هل يجوز كتابة شيك على الزوج بدلا من قائمة المنقولات الزوجية ؟؟؟

[Mahmoud Naguib]

ليا واحد صاحبي هيتجوز وهو مسافر برة فهو هيتجوز وياخد زوجته معاه
فأهل العروسة مقلقين شوية
فهو قالهم ممكن أكتب شيك مثلا لحد ما يرجع من السفر لمصر وبعدين يكتب قايمة عادي ؟؟

قإي حكم الشرع ف كدة ؟

[Adnfalcon]

اه وبالمره يمضوه علي كمبيالات و يمضوه علي بيته وعلي بياض
انا شايف ان الحوار دا غريب فزمن غريب .. يعني الشيك هو اللي هيطمنهم علي بنتهم ؟!!!
رحمتك يا الله

[mk3]

ههههههههههه
قال يعنى

[eslamrace]

ا/محمود اخبارك ايه
اظن الموضوع مش محتاج شيك لضمان حق بنتهم اذا كانوا شايفين فيه انسان يصلح لبنتهم فملهوش لازمه الشيك ولا غيره ولما ينزل مصر يبقى يحلها ربنا اما لو خايفين منه يبقى بلاش الموضوع من اساسه
واظن هو لو كتب شيك على نفسه علشان يتجوز عمره محيكون مرتاح فى بيته وهو حاسس ان حد مداينه او انه واخد حاجه وسايب رهن مكانها علشان يرجعها سليمه فحيحس ان الموضوع مادى بحت "اخد حاجه ودفع مكانها" وموضوع الجواز اساسه تفاهم وموده فكده الاساس اللى هو حيتجوز بيه حيكون غلط وبالتالى حيبنى على الغلط ده باقى حياته .
شرعا مش عارف بس اجتماعيا شايف الموضوع مينفعش
تحياتى.

[minicooper20]

لا يمضوه على بياض احسن

[Mahmoud Naguib]

ياجماعة هو مش فارق الأمر أوي معاه !
بس اللي فارق حكم الشرع

فياريت اللي يدخل يقول حكم الشرع أو لو ميعرفش بلاش يدخل ف مواضيع وآراء تانية !!

اسلام باشا ازيك معلش مكملناش كلامنا لأن الموب فصل شحن قريب لينا اتصال تاني ان شاء الله

[Mahmoud Naguib]

طب مهي القايمة اللي كلكم متجوزين بيها تعتبر شيك يعني !
ولآ هي أي تريقة ف أي حتة !

أنا ضد الموضوع ده تماما وعمري ما هعمله بس هي عقليات وأفكار !!
بلاش فزلكة الله يخليكم وكل واحد يبص لنفسه أفضل
أغلب اللي بيتريقوا مجوزين بناتهم بقايمة أصلا ويرجع يقول تخلف !!

حكم الشرع لو محدش يعرفه ميردش الله يخليكم !؟

[eslamrace]

ياجماعة هو مش فارق الأمر أوي معاه !
بس اللي فارق حكم الشرع

فياريت اللي يدخل يقول حكم الشرع أو لو ميعرفش بلاش يدخل ف مواضيع وآراء تانية !!

اسلام باشا ازيك معلش مكملناش كلامنا لأن الموب فصل شحن قريب لينا اتصال تاني ان شاء الله

تشرفنى يا باشا انا عرفت لانى كلمتك بعدها لقيت التيلفون فصل فعرفت انه فصل شحن ههههههه.
وعلى فكره حابب اقولك فى الموضوع ده ان الناس اللى ردت علقت كده لان القايمه بتكون حاجات الزوج استلمها وماضى لانه مفترض يسلمها لو حصل انفصال "لا قدر الله" فده بيعتبر فى كتير من الاوقات حق مشروع انما الشيك هو بيمضي على ايه او مقابل ايه
رجاء تقبل خروجى عن الرأى الشرعي "لانى معرفوش " بس وجب التوضيح.
تحياتى.

[Bassem Youssef]

يعني اهل البنت مأمنين علي بنتهم مع صاحبك بس مش مأمنين صاحبك علي شويه فلوس ؟؟؟

لا وجهه نظر برضه -_-

[Adnfalcon]

القايمه مش تخلف علي فكره .. و السؤال بتاعك مفهوش علاقه بالشرع .. هو صاحبك بس استغرب انهم يكتبوا شيك عليه كضمانه !! ويتمني انه حرام شرعا
بس هو مش حرام .. دي الأجابه
واحنا غلطانين اننا كنا بننصح صاحبك .. احنا اسفين
بس المهم يقطع الشيك لما يرجع و يكتب القايمه

[امجد مروان 454]

شوف حضرتك مبدئيا نتفق ان الشيك بديل عن القائمة لحد الرجوع من السفر وبالتالی ينطبق عليه ماينطبق علی القائمة.
أنا يمكن كنت من فترة متضايق من موضوع القائمة وإن ده يعتبر إقلال من كرامة الزوج لكن بعد ما بحثت ودورت اكتشفت إنی غلط ولقيت إن الموضوع مش زی ما احنا متصورين اكتشفت القائمة هی بديل للمهر اللی ما بيدفعش اصلا نظرا للحالة المعيشية فی مصر واللی المفترض يتم شرعا ان الزوج هو المتكفل بالزواج كليا حتی بملابس زوجته وده موجود فی دول كتير ومع ذلك أيضا بيدفع مهر وعلی فكرة المهر ده شرط من شروط الزواج
وبالتالی ده يعتبر مهر مؤجل السداد ولو حصل انفصال _لا قدر الله_بيقی العفش من حق الزوجة لانه مادفعش مهر من الأساس وموضوع ان احنا شباب واحنا بنكافح وكده مش لازم يعمينا عن الحق يكفی يا أخی إن الزوجة بتشارك معاك فی منزلك ومعظمنا لو حد اتقدم لأخته أو بنته وهو مش حابب الأمر برضه هيخليه يكتب قائمة حفظا لحقها يبقی بلاش ننظر للموضوع من زاوية واحدة
ونسأل نفسنا سؤال هل لو حد اتقدم لأختك وجه ساعة الموضوع ده ورفض حتی لو هو مين هتعترض وتقول ده مش شاريها و....الخ
أما موضوع الشيك برضه فهو كده يعتبر بدل القائمة اللی هی اساسا المهر وهو حل مناسب جدا ومفيهوش تخوين أو حاجة ده بنت لا حول لها ولا قوة ومع راجل غريب فی بلد غريبة ومفيش ولی أمر للمسلمين يبقی مفيش مشكلة وأنا لو مكانه هأعمل كده ولو مكان ولی أمرها هاطلب منه كده والأمر ده راجع للعرف والعرف إذا لم يخالف الشرع فلا مانع من العمل به وطالما الأمر يتم بالرضا والمعروف.
.*سئلت اللجنة الدائمة :.ما حكم الإسلام في ما يسمى بـ (القائمة) وهي عندنا: أن تكتب في وثيقة الزواج وهي تتكون من المنقولات التي أحضرها العريس أو التي لم يحضرها العريس، ويقال: إنها من المصالح المرسلة لخراب الذمم، قياسا بوثيقة الزواج؟ فأجابت : "إذا كان الأمر كما ذكر، فلا مانع من ذكرها في وثيقة الزواج، والتوقيع من كل من الزوجين عليها حتى إذا حصل خلاف يوجب الخلع يكون ما دفعه الزوج واضحا لا لبس فيه. وبالله التوفيق" فتاوى اللجنة الدائمة - المجموعة الأولى - (19 / 39)
وبالتالی الأمر مفيهوش مشكلة بل هو الأصلح فی هذه الظروف

[ahmed1981]

شرعاً يعتبر الشيك ده بديل المهر
لغاية ما يرجع ويجهز شقته اللي هي بديل المهر برضه وياخد شيكه

القائمة أو القايمة ما هي إلا بديل عن المهر

الرجالة اللي زعلانه من القايمة
بلاش قايمة خالص
بس إدفع مهر وجهز شقتك
مفيش يبقى قايمة
إلا إذا أهل العروسة مش عايزين قايمة فدي حاجة ترجعلهم

ISLAMIC AHMED1981: قائمة المنقولات الزوجية ( نموذج لقائمة المنقولات بصيغة وورد في نهاية الموضوع )

ـ

[ahmed1981]

أزيدك من الشعر بيت

في ناس بدل موضوع الشيك بيطلبوا دهب بمبلغ كبير يغطي القايمة وفرش الشقة وووو

ولما بيرجع بيبيعوا الدهب وبيجهز بالفلوس شقته
وهي بتجهز الجزء المتفق عليه
وبرضه بيكتبوا قايمة

[volociximab]

شرعا مش عارف
عرفا انا مش شايف فيها مشاكل و لا اهانه مانت بتمضى على القايمة و احيانا بيحطوا فى القايمة حاجات زيادة زى دهبها و ناقص يحطوا هدومها
بس كما هم يحتاطون هو كمان يحتاط و ميمضيش على بياض
و يشوف حكم الشرع طبعا

[A.Saad]

شرعا زى ما الاعضاء قالوا عن القائمة
بس الحق انها تكتب بقيمة اللى الزوجة جابته بس
مش حاجات الزوج جابها كمان
تانى نقطة صاحبك غفل عنها
ان القائمة لو حصلت مشكلة بتاخد الزوجة الاثاث اللى فيها
او هو من حقه يعرضه قانونا عليهم لاجبارهم على استلامه ويبقى خالى الذمة
لكن الشيك بكل سهولة من تانى يوم بقى سيف عليه
وممكن يجبروه على اى حاجة بيه
يكتب شقة ولا يديها دهب ولا يعمل اى حاجة