هل انا لو سعيت للطلاق كدا ابقى ظالمة

[إنسانة]

السلام عليكم
حاسه بالذنب - الشعور دا تقريبا بيلازمني فاي تصرف- ولكن التفكير دا بالاخص محسسني بالذنب والحيرة
أنا زوجة تانية لرجل سعودي وزوجته متعرفش مفيش داعي ادخل في تفاصيل بس انا اجبرت عليه ومش عارفة اسيبه
مع الوقت ابتديت افهم حقوقي لاني لما تزوجته كان بعد الثانوية دلوقتي عمري 25 وفهمت كل حقوقي
طلبت منه شقة بأسمي وأصريت وكتبلي -مع إن المبلغ كبير - واصريت اشتغل ووافق ادور على شغل ووافق على الفكرة بعد ماكان رافض
وهو عمل دا عشان أستمر معاه وأنا حسيت إني مش عايزة أستمر معاه أكتر من أول بالإضافة لشعوري بالقوة أكتر من قبل كدا
كنت فاكرة إني لما أستقر في شقة ملك ووظيفة هطمنله ومخاوفي هتقل وعلى الأقل هرتاح نفسيا
ولكن اللي حصل للأسف العكس
شعوري دا له مبرر المرادي بس فيه صوت شيطاني جوايا بيحسسني إني إتظلمت جدا ودا رد بسيط لظلمي كل السنين دي وإن الحياة قدامي وممكن أعيش بشكل افضل بدون الدوامة اللي اترميت فيها

هل انا لو سعيت للطلاق كدا ابقى ظالمة
وهل من حقي وحدي القرار دا ؟
هل هظلم بنتي ؟

[4fun14]

ايوه

[إنسانة]

الشعور بالذنب بيلاحقني كل لحظة بحاول افكر فيها
مش عايزة انكر انه ساعدني في كل حاجة تعليمي و دورات كتير بالاضافة انه عمره ماعلى صوته او زعل مني بالعكس طيب واخلاقة عالية جدا ويمكن عوضني عن حنان ابوي افتقدته من والدي القاسي جدا ودا اللي بيخليني مش قادرة اتجاهل شعور الشديد بالذنب

[#MAAM#]

طبعا هتظلمي نفسك وبنتك

[Adnfalcon]

الطلاق بيكون له دوافع وأسباب وأنا مش شايف اي دافع يخليكي تفكري فالطلاق
وبعدين لا قدر الله ساعتها هتكوني "مطلقه" وانتي عارفه هنا ف مصر وضع المطلقه فالمجتمع ايه
انتي مرتاحه ماديا والراجل بإعترافك كويس معاكي
نصيحتي ليكي احمدي ربك وحافظي ع بيتك و بنتك

[إنسانة]

معنديش مشكلة ابقى مطلقة و الحقيقة اتمنى احصل على اللقب دا
على الاقل افضل من ما اكون مع انسان اجبرت عليه ومتزوج وعنده بيت وزوجة وكمان متعرفش
حاسة بقهر على نفسي وعلى اني معشتش زي اي بنت
انا ملبستش فستان فرح ولا حد خيرني ولا اتعملي اي شيء بتحصل عليه اي بنت
لو اتطلقت هرتاح جدا من كل المشاعر السلبية دي بس هحس بالذنب لو ظلمته او أسأت لحدد على الاقل مأسأليش بشكل مباشر

[Adnfalcon]

ماشي . . بس خلي بالك . . ممكن تطلبي الطلاق و هو يرفض و جايز شخصيته تتغير و يتقلب عليكي عشان بصراحه انا مش شايف سبب قوي يخليكي تطلبي الطلاق
ارضي باللي كتبه ربنا وعيشي لبنتك

[Mo.Kareem]

يا سيدتى العزيزة اه انتى ظالمة ، وبلاش تبصى على امبارح

[إنسانة]

ماشي . . بس خلي بالك . . ممكن تطلبي الطلاق و هو يرفض و جايز شخصيته تتغير و يتقلب عليكي عشان بصراحه انا مش شايف سبب قوي يخليكي تطلبي الطلاق
ارضي باللي كتبه ربنا وعيشي لبنتك

انا قريت عن الخلع وموجود في السعودية صحيح معرفش الخطوات بس المهر ممكن اوفره لما اشتغل
مش عارفة مدى واقعية الخطوة دي ومش عارفة التبعات لو قدرت اخد الخطوة دي بس مش متخيلة نفسي اعمل فيه كدا وهل هسامح نفسي لو عملت كدا هل بنتي لما تكبر هتسامحني هل هو هيسامح
انا ممكن اخرج ازاي من الموقف دا بدون ما اضر حد

[kaza]

معنديش مشكلة ابقى مطلقة و الحقيقة اتمنى احصل على اللقب دا
على الاقل افضل من ما اكون مع انسان اجبرت عليه ومتزوج وعنده بيت وزوجة وكمان متعرفش
حاسة بقهر على نفسي وعلى اني معشتش زي اي بنت
انا ملبستش فستان فرح ولا حد خيرني ولا اتعملي اي شيء بتحصل عليه اي بنت
لو اتطلقت هرتاح جدا من كل المشاعر السلبية دي بس هحس بالذنب لو ظلمته او أسأت لحدد على الاقل مأسأليش بشكل مباشر

واية اللي هتعملية بعد ما تحصلي علي لقب مطلقة مع مرتبة الشرف هتتجوزي غيرة وهياخد اللي وراكي وقدامك وهتدفعي دم قلبك علشان تفدي نفسك وبنتك السيناريو الطبيعي لحالتك يابنتي انتي لسة صغيرة والاعيب الرجال بلا حدود وماحدش بيبص لواحدة متجوزة الا لمصلحة وصدقيني مادام الراجل زي الفل ومش باخل عليكي ولا بيهينك وبيلبيك كل طلباتك عايزة اية تاني اتقي الله وبلاش طمع اخرتة وحشة

[amrezzat82]

مش عارف احكم كويس ليه مخنوقة رغم كل الكلام الايجابي اللى انت قلتيه عليه
لو عشان انت متعملكيش زي اي بنت على حد كلامك و اتفرض عليكي فكري ان فى ناس كتيرة اتعملها و بعدين اتمنت تمشي و معرفتش او على الاقل عاشت مع حد فعلا سيء جدا
لو تمشي حتخسري كتير على فكرة و ممكن الانسان الكويس يتقلب عشان شايفك تتمردي بدون اسباب قهرية
ممكن لو تشوفي حد قريب منك تتكلمي معاه
بس الاجمال حرام تسيبي الا اذا استحالت العشرة تماما و طالما انت جواكي بيقول ايجابيات يبقى الاستحالة غير موجودة
حاولي تشغلي نفسك ووقتك فى تملة دراسة او فى حاجات اجتماعية و أو خيرية أو تطوعية
ربنا يفك قربك

[Adnfalcon]

انا قريت عن الخلع وموجود في السعودية صحيح معرفش الخطوات بس المهر ممكن اوفره لما اشتغل
مش عارفة مدى واقعية الخطوة دي ومش عارفة التبعات لو قدرت اخد الخطوة دي بس مش متخيلة نفسي اعمل فيه كدا وهل هسامح نفسي لو عملت كدا هل بنتي لما تكبر هتسامحني هل هو هيسامح
انا ممكن اخرج ازاي من الموقف دا بدون ما اضر حد

خلع !!!!!! طالما وصل تفكيرك لكده انا هنسحب من المناقشه لأن بصراحه دي قمه الظلم لجوزك و بنتك وحتي نفسك
مش معني ان والدك ظلمك انك تعاقبي كل اللي حواليكي
ربنا يهديكي و يكرمك

[speed_magnum]

ممكن ما تكونيش لبستي فستان فرح ولا عشتي حاجات كان نفسك تعيشيها
بس ربنا كرمك بواحد بيحبك وبيحافظ عليكي وبيخاف على زعلك وعمره ما على صوته عليكي بشهادتك انتي ....
الخطأ ليس خطؤه سيدتي الفاضله والذنب ليس ذنبه وهو بشهادتك لم يقصر في حقوقك
الخطأ هو خطأ اهلك الذين وافقوا على هذا الوضع من البدايه
ان كان هناك حساب لا بد منه فهو مع الاهل . اما هذا الرجل وابنتك فلا ذنب لهما

[حسام فتحي]

الواحد لما بطلع الدور التاني بينسي انه كان في الأرضي و كذا لما يستقر به الحال بينسي لان حاله الآن مختلف. المشكلة اننا بنتعود علي الوضع الحالي و نبدأ نري و نحس بما نفتقده. اكيد الوضع مش لطيف و خاصة لسنك ده.
الاختبار الحقيقي نرجع الي وضعنا السابق (هكذا سيكون الحال بعد الانفصال) و نشوف حنقبل ولا الوضع الحالي نعمة مع قبول بعض الامور.
لو مش متحمله الوضع لازم تِحليه لان تراكم الإحباط والإحساس بالظلم والقهر نتائجه سيئة ولازم حل محترم .

ما حدش بياخد كل حاجة.

[naser_56]

طالما انك معاكي بنت
هل تفتكري يوم انك تظلميها ؟؟؟؟ ما اعتقدش
واقدر اقلك ان والدك ما ظلمكش كل ما في الامر انه شاف جوازه كويسه ليكي في ظل ظروف وحياه صعبه وبكده ريحك حتي لو كان تفكيره خطاء ولكن هو اتصرف عن قناعه تامه منه ان جوازتك دي فيها مصلحتك
ثانيا انتي بتقولي انك اجبرتي علي زواجك ده طيب ليه ما فكرتيش ان زوجك كمان ممكن يكون مجبر علي زوجته الاولي ومش قادر يطلقها ويعيش معاكي لوحدك لظروف لا يعلمها الا الله !!!!!!
ثالثا لو فكرنا الي مرحله ما بعد طلاقك او خلعك ذي ما بتقولي فكرتي ايه الي هتعمليه بعد كده ووضع حياتك هيكون اذاي وعلي رأي المثل ضل راجل ولا ضل حيطه !!!!
نصيحه اخيره احمدي ربك علي الي انتي فيه وصدقيتي ناس كتير مش لاقياه وبلاش تفكير في نص الكوبايه الفارغ وفكري في النص المليان