدة أوفر لك من دمار ما في شقة لك ولأولادك
غير حرقة الدم عند نزولك القاهرة تلاقي أعطال وإستهلاكات أنت معملتهاش
وربنا معاك
لأنه أكيد قرار صعب إتخاذه
بس لو أهلك بيحبوك ومقدرين تعبك وغربتك علشان أولادك
هيرضوا وهيتسامحوا ولو بعد فترة

[م.محمد علاء]

أنا ممتن وشاكر لكم جميعاً ردودكم واقتراحاتكم.. جزاكم الله خيراً

أنا في الحقيقة سأتجنب جميع الحلول التي لا تتضمن الصدق، مثل أن الشقة اتسرقت أو المفتاح ضاع.. لأنها بعيدة عني كشخص، ولأنها غير منطقية.. الشقة في كمباوند ويوجد أمن 24 ساعة..

أيضاً لن يمكنني تأجير الشقة لأنها فيها أثاث بيتي وجهاز زوجتي، وهي بيتنا ومقرنا.. ففي الأجازة أين نذهب؟

الحل الأسلم حتى الآن هو أن أنتظر وأختار أهلي وأحتسب أجري على الله

أستاذي الفاضل..
ده مش حل..ده تهاون و تراخي في الدفاع عن حقك..
فاقد الشيء لا يعطيه..تبقى إنت زعلان من اللي بيحصل.و مش عايز تزعل اللي مزعلينك..
توكل على الله..قراءتي للموضوع إستفزتني للوضع اللي انت فيه..و ربنا يكرمك و يوفقك.

[mr_vampire]

واجههم بهدوء واللي يزعل يبقي كان اتعود واستحلي انتهاك حقوقك وخصوصيتك واملاكك وميتزعلش علي زعله.

[casperinoo]

انا شايف فعلا طالما انت مش عايز تخش في سكة انك تقولهم اتاجرت او السرقه ..
خلاص يبقي تفهم اهلك ان العيب في اهل زوجتك وبهدلوا الشقه وان ده قرارك انت وتحكلهم علي اللي حماك بيعملوا وبالمره ترمي كلام علي اللي هما عملوه برده بس بطريقه غير مباشره
ومراتك تفهم اهلها ان العيب في اهلك وان ده قرارها هي وتحكي عن اللي اهلك عملوه وبرده نفس الحكايه..

وانك هتغير الكلون وهتبقي تديهم المفتاح بس شويه كده علشان مراتك متزعلش
ونفس الحكايه مراتك تفهم اهلها ان هتديهم المفتاح بس شويه علشان انت متزعلش
..
وبعدين هل ينفع الكهربا تتفصل عن الشقه ولا لأ ..يعني العداد يتشال مثلا بحجة انه بايظ
اعتقد ده هينهي المشكله خالص..

بس عامة وضعك ده مينفعش نهائي
حتي لو هيزعلوا

[Car's Sniper]

ممكن تعمل حركة اجمل وتبقى خدت ثواب صلة الرحم وفى نفس الوقت حافظت على حاجتك..انك تسيبلهم الريسيبشن والحمام فقط وتقفل ابواب باقى الاوض بالمفتاح ولو حتى تحط عفشك الغالى فى الاوض المقفولة وتجيب سريرين من اللى بيتطبقوا حطهم فى الصالة وسيبهم يبهدلوهم براحتهم

[islambana]

الاجابه تتلخص في كلمتين
الخشاء في الرجال يجيب الفقر....

[Y a r i s]

مع احترامي لجميع أراء الاعضاء
حضرتك اووعه تغير الكلون والكلام ده !! هيزعلو منككك ويقلك اصل مراتوا بتوزوا علينا او الغربة غيرتوا وهتبقى ووحش في نظرهم

الحل

إنك تغير الباب كلوووووو .... غيروا كلو على بعضوا وركب الباب ابو ٣٠٠٠ جنية الي هو الباب المصفح ، بس غيروا انتا بنفسك يعني متبعتش فلوس لاخوك وتقلوا غيرهولي ... والي يسئلك قولوا. اسكت اسكت يا خويا. تصور رجعت لقيت باب الشقة مكسور والتلفزيون والخلاط. متاخدين (( اي حاجة ذات قيمة )) المهم بعد كده اي حد يقولك المفتااح اعمل نفسك من بنها. وقول حاضر وانشاء الله ... وربنا يتمم بخير ، واقولهم اصل الباب المصفح ده ليه نظام خاصة وطريقة فتح معينه ومتوصل بالانترنيت والاقمار الصناعية. وليه نسخ محدده وباسورد كده يعني .

[ayman20100]

اتكلم معاهم بصراحة بس ممكن تجمل الموضوع شوية
قول لاهلك انك منعت اهل مراتك من الذهاب والموضوع هيعمل مشكلة
وقول لاهل مراتك نفس الكلام وانه فيه اهانة لو سمحت لهم دون اهلك باستخدام الشقة
وتبقى صربت عصفورين بحجر واحد ده اولاً

ثانياُ : شقتك وانت مش موجود تبقى غير مجهزة للسكن بمعنى ما يبقاش فيها كهرباء شغاله ممكن توقف الكهربا من الشركة وكذلك الميه لو فيه محبس خاص بيك وتبقى الشقة غير صالحة للسكن وفي نفس الوقت ما تزعلش حد

ثالثاُ : لم عفشك كله في اوضه او اتنين ولفهم بكسوة بلاستيك اكنك معزل بس بشكل يبقى سهل انك تفرش العفش تاني

رابعاً : عرف البواب او الجار بإبلاغك في حالة وجود حد بالشقة عشان تتصل عليه وتعرفه انك عارف بوجوده لعله يشعر بالاحراج

[ahmedwagdy03]

كويس جدا العلاقات القوية بينكم و ربنا يزيد من قوة ترابطكم بس أتوقع أنه لابد أن يحدث خلاف كبير بسبب هذا الموضوع .

عايز أسألك سؤال : لو حصل و باظت حاجة حد فيهم حيرضى يعوضك عنها . أكيد لا .

المواجهة فى هذه الحالات أفضل كثيرا . إتخذ قرارك و بالذوق . خلاص يا جماعة الشقة إتبهدلت و حأقفلها و جيب باب حديد و غير كوالينك

و إتفق مع زوجتك إنك أمام أهلها حتقول إن أسرتك بهدلت الشقة و أمام أهلك حتقول إن نسايبك بهدلوا الشقة . و إتفقتوا إنتوا الإثنين محدش حيبات فيها و اللى يحب يزوركم فيها أهلا وسهلا

[tmz9111]

ربنا يكون فى عونك بجد

[M R. Z E C O]

انا حصلتلي مشكلة مشابهة ولكن ليس تماما ....في البداية..انا محب لاهلي ولا يوجد ضغائن بيني وبينهم ولكنني وجدتهم ينتهجون سلوكا من التمادي وما احسست به معي من حقد مشتت ...وذلك في نفس المثال السالف ذكره حول ما قد يظنون انك لا تحتاج الشئ او لديك القدرة على شراء غبيره ببساطه وهو ما طلب مني صراحه وكانت قصة طويلة ....

خلاصة القول ..عليك من البدايه عدم عرض اي شئ قيم قد لا تستطيع الاستغناء عنه ...عليك سحب شقتك قبل فوات الاوان حيث ستجد نفسك مضطر الى بيع الشقة بالفعل ..عندما يطلب احدهم منك طلبا قد ترى في نفسك حرجا عند محاولتك لطلب ذات الطلب من شخص اخر منهم فيجب عليك رفض الفكرة من اساسها حتى لا تكون بذرة للضغينة وهو ما فمت انا بفعله ولاقى نجاح باهر حيث طلب احد اخوتي شقتي لاستعمالها فالدراسه اثناء غربتي ولكنني رفضت وسرعان ما انتهى الموضوع

[amr100]

مع احترامي لكل راي لكنهم يغفلون عن عادات و تقاليد الصعايدة و للعلم انا في نفس حيرته علشان انا صعيدي فاهم الموضوع هيسبب احراج وبصراحة مش عارف اقوله على حل

[M!SHO]

الحل الوسط فعلاً

إنك تقفل اوضة النوم الرئيسيه ، أنا مش فاهم حضرتك سايبها مفتوحة ليه

الشقه ليها حرمتها وأوضة النوم ليها حرمتها أكتر

وميمنعش بردو إن أي حاجة حضرتك أو زوجتك ( وهي ليها حق ) خايفين عليها تتشال في الاوضه المقفوله

على فكرة احنا مرينا بنفس الموضوع ده وفي الأخر غيرنا الكوالين كلها وقفلنا خالص