خبراء : الدولار سيقفز الى 8 جنيهات شهر نوفمبر القادم والسبب ..؟

[أبو آسر]

لا الرد بجد والله

وانت عايز 10 تلاف دولار لية مثلا لو شغلك او حياتك محتاجة عملة الدولار ادفع بالفيزا اون لاين

ولا انت لازم تاخدهم كاش

ولو البنك المركزى حط الدولار بسعر السوق السودا يبقي السوق السودا حتزيد هى كمان


الدولار عملة صعبة واى بلد في مرحلة نمو بتحافظ على محتواها من العملة الصعبة

مش تقولي هاتلى 10 تلاف دولار ؟!! ادفعهم بالفيزا او الكريدت طالما انت معاك ومقتدر وربنا مديك

و حتتحاسب على فكرة بسعر الدولار البنكى مش سعر الدولار بتاع السوق السودا


اللى يتكلم يبقي فاهم لو سمحتم يا جماعة مش اى كلام غلط في غلط للمزايدة والرد وخلاص وتضييع الوقت

اللى مش فاهم يبحث و يفهم قبل مايرد الاول

غير كدة يستحسن ميردش اصلا

اللي بقي بيتاجر في العملة ذى الناس اللى هنا مش شغلتنا المهم ان غالبية الناس تعرف تعيش وطول ما سعر الدولار الرسمي في البنك المركزى تحت يبقي البورصة والاسعار تفضل تحت

مش سيادتهم يبيعوا لتجار عملة كل مخذونهم من الدولار عشان يتاجروا فية والدنيا تولع نار


واضح ان في ناس كتير محتاجة تتعلم اسس الاقتصاد او حتى تقرا وتحاول تفهم الاول قبل الاستظراف والاستهجان والرد

والبنك مديكم خيار ممتاز

visa card لو عايز تشترى بدولار اشترى بية مش تقولى هاتلى دولارات كاش اشغلهم والناس تولع مثلا


stop trolling

كفاية فهلوة

هو ليه حضرتك محسسنا إن كل اللي بيحتاجوا الدولار بيحتاجوه علشان يشتروا آيباد من أمازون مثلا أو نضارة ريبان من موقع الشركة الرسمي علشان كده عندهم وسيلة الدفع أونلاين وان ده أقصى طموحاتهم ؟!!
حضرتك متعرفش ان في آلاف بل عشرات الآلاف من البشر بتحتاج الدولار علشان الاستيراد لأننا دولة غير منتجة و90% من لبس حضرتك وأكلك وأجهزتك وكل حاجة تقريبا بتستعملها في حياتك اليومية بيتم استيرادها من برة بالدولار ؟؟
وعلى فكرة
البنك مش بيحاسبنا بالسعر الرسمي للدولار لو اشترينا بالفيزا ! في عمولة 2.5% إضافية على السعر الرسمي
كده أعتقد حضرتك مدين بالاعتذار للناس الفهلوية اللي اتهمتها انها بتتكلم في اللي ملهاش فيه واللي محتاجين يتعلموا أسس الاقتصاد قبل الاستظراف !

[wael30003]

انا لسه مغيره من يومين 7.50

[wael30003]

انا بعته مش اشتريته ...
يعنى لو اشتريته ممكن يكون 7.55 مثلا

[zangry]

علي فكرة يادكتور شهدي لو اشتريت حاجة بالفيزا البنك مبيحاسبش بالرسمي ! وقت مايحسب بيحسب بسعر البنك بس وقت مايخصم المبلغ بيحسبه بسعر السوق السودا

[ashouhdy]

انا لسة شارى النهاردة اونلاين ب 7.39 بالعمولة بكلة

وبالنسبة للاستاذ اللى عايز ياخد الدولارات في ايدية ودة في بلد ذى بلدنا مستحيل طبعا

لو حابب تشترى اعمل تحويل بنكي يأخي ؟ ما هو لو البنك فتحها كلة حيشفط و البنك يفلس والبلد تقع


مين اللى مدين للاعتذار لمين ؟ اللى بيدور على مصلحتة الشخصية ولا اللى بيتكلم في اسس اقتصاد بلد

ايباد اية وبتاع اية

[ashouhdy]

والعمولة اللى حضرتك محسسنى انها مصيييييييييبة وبياخد منك 2.5% فوق السعر الرسمي .. دى في كل دول العالم

ياريت تقرا وتبحث الاول قبل ما ترد يا فندم


مفيش بلد في العالم بتفتح خزائتها من العملة الصعبة الكل يسحب منها كما تشاء الا اباطرة البترول

[أبو آسر]

انا لسة شارى النهاردة اونلاين ب 7.39 بالعمولة بكلة

وبالنسبة للاستاذ اللى عايز ياخد الدولارات في ايدية ودة في بلد ذى بلدنا مستحيل طبعا

لو حابب تشترى اعمل تحويل بنكي يأخي ؟ ما هو لو البنك فتحها كلة حيشفط و البنك يفلس والبلد تقع


مين اللى مدين للاعتذار لمين ؟ اللى بيدور على مصلحتة الشخصية ولا اللى بيتكلم في اسس اقتصاد بلد

ايباد اية وبتاع اية

حقك عليا :)
فعلا الناس اللي عايزة الدولار في إيديها دي أكيد ناس عايزة توقع البلد وتفلسها وبتدور على مصلحتها الشخصية
بس الدولار مطلعش بـ 7.14 أهو يعني ^_^

[wael30003]

ملاحظة هامة جدا
ليه كتير من الاعضاء بيردوا على اسئلة بسخرية

وبيكون الرد يوحى ويعطى احساس ان الذى امامه لا يعلم اى شىء ...وانه هو الفهامه العلامه

ليه ما نردش على بعض ...بدون ما نجرح بعض ....
حتى لو اللى امامك ما يعرفش

اشرحه بشكل مبسط ....وخليك انت الاحسن ....

ده معلم البشرية ...امى ....وامتاز بالخلق العظيم

لنتأسى به ويكون قدوة لنا ....ونحتسب هذا الفعل عند الله يوم القيامه

[mk3]

دولار بالفيزا لاغراض تجاريه !؟ نفترض جدلا صحه كلامك...حضرتك متعرفش ان الفيزا لها ليمت يومى محدود جدا !!

[Karim Alaa]

يا شباب الناس بتتكلم على التجاااااااار الى محتاجين دولارات عشان يشترو من برا سواء خامات انتاج او منتجات جاهزه الدوله بتسمح بعدد محدود من المنتجات الى ممكن تاخد دولاارات عشان تشتريها و كمان عامله حدود و ده حقها لاننا معندناش كتير و كمان فى ناس مستفره بتستورد اكل قطط و كلاب و كافيار فالحكومه عندها حق لان العمله الصعبه محدوده و لازم تحدد دخولها و خروجها عشان منفلسش من العمله الصعبه نهائى
فى نفس الوقت فى ناس عندها مصانع شغاله و مشغله ناس و بتحتاج خامات من برا و الحكومه مش شايفاها مهمه فبيشترى دولار من برا غصب عنه و برضه ده عنده حق و فى ناس فاتحه شركات استيراد مشغله مئات من البشر و الاسر و برضه عندها حق و هى مشكله مش حكومه ولا افراد مشكله ندره العمله الصعبه فى البلد و عليه الحكومه لازم تعمل كده و الافراد غصب عنهم بيعملو كده مما خلق سوق سودا و اى حد معاه دولار عايز فيه اعلى سعر لانه لو باعه فى البنك مش بيعرف ياخده من البنك تانى لو احتاجه بالعكس بيروح يشتريه باغلى من تمنه بمراحل بس كده

[ashouhdy]

انا اسف لو ذعلت حد بكلامي

كنت منفعل شوية

[أبو آسر]

انا اسف لو ذعلت حد بكلامي

كنت منفعل شوية

أنا اللي بعتذر لحضرتك عن أسلوب التهكم في مشاركاتي
بس كلام حضرتك مش صحيح برده :)

[ashouhdy]

ليا صديق تاجر

ليميت الفيزا بتاعتة ربع مليون جنية

وعمرة ما اشتكي لان كلة تعاملاتة من علي النت وقليل قوي لما حد بيعاملة بفلوس كاش

حتي لو حد طلب بيقولي دول موضة قديمة دلوقتي بجيب اللي عايزة و بتكة زرار فلوسة بتوصلة

[ashouhdy]

يا عم اسر المهم اني وضحت سبل اخري للتعامل

و اكيد مش حبقي صح في كل كلامي انا بشر برضوا

[أبو آسر]

يا عم اسر المهم اني وضحت سبل اخري للتعامل

و اكيد مش حبقي صح في كل كلامي انا بشر برضوا

أبو آسر مش آسر :)
كلنا بشر وبنغلط مفيش مشكلة بس حضرتك فاهم الموضوع غلط
الدولار مش رفاهية ومينفعش حوار الفيزا والكلام ده للتجار الكبار اللي بيستوردوا من برة بالملايين
تخيل نفسك مستورد من الصين بتستورد أي حاجة ولتكن عربيات مثلا بما إننا في منتدى سيارات
محتاج شهريا ما لا يقل عن 10 مليون دولار مثلا لاستيراد فقط 1000 سيارة اقتصادية تكلفة الواحدة حوالي 75 ألف جنيه لتغطي حاجة السوق المحلي
هتروح للمصنع وتقولهم هدفعلكوا بالفيزا ؟!!
طب الفيزا دي هتشحنها ب10 مليون دولار منين ؟
هتقولي هفتح حساب وهحوله المبلغ أكيد مش هاخد الفلوس في شنطة !
جميل
هتجيب الدولارات اللي هتحطها في الحساب أصلا منين ؟!
البنك عمره ما هيديلك واحد على 1000 من المبلغ ده فبالتالي انت مسئول انك تتصرف ولذلك بيلجأ التجار للسوق السودا لأن البنك مش بيدي غير رقم محدود جدا جدا يادوب يكفي شراء آيباد أو نضارة شمس زي ما قلتلك قبل كده وبشروط قاسية كمان !
جرب روح كده البنك وقولهم عايز ألف دولار بس وشوف هيقولوك ايه
جرب افتح حساب بالدولار وقولهم معايا 100 ألف مصري وعايز أحطهم دولار شوف برده هيقولوا ايه
كلام حضرتك ده معناه ان السوق السودا دي ملهاش أي لازمة وكأن الناس بتروح تشتري منها رفاهية !
طب إيه اللي هيجبر واحد انه يشتري 10 مليون دولار من السوق السودا بسعر 7.50 مثلا وهو في البنك ب7.18 ؟ انت عارف الفرق كام بين الرقمين ؟ حوالي 24 مليون جنيه !!!
لذلك تلاحظ ارتفاع رهيب في أسعار كل حاجة مستوردة بالرغم من أن سعر البنك يعتبر ثابت ظاهريا طب ليه الأسعار بترتفع طالما الدولار سعره مستقر في البنك ؟! لأن الأسعار مش بتتحسب بناء على سعر البنك الرسمي وإنما بناء على سعر السوق السودا
ليه الحكومة سايبة الصرافات شغالة سوق سودا مع ان ده مخالف للقانون ؟! لأن مفيش بديل !!
أرجو يكون كلامي واضح ووجهة نظري وصلت لحضرتك