ما هو قانون التعامل مع الناس في مصر .. مش عارف أعيش في مصر

[youssefmustang]

بص يا باشا
الشعب المصرى ما يجيش بالذوق
لازم تتكاتف انت وأهل المنطقه لتعليم الواد ده الأدب
وسيبك من البوليس
الواد ده لازم يفهم أن الحته اللى فاتح فيها المحل فيها رجاله مش عيال سيس و كلهم عليه وكل واحد فى الحته ممكن يأذيه بشكل ما ( تجريح بودى-زلطه فى الزجاج- ترييح للعجل -خبطه ) وخلى بالك دى عربيات زيرو وانت فاهم الباقى
ده غير انك ممكن تعمل ليه سمعه زى الزفت

هو ده الصح يتعمل عليه حوارات يعنى ممكن تخلى اى عيل يجبله الاربع جنوط على الارض من بعيد ومن غير ما يشوفك تجبله الازاز الامامى بزلطة ده حل ..حل تانى النوعية دى من البشر بينفع معاه العافية 100% ازاى تلم كام واحد من صحابك ويترزع علقة محترمة هو و اللى جابوه واللى يدخل يطحن كمان لان الشرطة دلوقتى بقت *** لان بخمسين جنيه هيحل الموضوع فى الشرطة ومش هتاخد حقك مع الحكومة فده يتربى ويعرف ان الله حق ويعرف ان المنطقة اللى فيها فيها رجالة لان ممكن هو يكون بيعمل كدا عشان يعمل شخصية فى المنطقة عندكو والناس تقول ده فلان محدش يعرف يكلموه
من الاخر الواد ده تقلعوه ملط فى الشارع عشان يمشى من المنطقة اساسا (ده رأى فى المشكلة)
اخوكم يوسف

[bassem.naguib]

والله انا متعاطف معاك جدااا وحاسس باللى جواك واضافه للى قالوه الاخوه من حلول خلى اى عيل صغير يفكلك نمر العربيات اللىتبع الواد ده وارميهم فى اى صندوق قمامه بعيد عن المنطقه او ارميهم فى النيل وابقى خليه بقى يعرف يأجرهم من غير نمر ..علشان الاشكال دى مش هاتيجى الا بالعين الحمراء

يااااه .. ايه الأفكار الشريرة دي .. من عندك دي يا بطل .. ولا أخدت الفكرة الجهنمية دي منين

[R A N A]

السلام عليكم يا جماعة

حبيت بس أعلق على الموضوع بشكل مُغاير نوعاً ما ، أنا عارفة طبعاً انها مشكلة و تضايق أى حد لو اتعرض ليها و ممكن تخرجه عن شعوره و يحس بالخنقة و خلافه.

بس بذمتكم مش ملاحظين حاجة ان كل الاقتراحات اللى انتوا اقترحتوها على أخونا الكريم هى اللى مضايقانا من البلد و نقول بلد مفيهاش عدل و أرفانين منها :

يعنى مثلاً اقترح بعضكم ان احنا نعرف حد معرفة فى القسم و يظبطه ( طيب المعرفة اللى فى القسم ده هيظبطه ازاى الا بقلمين على وشه أو يسحله أو ينفخه و فى الآخر نعرض الصور ديه فى التليفزيون و نقول فيه تعذيب فى مصر)
أنا ممكن يبقى رأيى مثالى شوية و مينفعش فى الزمان ده بس أنا مقتنعة اقتناع تام ان عمر المشكلة ما تتحل بمشكلة و اذا اتحلت بالطريقة ديه يا ترى هتبقى مبسوط و سعيد(على فكرة أنا مش ضدك بالعكس أنا حاسة بخنقتك بس مش عايزاك تنزل بمستواك للانسان اللى قدامك ده لأنك ساعتها ممكن تفقد احترامك لنفسك)

و اقترح البعض الآخر بعض أساليب الأذى زى تفضية الكاوتش و الأمثلة الكثيرة طيب يا جماعة ده أذى و ميرضيش ربنا ( هتقولولى يعنى هو اللى بيعمله يرضى ربنا هأقولكم حتى لو اللى قدامنا بيعمل الغلط ده ميدنيش الحق انى أعمله)

طيب ليه محدش اقترح ان أخونا يتجه الى قسم الشرطة اللى تابع ليه و يقدم بلاغ بالتضرر و ممكن ساعتها يستخدم ظابط معرفة بس هيكون ماشى رسمى و ممكن الأمر يتصلح و ده الرأى اللى أنا بأنصحك بيه.

أنا رأيى انك لو نزلت بمستواك للانسان ده مش هتضايق الا نفسك ، متخليش الناس الأدنى منك سلوكاً يخلوك تنزل بمستواك و آسفة لو كنت زعلت برأيى حد فيكم بس حبيت تفكروا بطريقة مختلفة شوية.

معلش ليا تعقيب بسيط على كلام حضرتك
انا فعلا اقترحت عليه يشوف ضابط معرفة ليه ويظبطه اما يظبطه دي معناها ايه طبعا مقصدتش انه يضربه ولا يعتدي عليه بالصور المهينة اللي الواحد بيشوفها وبيسمع عنها دي لكن اقصد يخوفه اويهدده بحاجة يعني انا قلت ان الولد ده اكيد مش كل ورقه سليم يعني اكيد عنده اكتر من مشكلة مع التراخيص مثلا أو الحي وعشان كده لو لاقي ضابط جاي يخوفه يمكن يلم نفسه عشان ميفتحش علي نفسه ابواب اكبر من كده .
ده كان توضيح بسيط بس عشان انا ضد الاساليب المهينة للأدمية يتربي بس بالقانون يتربي ميري يعني زي مابيقولوا
لاني شايفة يعني ان مش من حق حد يمد ايده على حد ويهين ادميته حتى لو غلط برده يعني يعاقبه بعقاب مناسب لخطأه لكن لايسحله ولا حاجة

[bassem.naguib]

بص المحل ده فيه احتمال كبيريكون من غير ترخيص..و لو بترخيص هتلاقيه بسهولة مخالف فى اى حاجة...لأن ع حسب علمى المفروض انهم زى معارض السيارات يكون ليه مساحة يحط فيها عربياته...و عموماً كده كده تقريباً لايوجود محل خالى من المخالفات ...اشغالات...مبوظين الرصيف ....يفط...اى مصيبة...فأعتقد لو انت و بعض السكان واظبتم شوية ع شكاوى جماعية ف الحى ...و المحافظة ...و من غير ماتكون عارف حد حتى...هايقرفوه...هو اكيد بيدفع لكله....بص برده هايقرفوه...و هيدفعوه زيادة...و العيار اللى ما يصبش..

انا سألت في الموضوع ده امبارح .. وناس قالت ليا كلم شرطة المرافق واعمل محضر بالواقعة .. المهم اخويا كلم شرطة المرافق .. وقاللوا لازم تروح الحي الأول .. وبعد كده الحي هو اللي بيبلغنا وبنعمل اللازم ..

فربنا يسهل إن شاء الله اروح أعمال الشكوى دي في الحي الأول .. أنا ومعايا كام واحد من الجيران علشان تبقى شكوى جماعية .. أو كل واحد يروح في يوم ويعمله شكوى منفرده .. علشان يبان ان الموضوع كبير .. ومشكور يا باشا على المداخله

[AHMEDCAR]

احب اعرف حاجه واحده بس هو انت لوحدك اللى متضرر من الراجل ده ولا المنطقه كلها علشان تفرق جامد اوى

انا شايف انك انت اللى متصدرله و فى كل حكاياتك مقولتش ان فى حد تانى من جيرانك اتصدرله او عمل معاه مشكله لكن بيعمل معاك انت بس

[bassem.naguib]

احب اعرف حاجه واحده بس هو انت لوحدك اللى متضرر من الراجل ده ولا المنطقه كلها علشان تفرق جامد اوى

انا شايف انك انت اللى متصدرله و فى كل حكاياتك مقولتش ان فى حد تانى من جيرانك اتصدرله او عمل معاه مشكله لكن بيعمل معاك انت بس

لأه طبعاً مش أنا بس اللي متضرر .. ودي مش أول مرة تحصل مشكلة (بس مكنوش بالمنظر ده) .. وفيه ناس كتير على استعداد لأذاه .. وفعلاً بنتفق دلوقتي على موضوع الحي ده كخطوة أولى .. وحنشوف حيحصل ايه .

[AHMEDCAR]

تمام كده و الف شكر على ردك السريع

[Goodle]

قلبنا معاك يا أخ باسم
يا ريت توافينا بالأخبار.. ونطمئن عليك

[bassem.naguib]

قلبنا معاك يا أخ باسم
يا ريت توافينا بالأخبار.. ونطمئن عليك

ربنا يخليك ليا يا باشا .. وعلى سؤالك واهتمامك الجميل

[mada121977]

يااااه .. ايه الأفكار الشريرة دي .. من عندك دي يا بطل .. ولا أخدت الفكرة الجهنمية دي منين

لا اطمئن ... من عندى ..وياما فى الجراب ياحاوى

[د./اليشع ثابت]

اخى الفاضل
انت كدة منفعل جداااا و حكمت على الشعب المصرى كلة
انة سىء و قليل ادب و خلافة
مع انها ليست الحقيقة ابدااااااا
وعلى كل حال و بعيدااااااااا عن العنف و اكل الكلاب
وتنييييم العجل

ممكن سيادتك تعمل له محضر اشغال طريق عام و انت بتعمل المحضر تطلب من الذى قام بتحريرة رقم المحضر
هذا (اولا هو سوف يقلق لطلبك رقم المحضر هذا ولابد ان يهتم) لانه هيفهم انك فاهم حقوقك و ايضا سوف تتابع سير الامور
ثم اذهب برقم المحضر هذا الى النيابة العامة
و تضيف ان هذا الشخص بلطجى و يعمل على ارهاب المقيمين وشوف النتيجة

[bassem.naguib]

الأخوة الأفاضل اللي شاركوني بالرأي أو الذين اكتفوا بالمشاهدة ..

انا طولت في الرد كتير .. ولكن كنت في الفترة دي برتب للموضوع ده .. وأول حاجة عملتها أني رحت الحي وقلت ليهم على المشكلة دي .. فوجئت برد المسئولين هناك وهما بيسألوني .. العربية اللي بيسبها في نص الشارع دي مترخصة .. قلت ليهم اكيد .. قالي يبقى ملناش دعوة بيه خالص .. بس احنا لينا دعوة بالمحل الموجود فيه إذا كان مترخص ولا لاه .. وقالي هو فين بالضبط .. شرحت ليه مكانه .. طلعوا عارفينه .. وواحد منهم قال ايوة المحل ده مش مترخص وهو بالضبط في الحته الفلانية (وصف مكان المحل بدقة أكتر مني!!) معنى كده انهم عارفينه كويس .. وقالولي خلاص روح اكتب شكوى فيه وسلمها لسكرتارية مكتب رئيس الحي .. وقالولي بس المشكلة انه بيفتح متأخر بعد مواعيد الشغل الرسمية بتاعتهم .. فحينزلوا يلاقوه قافل (يعني هما عارفين انه مش مرخص .. وكمان عارفين أنه بيفتح متأخر .. تفتكروا ليه بقى ... ها ها ها) .

المهم عملت الشكوى وسلمتها .. وانا معنديش أي أمل في الموضوع ده خالص .. وفي نفس الوقت بفكر في حل تاني .. وانا ماشي من الحي قابلت واحد صاحبي بالصدفة .. لاقيته بيسألني بتعمل ايه هنا .. قلت ليه علشان كذا وكذا .. وقلت ليه وانت .. قالي انا شغال هنا .. وهنا لاقيت دماغي بتنور وبسأل نفسي ازاي انا مفتكرتوش في المشكلة دي .

المهم قالي سيبك من الشكوى دي .. انا حظبطهولك بشكل تاني .. وبحاجة اجمد بكتير .. وملكش دعوة بالموضوع ده .. وقالي كلمني بعد يومين

ومفتوش اليومين ولاقيته بيتصل بيا وبيقول ليا .. الواد اتعمله محضر مخالفة اشتراطات بيئة ودي غرامتها حوالي 800 جنية ده غير قضية واغلاق للمحل .. واهو قدامي اهو وشوية شوية حيعيط .. وقلت ليه علشان تحرم تقل ادبك على الناس اللي في الحته .. والواد استغرب قوي من الكلمة دي وتعرف ازاي تتعامل بأدب وتقعد في المنطقة من غير بلطجة .. ودي على فكرة قرصة ودن صغيرة منهم وهما ممكن يعملوا معاك اكتر من كده كمان ودي البداية .

المهم صاحبي قالي .. انا مستحرم المحل يتقفل علشان اكل العيش وعمال يعيط ليا ويقول ليا ده انا لسه ربنا رزقني بمولود .. والحكاية والرواية .. وسألني يعمل معاه ايه .. قلت ليه انت شايف ايه .. قالي انا ححفظ المحضر عندي وقت اللزوم .. ولو عمل حاجة تاني ضايقتك أو ضايقت أي حد ابقى كلمني وساعتها حشتغل ليه في الأزرق .. قلت ليه ماشي .. وشكراً جزيلاً

ومن ساعتها الواد لا حس ولا خبر ليه في المنطقة ماشي زي الكلب الجربان لا حد بيسلم عليه من ساعة الخناقة .. ولا عارف يرفع عنية في وش حد .. والنفخة الكدابة اللي كان رسمها اتحولت لواحد ماشي ومضروب على قفاه

بس ليه فيه ناس بالنوعية دي .. لما تكلمها بالأدب تتفرعن ولما تديها فوق دماغها تمشي زي الألف حاجة غريبة والله !!!

وفي النهاية بحب اشكر كل اللي شارك في الموضوع بالرأي .. وكانت أراء مفيدة فعلاً

[Terrible_DaRsH]

هههههههههههه
طب لما يحصل لى مشكلة هبقي اجى اشتكى عندكم فى الحى بتاعكم ..
الا صحيح هو حى ايه علشان نروح كل يوم نشتى خلق الله كلهم ..

[mohmd76]

قول الحق حسبنا الله ونعم الوكيل

[goodwave]

والله الأخوة إللي ماشيين ينتقدوا في البلد ياريت تتطلعوا برة البلد وتسافروا مكان تاني او بلد تاني اقل منا زي كتير من جيرانا في أفريقيا..... وساعتها حتعرفوا الفرق وإن مصر نعمة بكل ما فيها من عيوب

"مصري مقيم بالخارج"