هــربــت مـن المــدرســه كــام مــرة !!!

[elassar2010]

بصراحة موضوع شيق جدا
انا مكنتش بدخل المدرسة فى ثانوية عامة غير ممكن اثبت نفسى فى الحصة الاولى وزوغ بس طبعا كنت بثبت نفسى الساعة عشرة كنت باخد الغياب واعدلة ولو معرفتش كنا شلة نقطع الغياب وبالتالى المدرسة هتحضر الفصل كلة
فة تالتة ثانوى انا كنت اشهر واحد فى المدرسة كنت ادخل المدرسة الساعة 11الصبح اسلم على صحابى وامشى لدرجة انى مكنتش اعرف انى فى اهنى فصل المدرسين كانو يتحيلوا انى احضر وانا اقولهم لالالالالالالالالالا كلا البتة
وكل يوم واحد صاحبى يقولى شالو اسمك من قائمة الفصل وانا ولا فى دماغى وليا صحابى راحو اشتروا جواب من التامين الصحى 50جنية اة والله بحالهم علشان يعذروا فى 15يوم يعنى اليوم بكام؟؟هههه مش مشكلة
وفى الاخر كالعادة الوزير رجع كل الى اتفصلوا علشان الغياب حرصا على مصلحة الطلبة ههههههه
يعنى امتحنت عادى ولا رحت تامين صحى ولا دفعت فلوس ولا صحيت بدرى
كانت ايام جامدة

[ehabradwan]

انا زوغت مرة واحدة بس
وماحبتش التزويغ بصراحة

[mesaharaty]

بالنسبة لموضوع الهروب ده ما كانش بيجى على بال الواحد ابدا ، كنا فى غاية الإلتزام
مافيش غير هى بس مرة فى تالتة ثانوى نطيت من على السور وكنا فى أواخر العام الدراسى والعملية كانت مهرجلة شوية ونطيت من سور عالى جدا لدرجة إنى بعد ما تسلقته بقيت مش عارف أنزل إزاى ولا أرجع تانى من مطرح ماطلعت (إحتست جدا)
وفاكر اليوم ده من عشرين سنة لحد دلوقتى بكل تفاصيله لأنه كان جميل جدا ومشمس ورحنا اتمشينا فى وسط البلد ودخلنا المتحف المصرى وفضلنا نكلم السواح ونتصاحب عليهم وكان كله ضحك .
أياااااااااااااااااااااااااااااام

[tamohsen]

طبعا بس في تانيه وتالته ثنوي بس
لكن كنت بزوغ بكرامتي من الباب , يمكن مرتين ولا تلاته

meza من وصفك كده حاسس انك كنت في نفس مدرستي

[Ayman_Abdullah]

بص ياسيدى

انا كنت بهرب كتير بس مش دى المشكلة ز المشكلة انى مره كنت ناطط من على السور و قاعد قدام المدرسة مستنى باقى العصابة ** و هنا كانت المفاجأة ***
ببص جنبى لقيت والدى العزيز:k35::k35:
و سألنى السؤال الشهير اللى هو طلعت لك الفصل ملقيتكش ليه؟
الرد: اصل الحصص خلصت و قولت أنط من الصور عشان أروح بدرى أزاكر
و من ساعتها وهو ماسكهالى و اعتبر ان الحكاية دى سبب أى فشل فى حياتى

[mido777]

كانت ايام جميلة

انا كنت من ضمن شلة كانت مزهقة مديرية التربية والتعليم فى الأسكندرية من كتر المشاكل اللى كنا بنعملها

لدرجة ان مدير المدرسة كان بييرافبنا ويبعت ورانا ناس تشوف احنا بنروح فين وبنعمل ايه وبعد ما يتأكد اننا فى مكان معين يروح بنفسه ومعاه 3 - 4 مدرسين وميكروباص ويلمنا فيه زى الشرطة لما بتنزل حملة على مكان فيه مسجلين خطر ...

[fady.bekatcho]

بصو بقى مش هضيف جديد لو قلت إنى ياما هربت من المدرسة لإن ده أغلب حال الشباب فى مرحلة الثانوى
وأنا بصراحة مكنت بصدق إنى أخلع من المدرسة لدرجة إننا كنا لما بنروح متأخر ونلاقى الباب مقفول كنا بنتمنى إن المدير ميرضاش يدخلنا علشان تبقى جت منهم ,
وكان أغلب الأماكن اللى بنروحها هو آى ملعب أو شارع نلعب فيه كورة وساعات بتطلب معانا سينما أم ال 5 أفلام ب 3 جنيه وحاجات كدا

وحكايه الهروب دى بتفكرنى بموقف عمرى مهنساه طول عمرى ,
كنت أنا وصحابى أصلآ متفقين إننا مش هنروح المدرسة وكل واحد هيبلبس الحتة الجديدة ومظبطين إننا هنروح الرحلة النيلية بتاعة القناطر واللى كانت معظمها شباب وبنات كتين زينا ,
المهم روحنا القناطر وإحنا هناك واحد صاحبى بالصدفة أبوه كان هناك وأبوه شافوه ولحد كده الموضوع كويس ,
الكارثة بقى إن الواد هو كمان أفش أبوه مع واحدة ,
لأ وإيه كمان أبوه ماشى مع واحدة وحاطط إيده على كتفها ولا أحسن حبيبه
وإحنا اللى شوفنا أبوه الأول وأول مشوفناه من ضهره ندينا عليه
وهو من غير مايبص بشوف مين بينادى راح داخل جوه هدومه وقلبك وقع فى رجليه ,
والراجل يسأل إبنه إنت إيه اللى جابك هنا إنت مش المفروض فى المدرسة ,

الواد يرد إنت إيه اللى جابك هنا ,
وأنا وصحابى ميتين بجد من الضحك
واللى عرفناه إن كل واحد فيهم فضل يعامل التانى فى البيت كإنه ماسك عليه زلة
معلش طولت عليكو بس بجد موقف عمرى مهنساه والموضوع ده فكرنى بيه

هههههههههههههههههههههه

جامد جدا الموقف دا

[fady.bekatcho]

لا انا مرة هربت وانا فى اعدادى دا طبعا غير ثانوى التلات سنين هروب زى ما قلت لغاية ما اتفصلت نهائى وخدها منازل

مرة هربت وانا فى اعدادى ورحنا اجرنا موتسيكلات انا واخويا وواحد صحبنا

وماشين فى شارع عبد السلام عارف فى بنى سويف


ابص على العربية الى جنبى الاقيها المدير بتاع المدرسة

هيا كانت مدرسة خاصة

بعيد عنكم رحت تانى يوم خدت علقة تمام منة عمرى ما هنساها

[نور القمر]

---

بناء على طلب من العضوة نور القمر

يا ترى حد فيكوا كان بيهرب من المدرسة ؟
طب لو مكنتش بتهرب.. ليه مهربتش من المدرسة ؟
ولو هربت كنت بتهرب وتروح فين ؟
وكنت بتهرب ليه ؟

يا ريت الصراحة التامة

ههههههههههههههه فضايح علشان اللي مشفش ردي اول مرة يشوفو دلوقت مش كدة
والله والله مرة واحدة بس وكانت اخر السنه واليوم فاضي مفيش دراسة وكنت محبش اضيع حصة رياضيات ابدا كنت بعشقها وكنت لازم اروح علشانها والسور كان مهدود مش نطيت وكدة
والله روحت على البيت اذاكر على فكرة انا كنت بطلع الاولى على فصلي
شوفتوا انتم ظلمتوني ازاي
وبصراحة كمان انا كنت بزوغ ايام الكلية على طول اول سنه بس تقريبا كدة مكناش بنحضر غير مادة واحدة

بس بصراحة موضوعك تحفة وردود الاعضاء كلها تموت من الضحك زي ما يكونوا ما صدقوا حد يفكرهم بالذي مضى ههههههههههههه

[ethan82]

انا كنت في مدرسة القبة الثانوية وطبعا معتقدش ان كان في حد في المدرسة مبيعرفش يهرب . انا بقي كنت باخدها من اولها ومدخلش أصلا . علي القهوة الصبح شوية وبعدين (سينما أو كورة) وعيش حياتك .

الحمد لله اترفدت مرة في تانية ثانوي و مرتين في تالته . كل مرة عملت اعادة قيد والمرة الأخيرة خوفت أقول لابويا .

[wael_adel31]

يابختوكو أنا لم تتاح ليا فرصة الهرب من المدرسة لأنى كنت عايش فى السعودية بس أول مجيت هنا ودخلت الجامعة وشفت صحابى بيزوغو من المدارس بقيت أزوغ أنا كمان من الحضور وكنا غالبا بنروح نلعب بلياردو أو نقعد نشيش فى الخباثة على أى قهوة مغمورة يــــــــــــــــــــاه أيام جميلة .

[wael_adel31]

طب حد من اللى كانو عايشين فى مصر الجديدة فاكر قهوة كتكت اللى فى روكسى وأدهم بارك ؟

[نور القمر]

يابختوكو أنا لم تتاح ليا فرصة الهرب من المدرسة لأنى كنت عايش فى السعودية بس أول مجيت هنا ودخلت الجامعة وشفت صحابى بيزوغو من المدارس بقيت أزوغ أنا كمان من الحضور وكنا غالبا بنروح نلعب بلياردو أو نقعد نشيش فى الخباثة على أى قهوة مغمورة يــــــــــــــــــــاه أيام جميلة .

طيب عايزين نصدر رياضة قفز الاسوار للسعودية نعمل ايه
احسن كدة المصريين المغتربين صعبوا عليا بجد

[أشرف العدوي]

فا جم بالليل هدولنا سور المدرسة عشان نخش براحتنا

أنت كنت في الأرومان النموذجية
أصل الموقف ده حصل عندنا و كانت مدرسة بدون سور
انا بقى يعتبر من أول ثانية ثانوي مدخاتش المدرسة غير في الأمتحانات
بجد متعة حقيقية
الي كان في الاورمان يعرف الكلام ده
لما كنت تنط من عند سور الفيلا الي في أخر المدرسة ( يا سلام )
و انا مرة اتحشرت تحت الباب الي على الشارع الجانبي ( كان العيال يجرو و هوب يتزحلقوا من تحت الباب على حتة كرتونة ) انا كنت مليان شوية
و مرة تانية في الباب الخلفي وقعت من عليه و جالي تمزق في الاربطة روحت تسلقت الجامع و ما بقتش عارف انط و لا برة و لا جوة لحد ما الباب اتفتحت في اخر اليوم
بجد متعتة ايام ثانوي في التزويغ
انا بصراحة كنت بزوغ علشان بحب ازوغ
كنت بروح جيم في المنيل و اروح

[نور القمر]

لو سمحت الادارة تخلي الموضوع ده للكبار فقط وتمنعه عن الاعضاء الصغيرين
علشان الاعضاء اللي لسه طلبه ميتعلموش من الاعضاء الكبار فنون التزويغ