مشكلة مع امين شرطه

[Ahmed x]

بسم الله الرحمن الرحيم

انا حبيت اشارك مع حضاراتكم موقف حصلي وعاوز اعرف اتصرف ازاي لو حصلي تاني

الموضوع ان انا كنت بقرأ فتحتي عقبالكم جميعا في اسكندريه وبعد قراية الفتحه اتفقت مع خطيبتي اننا نخرج نتكلم مع بعض شويه قبل معاد الشبكه اهو نتعرف على بعض اكتر قبل ما يبقى الكلام الي بينا رسمي واتفقنا اننا هنتقابل قدام كوبري استانلي وقابلتها انا كنت استأذنت اهلها نخرج بس رفضوا قالو بعد الخطوبه بس انا طبعا كان لازم اقعد اتكلم معاها اعرف شخصيتها واسلوبها دا جواز يعني مش تقضيه وقت

واحنا قاعدين جالنا ظابط و3 امناء شرطه وطلب بطاقتي وادتهاله وسألني انت منين قولتله من المنصوره وكان محترم جددددددا لدرجه انه مبصش حتى لخطيبتي ومشا بعد شويه وقف حوالينا أمين شرطه وفضل يبص علينا طبعا انا مكنش فدماغي حاجه فجاه قرب مننا وطلب البطاقه وسألني دي مين معرفتش اقوله خطيبتي لانه مكنش فيه دبل في ايدينا ساعتها قولتله دي بنت خالتي قالها انتي يا اموره قوليلي اسمه بالكامل كدا هيا قالتله اسمي ثلاثي صح بس مكنتش عارفه اخر اسم وقالته غلط قام حط ايده على كتفي وقالي لو شفتك تاني هنا هوديك في داهيه انت وهي وشويه كلام ملوش لازمه وقالي اقف بعيد ووقف معاها قعد يقولها دا هيضيعك وهيضحك عليكي هياخد منك الي هوا عاوزه وهيرميكي وانتي شكلك بنت ناس وملكيش في الفضايح ولو شفتك معاه تاني هفضحك عند اهلك انا كل دا واقف مصدوم من الموقف بصراحه لاني اول مره في حياتي اتعرض لحاجه زي دي وانا كنت خايف اتكلم عشان معملش ليها مشكله مع اهلها عشان ميعرفوش اننا خرجنا من وراهم وكانت هتبقى مشكله احتمال الخطوبه تبوظ بسببها هيا قامت ركبت مواصله
ولقيته قرب مني جامد لدرجة ان وشه كان لزق في وشي وقعد يشتم ويقول كل واحد جايبلي واحده وقاعدين .......
هوا قالي امشي من هنا يلا مشوفش اهلك هنا تاني وعمال يقولي لو ما مشتش هرميلك التليفون الي في ايدك دا في الميه انا طنشته لاني مش عارف المفروض ارد اقوله ايه فلما مردتش مسك التليفون بتاعي وكان عاوز يرميه في البحر بس انا سحبته من ايده معملش حاجه ساعتها غير انه قالي طب يلا امشي من هنا وانا بعدت عنه وروحتلها لقيتها بتعيط وشكلي قدامها كان وحش جدا لدرجة اني لو مكانها هفكر الف مره اني ممكن اتجوز واحد مش قادر يدافع عن مراته ولا عن نفسه ؟؟

اتمنى انكم تساعدوني وتقولولي اتصرف ازاي في الموقف ده لاني حسيت ان كرامتي اتهانت مع اننا والله ما كناش لواحدنا كان فيه شباب وبنات كتير قاعدين مع بعض وكنا قاعدين محترمين يعني انا لو عاوز اعمل حاجات وحشه هروح اعملها على كوبري استانلي ؟؟؟؟؟؟؟؟؟؟؟؟؟
وشكرا ليكم واسف على الاطاله :(

[7oda]

امشى صح يحتار عدوك فيك

[mohamedzaki74]

طبعا موقف لا تحسد عليه المفروض الامين لما كان رجعلك كنت قله هو الظابط لسه كان شايف بطاقتي و كنت تكلمه بثقة ساعتها كان هيلم الدور
اما بالنسبة لخطيبتك فهمها ان سكوتك مش ضعف د ههههههههه خوف عليها

[wit]

اتق الشبهات

[Ahmed x]

امشى صح يحتار عدوك فيك

والله كنت ماشي صح وافرض انها مكنتش لا خطيبتي ولا قريبتي خليها واحده صحبتي هل من حقه انه يعمل كدا ويمشيني من المكان الي احنا قاعدين فيه؟؟

[Ahmed x]

طبعا موقف لا تحسد عليه المفروض الامين لما كان رجعلك كنت قله هو الظابط لسه كان شايف بطاقتي و كنت تكلمه بثقة ساعتها كان هيلم الدور
اما بالنسبة لخطيبتك فهمها ان سكوتك مش ضعف د ههههههههه خوف عليها

المشكله ان قبله فتشنا ظابط وكان محترم واتكلم معانا باسلوب محترم جدا جدا بس هوا من حقه انه يقولي امشي او انه يمسك تليفوني ؟

[أبو آسر]

انت غلطان من البداية انت وهي بخروجكم مع بعض بدون علم أهلها وتجاهل رفضهم للخروج قبل الخطوبة فبالتالي متزعلش مني تستاهلوا ودي قرصة وتنبيه من ربنا علشان تلتزم باتفاقك مع أهلها وتكون أد المسئولية لأن الحل مش في انك تعمل حاجة من وراهم دي مش جدعنة ولا رجولة حتى لو اتقابلتوا في مكان عام وفي عز النهار الموضوع مش انك هتعمل حاجة غلط الموضوع انك لازم تكون على قدر المسئولية والثقة وطالما بدأت حياتك معاها كده أمال بعد الجواز هتعملوا إيه ؟!
معلش كلامي شديد بس انت زعلان من موقف أمين شرطة معاك انت اللي حطيت نفسك في موضع شبهة قدامه ومعملتش حساب موقف أهلها لما يعرفوا إنكوا خرجتوا من وراهم وأعتقد لو عرفوا اعتبر موضوعك انتهى معاها لأن الناس مواقف وموقفك ده مش تمام

[amr011111]

كان المفروض لما روحتوا اتقدمتوا ليها كان والدك اتفق مع والدها ان انتوا داخلين على جواز وانكم عاوزين تتعرفوا على بعض اكتر وكان يفضل تقابلها فى بيتها بمعرفة الاهل
مكانش يبقى لما تقابلها بره كان يفضل تخدها مطعم او كافيه
المهم حصل خير
بالنسبه بقى للى حصل المفروض كنت تقول لامين الشرطه ان انتوا قاريين فاتحه وتقوله على اسمها الثلاثى ومتديش له فرصه انه يزود فى الكلام
ولا تسيبها وتمشى بعيد تبقى ناشف فى الكلام ان ديه خطيبتك ولو خدتكوا القسم عادى تتصل بوالدها وبوالدك وعادى

[J A G U A R]

انتو الاتنين غلطانين يا باشا
وتصرفك بالسكوت تصرف صحيح علشان لو رديت عليه فى الكلام ممكن تلاقي الكلابشات ف ايدك وتلاقى نفسك فى البوكس .. وبعدين لو عاوز تتعرف عليها اكتر الكلام ده بيبقى فى فتره الخطوبه والعمليه مش مستاهله اللى عملته ده من وجهه نظرى واللى بسببه مش بعيد اهلها يرفضوك تماما وهايبقى شكلك وحش قدام اهلك واهلها

[7oda]

والله كنت ماشي صح وافرض انها مكنتش لا خطيبتي ولا قريبتي خليها واحده صحبتي هل من حقه انه يعمل كدا ويمشيني من المكان الي احنا قاعدين فيه؟؟

لو انت ماشى صح ليه كذبت
كنت قولو واحدة صحبتىى لكن انت كنت خايف لأن احساسك من جوا ان انت بتعمل حاجة غلط

[Ahmed x]

هوا الحمد لله الخطوبه تمت بس انا مش واخدها عن قصة حب ومش عارف طريقتها ولا اسلوبها وكانت الخروجه مش عشان اتفسح والله وبعدين انتو عارفين ياما حصلت مشاكل وانا مش هروح اجيب شبكه بفلوس وارميها لناس مكنتس اعرفها فكان لازم الحكايه دي وحصل خير يعني
بس والله ماصحبتي لانها او صحبتي مكنتش اهتميت اصلا بالموضوع وانا عارف والله ان الخروج من ورا اهلها غلط بس لو انتو مكاني كان الوضع مش هيختلف كتير وانا عرضت الموضوع عشان تساعدوني في موضوع ان امين الشرطه شتم وقالي امشي والحوار ده مش ان دي خطيبتي ولا صحبتي والموقف ده ممكن اي حد غيري يتعرض ليه ويعرف يتصرف السؤال الي بسأله لحضراتكم في الموضوع هل انا اتصرفت صح بسكوتي ولا ﻷ ؟؟

طبعا انا قاعد مستني حضراتكم تقولولي اه عشان احس اني عملت الصح ومفضلش طول الليل افكر انا اتهنت ولا انا عرفت اتصرف ؟

[graffittiii]

بصرف النظر عن الموقف .
الراجل بيسأل هل اللي عمله أمين الشرطة قانوني ؟
وإزاي تاخد حقك وتحافظ علي كرامتك في موقف زي ده .
ماهي ممكن تبقي مراتك بس إنت نسيت بطاقتك في البيت .


علي الهامش بقي ... حاول لما تفتكر الموضوع ده مع خطيبتك تاخده بهزار .
قولها كنتي هتيجي تزوريني في السجن ولا هترجعيلي الدبلة
وكده تسلميني للضابط تسليم أهالي بدل ماتدافعي عني ...
دانتي شوية كمان وكنت هتقوليله من الصبح بيعاكسني وانا ولا أعرفه .
جو من ده يعني عشان ميفضلش سايب ذكري رخمه .
وربنا يتمملكم علي خير إن شاء الله يابرنس .

[Ahmed x]

بصرف النظر عن الموقف .
الراجل بيسأل هل اللي عمله أمين الشرطة قانوني ؟
وإزاي تاخد حقك وتحافظ علي كرامتك في موقف زي ده .
ماهي ممكن تبقي مراتك بس إنت نسيت بطاقتك في البيت .


علي الهامش بقي ... حاول لما تفتكر الموضوع ده مع خطيبتك تاخده بهزار .
قولها كنتي هتيجي تزوريني في السجن ولا هترجعيلي الدبلة
وكده تسلميني للضابط تسليم أهالي بدل ماتدافعي عني ... :e_braces[1]:
دانتي شوية كمان وكنت هتقوليله من الصبح بيعاكسني وانا ولا أعرفه .
جو من ده يعني عشان ميفضلش سايب ذكري رخمه .
وربنا يتمملكم علي خير إن شاء الله يابرنس .

والله بعمل كدا احسن من مفيش :)

وشكرا لذوق حضرتك والله يبارك فيك

[أبو آسر]

هوا الحمد لله الخطوبه تمت بس انا مش واخدها عن قصة حب ومش عارف طريقتها ولا اسلوبها وكانت الخروجه مش عشان اتفسح والله وبعدين انتو عارفين ياما حصلت مشاكل وانا مش هروح اجيب شبكه بفلوس وارميها لناس مكنتس اعرفها فكان لازم الحكايه دي وحصل خير يعني
بس والله ماصحبتي لانها او صحبتي مكنتش اهتميت اصلا بالموضوع وانا عارف والله ان الخروج من ورا اهلها غلط بس لو انتو مكاني كان الوضع مش هيختلف كتير وانا عرضت الموضوع عشان تساعدوني في موضوع ان امين الشرطه شتم وقالي امشي والحوار ده مش ان دي خطيبتي ولا صحبتي والموقف ده ممكن اي حد غيري يتعرض ليه ويعرف يتصرف السؤال الي بسأله لحضراتكم في الموضوع هل انا اتصرفت صح بسكوتي ولا ﻷ ؟؟

طبعا انا قاعد مستني حضراتكم تقولولي اه عشان احس اني عملت الصح ومفضلش طول الليل افكر انا اتهنت ولا انا عرفت اتصرف ؟

يا باشا انت قايل في أول الموضوع ان اللي حصل قراية فاتحة بس وأهلها قالولك تخرج معاها بعد الخطوبة فازاي الخطوبة تمت ؟!
وانت بتحكيلنا علشان نريحك ونقولك اه انت اتصرفت صح وتمام وبراوة عليك ولا نقولك الصح حتى لو مكنش على هواك ؟
أنا عن نفسي مش هقدر أغلط أمين الشرطة لأن انت اللي حطيت نفسك في الموقف ده خاصة لما كدبت عليه وقلتله دي بنت خالتي وهو هرش الكدبة لما سألها عن اسمك بالكامل وهي معرفتش تجاوب صح فبالتالي أنا لو مكانه هقول دول اتنين قاعدين بيتسلوا وفي وضع مريب وشبهة وكان ممكن ببساطة ياخدك على القسم ويلبسك أي تهمة فانت مفروض تحمد ربنا انها جت على كده لكن لو كنت ماشي صح من الأول مكنش حد هيبقى له عندك حاجة

[الاستاذ]

امين الشرطة صح
انت الى غلط
واحد شايف اتنين مع بعض عايزة يعمل اية ؟