حكايات البشر

[H.ibrahim]

اسمحى لى يادكتورة اهنئيكى بافضل نسبة للمشاهدة وشد اهتمام الاعضاء و اغير العنوان الى ( حكايات البشر .. مش هتقدر تغمض عينيك او مش هتقدر تقفل الكمبيوتر او مش هتقدر تخرج غير لما تخلص الموضوع ) هههههههههه الى الامام بدون توقف و احييك على مشاعرك بكل بنى ادم

[muslimah_dentist]

بجد الموضوع كل شويه بيشدنى اكتر من الاول الى الامام

جزاك الله خيراً أخى الكريم و شكراً على مرورك

[muslimah_dentist]

اسمحى لى يادكتورة اهنئيكى بافضل نسبة للمشاهدة وشد اهتمام الاعضاء و اغير العنوان الى ( حكايات البشر .. مش هتقدر تغمض عينيك او مش هتقدر تقفل الكمبيوتر او مش هتقدر تخرج غير لما تخلص الموضوع ) هههههههههه الى الامام بدون توقف و احييك على مشاعرك بكل بنى ادم

جزاك الله خيراً أخى

لو كان الموضوع ده حلو ، هو بقى حلو بيكم و بتواصلكم و ردودكم الجميلة.

[muslimah_dentist]

:wacko:الحكاية العاشرة:wacko:

النهاردة حكايتنا كلها عن "الحب" ، الحب اللى بنحبه لأقرب الناس لينا يا اما أهالينا أو أزواجنا أو زوجاتنا أو أطفالنا و بننسى نقولهم كلمة بسيطة أوى بس هم محتاجينها " بحبكم".نبتدى الحكاية.......................

بتيجى العيادة كتير حالات لنساء فوق الأربعين سنة مُصابات بمرض اسمه Lichen Planus ( للأسف مأعرفش ترجمته بالعربى) المرض ده مرض جلدى بس ساعات كتير بيظهر فى الفم قبل ما يظهر فى الجلد أو يكون مُصاحب لظهوره فى الجلد ، المرض ده من أنواع الأمراض المناعية اللى الجسم بيهاجم فيها نفسه و غالباً ما يُصيب النساء فوق سن الأربعين و غالباً بيكون السبب موت حد من العيلة فتُصاب السيدة بحزن شديد فيؤثر فيها نفسيا و بما ان الجسد كتلة واحدة ده بينعكس فسيولوجياً فى شكل مرض من الأمراض.

أنا شفت ستات عندهم المرض ده و كان السبب الرئيسى للاصابة بيه أنهم فقدوا أزواجهم فسائت حالتهم النفسية فجالهم هذا المرض لأن زى ما قالوا:كان عزيز عليا أوى يا دكتورة.

معلش صدعتكم بالحاجات العلمية ديه ، بس ديه مقدمة كان لابد منها ، لأنى حاولت أبص للموضوع من وجهة نظر أخرى و سألت نفسى سؤال : ليه بنستنى ان احنا نفقد أحبائنا عشان نعرف أد ايه كنا بنحبهم؟ ليه دايماً بنحاول نكتم مشاعرنا و مبنصرحش بيها لأقرب الناس لينا الا و احنا بنفقدهم؟ هى كلمة"بحبك" ليه بقت صعب تتقال؟

تعالوا نسأل أنفسنا هذه الأسئلة و سأترك لكم الاجابة و لكن لنعد بعضنا البعض هذا الوعد أن نذهب اليوم الى كل من نحب و نقول له " أحبك فى الله"

السؤال الأول:
يا ترى كم مرة نظرنا فيها الى أبائنا أو أمهاتنا و قلنا لهم " أحبكم"
بحبكم عشان خلتونى الانسان أو الانسانة اللى أنا عليه أو عليها دلوقتى
بحبكم عشان مش عايز أكتمها فى قلبى و أبقى أصرح بيها ليكم أما أفقدكم
بحبكم عشان انتم اللى جعلكم ربى سبب وجودى فى الحياة
أو بحبكم و خلاص من غير أى سبب.........لأنكما أبى و أمى..
يالا نوعد بعض ان احنا نروح النهاردة لأهالينا و نقولهم "بحبكم" على أد ما الكلمة بسيطة و مش هتكلفنا حاجة بس هما محتاجين يسمعوها.

السؤال الثانى:
هو موجه الى كل" زوج" و" زوجة" .بعد ما سنين الزواج بتكتر و المسئوليات بتكبر كلمة بحبك بتوه فى النص و للأسف ممكن تضيع .

الى كل زوجة:
كل ما بأقعد مع الستات فى أى قعدة فاكهة القعدة هى النميمة على أزواجهم و أقعد أقولهم :يعنى كله وحش كدة مفيش حاجة حلوة خالص بتفتكروها ليهم و أما بأسئلهم السؤال ده:بيقولوا طبعاً فيه ، فبقولهم ساعتها:طيب افتكروها ليهم.بس هو ده حال الستات كما قال رسول الله صلى الله عليه و سلم " يلعن الدهر و يكفرن العشير" و بما انى ست من الستات و زوجة من الزوجات بأنصح نفسى و اياكم:
ساعات كتير أوى بنبقى احنا جزء كبير من المشكلة أو احنا المشكلة جوزك اللى انتى عمالة تذمى فيه ده بقى كدة أكيد بتصرفاتك و ممكن نسيتى فى النص تقوليله" بحبك"
هى كلمة بسيطة بس هتدوب جبال منكم من البرود العاطفى و الخلافات الزوجية، حاولى حبيبتى فى الله أن تقولى لزوجك " أحبك " لأنه سبب دخولك الى الجنة.

الى كل زوج:
أنا عارفة ان المسئوليات عليكم كبيرة دلوقتى فى ظل الظروف الحالية اللى ممكن تخليك عمال تلف حوالين نفسك عشان تعيش زوجتك و عيالك عيشة كريمة ، بس انت ممكن تنسى حاجة فى النص بسيطة أوى بس بترجع للحياة معناها الحقيقى اللى انت خرجت عشانه من بيتك و تعبت عليه انك تقول لزوجتك"بحبك" ، مش لازم تجيب لمراتك هدية غالية عشان تقولها بحبك ، مراتك عايزة تسمع الكلمة ديه و بس و مش عايزة معاها أى حاجة تانية ، هى مش عايزة غير الكلمة ديه و بس.

السؤال الثالث:
ساعات أما عيالنا بيكبروا بتضيع منا كلمة"بحبك" فى النص و بما ان الحب مُعدى عيالنا مابيفتكروش يقولوها لنا .
يعنى مثلاً ماكنتش بأحس أوى بحب أمى و أبويا ليا غير أما أتعب أوى و أبقى طريحة الفراش و كلامات الحب تنهمر عليا من كل حدب و صوب ، هو لازم عيالنا يتعبوا يا جماعة عشان نقولهم " بحبكم" ، و نقول العيال مش بيسمعوا الكلام ، العيال تاعبنى ، ما هو احنا اللى مأوجدناش لغة حزار بينا و بين عيالنا لأننا ببساطة مصرحناش بحبنا ليهم ، ممكن نكون أدينالهم كل الاحتياجات المادية بس نسينا شئ على أد ما هو بسيط هو كبير أوى فى عينهم نسينا نقولهم " بحبكم:

الأسئلة خلصت ة ياريت نكون خرجنا منها بحاجة ، أنا خرجت منها ان كلمة" بحبك " على أد ما هى بسيطة بس هى اللى احنا اكتر حاجة محتاجنها دلوقتى و يا سلام لو كان كل هذا الحب فى الله .

آسفة انى طولت عليكم النهاردة............

[AHMEDCAR]

الحكايه العاشره دى فعلا انتى قدرتى تستنبطى منها نقاط مهمه جدا جدا

و هيه ليه الواحد مش بيصارح اللى قدامه بحقيقه مشاعره و هو عارف انه بيحبه و مايقدرش يستغنى عنه بالرغم من كده مخلى الحياه ماشيه روتينيه و مش بيحب يجدد فيها و بيقول ماهيه ماشيه يعم هاتدخلونا فى كلام الافلام و الحوارات دى ليه

و اول ما بيبعد عنه حبيبه بتبان الحقيقه طيب ماهو كان من الاول تقدر تكسبه

انا بتكلم بصفه عامه و مش ضرورى يكون الكلام ده للازواج فقط

[aif]

يااااااه يا دكتورة ....
انا اول مرة اشوف الموضوع الرائع ده وقرأت الموضوع بالكامل دلوقت
.....
ده انا كنت فاكر اني مش ح الاقي حد من الدكاترة ( مع احترامي الشديد لهم جميعا ) لسة بيفكر في شعور المرضى بتوعه ....
اكتر حاجة بتضايقني من الدكاترة .... انهم بيسمو المريض بتاعهم .... حالة Case بدل ما يقول الراجل ده او المريض ده.... يقولو الحالة دي .... زي ما يكون مش إنسان ..... انتي اول طبيب او طبيبة اقابله .... بيحاول يشعر بانسانية المرضي .... ربنا يباركلك
طبعا اكيد فيه كتير زيك .... الدنيا برضه لسة فيها خير .... لكن انا اعتقد اني ما اتعاملتش مع حد منهم .....
عشان ما حدش يفهمني غلط .... انا اقصد اثناء تأدية عملهم وليس في حياتهم الخاصة ....طبعا كل طبيب في حياته الخاصة بيكون شخص آخر ... لكن ده ما يمنعش انه حتي اثناء عملة يكون رحيم .... ويفكر في الانسان اللي تحت ايده
لكن برضه علشان ما نظلمهمش .... الاطباء بتبقي حياتهم معظمها بين المرضى والدماء والآلام و الجراحات .... الخ
ممكن برضه شعورهم بالمرض والمرضى بيختلف عننا من واقع ان ده جزء من عملهم .... إن ما كنش كل عملهم ....

الراحمون ..... يرحمهم الرحمن

موضوع رائع من شخصية رائعة ...... ربنا يوفقك في دراستك وحياتك ودينك ودنياك ..

[muslimah_dentist]

الحكايه العاشره دى فعلا انتى قدرتى تستنبطى منها نقاط مهمه جدا جدا

و هيه ليه الواحد مش بيصارح اللى قدامه بحقيقه مشاعره و هو عارف انه بيحبه و مايقدرش يستغنى عنه بالرغم من كده مخلى الحياه ماشيه روتينيه و مش بيحب يجدد فيها و بيقول ماهيه ماشيه يعم هاتدخلونا فى كلام الافلام و الحوارات دى ليه

و اول ما بيبعد عنه حبيبه بتبان الحقيقه طيب ماهو كان من الاول تقدر تكسبه

انا بتكلم بصفه عامه و مش ضرورى يكون الكلام ده للازواج فقط

صدقت أخى الكريم .

لا نشعر بقيمة الشئ حتى نفقده.

[muslimah_dentist]

يااااااه يا دكتورة ....
انا اول مرة اشوف الموضوع الرائع ده وقرأت الموضوع بالكامل دلوقت
.....
ده انا كنت فاكر اني مش ح الاقي حد من الدكاترة ( مع احترامي الشديد لهم جميعا ) لسة بيفكر في شعور المرضى بتوعه ....
اكتر حاجة بتضايقني من الدكاترة .... انهم بيسمو المريض بتاعهم .... حالة Case بدل ما يقول الراجل ده او المريض ده.... يقولو الحالة دي .... زي ما يكون مش إنسان ..... انتي اول طبيب او طبيبة اقابله .... بيحاول يشعر بانسانية المرضي .... ربنا يباركلك
طبعا اكيد فيه كتير زيك .... الدنيا برضه لسة فيها خير .... لكن انا اعتقد اني ما اتعاملتش مع حد منهم .....
عشان ما حدش يفهمني غلط .... انا اقصد اثناء تأدية عملهم وليس في حياتهم الخاصة ....طبعا كل طبيب في حياته الخاصة بيكون شخص آخر ... لكن ده ما يمنعش انه حتي اثناء عملة يكون رحيم .... ويفكر في الانسان اللي تحت ايده
لكن برضه علشان ما نظلمهمش .... الاطباء بتبقي حياتهم معظمها بين المرضى والدماء والآلام و الجراحات .... الخ
ممكن برضه شعورهم بالمرض والمرضى بيختلف عننا من واقع ان ده جزء من عملهم .... إن ما كنش كل عملهم ....

الراحمون ..... يرحمهم الرحمن

موضوع رائع من شخصية رائعة ...... ربنا يوفقك في دراستك وحياتك ودينك ودنياك ..

طيب الحمد لله انى رجعلتلك الأمل فى الدكاترة من تانى

بس صدقنى و الله فيه دكاترة أحلى و أحسن منى بكتير أوى و أنا بالنسبة لهم و لا حاجة و ممكن دول اللى علمونى انى احترم المرضى و الالآمهم.

و أعتذر على كلمة case اللى بتضايقك و أنا أكيد من الدكاترة اللى بتقولها بس احنا زى ما بنقولها و نتعود على رؤية المرض و المرضى احنا برضه بنتأثر بيها يعنى أنا عمرى ماشفت دكتور فى حياتى قابلته حالة سرطان و شخصها الا و رجع بيته متأثر ممكن نكون مش بنبين ده للمريض بس احنا برضه بشر من روح و لحم و دم.

جزاك الله خيراً على مرورك و تواصلك أخى الكريم.

[muslimah_dentist]

تنبيــــــــــــــــــــه هــــــــــــــــــام

فى الحكاية اللى فاتت أنا استشهدت بقول رسول الله صلى الله عليه و سلم و قلت (يلعن الدهر و يُكفرن العشير) و ده خطأ الصحيح هو (تُكثرن اللعن و تُكفرن العشير)

شفتم الماجستير لخبط صواميل مُخى ازاى:K15:

[muslimah_dentist]

:wacko:الحكاية الحادية عشر:wacko:

تعالوا النهاردة نتكلم شوية عن الدكاترة النصابين اللى بيضحكوا على العيانيين عشان يأخدوا منهم فلوس كتير و هم عارفين ان حالتهم لا محتاجة علاج و لا حاجة

جت مرة العيادة طبيبة زميلة معايا فى القسم قالتلى ان قربيتها بنت صغيرة بتعانى من صبغيات داخلية فى الأسنان(الصبغيات الداخلية عبارة عن صبغيات فى التركيب الداخلى للأسنان عكس الصبغيات الخارجية التى تُزال عن طريق التلميع أو التبييض) و البنت ديه كانت بتعانى من نوع من أنواع الصبغيات الداخلية اسمه العلمى (enamel hypoplasia)

و بتقول انها راحت لدكتور و قالها هأحطلك مادة عشان تكون و تدارى الصبغيات ديه و جت الدكتورة زميلتى تالنى:هى فيه مادة فعلاً بتعالج الحاجة ديه.
قلتلها:على حد علمى مافيش ، قلتلها طيب نسئل اللى أكبر مننا و اتصلت بدكتور كبير عندنا فى القسم و أما قلتله قعد يضحك:قالى طبعاً بيضحك عليها و عايز يأخد منها قرشين و السلام .
المهم الدكتور ده كان عايز يأخد من البنت كدة يجى ألفين جنيه عشان يخترعلها المادة الجهنمية اللى مفيش حد اكتشفها غير سيادته.

فيه غيره كتير أوى بيجيولى العيادة برضه الدكتور عارف ان حالتهم ماينفعش فيها حاجة و يطلب منهم مبالغ ممكن تصل الى 12 ألف جنيه:k20: عشان سيادته عايز يأخد قرشين و السلام مش مهم بأه الناس ديه يحصلها ايه بعد كدة

سؤال الى الطبيب اللى بيغش و ينصب على مريضه؟
انت ازاى بتعرف تنام بالليل؟؟؟؟؟؟؟؟؟؟؟؟؟؟
ألا تخشى الله ؟؟؟؟؟؟؟؟؟؟؟؟؟؟؟؟؟؟
ألا تخاف من الوقوف بين يدى الله يوم القيامة ؟؟؟؟؟؟؟
و الله كما تدين تُدان سيُفعل بك ما فعلته فى مرضاك يوماً من الأيام ، الله يُمهل و لا يُهمل.

[muslimah_dentist]

كفايـــــــــة حكايــات و لا نكمـــــــل

[H.ibrahim]

طبعا نكمل هي ديه محتاجة سوال يادكتورة .. كملى الله يبارك لك .

[AHMEDCAR]

انتى جايه بعد ماشوقتينا تقولى نكمل ولا لا ناقص تقولى كمان ادفعوا فلوس علشان احكيلكوا

كملى يا شيخه الله يرضى عليك

[muslimah_dentist]

طيب هنكمل ان شاء الله......

:wacko:الحكاية الثانية عشر:wacko:

أكتر كلمة بأسمعها فى العيادة"آه يا دكتورة ضرسى وجعنى" و كما هو مُسجل علمياً ان وجع الضروس من أشد الالآم التى يمكن أن تمر بالانسان و معه أيضاً المغص الكلوى.........

أنا من كتر مابأسمع كلمة "آه"قعدت مرة أتأملها......

قلت يا سبحان الله ، أد الانسان ده حقير مجرد ضرس فى بقه يخليه قاعد طول الليل مش عارف ينام و ممكن يخبط دماغه فى الحيطة من الالآم الرهيبة اللى بيحس بيها.......

سبحان الله فى ثانية واحدة تلاقى المُتكبر المُتجبر مش قادر يتكلم من الآلام الشديدة.
فى ثانية واحدة تلاقى العاصى المُنغمس فى الشهوات مش قادر يعمل حاجة واحدة من اللى كان بيعملها من الالآمه الشديدة.

و الله أكثر ما يُخفف الالآم العمل الصالح(طيب ازاى)

هأقولكم:أنا مرة كنت شغالة على مريضة و الحالة ديه حالة مُركبة بين علاج العصب و أمراض اللثة و كنت بأشيل عصب حى و ده أما بيتشال العيان بيطنطط على الكرسى من كتر الألم ، المهم أنا كنت بأشتغل فى سنتين مع بعض و كنت بأخلصهم فى نفس اليوم عشان أجهز الحالة للعملية فى اللثة ، الست و أنا بأشيلها العصب مأقلتش حتى"أى" أنا اتعجبت و قلتلها :انت حاسة بالألم.
قالتلى:أنا مش حاسة بأى حاجة يا دكتورة.
قلتلها:ازاى انتى العصب بتاعك حى و أنا عمالة أشيل فيه و انتى مش حاسة بأى حاجة.
قالتلى:دكتورة أنا عمالة أسبح الله و انتى بتشتغلى فأنا مش حاسة بأى حاجة.

شفتوا بأه أد ايه العمل الصالح بينفع و أد ايه احنا مفروض نعمل للحظات ديه.

أنا مأخرجتش من تأملاتى فى كلمة "آه" غير أد ايه الانسان حقير و ربنا قادر عليه فى أى لحظة مهما بلغ من الفتوة و القوة و خرجت ان اللى هينفعنى فى لحظة ألمى هو العمل الصالح فلنحرص اخوانى و أخواتى على العمل الصالح.

[muslimah_dentist]

معلش ماكنش فى حكاية النهاردة ، كنت مشغولة كتير ، نكمل حكايات من بكرة ان شاء الله